Ba Mumanzi Nka Zadoki

1-2. Zadoki akaba nuwe oha? (1 Ekyebyomubusinge 12:​22, 26-28)

TEERAMU akasisani. Ekitebe ky’abasaija abarukuhingura omu 340,000, besoroize hamu kufoora Daudi omukama hali Isaleri yoona. Kumara ebiro bisatu, bakaba bali omu nsozi eziri haihi na Heburoni nibaseka, nibabaza, kandi nibazina ebizina eby’okusemererwa ebirukukugiza Yahwe. (1 Byom. 12:39) Omu kitebe eki ekingi, hakaba harumu omusigazi ow’arukwetwa Zadoki, kandi abantu baingi bakaba batasobora kumumanyirra. Baitu Yahwe akamurora kandi yagonza naitwe tukimanye ngu akaba aroho. (Soma 1 Ekyebyomubusinge 12:​22, 26-28.) Zadoki akaba nuwe oha?

² Zadoki akaba nyakatagara ayakorraga hamu na Nyakatagara Omukuru Abyasara. Ekindi, Zadoki akaba ali murozi kandi Ruhanga akamuha amagezi maingi, n’obusobozi obw’okwetegereza ekigendererwa kye. (2 Sam. 15:27) Abantu baijaga hali Zadoki kubaha amagezi obu baabaga nibetaaga obukonyezi. Ekindi, akaba musaija omumanzi. Omu kicweka kinu, nitwija kurora omulingo Zadoki yayolekere obumanzi.

3. (a) Habwaki abaheereza ba Yahwe nibetaaga kuba bamanzi? (b) Kiki eki turabazaaho omu kicweka kinu?

³ Omu biro binu ebya ha mpero, Sitaani nakora kyona eki arukusobora kuceekya okwikiriza kwaitu omuli Yahwe. (1 Pet. 5:8) Tusemeriire kuba bamanzi obu nitulindirra Yahwe kuhwerekereza Sitaani hamu n’ensi ye embi. (Zab. 31:24) Leka turole emiringo esatu omulingo eitusobora kwegera ha bumanzi bwa Zadoki.

SAGIKA OBUKAMA BWA RUHANGA

4. Habwaki abantu ba Yahwe nibetaaga obumanzi kusobora kusagika Obukama bwa Ruhanga? (Rora n’ekisisani.)

⁴ Nk’abantu ba Yahwe, tusagika Obukama bwa Ruhanga n’omutima gwaitu goona, baitu emirundi erukukira obwingi, twetaaga obumanzi kukikora. (Mat. 6:33) Ekyokurorraho, omu nsi enu embi nitwetaaga obumanzi kuhondera endengo za Yahwe, hamu n’okutebeza amakuru amarungi ag’Obukama. (1 Bas. 2:2) Kandi emirundi erukukira obwingi, kyetaagisa obumanzi kwikara tutarukugwera orubaju omu by’obulemi omu nsi enu embi ey’erukweyongera kwebaganizaamu. (Yoh. 18:36) Baingi h’abantu ba Yahwe nibahikwaho ebizibu omu byentahya, batiirwe, kandi batairwe omu nkomo habw’okwanga kwejumbira omu by’obulemi, rundi kutaaha amahe.

5. Habwaki Zadoki akaba aine kuba mumanzi kusobora kusagika Daudi?

⁵ Zadoki atagende omu Heburoni kujaguza obukama bwa Daudi. Akagenda n’eby’okurwanisa bye kandi akaba ayeteekaniize kurwana. (1 Byom. 12:38) Akaba ayehaireyo kuhondera Daudi omu bulemu, n’okurwanirra Isaleri hali abanyanzigwa bayo. Zadoki n’asobora kuba akaba ataine obukugu omu kurwana, baitu akaba ali musaija omumanzi.

6. Daudi akateeraho ata Zadoki ekyokurorraho ekirungi eky’obumanzi? (Zabuli 138:3)

⁶ Nyakatagara Zadoki akeegera nkaha kuba omumanzi? Akaba ayetoroirwe abasaija abakaba b’amaani kandi abamanzi. Hataroho kugurukyagurukya, akeegera ha kyokurorraho kyabo. Ekyokurorraho, habwokuba Daudi akaba ali mwebembezi omumanzi kandi omurwani, Isaleri yoona ekagonza kumufoora omukama. (1 Byom. 11:​1, 2) Obwire bwona, Daudi yayesigaga Yahwe kumukonyera kusingura abanyanzigwa be. (Zab. 28:7; soma Zabuli 138:3.) Ekindi, Zadoki akeegera h’abasaija abandi abamanzi abayaikaraga nabo nka—Yehoyada hamu na mutabani we omurwani Benaya, otwaliiremu n’abakuru b’enganda 22, abaasagikaga Daudi. (1 Byom. 11:​22-25; 12:​26-28) Abasaija banu boona bakaba baacweriremu kimu kufoora Daudi omukama wabo n’okumulinda.

7. (a) Byokurorraho ki ebya kasumi kanu eby’obumanzi ebi tusobora kwegeraho? (b) Kiki eki orukwegera ha kyokurorraho ky’ow’oruganda Nsilu nk’oku kyolekerwe omu vidiyo?

⁷ Obu tuteekerezaaho omulingo abandi baayolekere obumanzi kusobora kwikara bali besigwa hali Yahwe hamu n’Obukama bwe, naitwe kitwekambisa kuba bamanzi. Omukama waitu Yesu Kristo obu akaba akyali omu nsi, akangira kimu okusindikirizibwa okw’okwejumbira omu by’obulemi eby’ensi ya Sitaani. (Mat. 4:​8-11; Yoh. 6:​14, 15) Buli kaire, yayesigaga Yahwe kumuha amaani. Ekindi, twine ebyokurorraho bingi muno ebya kasumi kanu eby’abasigazi abangire kutaaha amahe n’okwejumbira omu by’obulemi. Habwaki otasoma bimu ha birukubakwataho ha jw.org?a

KONYERA AB’ORUGANDA

8. Nidi abagurusi obu baba nibetaaga obumanzi kusobora kukonyera ab’oruganda bagenzi babo?

⁸ Abantu ba Yahwe bagonza kukonyerangana. (2 Kol. 8:4) Baitu obwire bumu, kyetaagisa obumanzi kukikora. Ekyokurorraho, obu habaho obulemu, abagurusi b’ekitebe bakyetegereza ngu ab’oruganda na banyaanya itwe nibetaaga kugarurwamu amaani, kubasagika, kandi obundi kubahikyaho ebyetaago byabo omu by’omwoyo rundi omu by’omubiri. Habwokuba nibagonza entaama, abagurusi bateeka obwomeezi bwabo omu kabi kusobora kubahikyaho ebi barukwetaaga. (Yoh. 15:​12, 13) Omu kukora kinu, baba nibahondera ekyokurorraho kya Zadoki eky’obumanzi.

9. Nk’oku kirukwolekwa omu 2 Samuiri 15:​27-29, kiki Daudi eki yaragire Zadoki kukora? (Rora n’ekisisani.)

⁹ Obwomeezi bwa Daudi bukaba buli omu kabi. Mutabani we Abusalomu akaba n’agonza kunyanga obukama hali ise. (2 Sam. 15:​12, 13) Daudi akaba aine kuruga Yerusalemu ahonaaho! Akagambira abaheereza be ati: “Muimuke, tuiruke: obututairuke tihalikira nomu omulitwe hali Abusalomu!” (2 Sam. 15:14) Abaheereza be obu bakaba nibagenda, Daudi akakyetegereza ngu omuntu omu asemeriire kusigara Yerusalemu kwikara nabamanyisa ha nteekaniza za Abusalomu. Nahabweki, akasindika Zadoki hamu na banyakatagara abandi kugarukayo omu rubuga kukora nka bambega. (Soma 2 Samuiri 15:​27-29.) Bakaba baine kuba abegendereza muno. Ekintu Daudi yagambiire abasaija banu kukora kyali nikiteeka obwomeezi bwabo omu kabi kandi kikaba nikisobora n’okubarugirramu kufa. Tekerezaaho ekintu Abusalomu ow’akaba nayegondeza wenka, ow’arukuhoora enzigu, kandi omugobya eki yakukozere Zadoki hamu na banyakatagara abandi kakuba yakukizoire ngu bakaba nibamubega, kusobora kulinda Daudi!

10. Zadoki n’abo abakaba bali nauwe, bakalinda bata Daudi?

¹⁰ Daudi akasaba Zadoki hamu na munywani we ondi omwesigwa Husai kusobora kumukonyera ha nteekaniza ye. (2 Sam. 15:​32-37) Husai akaba aine kwefoora ngu naasagika Abusalomu kandi amuhe amagezi ha mulingo asobora kutahirra Daudi, ekintu ekyakuhaire Daudi akaire ak’okweteekaniriza okutahirra oku. Abusalomu obu yaikirize amagezi ago, Husai akaija yagambira Zadoki hamu na Abyasara eki bakaba bacwiremu. (2 Sam. 17:​8-16) Hanyuma abasaija banu babiri bakamanyisa Daudi ha nteekaniza ya Abusalomu. (2 Sam. 17:17) N’obukonyezi bwa Yahwe, Zadoki hamu na banyakatagara bagenzi be bakakonyera kulinda Daudi kutahikwaho akabi.—2 Sam. 17:​21, 22.

11. Nitusobora tuta kwegera ha kyokurorraho kya Zadoki eky’obumanzi obu turukuba nitukonyera ab’oruganda bagenzi baitu?

¹¹ Kakuba tusabwa kukonyera ab’oruganda na banyaanya itwe omu busumi obugumire, nitusobora kwoleka tuta obumanzi nk’obwa Zadoki? (1) Hondera oburagirizi. Omu nyikara nk’ezi, kikuru muno kwikara tuli omu bumu. Hondera oburagirizi kuruga ha ofiisi y’itaagi ey’omu kiikaro kyanyu. (Baheb. 13:17) Abagurusi basemeriire kwikara nibeyijukyamu ha buragirizi oburukukwata ha mulingo ogw’okweteekaniriza ebigwererezi na kiki eki basemeriire kukora kakuba habaho ekigwererezi. (1 Kol. 14:​33, 40) (2) Ba mumanzi baitu omwekengi. (Nfu. 22:3) Banza oteekereze otakagizire eki wakora. Oteeteka omu kabi akatarukwetaagisa. (3) Wesige Yahwe. Ijuka ngu Yahwe n’agonza iwe n’ab’oruganda bagenzi baawe mwikale mwine obwomeezi oburungi. N’asobora kukukonyera nukwo okonyere ab’oruganda na banyaanya itwe batahikwaho akabi.

12-13. Kiki eki orukwegera ha kyokurorraho kya Viktor na Vitalii? (Rora n’ekisisani.)

¹² Tekerezaaho ab’oruganda babiri Viktor na Vitalii, abaakonyeraga kuhikyaho ab’oruganda ebyokulya n’amaizi omu Ukraine. Viktor nagamba ati: “Twaserraga ebyokulya buli hantu hoona. Emirundi erukukira obwingi twahurraga amasasi nambere tuli. Ow’oruganda omu akahayo ebyokulya kuruga omu lyahurro lye. Okuhayo kunu kukakonyera ab’oruganda baingi muno kutunga ebi bakaba nibetaaga habw’akasumi. Kiro kimu obu tukaba nitupakira ebintu ha motoka, roketi ekagwa mita nka 20 (66 ft) kuruga nambere tukaba tuli. Ekiro kyona nakimaraga ninsaba Yahwe kumpa obumanzi obundukwetaaga kusobora kugumizaamu ninkonyera ab’oruganda.”

¹³ Vitalii nagamba ati: “Kyayetaagisaaga obumanzi bw’amaani. Orugendo rwange orw’okubanza rukatwara esaaha 12. Omu rugendo oru rwona, nkaba ninsaba Yahwe.” Vitalii akaba mumanzi baitu kandi akaba ali mwekengi. Ayongera agamba ati: “Nkaikara ninsaba Yahwe kumpa amagezi n’okunkonyera kumanya obugarukiro bwange. Nkavugira ha nguudo zonka ezirukwikirizibwa ab’obusobozi. Okwikiriza kwange kukenyongera kuguma obu narozere ab’oruganda na banyaanya itwe nibakorra hamu. Baihaga omu muhanda ebintu ebyatulemesaaga kurabamu, basorooza kandi bapakira ebyokulya, engoye hamu n’ebintu ebindi ebikuru omu motoka. Kandi baatuhaga ebyokulya hamu n’ebiikaro eby’okuhumurramu”

IKARA OLI MWESIGWA HALI YAHWE

14. Nitusobora kukwatwaho tuta omuntu ou turukugonza obu aleka kuheereza Yahwe?

¹⁴ Kimu ha birengo ebi kyakizireyo kutumaramu amaani nikyo omunyabuzale rundi omunywani nfenafe obu aleka kuheereza Yahwe. (Zab. 78:40; Nfu. 24:10) Omuntu ou turukugonza muno obu aleka kuheereza Yahwe, kitugumira muno kwikiriza enyikara egi. Obu oraaba wahikirweho enyikara nk’egi erukusaaliza, ekyokurorraho kya Zadoki eky’obwesigwa nikisobora kukugarramu amaani.

15. Habwaki Zadoki akaba nayetaaga obumanzi kwikara ali mwesigwa hali Yahwe? (1 Ekyabakama 1:​5-8)

¹⁵ Zadoki akacwamu kusigara ali mwesigwa hali Yahwe, munywani we nfenafe Abyasara obu yalekere kuba mwesigwa. Kinu kikabaho ha kumalirra kw’obulemi bwa Daudi. Daudi obu akaba akuzire omu myaka kandi ali haihi kufa, mutabani we Adoniya akalengaho kwefoora omukama n’obu kiraaba ngu Yahwe akaba n’agonza Sulemani nuwe afooke omukama. (1 Byom. 22:​9, 10) Abyasara akacwamu kusagika Adoniya. (Soma 1 Ekyabakama 1:​5-8.) Omu kukora eki, Abyasara atabe mwesigwa hali Daudi na hali Yahwe! Mali kinu kiine kuba kyabihiize Zadoki kandi kyamumaramu amaani. Uwe na Abyasara abakaba bamazire emyaka ey’erukuhingura omu makumi ana nibaheereza hamu nk’abanyakatagara. (2 Sam. 8:17) Baarolerraga hamu “esanduko ya Ruhanga.” (2 Sam. 15:29) Ha kubanza abasaija banu boona bakaba nibasagika obukama bwa Daudi kandi bakaba bakozere ebintu ebindi omu buheereza bwabo hali Yahwe.—2 Sam. 19:​11-14.

16. Kiki ekisobora kuba kyakonyiire Zadoki kwikara ali mwesigwa?

¹⁶ Zadoki akaikara ali mwesigwa hali Yahwe n’obu kiraaba ngu Abyasara akacwamu kutaba mwesigwa hali Yahwe kuraba omu kugobeza Daudi. Daudi akatagurukyagurukye obwesigwa bwa Zadoki. Enteekaniza ya Adoniya obu yamanyirwe, Daudi akesiga Zadoki, Nasani, na Benaya kuseesaho Sulemani amagita nk’omukama. (1 Bakam. 1:​32-34) Kuba n’abaheereza ba Yahwe abesigwa nka Nasani, hamu n’abasagiki abandi ab’Omukama Daudi, kiine kuba kyagarwiremu Zadoki amaani. (1 Bakam. 1:​38, 39) Sulemani obu yafookere omukama, “Zadoki nyakatagara . . . yamuta omu kiikaro kya Abyasara.”—1 Bakam. 2:35.

17. N’osobora ota kwegera hali Zadoki kakuba omuntu ou orukugonza aleka kuba mwesigwa hali Yahwe?

¹⁷ N’osobora ota kwegera hali Zadoki? Kakuba omuntu ou orukugonza acwamu kuleka kuheereza Yahwe, yooleka ngu oli mwesigwa hali Yahwe. (Yos. 24:15) Yahwe naija kukuha amaani n’obumanzi ebi orukwetaaga. Mwesige kuraba omu kusaba kandi oikale oli haihi n’abaheereza be abandi abesigwa. Yahwe n’akusiima habw’okwikara oli mwesigwa kandi naija kukuha empeera.—2 Sam. 22:26.

18. Kiki eki orukwegera ha kyokurorraho kya Marco na Sidse?

¹⁸ Tekerezaaho ekyokurorraho kya Marco na mukazi we Sidse, abaine bahara babo babiri abakuzire abaarugire omu mananu. Marco nagamba ati: “Kuruga ekiro abaana baawe bazaarwa oba n’obagonza muno. N’osobora kukora kyona eki orukusobora kubalinda batahikwaho akabi. Nahabweki obu bacwamu kuruga hali Yahwe, mali kisaaliza muno.” Agumizaamu nagamba ati: “Baitu Yahwe aikaire natukonyera kugumiisiriza. Akigumize ngu obu mba mpoirwemu amaani, mukazi wange aba agumire, kandi mukazi wange obu aba ahoirwemu amaani, nyowe mba gumire.” Sidse ayongeraho ati: “Titwakusoboire kugumiisiriza kakuba Yahwe ataratuhaire amaani agaturukwetaaga. Nkaba mbihiirwe kandi ninteekereza ngu ekaba eri nsobi yange abahara bange kuleka kuheereza Yahwe, nahabweki nkagambira Yahwe omulingo nkaba ninyehurra. Na hanyuma y’ebiro bike, munyaanya itwe ou nkaba mmazire emyaka nyingi ntarukurora akampikirra, yateeka emikono ye ha mabega gange, yandora omu maiso, yangambira ati: ‘Ijuka Sidse, teri nsobi yaawe!’ N’obukonyezi bwa Yahwe, nsoboire kwikara nimmuheereza n’okusemererwa.”

19. Kiki eki ocweriiremu kimu kukora?

¹⁹ Yahwe n’agonza abaheereza be boona kuba bamanzi nka Zadoki. (2 Tim. 1:7) Baitu nabwo, tarukugonza twesige amaani gaitu itwenka. N’agonza tumwesige. Nahabweki, kakuba oyesanga omu nyikara nambere kirukukwetaagisa obumanzi, saba Yahwe. Kigumye ngu naija kukufoora omumanzi nka Zadoki!—1 Pet. 5:10.