Kampeini ey’Embaganiza ey’Okutandikaho Abeegi ba Baibuli omu Sebutemba

Omu Sebutemba, nitwija kutamu amaani maingi kutandikaho kwegesa abantu Baibuli nitukozesa burocuwa Wegondeze omu Bwomeezi Ebiro n’Ebiro! Abatebezi nibasobora kucwamu kuheereza nka bapayoniya abasagiki obu nibahayo esaaha 30. Kampeini enu ey’embaganiza nitwija kugikora tuta?

• Ha Murundi ogw’Okubanza: Kozesa ekyesweko eky’okumalirra ekya burocuwa kuleetera omuntu ekihika kandi olengeho kumwoleka nk’oku twegesa Baibuli. Ijuka abo abaayolekere ngu nibagonza kumanya ebirukukiraho omu bwire bw’enyuma otwaliiremu n’abawagarukiraga. N’obukiraaba ngu bakanga kwegesebwa Baibuli, nibasobora kugonza akatabu akahyaka n’omulingo omuhyaka ogw’okwega. Burocuwa zinu titusemeriire kuzisiga omu maka nambere tutasangire bantu rundi kuzisindikira abo abatoolekere ngu nibagonza kumanya ebirukukiraho. Akatebe ak’Obuheereza nikasobora kutekaniza ensorrokano ezindi ez’obuheereza omu kwezi oku.

• Obwire Obundi: Ekitebe kyanyu obukiraaba kikozesa obugaali, mutekeho burocuwa Wegondeze omu Bwomeezi Ebiro n’Ebiro! Manyisa abo abarukugonza kumanya ebirukukiraho ngu burocuwa niiziraho n’okwegesebwa Baibuli okutali kw’okusasurra. Omu bugufu, mwoleke nk’oku twegesa abantu Baibuli rundi okole entekaniza y’okumwoleka obwire obundi. Omuroleerezi w’obuheereza n’asobora kukomamu abatebezi abamu kugenda omu biikaro ebya bizineesi kutandikaho kwegesa abantu Baibuli. N’osobora n’okutandika kwegesa abantu ab’okora nabo rundi ab’okira kutangatangana.

Yesu akaturagira ‘kufoora abantu abegeswa,’ ‘nitubeegesa.’ (Mat 28:19, 20) Leka kampeini enu ey’embaganiza etukonyere kuhikiriza ekigendererwa kinu nitukozesa Wegondeze omu Bwomeezi Ebiro n’Ebiro!