Kuba Muntu Murungi Nikisobora Kukukonyera Kuba n’Obwomeezi Oburungi?

Kumara ebyasa bingi, abantu baingi baikaire nibatekereza ngu kuba bantu barungi rundi kuba n’engeso enungi nikisobora kubakonyera kuba n’obusumi obw’omumaiso oburungi. Ekyokurorraho, abantu baingi omu Asia baikiririza muno omu bigambo by’omusaija ow’akaba ali mwegesa arukwetwa Confucius (551-479 Y.A.) ayagambire ati: “Ebyotarukugonza abantu abandi bakukole, naiwe otabibakora.”a

BAINGI BALENGAHO KUKORA EBINTU EBIRUNGI

Abantu baingi batekereza ngu kuba n’engeso enungi nikiija kubakonyera kuba n’obusumi bw’omumaiso oburungi. Balengaho kuteekamu abandi ekitiinisa, kuba n’engeso enungi, kuhikiiriza obujunanizibwa bwabo hamu n’okuba n’omuntu ow’omunda omurungi. Omukazi arukwetwa Linh, kuruga Vietnam n’agamba ati: “Naikirizaaga ngu kuba muntu omwesigwa kandi ow’arukubaza amananu nikiija kunkonyera kuba n’obwomeezi oburungi.”

Hanyuma omukazi onu ajwahire, taine kusemererwa kandi akiikiire omutabani.

Abamu bekamba kukora ebirungi habwokuba ediini yabo nukwo erukubegesa. Omusaija arukwetwa Hsu-Yun, arukwikara omu Taiwan, n’agamba ati: “Nkegesebwa ngu kakuba omuntu akora ebintu ebirungi, naija kuba n’obwomeezi oburumu okusemererwa hanyuma y’okufa. Baitu kakuba akora ebibi, naija kubonabona hanyuma y’okufa.”

KIKI EKIRUGIREMU?

Omukazi nuwe omu naha abantu abataine buraaro ebyokulya.

Ky’amananu ngu obutukorra abantu ebintu ebirungi, naitwe tugasirwa. Baitu, baingi abalengereho kukorra abandi ebirungi bakizoire ngu hakumalirra, abantu abo tibabatwaza kurungi nk’oku babaire nibanihira. Omukazi arukwetwa Shiu Ping, arukwikara omu Hong Kong, n’agamba ati: “Nkirozere ngu abakorra abandi ebirungi, bo tibakira kubitunga. Nkekamba kurolerra kurungi ab’omu ka yange n’okukorra abandi ebirungi. Baitu iba nyowe akandekaho, nyowe na mutabani wange.”

Baingi bakirozere ngu ediini tekonyiire abantu kuba n’engeso enungi. Etsuko, arukwikara Japan n’agamba ati: “Nkataaha ediini emu kandi nafooka mukuru w’ensinganto. Baitu nkahunirra muno kukirora ngu omu diini egi, abantu bakaba baine engeso embi, nibarwanira obukuru kandi nibakozesa kubi sente ezahebwayoga.”

“Nkekamba kurolerra kurungi ab’omu ka yange n’okukorra abandi ebirungi. Baitu iba nyowe akandekaho, nyowe na mutabani wange.” —SHIU PING, HONG KONG

Abantu abamu abemaliire omu diini bahoirwemu amaani habw’ebintu ebibi ebibahikaho. Eki nikyo kyahikire ha mukazi arukwetwa Van kuruga Vietnam. N’agamba ati: “Buli kiro naguraga ebijuma, ebyakyo n’ebyokulya nimbitwara nambere twaramizaaga baisenkuru itwe abaafiire, ninihira ngu nibaija kumpa emigisa omu kasumi ak’omumaiso. N’obukiraaba ngu nkakora ebintu binu byona ebirungi, n’emigenzo y’ediini kumara emyaka nyingi, musaija wange akatunga oburwaire obw’amaani muno. Hanyuma, muhara wange omuto obwakaba nasomera omu ihanga erindi, akafa.”

KUBA MUNTU MURUNGI TIKIRUKUMARA

Kuba muntu murungi kikuru, baitu tikirukumara kusobora kuba n’obusumi bw’omumaiso oburungi. Habwaki? Wetegereze Ebyahandiikirwe Ebirukwera ekibirukugamba.

TALI BULI OMU NGU NAGONZA KUKORA EBINTU EBIRUNGI

‘Omusiisi omu ahwerekereza ebirungi bingi.’—OMUGAMBIZI 9:18.

N’obworalengaho kuba muntu murungi, ebikorwa eby’abantu ababi abarukwegondeza nibisobora kukuhikyaho akabi. Ekyokurorraho, obuhacwekaho oburwaire oburukuturra, iwe n’osobora kuhondera oburagirizi bw’ab’obusobozi kandi n’oyetantara kwirra haihi n’abantu abandi. Baitu, kiki ekibaho kakuba abantu abamu banga kukikora? Nikisobora kurugirramu abandi abarukuhondera oburagirizi kurwara.

ABANTU NIBASOBORA KUBA N’ENTEKEREZA ETAHIKIRE HA KIRUNGI N’EKIBI

‘Haroho omuhanda ogusisana omurungi hali omuntu baitu empero yagwo mihanda y’okufa.’—ENFUMO 14:12.

Ebyafaayo nibyoleka ngu abantu baingi bakozere ebintu ebibarukutekereza ngu bihikire baitu hanyuma bakirora ngu bikaba bitahikire. Kuba n’ebigendererwa ebirungi tikitangira omuntu kuhikwaho ebintu ebibi ebiruga omu kukora encwamu embi.

TOSOBORA KUMANYA EKIRAKUHIKAHO

‘Baitu timurukumanya ekiribaho nyenkya.’—YAKOBO 4:14.

Omuntu omurungi nauwe n’asobora kufa ahonaaho. Ekyokurorraho, omu kasumi ak’oburwaire bwa Korona, abantu baingi bakafa nibalengaho kukonyera abandi. Tekerezaaho ekyokurorraho ky’omukazi arukwetwa Liting kuruga China, ayaferiirwe ise omu butandwa bwa motoka. N’agamba ati: “Nkaba ntasobora kwetegereza habwaki omusaija omurungi kandi ow’embabazi yafiire. Ise nyowe akaba ali mukozi omwekambi, omwebundaazi kandi nabaza amananu. Baitu nuwe wenka ayafiire omu bantu boona abakaba bali omu motoka.”

Obukiraaba ngu kuba muntu murungi tikirukumara, kiki ekisobora kutukonyera kuba n’obusumi obw’omumaiso oburungi? Kutunga eky’okugarukamu ky’ekikaguzo eki, nitwetaaga oburagirizi oburukwesigwa kugarukamu ebikaguzo byaitu n’okutwoleka nk’oku tusobora kuba n’obusumi obw’omumaiso oburungi. Oburagirizi obu nitubusanga nkaha?

a Kumanya ebirukukiraho ha bintu omwegesa onu yayegeseze, rora esuura 7, akacweka 31-35, omu katabu Mankind’s Search for God, akaatiirwe Abakaiso ba Yahwe kandi akali ha mukura gwa www.jw.org.