Hansi y’obulemi bwa Ruhanga, ebihangwa byona bikaba biri omu bumu kandi biri omu businge

Habwaki Nitwetaaga Obukama bwa Ruhanga?

Abantu ab’okubanza obubahangirwe, Omuhangi waitu, arukwetwa Yahwe nuwe wenka akaba ali mulemi. Byona ebiyakoliire abantu akabikora habw’okugonza. Akateekaniza orugonjo orurungi omu Adeni kandi yaruha abantu kurwikaramu. Kandi akabateramu ebyokulya ebirukumara. Ekintu ekindi, akaha abantu omulimo omurungi gw’okukora. (Okubanza 1:28, 29; 2:8, 15) Abantu baakwikaire omu businge kakuba baikiriize kwikara hansi y’obulemi bwa Ruhanga ow’okugonza.

Adamu akwasire ekijuma Hawa ekyamuhaire kandi Yahwe ekiyabatangire. — Abantu ab’okubanza bakanga kuba hansi y’Obulemi bwa Ruhanga

Baibuli eyoleka ngu malaika omujeemu, ayamazire yayetwa Sitaani Diabolo, akagamba ngu Ruhanga tasemeriire kulema abantu. Akaba namanyisa ngu abantu nibasobora kutunga okusemererwa kakuba baruga hansi y’obulemi n’oburagirizi bwa Ruhanga. Eky’obusaasi, abazaire baitu Adamu na Hawa, bakahondera Sitaani kandi bajeemera Ruhanga.—Okubanza 3:1-6; Okusuku’rwa 12:9.

Habwokuba Adamu na Hawa bakanga kuba hansi y’obulemi bwaRuhanga, bakafeerwa Orugonjo rwabo orurungi hamu n’omugisa ogw’okwomeera ebiro n’ebiro baine obwomeezi obuhikiriire. (Okubanza 3:17-19) Encwamu yabo ekakwataho n’abaana ababakaba nibagenda kuzaara. Baibuli n’egamba ngu habwokuba Adamu akasiisa, ‘ekibi kikataaha omu nsi n’okufa obw’ekibi.’ (Abarumi 5:12) Ekibi kikaleeta ekizibu ekindi: “Omuntu omu [akaba] nobusobozi okukora kubi omuntu ondi.” (Omugambizi 8:9) Eki nikimanyisa ngu omuntu obwalema omuntu mutaahi we, kirugamu ebizibu bingi.

OBULEMI BW’ABANTU BUTANDIKA

Nimurodi ayemeriire omu mulingo gw’emyehembo kandi enyuma ye abantu baliyo nibombeka ekyombeko. — Nimurodi akajeemera Yahwe

Omuntu omulemi ayabandize kubazibwaho omu Baibuli nuwe Nimurodi. Kandi akahakaniza obulemi bwa Yahwe. Kurugira kimu omu busumi bwa Nimurodi, abantu abalemi baikaire nibakozesa obusobozi bwabo kukora kubi abandi. Nk’emyaka 3,000 enyuma, Omukama Sulemani akahandiika ati: “Dora, amaizi omu maiso gabo abenderezebwa, kunu batanyina muhumuza; kandi ha rubaju rwabo ababenderiize hakaba haroho obusobozi, baitu bo bakaba batanyina muhumuza.”—Omugambizi 4:1.

N’omu kasumi kanu haroho ekizibu nikyo kimu. Omu 2009, ekitabu ekyatiirwe ekitebe eky’Amahanga Agetereine rundi United Nations kikooleka ngu “obulemi obubi nubwo buletiire ebizibu kweyongera omu nsi.”

KANU NUKO AKASUMI OBUKAMA KUGIRA EKIBWAKORA!

Ensi neyetaaga abalemi abarungi hamu na gavumenti erukukirrayo kimu oburungi. Kandi kinu nikyo Omuhangi waitu arukuturaganiza!

Ebisisani: Ebirugire omu gavumenti z’abantu. 1. Omukazi kuruga omu ihanga lya Asia aikaliire ha rugondo orwiragwire kandi ahimbire omwana arukurra. 2. Omugurusi anyakurwaire ali ha kitabu omu irwarro. 3. Abaserukale bali omu bulemu nibatera amasasi. 4. Abarukwesalinga bahimbire ebipande kandi nibatokera haiguru n’ekiniga. 5. Omukazi na muhara we bemeriire aheru y’enju yabo, kandi basangire egilaasi y’orwigi rwa hairembo eyatikire. 6. Orubuga orwijwiremu omwika hamu n’ewaya ez’amasanyarazi. — Na gavumenti ezirukukirayo oburungi ziremerwe kumaraho ebizibu by’abantu

Ruhanga ataireho Obukama rundi gavumenti ey’erigaruka omu kiikaro ky’obulemi bw’abantu kandi Obukama bwe “buligumaho ebiro nebiro.” (Danieri 2:44) Bunu nubwo Obukama obukaikuru n’obukaikuru bw’abantu, obubaikaire nibasaba ngu bwije. (Matayo 6:9, 10) Ruhanga tali nuwe alirema Obukama bunu. Baitu, ataireho Omulemi, ayabaireho nk’omuntu kandi ayaikaireho omu nsi. Nooha Ruhanga ow’akomere?