Konyera Abeegi Baawe Ba Baibuli Kucwamu Kuheereza Yahwe

1-2. (a) Habwaki abeegi ba Baibuli abamu batiina kukora encwamu ey’okufooka bamu h’Abakaiso ba Yahwe? (b) Biki ebi turukwija kubazaaho omu kicweka kinu?

HAROHO ebintu ebikaba nibikweraliikiriza ebyakuleetiire kutiina kufooka omu h’Abakaiso ba Yahwe? Obundi okaba otiinire ngu abakozi bataahi baawe, banywani baawe, rundi abanyabuzaale baawe bakaba nibaija kukubiihirirwa. Rundi okaba nooyehurra ngu tosobora kuhondera endengo za Ruhanga. Obu oraaba wayehuliire oti, nosobora kwetegereza habwaki abeegi abamu batiina kukora encwamu ey’okufooka bamu h’Abakaiso ba Yahwe.

² Yesu akakyetegereza ngu okutiina nk’oku nikusobora kulemesa omuntu kufooka omuheereza wa Yahwe. (Mat. 13:​20-22) Baitu ataleke kulengaho kukonyera abo abakaba nibatiina kumuhondera. Oihireho, kuraba omu bintu yakozere, akateeraho abeegeswa be ekyokurorraho kumanya omulingo basobora kukonyera abantu nk’abo (1) kumanyirra ebintu ebisobora kubalemesa kukurakurana, (2) kweyongera kugonza Yahwe, (3) kuhinduramu ebintu ebi barukwebembeza omu bwomeezi bwabo, (4) n’okumanya eki basemeriire kukora abandi obu babahakaniza. Nitusobora tuta kuta omu nkora ebintu Yesu yagambiire abeegeswa be obu nitukozesa ekitabu Wegondeze omu Bwomeezi Ebiro n’Ebiro! kukonyera omwegi wa Baibuli kukora encwamu ey’okufooka omu h’Abakaiso ba Yahwe?

KONYERA OMWEGI KUMANYIRRA EBINTU EBISOBORA KUMULEMESA KUKURAKURANA

3. Kiki ekisobora kuba kyalemeseze Nikodemu kufooka omu h’abahondezi ba Yesu?

³ Nikodemu, ow’akaba ali omulemi omukuru ow’Abayudaaya, akaba aine ekizibu ekikaba nikimulemesa kufooka omu h’abahondezi ba Yesu. Nikodemu akakyetegereza ngu Yesu akaba asindikirwe Ruhanga hanyuma y’okurabaho emyezi mukaaga yonka Yesu atandikire obuheereza bwe. (Yoh. 3:​1, 2) Baitu Nikodemu akacwamu kutangaana Yesu omu nsita “habw’okutiina Abayudaaya.” (Yoh. 7:13; 12:42) Naasobora kuba yateekeriize ngu akaba naija kufeerwa ebintu bingi kakuba afooka omu h’abahondezi ba Yesu.a

4. Yesu akakonyera ata Nikodemu kwetegereza ekintu Ruhanga akaba naamunihirramu kukora?

⁴ Nikodemu akaba amanyire ebiragiro, baitu akaba naayetaaga obukonyezi kusobora kwetegereza ekintu Yahwe akaba naamunihirramu kukora. Yesu akamukonyera ata? Akaba ayeteekaniize kukozesa obwire bwe kubaza na uwe n’omu bwire bw’ekiro. Yesu akamwoleka kurungi ekintu eki akaba asemeriire kukora kusobora kufooka omwegeswa we, kandi eki nikyo ngu akaba asemeriire kwegarukamu ebibi bye, abatizibwe omu maizi, kandi aikiririze omu Mwana wa Ruhanga.—Yoh. 3:​5, 14-21.

5. Nitusobora tuta kukonyera omwegi kumanyirra ebintu ebisobora kuba nibimulemesa kukurakurana?

⁵ Omwegi wa Baibuli naasobora kuba naamanya kurungi Ebyahandiikirwe, baitu nabwo, naaba naayetaaga obukonyezi kumanyirra ekintu ekirukumulemesa kukurakurana. Omulimo, rundi okuhakanizibwa kuruga omuka, nibisobora kumulemesa kweteeraho ebigendererwa eby’omwoyo. Kusisanaho na Yesu, tunga obwire obw’okukonyera omwegi waawe. Nosobora kumuraaliza kulya hamu ekiihuro, rundi kurubatamu hamu. Obu mukora hamu ebintu nk’ebi, naasobora kukugambira ebintu ebirukumutalibaniza. Mwekambise kukora empindahinduka ezirukukwetaagisa, hatali habwokuba ngu naagonza kukusemeza, baitu habw’okugonza oku ainiire Yahwe.

6. Nosobora ata kukonyera omwegi wa Baibuli kutunga obumanzi obw’okuteeka omu nkora ebi arukwega? (1 Abakolinso 16:13)

⁶ Omwegi obu akigumya ngu Ruhanga naija kumukonyera kworobera endengo za Baibuli, naija kutunga obumanzi obw’okuta omu nkora ebi arukwega. (Soma 1 Abakolinso 16:13.) Omwegesa wa Baibuli, naasisanamu n’omwegesa w’isomero. Obu orukuteekerezaaho obu akaba okyali omu isomero, mwegesa ki ou wagonzaaga muno? Naasobora kuba akaba ali mwegesa ayakugumiisirizaaga obu naakukonyera kweikiririzaamu ngu nosobora kukora ebintu ebi arukukwegesa. Omu mulingo nugwo gumu, omwegesa omurungi, tagarukira ha kwegesa omwegi we ebintu Ruhanga ebi arukugonza akole kyonka, baitu amugumya ngu habw’obukonyezi bwa Yahwe, naasobora kukora empindahinduka ezirukwetaagisibwa omu bwomeezi bwe. Eki nosobora kukikora ota?

KONYERA OMWEGI WAAWE KWEYONGERA KUGONZA YAHWE

7. Yesu akakonyera ata abo abakaba nibamuhuliiriza kukurakuraniza okugonza kwabo hali Yahwe?

⁷ Yesu akaba akimanyire ngu okugonza abeegeswa be oku bakaba bainiire Ruhanga, kwakubekambisize kuteeka omu nkora ebi bakaba nibeega. Yaikaraga naayegesa abeegeswa be ebintu ebyakubakonyiire kukurakuraniza okugonza oku bakaba bainiire Isebo ow’omu iguru. Ekyokurorraho, akalengesaniza Yahwe na taata ow’aha abaana be ebintu ebirungi. (Mat. 7:​9-11) Bamu h’abantu abakaba nibahuliiriza Yesu, nibasobora kuba bakaba batakuziibwe taata ow’okugonza nk’ogu. Teekerezaaho omulingo baayehuliire Yesu obu yabahaire ekyokurorraho ekya taata ow’embabazi ayatangiriire mutabani we ow’akaba azaahire. Eki kikabakonyera kurora omulingo Yahwe abagonza muno n’omulingo agonza kubakonyera.—Luk. 15:​20-24.

8. Nosobora ota kukonyera omwegi wa Baibuli kweyongera kugonza Yahwe?

⁸ Na iwe nosobora kukonyera omwegi wa Baibuli kweyongera kugonza Yahwe kuraba omu kumusoborra kurungi emiringo ya Ruhanga obu orukuba n’omwegesa. Buli murundi oraayega n’omwegi, mukonyere kwetegereza omulingo ebi arukwega birukwoleka ngu Yahwe naamugonza. Obu muraaba nimubazaaho ekicunguro, mwoleke omulingo kirukumukwataho. (Bar. 5:8; 1 Yoh. 4:10) Omwegi naasobora kweyongera kugonza Yahwe, kakuba ayecumiitirizaaho okugonza Yahwe oku amwiniire.—Bag. 2:20.

9. Kiki ekyakonyiire Michael kukora empindahinduka omu bwomeezi bwe?

⁹ Teekerezaaho ekyokurorraho kya Michael kuruga omu Indonesia. Akakura naamanya amananu baitu atabatizibwe. Obu yahikize emyaka 18, akagenda omu ihanga erindi yatandika kukora nk’omuvugi w’ebimotoka ebikooto. Hanyuma akataaha obuswere obu akaba ali omu Indonesia, baitu yagumizaamu naakorra omu ihanga erindi erikaba liri hara n’eka ye. Omu kasumi ako, mukazi we na muhara we bakatandika kwega Baibuli kandi baakurakurana. Hanyuma ya nyina kufa, Michael akacwamu kugaruka omuka kurolerra ise kandi yaikiriza kwegesebwa Baibuli. Michael akakwatwaho muno obu bakaba nibabazaaho ekicweka “Yega Ebirukukiraho” omu isomo 27 ery’ekitabu Wegondeze omu Bwomeezi Ebiro n’Ebiro! Michael akarra obu yateekerizeeho omulingo Yahwe asobora kuba yayehuliire obu yarozere omwana we naabonabona. Akasiima muno habw’ekicunguro kandi kyamwekambisa kuhindura obwomeezi bwe kandi yabatizibwa.

KONYERA OMWEGI WAAWE KUHINDURAMU EBINTU EBI ARUKWEBEMBEZA

10. Yesu akakonyera ata abeegeswa be aba kara kuhinduramu ebintu ebi bakaba nibebembeza? (Luka 5:​5-11) (Rora n’ekisisani.)

¹⁰ Abeegeswa ba Yesu ab’okubanza bakaba bakimanyire ngu Yesu nuwe akaba Masiya ow’akaba araganiziibwe, baitu bakaba nibeetaaga kukonyerwa kukimanya ngu kusobora kuheereza Yahwe, kikaba nikibeetaagisa kutebeza amakuru amarungi n’obwekambi. Petero na Andereya bakaba bafookere ira abeegeswa ba Yesu kumara akasumi, nambere yabaraalize kufooka abeegeswa be ab’akasumi koona. (Mat. 4:​18, 19) Bakaba baine bizineesi ey’amaani ey’okusoha encu, kandi nibasobora kuba bakaba nibakorra hamu na Yakobo na Yohana. (Mar. 1:​16-20) Petero na Andereya obu ‘baalekereho ebitimba byabo,’ nibasobora kuba baakozere enteekaniza ez’okurolerra ab’omu maka gaabo obu bakaba nibahondera Yesu. Kiki ekyabekambisize kulekaho bizineesi yabo ei baagonzaaga muno? Ebyahandiikirwe omu kitabu kya Luka nibyoleka ngu Yesu akakora ekyamahano ekyagumize obwesige bwabo omu busobozi bwa Yahwe obw’okubarolerra.—Soma Luka 5:​5-11.

11. Nitusobora tuta kukozesa ebyokurorraho byaitu kugumya okwikiriza kw’abeegi baitu?

¹¹ Titurukusobora kukora ebyamahano nkooku Yesu yakozere, baitu nitusobora kugambira abeegi ba Baibuli ebyokurorraho ebirukwoleka omulingo Yahwe akonyera abo abamwebembeza omu bwomeezi bwabo. Ekyokurorraho, noijuka omulingo Yahwe yakukonyiire obu watandikire kugenda omu nsorrokano? Obundi nikisobora kuba kyakwetaagisize kubaza n’omuntu ow’arukukukozesa kandi wamusoborra nkooku otarukwija kukora obwire obweyongiireyo kakuba butaahira obwire bwawe obw’ensorrokano. Obu oraaba noogambira omwegi waawe ha kyokurorraho kyawe, musoborre omulingo okwikiriza kwawe kwagumiibwe obu warozere Yahwe naasagika encwamu yaawe ey’okumwebembeza.

12. (a) Habwaki kikuru kuraaliza Abakristaayo abarukwahukana kutweteranizaaho obu turukuba nitwega n’omwegi waitu? (b) Kintu ki ekindi eki tusobora kukozesa kukonyera abeegi baitu kwebembeza Yahwe?

¹² Ekindi, omwegi waawe naija kugasirwa obu araahurra omulingo Abakristaayo abandi baahindwiremu ebi abakaba nibebembeza. Nahabweki, raaliza Abakristaayo bagenzi baawe abarukwahukana kukweteranizaaho obu muraaba nimwega. Basabe kusoborra omwegi waawe omulingo baizire omu mananu, hamu n’ebintu ebi baakozere kusobora kwebembeza obuheereza bwabo hali Yahwe. Ekindi, twara obwire iwe n’omwegi waawe kurora vidiyo eziri omu kicweka “Yega Ebirukukiraho” rundi “Seruliiriza,” omu kitabu Wegondeze omu Bwomeezi Ebiro n’Ebiro! Ekyokurorraho, obu muraaba nimubazaaho isomo erya 37, nosobora kubazaaho emisingi kuruga omu vidiyo enyakwine omutwe: Yahwe Naija Kutuha Ebyetaago Byaitu. Kandi hanyuma omukonyera kurora omulingo Yahwe asobora kumukonyera obu aramwebembeza omu bwomeezi bwe.

KONYERA OMWEGI KUMANYA EKI ASEMERIIRE KUKORA ABANDI OBU BAMUHAKANIZA

13. Yesu akakonyera ata abeegeswa be kweteekaniriza okuhakanizibwa?

¹³ Yesu akaikara naagambira abahondezi be ngu baakuhikirweho okuhakanizibwa kuruga omu bantu abandi, otwaliiremu n’abanyabuzaale baabo. (Mat. 5:11; 10:​22, 36) Yesu obu akaba ali haihi kufa, akagambira abeegeswa be ngu bakaba nibasobora kwitwa habw’okuramya Yahwe. (Mat. 24:9; Yoh. 15:20; 16:2) Akabatererra kuba begendereza omu buheereza bwabo. Akabagambira kutateera empaka n’abo abarukubahakaniza, n’okwegendereza ebi barukubaza hamu n’ebi barukukora nukwo bagumiizeemu nibatebeza.

14. Nitusobora tuta kukonyera omwegi waitu kweteekaniriza okuhakanizibwa? (2 Timoseo 3:12)

¹⁴ Nitusobora kukonyera omwegi kweteekaniriza okuhakanizibwa kuraba omu kumusoborra ebintu ebi asobora kunihira kuhurra kuruga h’abakozi bataahi be, banywani hamu n’abanyabuzaale be. (Soma 2 Timoseo 3:12.) Bamu h’abakozi bataahi be nibasobora kumusekereza habw’empindahinduka ezi akozere. Abandi otwaliiremu n’abanyabuzaale be, nibasobora kubazaaho kubi enyikiriza ze ezirukusigikirra ha Baibuli. Kakuba tukonyera kara omwegi waitu kweteekaniriza okuhakanizibwa, nikiija kumwanguhira kukugumira obu kuraamuhikaho.

15. Kiki ekisobora kukonyera omwegi kugumira okuhakanizibwa kuruga hali abanyabuzaale?

¹⁵ Obu kirukuhika ha kuhakanizibwa kuruga omu banyabuzaale be, konyera omwegi waawe kuteekerezaaho ensonga habwaki nibasobora kubiihirwa. Nibasobora kuteekereza ngu ahabisiibwe, rundi nibasobora kuba batarukugonza Abakaiso ba Yahwe. N’abanyabuzaale ba Yesu batasemererwe habw’ebintu Yesu akaba naakora. (Mar. 3:21; Yoh. 7:5) Yegesa omwegi waawe kuba omuntu ow’arukugumiisiriza kandi ow’arukubaza omu mulingo ogw’embabazi hali abanyabuzaale be na hali abantu abandi.

16. Nitusobora tuta kukonyera abeegi baitu kubazaaho enyikiriza zaabo omu mulingo ogw’embabazi kandi ogw’amagezi?

¹⁶ Abanyabuzaale noobu baakwoleka ngu nibagonza kwega Baibuli, omwegi wa Baibuli tasemeriire kubasoborra ebintu byona ha murundi gumu. Kakuba eki akikora, obutumwa obu abagambiire nibusobora kubahinguranaho, kandi ekirugamu, nibasobora kwanga kumuhuliiriza omurundi ogundi obu arukuba naabagambira ha nyikiriza ze. Nahabweki, wekambise omwegi waawe kugambira abanyabuzaale be ha nyikiriza ze omu mulingo ogurabaleetera kugonza kumuhuliiriza omurundi ogundi obu araaba naabagambira ha nyikiriza ze. (Bak. 4:6) Obundi naasobora kugambira abanyabuzaale be kugenda ha mukura ogwa jw.org. Kinu nikiija kubakonyera kwega bingi ebirukukwata h’Abakaiso ba Yahwe obu nibecweramu obwingi bw’ebintu ebi barukugonza kwega hamu n’obwire obu barukugonza kubyegeramu.

17. Nosobora ota kutendeka omwegi waawe kugarukamu abo abasobora kubaza ebisuba h’Abakaiso ba Yahwe? (Rora n’ekisisani.)

¹⁷ Nosobora kukozesa ebicweka ebiri ha jw.org ebiri hansi y’omutwe “Ebikaguzo Ebikira Kukaguzibwa ha Bakaiso ba Yahwe” kukonyera omwegi waawe kuteekaniza eby’okugarukamu ebyanguhire hali ebikaguzo abanyabuzaale be rundi abakozi bataahi be basobora kumukaguza. (2 Tim. 2:​24, 25) Ha kumalirra kwa buli isomo, mubazeeho ekicweka “Abantu Abamu Bagamba” ekiri omu kitabu Wegondeze omu Bwomeezi Ebiro n’Ebiro! Wekambise omwegi waawe kwerengesaamu omulingo asobora kusoborra enyikiriza ze obu naakozesa ebigambo bye. Kakuba kiba nikyetaagisa, muhemu amagezi ha mulingo asobora kusemezaamu eby’okugarukamu bye. Kinu nikiija kumukonyera kuba mumanzi obu naarwanirra okwikiriza kwe.

18. Nosobora ota kwekambisa omwegi waawe kutandika kutebeza hamu n’ekitebe? (Matayo 10:27)

¹⁸ Yesu akekambisa abeegeswa be kutebeza amakuru amarungi hali abantu. (Soma Matayo 10:27.) Omwegi wa Baibuli obu aratandika kara kugambiraho abandi hali okwikiriza kwe, nikiija kumwanguhira kwega kwesiga Yahwe. Nosobora ota kukonyera omwegi kweteraho ekigendererwa eki? Ekitebe kyanyu kakuba kiranga kampeini ey’okutebeza, wekambise omwegi waawe kuteekerezaaho ebintu ebi asemeriire kukora kufooka omutebezi. Musoborre ensonga habwaki baingi kibanguhira kutandika kutebeza omu kampeini ezi. Ekigendererwa ekindi eki asobora kweteraho, nikyo eky’okutandika kuha ebicweka omu nsorrokano eza hagati omu wiiki. Obu araaba naalengaho kuhikiiriza ekigendererwa eki, naija kwega omulingo asobora kusoborra kurungi enyikiriza ze.

YOLEKA NGU NOOYESIGA OMWEGI WAAWE

19. Yesu akooleka ata ngu naayesiga abeegeswa be, kandi nitusobora kumwegeraho tuta?

¹⁹ Yesu obu akaba atakafiire kandi atakagarukire omu iguru, akagambira abeegeswa be ngu kiro kimu baakwongiire babe hamu na uwe. Batakyetegereze ngu Yesu akaba naamanyisa ngu bakaba nibaija kugenda omu iguru. Noobu kiraaba ngu bateetegereze buli kimu kyona eki yabagambiire, Yesu akaba naakigumiza kimu ngu kiro kimu baakwongiire babe na uwe omu iguru. (Yoh. 14:​1-5, 8) Akaba akimanyire ngu bakaba nibeetaaga akaire ak’okwetegereza ebintu ebimu, nk’okunihira okw’okugenda omu iguru. (Yoh. 16:12) Na itwe nitusobora kwoleka abeegi baitu ngu nitubeesiga ngu nibagonza kusemeza Yahwe.

20. Munyaanya itwe kuruga omu Malawi akooleka ata ngu naayesiga omwegi we?

²⁰ Kigumye ngu omwegi waawe naagonza kukora ebihikire. Teekerezaaho ekyokurorraho ekya munyaanya itwe Chifundo, kuruga omu Malawi. Akatandika kwega Baibuli n’omukazi Omukatuliki ow’arukwetwa Alinafe naakozesa ekitabu Wegondeze omu Bwomeezi Ebiro n’Ebiro! Obu bakaba nibamalirra isomo erya 14, Chifundo akakaguza omwegi we eki akaba naateekereza ha kukozesa ebisisani omu kuramya. Alinafe akatabuka kandi yamugambira ati, “Egi eri ncwamu yange!” Chifundo akateekereza ngu Alinafe naasobora kuleka kwega. Baitu n’okugumiisiriza, akagumizaamu naayega na Alinafe, obu naanihira ngu akasumi nikaija kuhika ayetegereze ensonga egi. Hanyuma y’okurabaho emyezi nke, Chifundo akamukaguza ekikaguzo ekirukusangwa omu isomo erya 34 ekirukugamba ngu: “Kwega Baibuli n’okwegaho Yahwe Ruhanga ow’amananu, bikugasiire bita?” Chifundo abazaaho omulingo Alinafe yamugarukiremu, naagamba ati: “Akabazaaho ensonga nyingi muno enungi, kandi emu hali zo ekaba ngu Abakaiso ba Yahwe tibejumbira omu bikorwa Baibuli ebi ejumirra.” Omu kaire kake, Alinafe akaleka kukozesa ebisisani, kandi yabatizibwa.

21. Nitusobora tuta kukonyera omwegi kukora encwamu ey’okuheereza Yahwe?

²¹ Noobu kiraaba ngu Yahwe nuwe ‘akuza,’ twine obujunaanizibwa obw’okukonyera omwegi kukurakurana. (1 Kol. 3:7) Titugarukira ha kumwegesa Ruhanga ebi arukugonza akole kyonka, baitu tumukonyera n’okukurakuraniza okugonza oku ainiire Yahwe. Nitusobora n’okumwekambisa kwoleka okugonza oku ainiire Yahwe kuraba omu kuhinduramu ebintu ebi arukwebembeza. Kandi tumwegesa omulingo asobora kwesiga Yahwe obu arukuba naahikwaho okuhakanizibwa. Obu tumwoleka ngu nitumwesiga, nikisobora kumugumya ngu na uwe naasobora kworobera endengo za Yahwe kandi akacwamu kumuheereza.