Eby’Osemeriire Kwijuka oli ha Ruso’rokano rw’Ebiro Bisatu
Obwire bwa Puroguraamu: Kutandika na saha 2:00 ezanyenkyakara, ekiikaro nikiija kuba kikingwirwe. Habw’ebiro bisatu, obuzina nibwija kutekebwahoga saha 3:20. Bunu nubwo obwire tusemeriire kwikarra nukwo puroguraamu etandike. Ha Kyataano na Kyamukaaga n’esobora kuhwa saha 11:00 ezarwebagyo kandi ha sande n’esobora kuhwa saha 10:00 ezarwebagyo.
‘Tuhaisanize Yahwe n’Ekizina’: Omu busumi bwa kara, abaheereza ba Yahwe bamukugizaaga kuraba omu bizina kandi n’omu kasumi kanu okuzina kiri kintu kikuru omu kuramya kwaitu. (Zab. 28:7) Buli kicweka eky’oruso’rokano orw’ebiro bisatu kitandika n’obuzina. Bunu tibuli buzina bw’okutusemeza busemeza kwonka baitu butekaniziibwe kutukoonyera kwega hali Yahwe n’okumuramya. Ow’oruganda obwararanga ngu obuzina buli haihi kutandika, tusemeriire kwikarra nukwo tuhuliriize mukiikaro ky’okwikara nitubaza n’abagenzi baitu. Obutukora eki tuba nitwoleka ngu nitusiima amaani aba Watchtower orchestra batairemu okuturukya ebizina binu. Emirundi ebiri buli mwaka, ab’oruganda n’abanyanya itwe bakozesa sente zaabo kugenda Patterson, New York, kuturukya ebizina ebirukusemeza. Hanyuma y’obuzina, buli omu asemeriire kwemerra nukwo itwena tukugize Yahwe omu kuzina ebizina eby’Obukama.
Ah’Okuteeka Ebiiruka: Nambere oruso’rokano rwaitu rwona ruraaba nihaija kubaho ah’okuteeka ebiruka otasaswire kandi abaraija kara nubwo barabanza kutunga ah’okuteeka ebiruka byabo. Obwire bumu ah’okuteeka ebiruka nihasobora kuba hatarukumara n’ahabw’eki, abaine ebiiruka baitu nibaruga omu kiikaro kimu nibasobora kukozesa ekiiruka kimu. Abaraaba baine abalema nubwo abaraikirizibwa kuteeka ebiiruka byabo omu biikaro ebibateriirweho.
Kukwata Ebiikaro: Ekiikaro obu kirakingurwaho, titusemeriire kwiruka kugenda kukwata ebiikaro nk’abarukusimbirana n’ab’oruganda bandi. Tusemeriire kufaayo hali abagenzi baitu n’obu kiraaba nikyetagisa kubaheereza ebiikaro byaitu. Obutwoleka okwehayo, eki kyoleka ngu tuli Bakristaayo ab’amananu kandi kisikiriza abantu kuhaisa Yahwe ekitiinisa. (Yoh. 13:34, 35; 1 Kol. 13:5; 1 Pet. 2:12) Osemeriire kukwatira ebiikaro abo aboizire nabo, ab’omuka yawe, n’abeegi baawe aba Baibuli. Otetateeka ebintu ha ntebe ez’otarukugenda kukozesa. Kinu nikiija kukoonyera abandi kurora entebe ezitaroho bantu nukwo batunge h’okwikarra. Abakaikwire n’abelema babateekaniriize ah’okwikarra. Kusigikirra entebe nk’oku zitarukumara omuntu omu rundi babiri nubwo barukwija kwikirizibwa kwikarra n’abaceke.
Kujwara omu Mulingo Ogusemeriire: Enjwara yaitu ha ruso’rokano esemeriire kuhaisa omukoro ekitiinisa. Titusemeriire kujwara nk’abantu b’ensi. (1 Tim. 2:9) N’obuturaaba tuli omu hoteeri rundi omu bwire bwaitu obw’okwesemeza hanyuma y’oruso’rokano rundi rutakatandikire, nitugonza kujwara kurungi n’okweriinda enjwara erukujagaraza. Obuturajwara kurungi kandi tukaikazaaho baaji zaitu titurukwija kuswara kubaza hali Yahwe omuntu obw’aragonza kumanya ebirukukiraho. Enjwara yaitu ha ruso’rokano erurabaho terukwija kusikiriza abantu kwega Baibuli kwonka baitu neija n’okusemeza Yahwe.—Zef. 3:17.
Omulingo Omurungi ogw’Okukozesamu Esimu: Obutwihaho amaraka g’esimu zaitu omu bwire bwa puroguraamu kyoleka ngu twine engeso nungi. Obuturaaba nituteera rundi nitukwata ebisisani ha ntambi, tikiri kirungi kutalibaniza abandi rundi kubasiikiriza. Kandi tikiri kirungi kusindikiranganira obumeseji puroguraamu obw’eraaba n’egenda omu maiso.
Ekyamusana: Kiri kirungi kwija n’ekyamusana nukwo otagenda kuserra eby’okulya. N’osobora kubohera eby’okulya omu kintu eky’orukusobora kuteeka hansi y’entebe. Eky’oboheiremu obukiraaba kiri kikooto, tikirukwikirizibwa omunda nambere oruso’rokano ruraaba.
Ebisembo: Nitusobora kwoleka okusiima kwaitu habw’orusorokano obuturaheereza ebisembo kusagika omulimo gw’okutebeza omu nsi yoona. Abarukugonza kuhayo sente nibakozesa banka nibasobora kuziheereza omu ibara Abakaiso ba Yahwe bakozesa omu ihanga lyanyu.
Emibazi: Obworaaba oina emibazi orukumira otagirekayo. Obworaaba omu hoteeri rundi ha ruso’rokano tosemeriire kunaga enkiinzo zoona n’ebibombo eby’okozeseze omu debe ezitairweho baitu obinage omu kasasiro kurora twayetantara kujanjaaza endwaire.
Kwerinda Obutandwa: Nitukusaba kwerinda ebirukusobora kuleetaho butandwa. Buli mwaka abantu bagwa habw’okujwara enkaito ez’obukondo. Kiri kirungi tujwale enkaito eziratusobozesa kuraba kurungi hamatembero n’ebiikaro ebirukuterra.
Abatarukuhurra Kurungi: Puroguraamu neija kuteekwa ha mbeho nukwo abaina oburediyo obuke oburukusobora kukwata radiyo bahurre kurungi. Kinu nikiija kwetaagisa oije n’akarediyo hamu n’obw’okuhuliriza omu matu.
Obugaali bw’Okuvugiramu Abaana: Titusemeriire kuleeta obugaali bw’okuvugiramu abaana nambere oruso’rokano rukugenda kuba. Baitu obu buraaba butebe bw’okulindiramu abaana, bunu nibwikirizibwa kakuba abazaire babuteeka haihi nabo.
Obuhooho: Enso’rokano ezirukukira obwingi ziba omu biikaro ebitarukuhikwamu orwoya kurungi. Habw’ensonga enu, tusemeriire kwerinda kukozesa amagita agarukuboya muno habwokuba haroho bamu abatalibanizibwa amagita.—1 Kol. 10:24.
Kukozesa foomu ya Please Follow Up (S-43): Osemeriire kukozesa foomu ya Please Follow Up kakuba otunga omuntu arukugonza kumanya ebirukukiraho omu akasumi k’oruso’rokano. Hanyuma y’okugiijuza, nosobora kugitwara nambere barukwahura ebitabu rundi ogiheereze omuhandiiki w’ekitebe kyanyu obw’oragaruka omuka.
Nambere Batunda eby’Okulya Ebicumbirwe: Obworaaba ogenzere kugura eby’okulya, engeso zaawe zisemeriire kuhaisa Yahwe ekitiinisa. Osemeriire kujwara nk’Omukristaayo. Obukiraaba kisobokere, nosobora kuleekera omukozi akukoonyire akasimo.
Hoteeri:
Otakwatira abantu ebisiika ebibatarukugenda kukozesa. Kandi tutusemeriire okurara omu kisiika kuhingura ha omuhendo ogurukwetagisibwa.
Obworaaba osabire bakwahurre ekisiika eky’okuraramu otehindura hakumaliira oihireho obworaaba otungire ekizibu, bamanyise obukiraaba nikyetagisa nukwo kisobozese abandi kukikozesa. (Mat. 5:37) Obwaraaba otarukwija kukozesa ekisiika, n’osobora kubamanyisa ngu tokyagonza kukikozesa. Kakuba okererwa kubamanyisa, sente zaawe tizirikwija kukugarurwa.
N’osobora kukozesa akagali obworaaba n’ogonza kuhimbiramu ebintu, kandi obwaramara n’osobora kukagaraayo.
Obukiraaba kisobokere, n’osobora kulekera akasiimo abakozi abarukuyonja.
Osemeriire kucumbira omu bisiika ebirukwikirizibwa kucumbirwamu.
Otaswaga eby’okulya ebihereziibwe nka ekyanyenkyakara, kaawa, rundi eby’okunywa ebirukufuka.
Obwire bwona, tusemeriire kwoleka ebisembo eby’omwoyo obuturaaba nitukoragana nabarukokora omu hoteeri. Nk’oku barukuheereza abantu baingi, tusemeriire kwoleka okugumisiriza, embabazi, kandi tusemeriire kuba abantu abarukwetegereza.
Abazaire basemeriire kuroleera abaana baabo nukwo batasiisa ebintu rundi batahikwaho obutandwa obu barukuba bali omu hoteeri.
Obw’oratunga ekizibu kyona nambere orukurrarra, manyisa ab’oruganda abakora habya hoteeri ohikire ha ruso’rokano nukwo bakukoonyere.
Abarukugonza Kukoonyera: Omuntu weena arukugonza kukoonyera asemeriire kugenda ekehandiikisa. N’abaana abatakahikize emyaka 16 nibasobora kukoonyera kakuba bakorra haihi n’abazaire baabo rundi omuntu omukuru ou baizire nauwe.