Oburagirizi obw’Okuhondera omu Rusorrokano orw’Obwomeezi n’Obuheereza Bwaitu nk’Abakristaayo

Ebirimu

1. Oburagirizi obuli ha kihandiiko kinu nibwija kukonyera abo boona abaine ebicweka omu rusorrokano orw’Obwomeezi n’Obuheereza Bwaitu nk’Abakristaayo. Abo boona abaine ebicweka basemeriire kusoma oburagirizi oburukukwata ha bicweka ebibaine ebiri omu katabu Obwomeezi n’Obuheereza Bwaitu nk’Abakristaayo hamu n’omu kihandiiko kinu batakatandikire kutekaniza ekicweka kyabo. Abatebezi boona basemeriire kwekambisibwa kugonza kuha ebicweka by’abeegi. Abandi nabo abatakafookere batebezi baitu abaija omu nsorrokano, kandi abarukutwaza obwomeezi bwabo omu mulingo ogurukwikiranganiza na Baibuli eby’erukwegesa nibasobora kuha ebicweka by’abeegi. Omuroleerezi w’Orusorrokano orw’Obwomeezi n’Obuheereza Bwaitu asemeriire kubazaaho ebirukwetagisa n’omuntu weena ow’atakafookere mutebezi owarukugonza kwejumbira omu isomero linu kandi hanyuma amuleke ayecweremu uwe wenka obwaraaba nahikiriza ebirukwetagisa. Owarukumwegesa Baibuli asemeriire kubaho obwaraaba nabaza nauwe (rundi omuzaire owali omu mananu). Ebirukwetagisibwa nibyo bimu n’eby’ogu arukugonza kufooka omutebezi ow’atakabatiziibwe.—od-E sur. 8 kac. 8.

OKWANJURA

2. Edakiika emu. Buli wiiki hanyuma y’okukinguraho orusorrokano n’ekizina hamu n’okusaba, ceyamaani w’orusorrokano, naija kuleetera abantu ekihika habw’ebi ebiraaba omu rusorrokano. Ceyamaani w’orusorrokano naija kuteeka omutima ha nsonga ezirakira kugasira ekitebe.

EBITURUKWEGA KURUGA OMU BAIBULI

3. Orubazo: Edakiika ikumi. Omutwe n’ensonga nka ibiri rundi isatu ez’okubazaaho omu rubazo runu nizisangwa omu katabu k’ensorrokano. Orubazo runu rusemeriire kuheebwa omugurusi rundi omuheereza anyakuhikire kuha embazo. Obuturaabaga nitugenda kutandikaho ekitabu kihyaka ekya Baibuli, nihaija kubahoga vidiyo erukukyanjura. Arukuha orubazo n’asobora kwoleka omulingo vidiyo enu ine akakwate n’omutwe gw’orubazo. Baitu akole kyona ekirukusoboka kubazaaho ensonga zoona ezolekerwe omu katabu ak’ensorrokano. Kandi, asemeriire n’okukozesa ebisisani ebyolekerwe kusobora kugumya ensonga enkuru. N’asobora n’okubazaaho ebintu ebindi ebyaseruliizeeho kakuba biba biine akakwate n’ensonga ezirukubazibwaho.

4. Eby’Omuhendo Kuruga Omu Baibuli: Edakiika ikumi. Ekicweka kinu ky’okukaguza n’okugarukamu kandi arukukyebembera tasemeriire kubanza kwanjura rundi kukingaho n’ebigambo eby’okumalirra. Kisemeriire kuheebwa omugurusi rundi omuheereza arukwikirizibwa kuha ebicweka. Asemeriire kukaguza ebikaguzo byona. Ekindi, n’asobora kucwamu obukiraaba nikyetagisa kusoma enkarra zoona rundi kusomaho enke. Abarukugarukamu basemeriire kukozesa obutikitiki 30 n’obutahika.

5. Okusoma Baibuli: Edakiika ina. Omwegi araheebwa ekicweka kinu asemeriire kuba ali musaija. Omwegi asemeriire kuha ekicweka kye atabandize kukyanjura, kandi obwaramara kusoma atongeraho ekigambo kindi kyona. Ceyamaani w’orusorrokano asemeriire kufaayo muno kukonyera abeegi kusoma kurungi, kusoma omu mulingo ogurukwetegerezebwa, kusoma kurungi ensonga enkuru, kuhindahindura iraka, kuhumuzamu nambere kirukwetagisa, n’okusoma omu mulingo gwe ogwa buli kiro. Habwokuba ebicweka ebimu eby’okusoma omu Baibuli biba bigufu kandi ebindi biba biraihire, Omuroleerezi w’Orusorrokano orw’Obwomeezi n’Obuheereza Bwaitu asemeriire kutekerezaaho obusobozi bw’abeegi obwarukuba nagaba ebicweka binu.

WEKAMBIRE OBUHEEREZA

6. Edakiika ikumi na itaano. Ekicweka kinu kitekaniziibwe kukonyera boona kwetekaniriza obuheereza n’okwongera ha bukugu bwabo obw’okubaza n’abantu, obw’okutebeza n’okwegesa. Abagurusi nabo nibasobora kutunga ebicweka by’abeegi kakuba kyetaagisa. Buli mwegi asemeriire kukoraho isomo omu katabu Okwegesa rundi Gonza Abantu erikwolekwa omu bugo haihi n’ekicweka ekiri omu katabu k’ensorrokano. Obwire obumu nihaija kubaho ebicweka eby’okuleeta hamu ebitekerezo. Ekicweka eki, kisemeriire kwebemberwa omugurusi rundi omuheereza ow’aikiriziibwe.—Rora akacweka 15 akarukubazaaho ebicweka eby’okuleeta hamu ebiteekerezo.

7. Kutandika Kubaza n’Omuntu: Ekicweka kinu nikisobora kukorwa omwegi omusaija rundi omukazi. Obukiraaba nikiheebwa ow’oruganda, omukonyezi we asemeriire kuba w’oruganda rundi omu ha bantu abaarukwikara nabo omu ka, kandi obukiraaba nikiheebwa munyaanya itwe, omukonyezi we asemeriire kuba munyaanya itwe rundi omu ha bantu abaarukwikara nabo omu ka. Omwegi n’omukonyezi we nibasobora kwikarra rundi kwemerra.—Kumanya ebirukukiraho ha bibarabaza n’omulingo barakikoramu, rora obucweka 12 na 13.

8. Kugarukira Omuntu ow’Otebiize: Ekicweka kinu nikisobora kukorwa omwegi omusaija rundi omukazi. Obukiraaba nikiheebwa ow’oruganda, omukonyezi we asemeriire kuba w’oruganda, kandi obukiraaba nikiheebwa munyaanya itwe, omukonyezi we asemeriire kuba munyaanya itwe. (km 5/97-E orupapura. 2) Omwegi n’omukonyezi we nibasobora kwikarra rundi kwemerra. Omwegi asemeriire kuha ekicweka kye natandikira nambere yagarukiire obuyabalize n’omuntu.—Kumanya ebirukukiraho ha bibarabaza n’omulingo barakikoramu, rora obucweka 12 na 13.

9. Kufoora Abantu Abegeswa: Ekicweka kinu nikisobora kukorwa omwegi omusaija rundi omukazi. Obukiraaba nikiheebwa ow’oruganda, omukonyezi we asemeriire kuba w’oruganda, kandi obukiraaba nikiheebwa munyaanya itwe, omukonyezi we asemeriire kuba munyaanya itwe. (km 5/97-E orupapura. 2) Omwegi n’omukonyezi we nibasobora kwikarra rundi kwemerra. Kakuba oba nooyoleka ngu okwega kubaire kuliyo nikugenda omu maiso, tikirukwetaagisa omwegi kubanza kwanjura rundi kubaza ebigambo ebirukwoleka ngu namalirra, oihireho kakuba isomo eryarukuba nakoraho liba limuragiire kukikora. Tikirukwetagisa kusoma obucweka bwona omu iraka erirukuhulirwa nobukiraaba ngu obwire obumu nasobora kubusoma bwona.

10. Kusoborra Enyikiriza Zaawe: Ekicweka kinu obukiraaba kiri omu mulingo gw’orubazo, kisemeriire kuheebwa omwegi omusaija. Kakuba kiba kiri omu mulingo ogw’ekyokurorraho, nikisobora kukorwa omwegi omusaija rundi omukazi. Obukiraaba nikiheebwa ow’oruganda, omukonyezi we asemeriire kuba w’oruganda rundi omuntu ow’arukwikara nauwe omu ka, kandi obukiraaba nikiheebwa munyaanya itwe, omukonyezi we asemeriire kuba munyaanya itwe rundi omu ha bantu abaarukwikara nabo omu ka. Omwegi asemeriire kugarukamu ekikaguzo ekikaguziibwe omu mulingo ogurukwetegerezebwa kurungi kandi ogw’amagezi nakozesa endagirro eyemuhairwe. Omwegi nasobora kucwamu kukozesa rundi kutakozesa ekitabu ekijuliziibwe omu kicweka kye.

11. Orubazo: Ekicweka kinu kisemeriire kukorwa omwegi omusaija kandi akihe omu mulingo ogw’orubazo hali ekitebe. Orubazo obururaaba nirusigikirra ha kacweka kuruga omu Ebyongirweho A omu katabu Gonza Abantu, omwegi asemeriire kusoborra omulingo orukarra rundi enkarra zisobora kukozesebwa omu buheereza. Ekyokurorraho, nasobora kusoborra nidi orukarra rusemeriire kukozesebwa, amakuru g’orukarra, n’omulingo rusobora kukozesebwa kusoborra omuntu. Orubazo obururaaba nirusigikirra ha nsonga kuruga omu limu ha masomo agali omu katabu Gonza Abantu, omwegi asemeriire kuta omutima ha mulingo asobora kukozesa ensonga egi omu buheereza. Nasobora kubazaaho ekyokurorraho ekibaziibweho omu nsonga 1 ey’isomo rundi abazeeho enkarra ezindi ez’olekerwe omu isomo, obukiraaba nikikonyera.

12. Eby’Orabaza: Ebiri omu kacweka kanu hamu n’akakwongeraho nibikwataho ebicweka “Kutandika Kubaza n’Omuntu” na “Kugarukira Omuntu ow’Otebiize.” Rundi buli kyolekerwe kundi, ekigendererwa ky’omwegi nukwo kubazaaho n’omuntu amananu agali omu Baibuli kusigikirra ha muntu owaliyo nabaliza n’okusigaho ekyarabazaaho omurundi ogundi. Omwegi asemeriire kubazaaho omutwe ogwa baingi barukutekerezaaho kasumi ako kandi ogukizire kukwataho abantu omu kiikaro ekyarukwikaramu. Nasobora kucwamu kwanjura akatabu rundi vidiyo kuruga omu Bikwato Byaitu Ebitukozesa Kwegesa. Omu kiikaro kyokubaza ebigambo ebikwasirwe omu mutwe, abeegi basemeriire kwemanyiza obukugu obw’okubaza n’abantu, nk’okwoleka okufaayo n’okubaza omu mulingo ogwa buli kiro.

13. Omulingo gw’okukikoramu: Omwegi asemeriire kuta omu nkora emiringo enu ey’okukoramu ekicweka kye kusigikirra ha nyikara ye. Ekyokurorraho:

(1) Enju ha nju: Enyikara enu netwarramu kutebeza enju ha nju—kabe n’atebeza maiso ha maiso, ha simu, rundi nahandiika amabbaruha—kandi nagarukira omuntu ouyatebebiize omu kutebeza okw’enju ha nju.
(2) Kutebeza okwahonaaho: Enyikara enu n’ebazaaho kukozesa buli mugisa ogw’oratunga kubaza n’omuntu okamalirra omutebiize. Nikisobora kutwarramu kubazaaho Ekyahandiikirwe n’abantu ab’otangatangana ha mulimo, ha isomero, nambere orukwikara, omu biiruka, rundi omu kiikaro ekindi kyona obworukuba nokora emirimo yaawe eya buli kiro.
(3) Kutebeza okw’omu rwijwire: Enyikara enu nesobora kutwarramu kukozesa akagaali, kubaza n’abantu omu biikaro ebya bizinesi, kutebeza ha nguudo, rundi kutebeza omu biikaro eby’okuhumurramu, eby’okwemerezaamu ebiiruka, rundi hona nambere tusanga abantu.

14. Kukozesa Vidiyo Hamu n’Ebitabu: Kusigikirra ha nyikara, omwegi nasobora kucwamu kukozesa vidiyo rundi ekitabu. Ekicweka ky’omwegi obukiraaba kirumu vidiyo rundi kakuba omwegi acwamu kukozesa emu ha vidiyo, asemeriire kugyanjura kandi agibazeeho baitu atagitaho.

OBWOMEEZI BWAITU NK’ABAKRISTAAYO

15. Hanyuma y’ekizina, edakiika 15 ezirahonderaho omu kicweka kinu niziija kubamu ekicweka kimu rundi bibiri ebitekaniziibwe kukonyera ab’oruganda kuta omu nkora oburagirizi obw’omu Kigambo kya Ruhanga. Oihireho kyolekerwe kundi, ebicweka binu bisemeriire kuheebwa abagurusi n’abaheereza, baitu kandi ekicweka ky’ebyetaago by’ekitebe kisemeriire kuheebwa abagurusi bonka. Kakuba ekicweka kiba kiri ky’okuleeta hamu ebitekerezo, arukwebembera nasobora kukaguza ebikaguzo ebindi kwongerereza hali ebi ebirukuba bimuhairwe. Okwanjura kwe kusemeriire kuba kugufu nukwo kimusobozese kutunga obwire obw’okubazaaho ensonga enkuru n’abarukumuhuliriza kuhayo eby’okugarukamu. Kakuba ekicweka kiba kirumu kukaguza n’okugarukamu, nikiba kirungi owarukukaguzibwa kugarukamu ali mumaiso obukiraaba nikisoboka omu kiikaro ky’okugarukamu ali nambere aikaliire.

16. Okwega Baibuli nk’Ekitebe: Edakiika makumi asatu. Ekicweka kinu kisemeriire kuheebwa omugurusi w’ekitebe. (Ebitebe ebitaine abagurusi abarukumara nibisobora kukozesa abaheereza kwebembera ekicweka kinu.) Akatebe k’abagurusi kasemeriire kucwamu nooha ahikire kwebembera ekicweka kinu. Abarakomwamu kwebembera ekicweka kinu basemeriire kwihayo ensonga enkuru n’okulinda obwire, bakozese kurungi ebyahandiikirwe ebirumu ensonga enkuru, kandi bakonyere buli omu kurora omulingo ensonga ezirukubazibwaho zisobora kumukonyera. Abo abaikirizibwe kwebembera ekicweka kinu nibaija kugasirwa omu buragirizi oburukukwata ha mulingo ogw’okwebemberamu ebicweka ebirumu kukaguza ebikaguzo. (w23.04 orupapura. 24, akasanduuko) Hanyuma y’ekicweka ekisemeriire kusomwa wiiki egi kuhwayo, tikirukwetagisa kugumizaamu habwokugonza kumarayo obwire. Obukiraaba kisobokere, buli wiiki mukozese ab’oruganda abarukwahukana kwebembera ekicweka kinu n’okusoma obucweka. Ceyamaani kakuba asaba arukwebembera Okwega Baibuli nk’Ekitebe kukora ebintu omu bugufu, arukwebembera aine kucwamu omulingo arayebembera ekicweka kinu omu bugufu. Nikisobora kwetagisa obucweka bumu kutabusoma.

OKUMALIRRA

17. Edakiika isatu. Ceyamaani w’orusorrokano naija kurabamu omu bugufu ensonga enkuru ezimwegere omu rusorrokano. Obwire obu buraaba bukyaroho, naasobora kuraaliza abarukuhuliiriza kubazaaho ensonga ezibagasiire. Naija n’okubazaaho omu bugufu ensonga ezirukwija kuba omu rusorrokano rwa wiiki erukuhonderaho. N’asobora n’okubaza amabara gaabo abaine embazo wiiki erukwija obwaraaba akyaine obwire. Oihireho kyolekerwe kundi, obuharaaba haroho ebirango n’ebbaruha z’okusomera ekitebe, ceyamaani azisome rundi arange ebirango. Ebintu ebya buli kiro nk’entekaniza z’okugenda omu buheereza n’ez’okuyonja, tizisemeriire kurangwa omu maiso g’ekitebe baitu zisemeriire kutekwa ha rubbaho orw’amabbaruha. Edakiika zinu obuziraaba zitarukumara kuranga ebirango n’okusoma amabbaruha, ceyamaani w’orusorrokano asemeriire kusaba ab’oruganda abaine ebicweka omu kicweka Obwomeezi Bwaitu nk’Abakristaayo kumusigirayo edakiika nke. (Rora obucweka 16 na 19.) Orusorrokano rusemeriire kumalirra n’ekizina hamu n’okusaba.

KUSIIMA N’OBUHABUZI

18. Hanyuma ya buli mwegi kuha orubazo rwe, ceyamaani aine edakiika nk’emu kusiima n’okuhabura omwegi nakozesa isomo elyabaire nakoraho. Ceyamaani obwaraaba nayeta omwegi kuha orubazo rwe, tarukwija kurangirra obuhabuzi omwegi arukukoraho. Baitu hanyuma y’omwegi kuha orubazo rwe kandi na hanyuma ya ceyamaani kumusiima, n’asobora kugambira ekitebe obuhabuzi omwegi abaire nakoraho kandi ayoleke n’ensonga habwaki omwegi akozere kurungi kusigikirra ha buhabuzi obu, rundi amusoborre omu mulingo gw’embabazi ensonga habwaki asemeriire kwongeramu amaani ha isomo eri n’omulingo arakikoramu. Kandi ceyamaani n’asobora n’okubazaaho ebintu ebindi ebirungi ebibaire omu kyokurorraho ky’omwegi obwararora ngu nikisobora kugasira omwegi rundi ekitebe. Kusigikirra ha bwetago bw’omwegi, ceyamaani n’asobora kwongera kukozesa burocuwa Gonza Abantu, Okwegesa rundi ekitabu Ministry School hanyuma y’orusorrokano rundi ekiro ekindi kuha omwegi obuhabuzi oburamukonyera ha isomo eri rundi ha isomo erindi. Kumanya ebirukukiraho ha bujunanizibwa bwa Ceyamaani w’Orusorrokano rw’Obwomeezi n’Obuheereza Bwaitu hamu n’obw’omuhabuzi, rora obucweka 19, 24, hamu na 25.

KULINDA OBWIRE

19. Busaho omuntu asemeriire kuhingura ha bwire obumuhairwe omu kicweka kye n’obwarukuba ali ceyamaani. N’obukiraaba ngu akatabu k’ensorrokano kooleka obwire obwa buli kicweka, kakuba ensonga ziba zirugireyo kurungi, tikirukwetagisa kwongeraho ebintu ebindi ngu nukwo okozese obwire bwona obukuhairwe. Kakuba ow’oruganda arukuha ekicweka kyona ahinguza obwire obuhairwe ekicweka kye, ceyamaani w’orusorrokano rundi omuhabuzi asemeriire kumuheera ha rubaju obuhabuzi. (Rora obucweka 24 na 25.) Orusorrokano rwona otwaliremu ebizina n’esaara rusemeriire kumara esaaha 1 n’edakiika 45.

ORUBUNGO RW’OMUROLEEREZI W’EKICWEKA

20. Ekitebe obukiraaba kiine orubungo rw’omuroleerezi w’ekicweka, ebicweka byona ebyolekerwe omu Katabu k’Ensorrokano bisemeriire kuheebwa oihireho: Okwega Baibuli nk’Ekitebe habwokuba omuroleerezi naija kukozesa edakiika 30 ez’ekicweka kinu kuha orubazo rwe orw’obuheereza. Orubazo runu rutakatandikire, ceyamaani w’orusorrokano naija kurabamu omu bugufu ebimwegere n’ebya wiiki erukwija, obuharaaba haroho ebirango abirange, kandi obuharaaba haroho ebbaruha ezirukwetaagisa kusomwa nazo azisome, hanyuma araalize omuroleerezi w’ekicweka. Hanyuma y’omuroleerezi kumara orubazo rwe, naija kukingaho orusorrokano n’ekizina ekyakomere. Kandi n’asobora kuraaliza ow’oruganda ondi kukingaho n’esaara. Ekitebe kyanyu obukiraaba kigira kilaasi endi, timusemeriire kuba nayo omu wiiki y’orubungo rw’omuroleerezi. Obumuraaba mwine guruupu n’esobora kugenda omu maiso n’ensorrokano zaayo n’omu wiiki y’orubungo rw’omuroleerezi. Baitu guruupu enu esemeriire kweteraniza ha kitebe kyona omu bwire bw’orubazo rw’omuroleerezi orw’okubanza orwa hagati omu wiiki.

WIIKI Y’ORUSORROKANO ORUKOOTO

21. Tihasemeriire kubaho ensorrokano zoona omu wiiki ey’orusorrokano orukooto. Ekitebe kiine kwijukibwa ngu ebimubaire musemeriire kwega nk’ekitebe, buli omu n’asobora kubyesomesa nk’omuntu rundi nk’eka.

WIIKI Y’EKIIJUKYO

22. Kakuba Ekiijukyo kibaho omu kimu ha biro bya wiiki, orusorrokano orw’Obwomeezi n’Obuheereza Bwaitu tirusemeriire kubaho.

OMUROLEEREZI W’ORUSORROKANO ORW’OBWOMEEZI N’OBUHEEREZA BWAITU

23. Akatebe k’abagurusi nikaija kukomamu omugurusi omu kuba Omuroleerezi w’Orusorrokano orw’Obwomeezi n’Obuheereza Bwaitu. Nuwe arukwija kujunanizibwa n’okurora ngu ensorrokano zagenda kusigikirra ha buragirizi obuhairwe. Asemeriire kukoragana kurungi n’ow’oruganda arukukora nk’omuhabuzi. Akatabu k’ensorrokano obukaraturuka, Omuroleerezi w’Orusorrokano rw’Obwomeezi n’Obuheereza Bwaitu naija kugaba ebicweka byona eby’emyezi ebiri. Kinu nikitwarramu kugaba ebicweka ebitali by’abeegi, hamu n’abarakora nka ba ceyamaani hali abo abaikiriziibwe akatebe k’abagurusi hamu n’ebicweka by’abeegi. (Rora obucweka 3-16 hamu na 24.) Obwaraaba naha abeegi ebicweka, asemeriire kutekerezaaho emyaka y’omwegi, obukugu, n’omulingo arayehurramu ha kintu ekirabazibwaho. Asemeriire kukora nikyo kimu obwaraba nagaba ebicweka ebindi eby’orusorrokano. Buli muntu asemeriire kuheebwa ekicweka kye nihaburayo wiiki isatu akihe. Akapapura Our Christian Life and Ministry Meeting Assignment (S-89) kasemeriire kukozesebwa kwoleka abeegi ebicweka byabo. Omuroleerezi w’Orusorrokano orw’Obwomeezi n’Obuheereza Bwaitu asemeriire kurora ngu puroguraamu y’orusorrokano orwa hagati omu wiiki etairwe ha rubbaho rw’okuhanikaho amabbaruha. Akatebe k’abagurusi nikasobora kukoma omugurusi ondi rundi omuheereza kumukonyera. Baitu abagurusi bonka nubo basemeriire kukozesebwa kugaba ebicweka ebitali by’abeegi.

CEYAMAANI W’ORUSORROKANO

24. Buli wiiki, hasemeriire kubaho omugurusi omu arukukora nka ceyamaani kwebembera orusorrokano rwona. (Omu biikaro nambere hatali abagurusi abarukumara, abaheereza nibasobora kukozesebwa nk’aba ceyamaani.) Obujunanizibwa bwe nibutwarramu kutekaniza ebigambo ebyarakozesa kwanjura n’okukingaho orusorrokano. Kandi nuwe arayeta buli muntu anyakwine ekicweka. Kusigikirra ha muhendo gw’abagurusi abali omu kitebe kyanyu, nauwe n’asobora kwebembera ebicweka ebimu omu rusorrokano, kukira muno ebicweka ebirumu kwoleka vidiyo hataroho kugibazaaho. Asemeriire kubaza ebigambo bike muno hanyuma ya buli kicweka. Akatebe ak’abagurusi nikaija kucwamu mugurusi ki araheebwa obujunanizibwa obu. Kusigikirra ha nyikara enyakuroho, buli mugurusi kuruga omuli abo abakomerwe kuba ba ceyamaani n’asobora kukora nka ceyamaani buli hanyuma y’akasumi, baitu omuroleerezi w’Orusorrokano orw’Obwomeezi n’Obuheereza Bwaitu uwe n’asobora kukora nka ceyamaani emirundi nyingi kukira abagurusi abandi. Omugurusi obwaraaba n’asobora kwebembera ekicweka Okwega Baibuli nk’Ekitebe, eki nikyoleka ngu n’asobora kukozesebwa nka ceyamaani. Baitu mwijuke ngu omugurusi arakora nka ceyamaani aine obujunanizibwa bw’okusiima kandi kakuba kyetagisa n’okuhabura abeegi abaine ebicweka omu mulingo ogw’okugonza kandi ogurabakonyera kweyongera kukurakurana. Kandi ceyamaani aine obujunanizibwa bw’okurora ngu ensorrokano zaahwera omu bwire. (Rora obucweka 17 na 19.) Ceyamaani obwaraaba agondeze kandi mwine omwanya ogurukumara ha katuuti, akozese omuzindaaro gundi ha rubaju nukwo obwaraaba nayanjura ekicweka ekirukuhonderaho, ow’oruganda ow’asemeriire kukyebembera abe ayemeriire ira ha muzindaaro ogundi. Ekindi, ceyamaani nasobora kwikarra ha rubaju ha katuuti abeegi obubaraaba nibaha ebicweka byabo otwaliremu n’omwegi arukusoma Baibuli. Kinu nikisobora kukonyera kulinda obwire.

OMUHABUZI

25. Obujunanizibwa bw’omuhabuzi nibwija kuba bw’okuheera ha rubaju obuhabuzi abagurusi n’abaheereza ha mulingo babaire basemeriire kuha ebicweka byabo omu rusorrokano orw’Obwomeezi n’Obuheereza Bwaitu, bahaire orubazo rwa boona, rwebembiire rundi ow’asomere Omunaara gw’Omulinzi, rundi Okwega Baibuli nk’Ekitebe.—Rora akacweka 19.

KILAASI EZINDI

26. Ebitebe nibisobora kuba na kilaasi ezindi ez’abeegi kusigikirra ha bwingi bw’abeegi abali omu kitebe. Buli kilaasi esemeriire kuba n’omuhabuzi wayo, kandi kirungi abe mugurusi. Obukiraaba kitasobokere, mukozese omuheereza anyakwine obukugu. Akatebe k’abagurusi kasemeriire kucwamu nooha asemeriire kuhebwa obujunanizibwa bunu kandi obukiraaba nikyetaagisa kuhindura obujunanizibwa bunu buli hanyuma y’akasumi. Omuhabuzi araakomwa asemeriire kuhondera obuhabuzi obwolekerwe omu kacweka 18. Obumuraaba mwine kilaasi endi, abeegi basemeriire kusabwa kugenda omu kilaasi enu ekicweka Eby’Omuhendo Kuruga Omu Baibuli obukiraaba nikihwa. Basemeriire kugaruka baketeranizaaho ekitebe hanyuma y’ekicweka ky’okumalirra omu bicweka ebyabeegi.

VIDIYO

27. Orusorrokano runu nirwija kubamuga vidiyo. Vidiyo z’okwoleka omu rusorrokano runu nizisobora kusangwa omu JW Library® app kandi nimusobora kukozesa ebyoma bya kalimagezi ebirukwahukana kuzitunga.

S-38-RT 9/25