Teera Ebisisani Bikukonyere Kwijuka

Kusisanaho na baingi hali itwe, obundi na iwe kikugumira kwijuka ebintu ebi oba oyesomeseze. Baitu okyetegeriize ngu kyanguhire kwijuka ebintu ebirukukira obwingi Yesu ebi yayegeseze habwokuba yakozesaga ebyokurorraho? Nitusobora kuteramu akasisani kandi tukarora Yesu ebi akaba naabazaaho kandi kinu kitukonyera kwijuka ebi yayegeseze. Omu mulingo nugwo gumu, na iwe noosobora kwijuka ebintu bingi ebi oba oyesomeze kuraba omu kuteramu akasisani noorora ebi orukwesomesaaho. Eki noosobora kukikora ota? Kuraba omu kuteera ebisisani obu orukuba noyesomesa.

Abantu abateera ebisisani eby’ebintu ebihyaka ebi baba beegere, bakira muno kubiijuka kurungi. Bakizoire ngu kuteera ebisisani tikigarukira ha kubakonyera kwetegereza ebigambo kyonka baitu n’ensonga enkuru ezi baba nibesomesaaho. Tibamara obwire bwingi ngu habwokuba nibagonza kuteera ebisisani ebirukuzooka kurungi, oihireho biba byanguhire. Kandi obwakaiso nibwoleka ngu abantu abakuzire omu myaka nubo bakira muno kugasirwa omu magezi ganu.

Omurundi ogundi obu oraaba noyesomesa, noosobora kulengaho kuteera ebisisani ebimu eby’ebintu ebi oyesomesezeeho. Noosobora kuhunirra habw’obwingi bw’ebintu ebi orukwija kwijuka!