Noosobora Kurwanisa Enyehurra Embi

1-2. Obwire obumu Paulo yayehurraga ata, kandi habwaki ekyokurorraho kye nikitukoonyera? (Abarooma 7:​21-24)

KIKI ekikwija omu biteekerezo obu oteekerezaaho omukwenda Paulo? Omuteekerezaaho nk’omumiisani omumanzi, omwegesa omukugu, rundi nk’omuhandiiki w’ebitabu bingi ebya Baibuli? Amananu gali nooba ohikire kumuteekerezaaho oti. Baitu, Paulo akaba aine n’enyehurra ez’amaani. Kusisanaho na baingi omuli itwe, obwire obumu na uwe yarwanisaaga enyehurra embi.

² Soma Abarooma 7:​21-24. Omu bbaruha ei yahandiikire Abarooma, Paulo akabazaaho enyehurra baingi omuli itwe ezi tuba nazo. Noobu kiraaba ngu akaba ali Mukristaayo omwesigwa, haroho ekintu eki akaba naarwanisa—kandi eki nikyo ngu, obu yabaga naagonza kukora ekihikire, yayesangaga naagonza kukora ekitahikire. Oihireho eki, haroho obwire obumu Paulo obu yarwanisaaga enyehurra embi habw’ebintu ebi yakozere kara hamu n’ekizibu ekikaba kimwikaireho.

3. Biki ebi turukwija kubazaaho omu kicweka kinu? (Rora na “Kusoborra Amakuru g’Ebigambo.”)

³ Noobu kiraaba ngu Paulo akaba aine ekizibu eki akaba naarwanisa, ataikirize enyehurra ze embia kukwataho enteekereza ye. Omu kicweka kinu nitwija kubazaaho ebikaguzo binu: Kiki ekyaleteraga Paulo kwehurra aine obujune obwire obumu? Yarwanisaaga ata enyehurra embi? Kandi na itwe nitusobora tuta kurwanisa enyehurra embi?

EKINTU EKYALEETERAGA PAULO KUTUNGA ENYEHURRA EMBI

4. Kiki ekyaleeteraga Paulo kuba n’enyehurra embi?

⁴ Ebintu ebi akaba akozere kara. Paulo obu akaba atakafookere Mukristaayo kandi noobu akaba naakyamanywa nka Saulo, akakora ebintu ebi yahikire yayeyijukya. Ekyokurorraho, akabaho Sitefano obu akaba naitwa kandi akaba naakirora nk’ekintu ekihikire. (Ebikorwa by’Abakwenda 7:58; 8:1) Ekindi, akeebembera omu kuhiiganiza Abakristaayo kandi yabatwazaaga kubi muno.—Ebikorwa by’Abakwenda 8:3; 26:​9-11.

5. Paulo akakwatwaho ata habw’ebintu ebi akaba akozere kara?

⁵ Hanyuma ya Paulo kufooka Omukristaayo, obwire obumu yatuntuzibwaga ebintu ebi akaba akozere kara. Ebintu ebi nibisobora kuba byayeyongiire kumutuntuza emyaka obu yagenzere neerabaho. Ekyokurorraho, obu yahandiikire ebbaruha ye ey’okubanza hali Abakolinso nk’omu mwaka 55 Y.A.K., akagamba ati: “Tikinsemeriire kwetwa omukwenda, habwokuba nkahiiganiza ekitebe kya Ruhanga.” (1 Kol. 15:9) Hanyuma y’okurabaho emyaka nk’etaano, obu akaba naahandiikira Abefeeso ebbaruha akeebazaaho “[nk’ow’arukukirayo] kuba owa hansi omu barukwera boona.” (Bef. 3:8) Kandi obu akaba naahandiikira Timoseo akeebazaaho naagamba ngu: “Najumaga Ruhanga, nimpiiganiza abandi, kandi ntarukubatamu ekitiinisa.” (1 Tim. 1:13) Teekerezaaho omulingo Paulo yayehurraga obu yabungiraga ekitebe kandi akatangatangana abantu ab’akaba ahiiganiize rundi abanyabuzaale baabo?

6. Kintu ekindi ekyaleeteraga Paulo obusaasi bwingi? (Rora n’obugambo obwa hansi.)

⁶ Ihwa omu mubiri. Paulo akalengesaniza ekintu ekyali nikimuleetera kwetuntura muno ‘n’ihwa omu mubiri.’ (2 Kol. 12:7) Omukwenda Paulo tabazaaho ekintu ekyamuleeteraga okwetuntura. Baitu ebigambo ebi yakozeseze nibyoleka ngu nibusobora kuba bukaba burwaire rundi ekintu ekindi ekyamutuntuzaaga.b

7. Paulo akakwatwaho ata habw’obutahikirra bwe? (Abarooma 7:​18, 19)

⁷ Obutahikirra bwe. Paulo yarwanisaaga obutahikirra bwe. (Soma Abarooma 7:​18, 19.) Noobu kiraaba ngu yabaga naagonza kukora ekihikire, obutahikirra bwe bwamuleeteraga kugonza kukora ekitahikire. Akagamba ngu yaikaraga naarwanisa okwegomba okw’omubiri okwamuleeteraga kugonza kukora ekibi omu kiikaro ky’okukora ekihikire. Baitu nabwo, Paulo akeekamba muno kurora yarwanisa okwegomba oku. (1 Kol. 9:27) Hataroho kugurukyagurukya yahwamuga amaani emize ye embi obu yagarukaga!

OMULINGO PAULO YARWANISIZEEMU ENYEHURRA EMBI

8. Ebbaruha Paulo ezi yahandiikire nizitwegesa ki obukirukuhika ha mulingo yarwanisize obutahikirra bwe?

⁸ Nkooku kirukwolekwa omu bbaruha ze, Paulo yateekerezahoga omulingo omwoyo ogurukwera gusobora kumukoonyera hamu n’Abakristaayo bagenzi be kurwanisa okwegomba okubi n’okuhinduramu enyetwaza yabo. (Bar. 8:13; Bag. 5:​16, 17) Paulo akooleka kurungi enyetwaza n’ebikorwa Abakristaayo ebi basemeriire kwetantara kusobora kusemeza Yahwe. (Bag. 5:​19-21, 26) Hataroho kugurukyagurukya, Paulo akeecumiitirizaaho obuceke bwe, yaserra obuhabuzi kuruga omu Byahandiikirwe, kandi yamanya omulingo asobora kuta obuhabuzi obu omu nkora. Nitusobora kukigumya ngu yateekaga omu nkora obuhabuzi obu yahaga abandi.

9-10. Kiki ekyakoonyiire Paulo kurwanisa enyehurra embi? (Abefeeso 1:7) (Rora n’ekisisani.)

⁹ Noobu kiraaba ngu obwire obumu Paulo yahurraga ahoirwemu amaani, akasobora kwikara aine enteekereza enungi. Ekyokurorraho, yasemererwaga obu yahurraga ebintu ebirungi kuruga omu bitebe ebikaba biri hara. (2 Kol. 7:​6, 7) Yatungaga okusemererwa kuruga omu kuba n’enkoragana enungi n’Abakristaayo bagenzi be. (2 Tim. 1:4) Kandi akaba akimanyire ngu akaba naasiimwa Yahwe. Mali, Paulo akaba aine okusemererwa habwokuba akaba naaheereza Ruhanga aine “omuntu ow’omunda omurungi.” (2 Tim. 1:3) Paulo noobu akaba atairwe omu nkomo omu Rooma, akateererra Abakristaayo bagenzi be ‘kusemererwaga omu Mukama.’ (Baf. 4:4) Obu turukuba nitusoma ebigambo bya Paulo, niturora ngu obwire bwona tiyaikaraga ataire omutima ha bizibu bye rundi ha nsobi ze. Buli murundi Paulo yatandikaga kuteekerezaaho ebintu ebirukumaramu amaani, ahonaaho yateekerezaahoga ebintu ebyamuleeteraga okusemererwa.

¹⁰ Ekindi, Paulo akasobora kurwanisa enteekereza embi habwokuba akaba naikiriza ngu ekicunguro kikaba kisembo ekikaba kihairweyo habwe nk’omuntu. (Bag. 2:20; soma Abefeeso 1:7.) Eki kikamuleetera kukigumiza kimu ngu Yahwe akaba naasobora kumuganyira kuraba omu Yesu Kristo. (Bar. 7:​24, 25) Noobu kiraaba ngu Paulo akaba aine ebintu ebibi ebi akaba akozere kara kandi akaba aine obuceke obu akaba naarwanisa, akasobora kuheereza Yahwe n’okusemererwa.—Baheb. 9:​12-14.

11. Habwaki ekyokurorraho kya Paulo nikitugarramu amaani?

¹¹ Kusisanaho na Paulo, na itwe nitusobora kuba twine enyehurra ezi turukurwanisa. Nizisobora kuba nizikwata ha bintu ebi tuteekerezaaho, ebi tukora, rundi ebi tubaza. Kandi obwire obumu nitusobora kwehurra tuhoirwemu amaani kandi tukahika nookuteekereza ngu titusobora kuheereza Yahwe omu bwijwire. Munyaanya itwe ow’arukwetwa Eliza ow’ali omu myaka 20c kandi ow’aine enyehurra ezi arukurwanisa naagamba ati: “Kingarramu amaani obu nteekerezaaho enyikara ya Paulo, nikihuumuza kukimanya ngu tali niinyowe nyenka arukwehurra omu mulingo gunu. Kinkoonyera kukiijuka ngu Yahwe naamanya abantu be ebi barukurabamu.” Kusisanaho na Paulo, kiki eki tusobora kukora kuba n’omuntu ow’omunda omurungi kandi tukaheereza Yahwe n’okusemererwa, noobu turaaba twine enyehurra embi?

NITUSOBORA KURWANISA ENYEHURRA EMBI

12. Kuba n’enteekaniza enungi ey’eby’omwoyo kitukoonyera kita kurwanisa enyehurra embi?

¹² Ikara oine enteekaniza enungi ey’eby’omwoyo. Obu tuba n’enteekaniza enungi ey’eby’omwoyo, kitwanguhira kuba n’enteekereza enungi. Teekerezaaho kinu, twehurra kurungi obu tulya ebyokulya ebirumu ekiriisa, tukakora ebisasaizi butoosa, noobu tubyama ekirukumara. Omu mulingo nugwo gumu, itwena tweroliire nkooku tuhurra kurungi obu tusoma Ekigambo kya Ruhanga butoosa, obu tugenda omu nsorrokano tuziteekaniize kandi tukazeejumbiramu, noobu tugenda omu buheereza. Ebintu nk’ebi ebirukugarramu amaani bitukoonyera kurwanisa enteekereza embi.—Bar. 12:​11, 12.

13-14. Abakristaayo abamu bagasiirwe bata kuraba omu kuba n’enteekaniza enungi ey’eby’omwoyo?

¹³ Teekerezaaho ekyokurorraho kya John ou baakebiiremu oburwaire bw’ekookoro obu akaba aine emyaka 39. Ha kubanza akatunga enyehurra embi. Akeekaguza ati: ‘Ninsobora nta kurwara ha myaka ey’obuto enu?’ Omu kasumi ako mutabani we akaba aine emyaka esatu yonka. Kiki ekyakoonyiire John kurwanisa enyehurra embi? Naagamba ati: “Noobu kiraaba ngu nabaga njwahire, nakoraga kyona ekirukusoboka kurora ngu eka yaitu yaikara ine enteekaniza enungi ey’eby’omwoyo. Twagendaga omu nsorrokano zoona, twejumbira omu buheereza buli wiiki, kandi tuba n’okuramya kw’eka butoosa noobu kiraaba ngu obwire obumu kyabaga kigumire.” John obu aijuka ebi yarabiremu agamba ati: “Obu tutunga ekizibu, ha kubanza twehurra twetuntwire kandi twine enaku. Baitu nyegere ngu omu kaire kake, turora omulingo Yahwe atuhamu amaani aga turukwetaaga n’omulingo atugonzaamu.”

¹⁴ Eliza, ou tusangirwe tubalizeeho naagamba ati: “Buli murundi ngenda omu nsorrokano rundi nkesomesa, kinkoonyera kwijuka ngu mali Yahwe nangonza kandi nanfaaho. Eki kindeetera okusemererwa.” Nolan, ow’arukuheereza nk’omuroleerezi w’ekicweka omu Afrika, abazaaho ebintu ebimukoonyiire na mukazi we, Diane, naagamba ati: “Twikara twine enteekaniza enungi ey’eby’omwoyo noobu tuba tuhoirwemu amaani. Yahwe akyolekiire kimu ngu aliyo naatukoonyera kuba n’enteekereza enungi. Tulengaho kukiijuka ngu Yahwe naija kutukoonyera kandi atuhe emigisa. Noobu turaaba tutamanyire omu mulingo ki, tukigumya ngu naija kukikora”

15. Kintu ki ekindi eki tusobora kukora kusobora kurwanisa ebiteekerezo ebibi? Bazaaho ekyokurorraho.

¹⁵ Kakuba tugumizaamu nitwehurra tuhoirwemu amaani, haroho ebintu ebindi ebi tusobora kukora. Ekyokurorraho, teeramu akasisani noosaasa omugongo. Nikisobora kukukoonyera kakuba orubatarubata buli kiro. Baitu kusobora kumaraho obusaasi obu, nikisobora kukwetaagisa kukora ekirukukiraho. Nikisobora kukwetaagisa kukora okuseruliiriza kandi obaze na dakitaali kumanya endugirro y’obusaasi. Omu mulingo nugwo gumu nitwetaaga kukora okuseruliiriza omu Baibuli n’omu bitabu byaitu kandi tubaze n’Omukristaayo ow’akuzire omu by’omwoyo nukwo kitukoonyere kwega kurwanisa enteekereza embi eziikara nitwizira. Weetegereze ebintu ebindi ebisobora kutukoonyera.

16. Kiki ekisobora kukukoonyera kumanyirra ebintu ebukuleetera kuba n’ebiteekerezo ebibi? (Zabbuli 139:​1-4, 23, 24)

¹⁶ Saba Yahwe akukoonyere kumanya kiki kyonyini eki orukwetaaga. Omukama Daudi akaba naakigumya ngu Yahwe akaba amumanyire kurungi. Nahabweki akasaba Yahwe kumukoonyera kumanya ekirukumuleetera ‘okwetuntura.’ (Soma Zabbuli 139:​1-4, 23, 24.) Na iwe noosobora kusaba Yahwe akukoonyera kumanya ekirukukuleetera ebiteekerezo ebibi kandi akukoonyere n’okumanya omulingo osobora kubirwanisa. Noosobora n’okwekaguza ebikaguzo binu: ‘Kiki ekisobora kuba nikindeetera ebiteekerezo ebibi? Haroho ekintu kyona ekindeetera kutandika kuba n’enteekereza embi? Obu ntunga ebiteekerezo ebibi, ndengaho kuteekerezaaho ebintu ebindi ebindeetera okusemererwa? Rundi nyikara ntaire omutima ha bintu ebibi?

17. Masomo ki ag’osobora kwesomesaaho gakakukoonyera kuta omutima ha bintu ebirukugarramu amaani? (Rora n’ekisisani.)

¹⁷ Weesomeseeho ebintu ebirukukwata ha nyikara ei orumu. Obwire obumu noosobora kugasirwa kuraba omu kwesomesaaho emiringo ya Yahwe. Ekyokurorraho, omukwenda Paulo akagasirwa muno habw’okwecumiitirizaaho ekicunguro hamu n’okuganyira kwa Yahwe. Na iwe noosobora kukora ekintu nikyo kimu. Kozesa Ekitabu Ekikonyera Abakaiso ba Yahwe Kuseruliiriza, Watch Tower Publications Index, rundi ebikwato ebindi eby’okwesomesa ebirukusigikirra ha Baibuli. Kora okuseruliiriza ha masomo nka, embabazi za Ruhanga, okuganyira hamu n’okugonza okutalekera. Kandi obu oraamara kuzoora ebicweka ebisobora kukugasira, bihandiike. Bite nambere osobora kubirora, kandi obyesomeseeho obu oratandika kuhurra n’ohwamu amaani. Lengaho kuta omu nkora ebi orukusoma omu nyikara yaawe.—Baf. 4:8.

18. Bintu ki ebimu eby’okwesomesaaho ebikoonyiire Abakristaayo abamu?

¹⁸ Eliza, ou tusangirwe tubalezeeho akeesomesaaho ekyokurorraho kya Yobbu kuruga omu Baibuli. Naagamba ati: “Nanyowe nkahikwaho ebizibu ebihonderaine nka Yobbu. Baitu noobu kiraaba ngu akaba ali omu nyikara enu ey’egumangaine ataleke kwesiga Yahwe noobu kiraaba ngu akaba atamanyire ensonga habwaki akaba naahikwaho ebizibu.” (Yob. 42:​1-6) Diane, ou tusangirwe tubalizeeho naagamba ati: “Nyowe na ibanyowe tuliyo nitwesomesa nitukozesa ekitabu Draw Close to Jehovah. Nitusiima muno Yahwe habwokuba naatubumba nkooku omubumbi abumba ebinaga. Omu kiikaro ky’okuta omutima ha mulingo tuhoirwemu amaani, tulengaho kuteeramu akasisani Yahwe naatubumba kandi naatufoora abantu abarungi. Kinu kituleetera kweyongera kumwirra haihi.”—Is. 64:8.

KIGUMYE NGU YAHWE NAIJA KUKUKOONYERA KANDI AKUHE EMPEERA

19. Obwire obumu nitwija kwehurraga tuta, baitu kiki eki turukugumya?

¹⁹ Noobu turaaba twine enteekaniza enungi ey’eby’omwoyo, hamu n’enteekaniza ey’okwesomesa kusigikirra ha nyikara yaitu, titusemeriire kunihira ngu enyehurra embi hamu n’ebiteekerezo ebibi nibiija kuhweraho kimu. Obwire obumu nitusobora kwehurra tuhoirwemu amaani. Baitu habw’obukoonyezi bwa Yahwe nitusobora kuleka kuteekerezaaho ebintu ebibi kandi tukahurra tuteekaine. Nitukigumya ngu ebiro ebirukukira obwingi nitwija kwegondeza omu kuba n’omuntu ow’omunda omurungi kandi twegondeze omu bwomeezi bwaitu hamu n’obuheereza bwaitu hali Yahwe.

20. Kiki eki ocweriiremu kimu kukora?

²⁰ Nahabweki leka tucweremu kimu kutaikiriza ebintu ebi twakozere kara, ebizibu ebi turukurabamu, rundi obutahikirra bwaitu kutulemesa kutunga okusemererwa omu bwomeezi. Yahwe naija kutukonyera kwikara niturwanisa enteekereza embi. (Zab. 143:10) Tulindiriire n’ekihika akasumi nambere kiriba kitakyatwetaagisa kurwanisa ebiteekerezo ebibi obu buli kiro nitwimuka tutaine ebiteekerezo byona ebirukutuntuza kandi nituheereza Yahwe, Ruhanga waitu ow’okugonza twine okusemererwa!