Isomero ly’Omulimo gwa Ruhanga Erya 2015 Liija Kutukonyera Kusemeza omu Omulingo Twegesa

¹ Omuhandiiki wa Zabuli Daudi akagamba: “Ebigambo ebyomu kanwa kange, nokutekereza okwomu mutima gwange bisemere omu maiso gawe, Ai MUKAMA, omwandara gwange, nomucunguzi wange.” (Zab. 19:14) Naitwe, nitugonza ebigambo byaitu bisemeze Yahwe habwokuba nitusiima omugisa ogwatuhaire okwegesa ab’oruganda n’abantu abandi tuli omu buheereza. Isomero ly’Omulimo gwa Ruhanga liri limu ha miringo y’akozesa okututendeka omu buheereza. Ebitebe ebirukuhingura omu 111, 000 omu nsi yoona biba n’isomero linu buli wiiki. Likonyiire ab’oruganda omu nsi yoona kufooka abatebezi barungi ab’amakuru ag’Obukama, okwegesa omu mulingo ogurukusikiriza, kukwata abantu n’amagezi n’okutebeza batarukutiina.—Eng. 19:8; Bak. 4:6.

² Puroguraamu eya 2015 etekaniziibwe kuruga omu “An Introduction to God’s Word” (kiri ha ntaandikwa) na “Glossary of Bible Terms” (kiri ha kumaliira), ebiri omu New World Translation, n’okuruga omu katabu ‘Baibuli Mali Eyegesa Ki? Obwire bw’ekicweka eky’Okusoma Baibuli n’Orubazo Nam. 1 bukeheziibwe. Empinduka zinu n’oburagirizi oburukwoleka omulingo embazo ziina kuheebwa byolekerwe omu bucweka oburukuhonderaho.

³ Okusoma Baibuli: Ab’oruganda abaraheebwa ekicweka kinu baine kukozesa edakiika ibiri kubazaaho ensonga emu yoonka ey’ibarukugonza ab’oruganda baijuke. Okuteekaniza kurungi nikwija kubakonyera kukozesa kurungi obwire obubahairwe. Edakiika mukaaga ezirukuhonderaho ziina kukozesebwa ab’oruganda nabo kubazaho ebi beegere kuruga omu kusoma Baibuli, buli omu n’akozesa obutikitiki 30 n’obutahika. Kakuba aboruganda bateekaniza kurungi kandi bakoleka ngu nibafaayo hali abandi, buli omu aija kusobora kukozesa kurungi obwire obutuhairwe. Kulinda obwire kiija kusobozesa n’abandi kubazaaho ebi beegere omu kusoma kwabu okwa Baibuli.

⁴ Orubazo Nam. 1: Okusoma Baibuli nikwija kutwara edakiika isatu n’obutahika kandi araba n’asoma aija kuheebwa enkaarra nke ez’okusoma. Abahairwe orubazo runu baine kuteekaniza kurungi, kutwara obwire kurabamu emirundi n’emirundi kandi nibasoma nibaatura ebigambo, nukwo basobole kusoma nibaihayo amakuru kandi batakuhebebera. Habwokuba okusoma kutukonyera omu kuramya kwaitu, abaheereza ba Yahwe boona basemeriire kwega kusoma kurungi. Kitusemeza muno kurora abaana baitu nibasoma kurungi! Abazaire nibasiimwa haw’okukonyera abaana baabu okwega kusoma kurungi.

⁵ Orubazo Nam. 2: Rwija kuheebwa munyanyaitwe omu dakiika itaano. Omutwe oguhairwe nugwo gwina kukozesebwa. Obu ruraaba nirwihwa omu New World Translation, rwina kuheebwa mu mulingo ogurukuhikaana n’ebyo ebitusanga tugenzere omu buheereza. Omuroleezi w’isomero nuwe arukwija kumukomera ow’okumukoonyera.

⁶ Orubazo Nam. 3: Runu rusobora kuheebwa ow’oruganda rundi omunyanyaitwe omu dakiika itaano. Obu ruraheebwa munyanyaitwe, asemeriire kuruheereza nk’orubazo Nam. 2. Baitu obu ruraheebwaga ow’oruganda aine kubaliza ab’oruganda boona. Omwegi asemeriire kusoma ebyahandiikirwe ebiramukonyera kwihayo kurungi ensonga enkuru ab’oruganda ezibarasigara nibacumitirizaho.

⁷ Omulingo Omuhyaaka ab’Oruganda Baraheereza Orubazo Nam. 3: Obu ruraaba niruruga omu New World Translation, rusemeriirre kuheebwa nk’ekyokuroorraaho ky’okuramya kw’eka rundi eky’omutebezi ali omu buheereza. Omuroleerezi nuwe arukwija kumukomera ekyarakoraho n’aramukonyera. Aramukonyera asemeriire kuba n’aruga omw’eka yoogu arukuha orubazo rundi ow’oruganda omu kitebe. Asobora kukozesa n’ebyahandikiirwe ebindi obu biraaba nibikwatagana n’omutwe. Obusumi oburukukira, abagurusi nubo barukwija kuheebwa orubazo runu. Banu basobora kwekomera abarabakonyera n’omulingo bararuheerezamu. Kurora abagurusi nibeegesa ab’omu maka gaabu rundi ab’oruganda abandi, kiija kutugarramu muno amaani.

⁸ Okuhabura: Omuroleerezi w’isomero aija kukozesa edakiika ibiri buli hanyuma y’orubazo okusiima n’okuhabura omwegi n’akozesa ekitabu Benefit From Theocratic Ministry School Education. Obw’araaba n’agambira ekitebe omutwe gw’orubazo, ow’oruganda ogw’arukugenda kukurakuraniza, tasemeriire kugambira ab’oruganda isomo ely’omwegi arukugenda kukoraho. Baitu buli hanyuma y’orubazo, omuroleerezi aija kusiima ow’oruganda, agambire ekitebe isomo ery’abaire n’akoraho kandi asoborre ekitebe ebirungi eby’arozere rundi habwaki kiri kirungi omwegi kweyongera kwetegereza ebiri omu isomo.

⁹ Nitubaijukya ngu orupapura 79 kuhika 81 orw’ekitabu Ministry School eky’omwegi nirwo osemeriire kukozesa okumukebera. Hanyuma y’omwegi kuheereza orubazo rwe, omuroleerezi aija kukebera ekitabu kye kandi aija kumukaguza obw’araaba akozere ebimuragiirwe ha kumaliira kw’isomo ery’abaire n’akoraho. Asobora kwongera kumusiima n’okumuheereza obukonyezi oburukukiraho hanyuma y’oruso’rokano rundi ekiro kindi. Obukonyeezi bwona buli mwegi aratunga asemeriire kubutwara nk’omugisa ogw’okumukonyera kweyongera kukurakurana omu by’omwoyo. —1 Tim. 4:15.

¹⁰ Omwegi kakuba ahinguza obwire, omuroleerezi rundi omukonyezi we asemeriire kumumanyisa omu mulingo ogw’amagezi n’ateera akadde rundi n’akozesa omulingo ogundi gwona. Hanyuma y’omwegi kuhuura akadde, asemeriire kumaliira ekyabaire n’abaza, nukwo aruge ha kituuti.—Rora Ministry School book, rup. 282, kac. 4.

¹¹ Boona abaine ebirukukwetagisa basobora kutaaha omw’Isomero ly’Omulimo gwa Ruhanga (Rora Ministry School book, orup. 282, kac. 6.) Okutendekebwa kunu kukonyiire abantu ba Yahwe kutebeza n’okwegesa omu mulingo ogw’obumanzi, n’okwebundaaza, hamu n’okugonza. Yahwe kimusemeza kurora ebintu atwegeseze kuraba omw’isomero linu nitubikozesa okumuramya n’okuhaisaniza ibara lye.—Zab. 148:12, 13; Isa. 50:4.