Okitobba

Emirundi erukukira obwingi tutunga oburagirizi kuruga hali abagurusi, h’abaroleerezi b’ebicweka, ha ofiisi y’itaagi, hamu na h’Akatebe Akalemi obu tukoonyera kuheereza Yahwe. Baitu kakuba tukora ebintu binu, nituba nitugendera omu kurora. Kandi kakuba obwire obumu tulemwa kwetegereza ensonga habwaki tuhairwe oburagirizi obumu? Nitusobora kuta omutima ha bintu ebibi ebirukwija kutuhikaho habw’oburagirizi obu. Nitusobora n’okutandika kuta omutima ha butahikirra obw’ab’oruganda abatuhaire oburagirizi. Obu tugendera omu kwikiriza, twesiga ngu Yahwe naayebembera ekitebe kye kandi ngu naamanya ekirukukirayo oburungi hali itwe. Ekirugamu, twanguha kworoba kandi tukikora twine enteekereza ey’ehikire. (Baheb. 13:17) Tukyetegereza ngu kuba bantu abahulizi kireetera ekitebe kuba omu bumu. (Bef. 4:​2, 3) Noobu kiraaba ngu ab’orugnda abarukutwebembera tibahikiriire, nitukigumya ngu Yahwe naija kutuha emigisa habw’okuba abantu abahulirizi. (1 Sam. 15:22) Omu kasumi ke, naija kutereekereza buli kintu kyona ekirukwetaagisa kutereekerezebwa. w25.03 23-24 ¶13-14

Tuli omu kasumi akarukusemeza. Buli kiro niturora ebintu Baibuli ebi yabalizeeho nibihikirra. Ekyokurorraho, niturora “omukama wobukiizi bwobulyo” hamu ‘n’omukama wobukiizi bwemoso’ nibasindikangana habwokuba buli omu naagonza kulema ensi. (Dan. 11:40) Niturora amakuru amarungi ag’Obukama bwa Ruhanga nigatebezebwa omu nsi yoona kandi obukaikuru n’obukaikuru bw’abantu nibacwamu kuheereza Yahwe. (Is. 60:22; Mat. 24:14) Kandi nitutunga ebyokulya bingi eby’omwoyo omu kasumi akahikire. (Mat. 24:​45-47) Yahwe naagumizaamu kutukoonyera kwetegereza ebintu ebikuru ebiri haihi kubaho. (Nfu. 4:18) Nitukigumiza kimu ngu omuhito omwingi gutakatandikire, nitwija kumanya byona ebi tusemeriire kumanya kusobora kugumiisiriza n’obwesigwa n’okwikara tuli omu bumu omu kasumi ako akagumire. Baitu, tusemeriire kukimanya ngu haroho n’ebintu ebitutamanyire ebirukwija kubaho omu kasumi akatali ka hara. w24.05 8 ¶1-2

Omuhandiiki wa Zabuli abazaaho kuhangirra. Okuhangirra nikimanyisa ki? Nikimanyisa kubazaaho omuntu ebisuba n’ekigendererwa eky’okumusiisa ibara. Omu Zabuli 15:3 nihatwijukya ngu abagenyi ba Yahwe tibakora ekintu kyona ekibi hali enganjani zaabo kandi tibageya bataahi baabo. (Zab. 15:1) Nitusobora tuta kwesanga nitugeya banywani baitu? Nitusobora kugeya omuntu tutakigenderiire kuraba omu kumubazaaho ebintu ebibi. Ekyokurorraho: (1) munyaanya itwe aleka kuheereza nka payoniya, (2) ow’oruganda na mukazi we baleka kuheereza ha Beseeri, rundi (3) ow’oruganda takyaheereza nk’omugurusi rundi omuheereza omu kitebe. Kyakubaire ky’amagezi kutebereza habwaki empindahinduka nka zinu zaakozerwe kandi okagambira abandi ebi orukuteekereza? Nihasobora kubaho ensonga habwaki empindahinduka nk’ezo zaakozerwe kandi itwe tutarukuzimanya. Kwongerraho, omugenyi omu heema ya Yahwe “[tagirra] obubi enganjaniye, nobukwakuba okugeya omutahiwe.” w24.06 11 ¶11-13

Kusobora kwongera ha kutiina oku twiniire Ruhanga, tusemeriire kuta omutima ha kumusemeza omu buli ncwamu yoona ei turukukora. Obu oraaba noosomaho ebyokurorraho eby’omu Baibuli, weekaguze, ‘Kakuba niinyowe ayaakubaire omu nyikara egi, ncwamu ki ei naakukozere?’ Ekyokurorraho, teeramu akasisani noohuliiriza entasi ikumi nibagamba ngu tibasobora kusingura Abakanaani. Waakwikiriize ebi barukugamba, na iwe okatandika kutiina abantu, rundi okugonza kwawe oku oiniire Yahwe nookugonza kukora ebirukumusemeza, byaakubaire by’amaani kukira okutiina abantu? Abaisaleeri boona abaarozere obwokurorraho bwa Yahwe omu Misiri, bakanga kwikiriza amananu Yosuha na Kalebu baabalize. Ekyarugiremu, bakafeerwa omugisa ogw’okutaaha omu Nsi ey’Ekaba Eraganiziibwe.—Kubar. 14:​10, 22, 23. w24.07 10 ¶7

Gomere mukazi wa nabbi Hoseya akalekaho Hoseya yagendera abasaija abandi. Tugambe ngu kikaba kitakyasoboka kwegarukamu? Yahwe ow’amanya ekiri ha mutima akagambira Hoseya ati: ‘Genda kandi, ogonze omukazi arukugonzebwa omusaija ondi baitu musiihani nka Yahwe oku agonza abaana ba Isaleeri, noobu bahindukira abacwezi.’ (Hos. 3:1; Nfu. 16:2) Weetegereze ngu omukazi wa Hoseya akaba naakyayejumbira omu kukora ekibi eky’amaani. Baitu Yahwe akagambira Hoseya kumuganyira n’okwongera kumutwaza nka mukazi we. Omu mulingo nugwo gumu, Yahwe akaba atalekereho abantu be abajeemu. Noobu kiraaba ngu bakaba nibakyakora ebintu ebibi muno, akaba naakyabagonza, kandi akagumizaamu naabakoonyera kwegarukamu n’okukora empindahinduka omu bwomeezi bwabo. Ekyokurorraho kinu nikyoleka ngu Yahwe ow’arora emitima naija kuhikirra omuntu ow’akyaliyo naakora ekibi ky’amaani kandi alengeho kumukoonyera kwegarukamu. w24.08 10 ¶7

Abakristaayo Abayudaaya aba kara bakahikwaho ekizibu eky’amaani. Kumara akasumi, Abayudaaya baali bantu ba Yahwe abakomerwemu. Omukama ayakiikirraga Yahwe yalemeraga Yerusalemu, kandi abantu baaramyaga Yahwe ha yekaru ey’ekaba eri omu Yerusalemu. Abayudaaya boona abeesigwa baahonderaga Ebiragiro bya Musa, abebembezi baabo ab’amadiini ebi baabeegesaaga. Enyegesa ezi zaakwatahoga ebyokulya ebi baalyaga, omulingo baaroramuga okusarwa, hamu n’enkoragana yaabo n’abanyamahanga. Baitu Yahwe akaba atakyaikiriza ebihongwa eby’Abayudaaya hanyuma y’okufa kwa Yesu. Kinu kikafooka kizibu ky’amaani hali Abakristaayo Abayudaaya abakaba bamanyiriire kuhondera Ebiragiro bya Musa. (Baheb. 10:​1, 4, 10) N’Abakristaayo abakuzire omu by’omwoyo nk’omukwenda Petero, kikabagumira kumanyirra empindahinduka zinu. (Ebik. 10:​9-14; Bag. 2:​11-14) Enyikiriza zinu empyaka, zikaleetera abeebembezi b’amadiini Abayudaaya kuhiiganiza Abakristaayo abo. w24.09 9 ¶4

Yahwe obu aha abantu be obujunaanizibwa, aba naabanihirramu kubuhikiiriza omu mulingo oguteekaniziibwe kurungi. (1 Kol. 14:33) Ekyokurorraho, Yahwe naagonza amakuru amarungi gatebezebwe omu nsi yoona. (Mat. 24:14) Kandi ahaire Yesu obujunaanizibwa obw’okwebembera omulimo ogu. Yesu akigumya ngu gwakorwa omu mulingo oguteekaniziibwe kurungi. Omu kyasa eky’okubanza, ebitebe obu byatandikwahoga omu biikaro ebirukwahukana, abagurusi baakomwaga kubyebembera n’okuha oburagirizi. (Ebik. 14:23) Omu Yerusalemu, akatebe akalemi akakaba nikatwarramu abakwenda n’abagurusi abamu abaali bamazire akasumi, baakoraga encwamu enkuru kandi ebitebe byona byanihirwaga kuzihondera. (Ebik. 15:2; 16:4) Habwokuba Abakristaayo bakahondera oburagirizi obu baaheebwaga, ‘ebitebe bikeeyongera kugumibwa omu kwikiriza, n’omuhendo gw’abantu abarukwikiriza gwayeyongera kukanya buli kiro.’—Ebik. 16:5. w24.04 8 ¶1

Nyenkyakara Nisani 16, abakazi abamu bakagenda ha kituuro nambere bakaba baabyamize omutumbi gwa Yesu. (Luk. 24:​1, 10) Leka tubazeeho ebyahikire hali omu h’abakazi arukwetwa Malyamu Magadalene. Malyamu obu yahikire ha kituuro akasanga busamu kantu. Hanyuma, akairuka yagambira Petero na Yohaana abairukire nibagenda ha kituuro kandi na uwe yabahondera. Hanyuma y’okukigumya ngu omu kituuro busamu kantu, Petero na Yohaana bakagaruka omu ka. Baitu Malyamu atagaruke omu ka. Akaikaraho ha kituuro narra. Baitu akaba atakimanyire ngu Yesu naamurora. Yesu akarora omukazi onu omwesigwa narra. Nahabweki akeyoleka Malyamu kandi yakora ekintu ekyamugarwiremu amaani. Akabaza na uwe kandi yamuha obujunanizibwa obukuru obw’okugambira abeegeswa abandi ngu Yesu ahumbuukire.—Yoh. 20:​17, 18. w24.10 13 ¶7

Musa akaheereza nka nabbi, omucwi w’emisango, omuduumizi kandi omunyabyafaayo. Akeebembera ihanga lya Isaleeri kuruga omu bwiru omu ihanga lya Misiri kandi yayerorra ebyamahano bingi muno Yahwe ebi yakozere. Yahwe akamukozesa kuhandiika ebitabu bitaano eby’okubanza ebya Baibuli, na Zabuli 90, kandi obundi na Zabuli eya 91. Nuwe asobora kuba yahandiikire n’ekitabu kya Yobu. Omu kaire kake atakafiire obu akaba aine emyaka 120, Musa akasorooza hamu Abaisaleeri yabaijukya ebintu ebi bakaba barabiremu kandi beeroliire. Bakaba beeroliire ebyamahano bingi Yahwe ebi yakozere otwaliiremu n’omulingo Yahwe yafubiire ihanga lya Misiri. (Kurug. 7:4) Bakaba barabire omu Nyanja ey’Erukutukura ey’ekaba ebaganiziibwemu kandi bakaba beeroliire okuhwerekerra kw’ihe lya Faraho. (Kurug. 14:​29-31) Obu bakaba bali omu irungu bakaba beeroliire obulinzi bwa Yahwe n’omulingo akaba naabafaaho. (Bir. 8:​3, 4) Kandi hati nkooku bakaba beeteekaniize kutaaha omu Nsi ey’Ekaba Eraganiziibwe, Musa akakozesa omugisa gunu kugarramu abantu amaani. w24.11 8-9 ¶3-4

Ekintu Yesu yabaliize abakwenda be ha mukoro gw’Ekiihuro kya Mukama Waitu Ekya Rwebagyo nikyahukanira kimu n’eki eki yagambiire ekitebe ky’abantu omu Galiraaya. Yesu eki yabalize ha Kiihuro kya Mukama Waitu Ekya Rwebagyo, kikaba nikikwataho guruupu entaito ey’abantu, baitu eki, eki yabaliize omu Galiraaya kikaba nikwataho abantu baingi. Yesu obu akaba ali omu Galiraaya omu mwaka gwa 32 Y.A.K., akaba naagambira Abayudaaya abakaba nibagonza ebyokulya eby’omubiri byonka. Baitu Yesu akalengaho kubakoonyera kwetegereza ngu hakaba haroho ekintu ekirukukirayo obukuru ekikaba nikikira ebyokulya eby’omubiri. Akooleka ekintu ekyakubasobozeseze kutunga obwomeezi obutahwaho. Kandi Yesu akongera yagamba ngu abo abaafiire nibaija kuhumbuuka ha kiro ekya ha mpero kandi boomeere ebiro n’ebiro. Akaba atarukumanyisa bake abakomerwemu, nkooku yakozere ha mukoro gw’Ekiihuro kya Mukama Waitu Ekya Rwebagyo. Oihireho, omu Galiraaya akabazaaho omugisa ogw’obwomeezi obutahwaho oguraatungwa abantu boona. w24.12 11 ¶10-11

Yahwe anoba omuntu weena ow’agonza ebikorwa eby’okurwana. (Zab. 11:5) Ajumirra banyineeka abatwaza kubi bakazi baabo. (Mara. 2:16) Nyineeka obu atwazi kubi mukazi we kikwataho enkoragana ye na Ruhanga. Yahwe naasobora n’okutahurra esaara ze. (1 Pet. 3:7) Banyineeka abamu bajuma bakazi baabo nibakozesa ebigambo ebirukusaaliza kandi eby’ekiniga. Baitu Yahwe anoba ‘okubiihirwa, ekiniga, kukaayuuka, n’okubaza ebigambo ebirukujuma.’ (Bef. 4:​31, 32) Nyineeka ow’abaza na mukazi we omu mulingo ogw’ekiniga tagarukira ha kusiisa obuswere bwe kyonka, baitu asiisa n’enkoragana ye na Ruhanga. (Yak. 1:26) Nikyo kimu na nyineeka ow’arora ebisisani eby’orwanju. Na uwe asiisa enkoragana ye na Yahwe. Kandi amaramu mukazi we ekitiinisa. Yahwe naanihirramu nyineeka kwikara ali mwesigwa hali mukazi we hatali omu bikorwa honka baitu n’omu biteekerezo. Yesu akagamba ngu omusaija ow’arora omukazi ondi naamwegomba aba amazire ira kusiihana na uwe “omu mutima gwe.”—Mat. 5:​28, 29. w25.01 9 ¶6-8

Baibuli egamba ngu abaheereza ba Yahwe baihirweho omusango, kinu nikimanyisa ngu tikikyatwetaagisa kusasurra ebibi ebi tukora. Yahwe obu akora kinu, aba atarukurubatirra endengo ze ez’obwinganiza. Titwihwaho omusango ngu habwokuba tukikoleriire, kandi taitira ebibi byaitu eriiso. Baitu, habwokuba nitwikiririza omu nteekaniza ey’okulihirra hamu n’ekicunguro kya Yesu kristo, eki nikyo Yahwe asigikirraho kuganyira amabanja rundi ebibi byaitu. (Bar. 3:24) Tugasirwa tuta Yahwe obu atwihaho omusango? Abo abakomerwe kulema na Yesu omu iguru bamazire ira kwetwa ab’okuhikirra kandi bafookere abaana ba Ruhanga. (Tit. 3:7; 1 Yoh. 3:1) Baganyiirwe ebibi byabo. Nikisisana oti rundi tibakabikoraga, kandi habw’ensonga egi kibasemeriire kuba omu Bukama. (Bar. 8:​1, 2, 30) Abo abaine okunihira okw’okwikara omu nsi baihirweho omusango, nibabarwa nk’abanywani ba Ruhanga kandi baganyiirwe ebibi byabo.—Yak. 2:​21-23. w25.02 5 ¶17; 7 ¶18

Teekerezaaho enyikara emu nambere omukwenda Petero atarayolekere enteekereza nk’eya Yahwe ha nsonga. Yesu akaba nubwo yakaruga kugambira abakwenda be ngu akaba aine kugenda Yerusalemu, aheebweyo hali abeebembezi b’amadiini, agumire okubonabonesebwa kandi hanyuma aitwe. (Mat. 16:21) Nikisobora kuba kyagumiire Petero kukiikiriza ngu Yahwe yaakwikiriize Yesu ow’akaba ali kunihira kwa Isaleeri kandi Masiya ow’araganiziibwe, kwitwa. (Mat. 16:16) Nahabweki Petero akatwara Yesu ha rubaju kandi yamugambira ati: “Wegirre embabazi Mukama wange, ebi byona tibirukwija kukuhikaho nakake.” (Mat. 16:22) Habwokuba Petero atooleke enteekereza ya Yahwe ha nsonga egi, akaba atarukuteekereza nka Yesu. Petero naasobora kuba akaba aine ebigendererwa ebirungi, baitu Yesu akanga obuhabuzi bwe. Isomo ki eriturukwega? Kikaba kitali kigendererwa kya Yahwe, Yesu kwesaalirirwa. Kiro eki, Petero akeega isomo erikuru erirukukwata ha kuba n’enteekereza nk’eya Ruhanga. w25.03 9 ¶5-6

Oyetuntwire habw’okugobezebwa omuntu ou orukwesiga? Omuntu ow’orukugonza noobu akutwaza omu mulingo ki, So ow’omu iguru aikara naakugonza. Obu oraaba ohoirwemu amaani habw’okugobezebwa omuntu ou orukugonza, ebigambo bya Daudi ebirukusangwa omu kyahandiikirwe ekya kiro kinu nibisobora kukugarramu amaani. Ekitabu kimu kigamba ngu abo “abomutima ogucwekere” nibasobora kwehurra nk’abantu “abataine ekintu kyona ekirungi eki barukunihira.” Yahwe akoonyera ata abantu abeehurra omu mulingo gunu? Kusisanaho omuzaire ow’okugonza, ow’ahimba kandi akahuumuza omwana we ow’ayetuntwire, Yahwe “aikara haihi” na itwe. Obu tuba nitubonabona habw’okuba omuntu ou turukugonza atugobiize rundi atulekereho, Yahwe aba naamanya obusaasi obuturukurabamu kandi atukoonyera aho naaho. Aine ekihika ky’okutuhuumuza obu turukuba nituhikwaho obusaasi. Atuhaire ebintu bingi ebi tulindiriire omu kasumi ak’omumaiso ebitukoonyera kugumira ebizibu ebiturukurabamu kasumi kanu.—Is. 65:17. w24.12 23 ¶13-14

Kasumi kanu, abagurusi nibasobora kukigumya ngu Yahwe arora kandi asiima omulimo omurungi ogu bakora. Kwongerra ha kubungira Abakristaayo bagenzi baabo kubagarramu amaani, okwegesa hamu n’okutebeza, abagurusi baingi basagika purojekiti ez’okwombeka kandi bakoonyera nambere hali ebigwererezi. Abandi baheereza ha Patient Visitation Groups rundi Hospital Liaison Committees. Abagurusi abakoonyera omu mirimo egi barora ekitebe nk’enteekaniza ya Yahwe. Nibakigumiza kimu ngu Ruhanga naija kubaha empeera habw’emirimo ei bakora. (Bak. 3:​23, 24) Buli omu weena tasobora kuba mugurusi. Baitu itwena nitusobora kuba n’ekintu eky’okuha Yahwe. Ruhanga waitu asiima muno obu tukora kyona ekirukusoboka kumuheereza. Ekindi, asemererwa obu tuganyira abo abatusobeza. Kigumye ngu Yahwe naasiima kyona eki orukukora. Naakugonza kandi naija kukuha empeera.—Luk. 21:​1-4. w24.06 23 ¶12-13

Ebyahandiikirwe binu nibyoleka ekisobora kuhika ha muheereza wa Yahwe. Naasobora kukora ekibi eky’amaani kandi hanyuma naayehurra ngu buli kimu kibaireho bwangu-bwangu. Rundi naasobora kugamba ngu, “mbaire ntarukukinihira.” Baitu kandi, kakuba ateekerezaaho ebintu byonyini ebibaireho, naasobora kukizoora ngu haroho encwamu embi ezi yakozere ezamurugiriiremu kusiisa. Encwamu ezi nizisobora kutwarramu abanywani ababi, eby’okwesemeza ebitasemiire, rundi kugenda omu biikaro ebitali birungi ka kibe maiso ha maiso rundi ha mikura. Obundi naasobora kuba akaba alekere kusaba, kusoma Baibuli, kugenda omu nsorrokano rundi kwejumbira omu buheereza. Kusisanaho n’omusigazi ow’arukubazibwaho omu Enfumo, ekibi eki yakozere kiine kuba kitaramugwireho bugwaho. Isomo ki eri turukwega? Titusemeriire kugarukira ha kwetantara ekibi kyonka, baitu n’ebintu ebisobora kutuleetera kukora ekibi. Kinu nikyo kyonyini Suleimani yabalizeeho hanyuma y’okubazaaho ebyahikire hali omusigazi n’omukazi omusiihani.—Mat. 5:​29, 30. w24.07 16 ¶10-11

Ky’obuguuda ki ekirukubazibwaho? Nugwo omulimo ogw’okutebeza ha Bukama bwa Ruhanga ogurukujuna obwomeezi. (2 Kol. 4:1) Kandi ebibindi ebiibumba nibyo biha? Nibikiikirra abantu ba Ruhanga abagambira abandi amakuru amarungi. Omu kasumi ka Paulo, abasuubuzi baakozesaaga ebibindi ebiibumba kutwarramu ebintu eby’omuhendo nk’ebyokulya, eviini, na sente. Omu mulingo nugwo gumu, Yahwe atuhaire obujunaanizibwa obw’omuhendo obw’okutebeza amakuru amarungi. Habw’obukonyezi bwa Yahwe nitusobora kutunga amaani agaturukwetaaga kugumizaamu nitutebeza obutumwa bunu. Obwire obumu nitusobora kutiina ngu abantu tibarukwija kutuhuliiriza. Kiki ekisobora kutukoonyera? Teekerezaaho esaara abakwenda ei baasabire obu baabatangirwe kutebeza. Omu kiikaro ky’okutiina, bakasaba Yahwe abakoonyere kubaza ekigambo n’obumanzi. Kandi ahonaaho Yahwe akagarukamu esaara yabo. (Ebik. 4:​18, 29, 31) Kakuba obwire obumu otiina abantu, saba Yahwe akukoonyere oleke kutiina abantu nukwo obatebeze. w24.04 16 ¶8-9

Okugonza oku twiniire Yahwe kutwekambisa kweza ibara lye. Eki nikimanyisa ngu ebintu Sitaani ebi yabalize ha ibara lya Yahwe tibihikire. (Kub. 3:​1-5; Yob. 2:4; Yoh. 8:44) Obu tuba tuli omu buheereza, tuba n’ekihika eky’okugambiraho abandi Yahwe Ruhanga wa mulingo ki. Tugonza buli omu amanye ngu omulingo gwe omukuru nukwo kugonza, omulingo arukulema guhikiriire kandi gw’obwinganiza, kandi ngu omu bwire obutali bwa hara Obukama bwe nibwija kumaraho okubonabona kwona buleetere abantu obusinge n’okusemererwa. (Zab. 37:​10, 11, 29; 1 Yoh. 4:8) Obu tugambira abantu omu buheereza ha bintu binu ebirukukwata hali Yahwe, tuba nitweza ibara lye. Ekindi, tuba n’okumarwa kukimanya ngu nitukora eki tusemeriire kukora nk’abakaiso be. w24.05 18 ¶12

Ow’oruganda, oyoleka ngu ‘nookunira abagenyi’ obu okorra abandi ebirungi otwaliiremu n’abo abatali banywani baawe nfenanfe. (1 Pet. 4:9) Katondogorozi emu eya Baibuli egamba eti: “Omuntu ow’amakune ayoleka embabazi abantu ab’atamanyire kandi kimusemeza kubaraaliza omu ka ye.” Wekaguze, ‘abantu abandi bammanyire nk’omuntu ow’ayoleka abandi embabazi omu kitebe?’ (Baheb. 13:2, 16) Omusaija ow’amakune ayoleka embabazi abantu boona otwaliiremu abanaku, ab’oruganda ababa babungiire ekitebe kuha embazo, hamu n’abandi abeekamba kugarramu ab’oruganda na banyaanya itwe amaani nk’abaroleerezi b’ebicweka.—Kub. 18:​2-8; Nfu. 3:27; Ebik. 16:15; Bar. 12:13. w24.11 21 ¶6

Omu kyokurorraho eky’abaisiki, Yesu akabazaaho abaisiki ikumi abaagenzere kutangatangana omuswezi. (Mat. 25:​1-4) Boona bakaba nibanihira kumusendekereza ha bugenyi bwe obw’okugaitwa. Yesu akabazaaho bataano hali bo ‘nk’ab’amagezi’ kandi bataano abandi ‘nk’abadomadoma.’ Abaisiki ab’amagezi, bakaba beeteekaniize kulindirra omuswezi hoona nambere yaakwiziire, noobu yakwizire omu bwire bw’ekiro muno. Egi niyo ensonga habwaki baizire n’etabaaza ezirumu amagita, nukwo zibakoonyere kutunga ekyererezi omu mwirima. Ekindi, bakaija n’amagita agandi kakuba omuswezi akeerererwa. Nahabweki, bakaba beeteekaniize kwikaza etabaaza zaabu nizaaka. (Mat. 25:​6-10) Omuswezi obu yaizire, abaisiki ab’amagezi bakataahamu na uwe ha bugenyi obw’okugaitwa. Omu mulingo nugwo gumu, Abakristaayo abaseeserweho amagita aboolekere ngu beeteekaniize, kuraba omu kwikara bali bulindaara kandi bali beesigwa kuhika akasumi Yesu obu aliija kucwa omusango, nibaija kweteeranizaaho omuswezi, kandi ogu nuwe Yesu omu Bukama bwe obw’omu iguru.—Kus. 7:​1-3. w24.09 21 ¶6

Obu tuteekerezaaho ebintu ebirukuhikiirizibwa omu nsi yoona kasumi kanu, kitwekambisa kwikara nitutebeza n’obwekambi. Buli mwaka, obukaikuru n’obukaikuru bw’abantu abarukugonza kumanya amananu baija ha Kiijukyo kandi batandika kwega na itwe Baibuli. Abantu baingi babatizibwa kandi batweteeranizaaho omu mulimo gw’okutebeza. Titumanyire omulingo baingi barukwija kwetwaza obu turaabatebeza amakuru amarungi, baitu nitukimanya ngu Yahwe aliyo naasoroza ekitebe ekingi eky’abantu abaraakiraho omu muhito omwingi ogurukwija. (Kus. 7:​9, 14) Mukama w’okugesa naarora ngu hakyaliyo abantu abasobora kworobera amakuru amarungi, nahabweki twine ensonga enungi erukutuleetera kwikara nitutebeza. (Luk. 10:2) Abeegeswa ba Yesu baikaire nibamanyirwa ha bwekambi bwabo obw’okutebeza. Abantu obu baarozere abakwenda nibatebeza n’obumanzi hamu n’obutagasi, ‘bakakyetegereza ngu baikaraga na Yesu.’ (Ebik. 4:13) Obu turaaba tuli omu buheereza, leka abantu bakirole ngu nitwegera ha kyokurorraho kya Yesu eky’obwekambi. w25.03 18 ¶15; 19 ¶17-18

Baibuli etwegesa ngu Yahwe afaaho abo abazooka nk’abatali b’omugaso hali abandi. Ekyokurorraho, Yahwe akatuma nabbi Samuiri hali enju ya Yese kuseesaho omu ha batabani be amagita ayaakufookere omukama wa Isaleri. Yese akeeta batabani be musanju omu batabani be munaana kutangatangana Samuiri baitu yasigayo omuto wabo Daudi. Baitu, Daudi nuwe Yahwe akaba akomeremu. (1 Samuiri 16:​6, 7, 10-12) Yahwe akarora kiki Daudi eki akaba ali omu mutima—omusigazi omuto ayagonzaaga muno ebintu eby’omwoyo. Teekerezaaho omulingo Yahwe ayolekere ngu naakufaaho. Akuha obuhabuzi obw’orukwetaaga kusigikirra ha nyikara yaawe. (Zab. 32:8) Eki naasobora kukikora kakuba aba atarukukumanya kurungi? (Zab. 139:1) Obu ota omu nkora obuhabuzi bwa Yahwe kandi okarora omulingo bukukonyiire, noija kukigumya ngu naakufaaho. (1 Byom. 28:9; Ebik. 17:​26, 27) Yahwe arora byona ebi okora kusobora kumuheereza n’okumworobera. Ekindi, arora emiringo yaawe enungi kandi naagonza kuba munywani waawe.—Yer. 17:10. w24.10 25-26 ¶7-9

Hataroho kugurukyagurukya noogonza Yahwe kandi noogonza kuheereza abandi. Kiki ekisobora kukukoonyera kugonza kuheereza abandi? Tekerezaaho okusemererwa okuruga omu kuheereza ab’oruganda na banyaanya itwe. Yesu akagamba ati: “Okugaba kuleeta okusemererwa kwingi kukira okuheebwa.” (Ebik. 20:35) Yesu atagarukire ha kubaza ebigambo binu baitu akabita n’omu nkora. Akatunga okusemererwa kwingi omu kuheereza abandi. Wetegereze ekyokurorraho ekirukusangwa omu Marako 6:​31-34. Ha kiro eki, Yesu n’abakwenda be bakaba bajwahire. Bakaba nibagenda omu kiikaro ekyesoroire nukwo bahuumuleho. Baitu ekitebe ky’abantu kikababanzaayo nibagonza Yesu abeegese. Akaba naasobora kwanga kubeegesa kandi uwe na banywani be “batatunge obwire obw’okuhuumuraho rundi obw’okulya.” Rundi Yesu yakubeegeseze ebintu bike kandi abagamba bagende. Baitu habwokuba akaba naabagonza, “yatandika kubeegesa” kuhikya ‘obwire kwira.’—Mar. 6:35. w24.11 16 ¶9-10

Abazaire, mwekambise abaana banyu kuserra emigisa ey’okugambiraho abandi amananu agali omu Baibuli. (Bar. 10:10) Noosobora kulengesaniza amaani arukutamu kugambiraho abandi enyikiriza ze, n’amaani ag’omuntu atamu kwega ebintu ebiturukya amaraka. Ha kubanza, omuntu ow’arukwega kuteera ebintu ebiturukya amaraka atandika n’ebizina ebyanguhire. Obwire obu bugenda niburabaho, kuteera ebintu binu kutandika kumwanguhira. Omu mulingo nugwo gumu, Omukristaayo omuto naasobora kutandika n’enyanjura ezanguhire obu arukuba naagambiraho abandi ebi arukwikiririzaamu. Ekyokurorraho, naasobora kukaguza abeegi bataahi be ha isomero ati: “Obaire okimanyire ngu bainjiniya bakira kukora ebintu obu nibakopa ebyahangirwe? Leka mbooleke vidiyo ey’erukusemeza.” Hanyuma y’okubooleka vidiyo eziri hansi y’ekicweka Kikahangwa? naasobora kugamba ati: “Abanyasayansi obu baraaba nibasobora kusiimwa habw’ebintu ebi bakozere nibasigikirra ha byahangirwe, hati nooha ow’asemeriire kusiimwa habw’ebyahangirwe?” Enyanjura nk’egi ey’eyanguhire neesobora kuleetera omuntu kugonza kumanya ebirukukiraho. w24.12 19 ¶17-18

Kusobora kulekerwa kuruga omu kibi n’okufa, Yahwe akasindika Yesu kuhayo obwomeezi bwe nk’ekicunguro. Baitu ekicunguro eky’omuntu omu ow’ahikiriire, kikaba nikiija kucungura kita obukaikuru n’obukaikuru bw’abantu? Omukwenda Paulo asoborra ati: “Habwokuba kuraba omu butahurra obw’omuntu omu, [Adamu] baingi bakafoorwa abasiisi, kuraba omu buhulizi bw’omuntu omu [Yesu] baingi balifoorwa abahikiriire.” (Bar. 5:19; 1 Tim. 2:6) Hanu Paulo akaba naagamba ngu abantu boona bali basiisi kandi bafa habwokuba omuntu omu ow’ahikiriire akajeemera Ruhanga. Nahabweki, kikaba nikyetaagisa omuntu omu ow’ahikiriire kandi omuhulizi, kutulekera kuruga omu kibi n’okufa. Baitu mali kikaba nikyetaagisa Yesu kubanza kufa nukwo atujune? Yahwe akaba atasobora kucwamu kwikiriza abaijukuru ba Adamu abaakumworobiire kwomeera ebiro n’ebiro? Hali abantu abatahikiriire, eki kikaba nikisobora kuzooka nk’ekikorwa eky’embabazi kandi ekirukwoleka okwetegereza. Baitu hali Yahwe, kinu kikaba kiri kintu eky’obwinganiza eki akaba asemeriire kukora habwokuba kyakusisaine oti rundi Adamu atakole ekibi eky’amaani kandi ngu n’abaana be batabe basiisi. Baitu ago gakaba gatali mananu. w25.01 21 ¶3-4

Paulo akaba akimanyire ngu akasumi kakaba kali haihi kuhika aitwe, baitu obuyateekeriizeeho omulingo akaba atwaizemu obwomeezi bwe akasemererwa muno. Obu naatekeerezaaho ebi yarabiremu akagamba ati: “Nyirukire empaka ez’okwiruka kuhika ha kumalirra, okwikiriza kwange nkulinzire.” (2 Tim. 4:​6-8) Paulo akaba akozere encwamu ez’amagezi omu buheereza bwe obw’Ekikristaayo, kandi akaba naakigumya ngu Yahwe akaba naamusiima. Na itwe nitusobora kukora encwamu enungi kandi tusiimwe Ruhanga. Eki nitusobora kukikora tuta? Paulo akeebazaaho hamu n’Abakristaayo abandi abeesigwa ati: “Nitugendera omu kwikiriza, hatali omu kurora.” Omu Baibuli, ekigambo, “kugenda” obwire obumu nikisobora kumanyisa omulingo omuntu acwamu kutwazaamu obwomeezi bwe. Omuntu obu agendera omu kwikiriza, akora encwamu naasigikirra ha bwesige bwe omuli Yahwe Ruhanga. Ebikorwa bye byoleka ngu naakigumya ngu Ruhanga naija kumuha empeera kandi ngu naija kugasirwa kuraba omu kuhondera oburagirizi bwa Yahwe oburukusangwa omu Kigambo Kye.—Zab. 119:66; Baheb. 11:6. w25.03 20 ¶1-2

Habw’obukoonyezi bw’omwoyo ogurukwera, baingi abaakoraga ebikorwa ebibi bakozere empindahinduka ez’amaani omu bwomeezi bwabo. (Is. 65:25) Batairemu amaani kwecwaho engeso embi. (Bef. 4:​22-24) Baitu nabwo abantu ba Ruhanga bakyali bantu abatahikiriire, nahabweki nibaija kugumizaamu nibakora ensobi. Baitu Yahwe ateeraniize hamu abantu boona abarukumugonza kandi abarukugonzangana. Kandi ekirugiremu, nibeegondeza omu businge n’obumu. (Tit. 2:11) Yahwe nuwe wenka asobora kukora ekintu kinu! Yahwe ahikiiriza ebi aba araganiize. (Is. 55:​10, 11) Kandi eki nitukirorra ha rugonjo orw’eby’omwoyo oruroho kasumi kanu. Yahwe atuhaire oruganda orw’ensi yoona. Kandi habwokuba tuli kicweka ky’eka ye twine obusinge n’obulinzi omu nsi enu enyakwijwiremu ebintu ebibi. (Zab. 72:7) Nahabweki, nitugonza kukoonyera abantu baingi kutweteeranizaaho omu ruganda runu orw’ensi yoona. Kandi eki tukikora obu tuta omutima ha kufoora abantu abeegeswa.—Mat. 28:​19, 20. w24.04 23 ¶13, 15

Yesu yagonzaaga Yahwe n’ebiteekerezo bye byona. Akaba amanyire ekigendererwa kya Ruhanga hali uwe, kandi akaba acwiremu kutwaza obwomeezi bwe naasigikirra ha kigendererwa eki, noobu kiraaba ngu kukikora kikaba nikiija kumurugirramu kubonabona habw’okukora ekihikire. Habwokuba Yesu akaba ataire omutima ha kukora Ise ebi agonza, ataikirize ekintu kyona kumulemesa kuhikiiriza ekigendererwa eki. Petero hamu n’abakwenda bagenzi be bakatunga omugisa ogw’okumara obwire na Yesu n’okwega omulingo Yesu yateekerezaamuga. Petero obu yahandiikire ebbaruha ye ey’okubanza eyatereekereziibwe omwoyo ogurukwera, akateererra Abakristaayo kuba n’enteekereza niyo emu nk’eya Kristo. (1 Pet. 4:1) Ekigambo “mube n’enteekereza” Petero eki yakozeseze hanu, omu Ruyonaani kyakozesebwaga ha muserikale anyakwine eky’okurwanisa obu yabaga naayetekaniriza obulemu. Nahabweki, Abakristaayo obu beegera ha nteekereza ya Yesu, nibaija kuba baine eky’okurwanisa eky’amaani ekirukwija kubakoonyera kurwanisa okwegomba kwona okw’okukora ekibi, hamu n’okurwanisa ensi ey’erukulemwa Sitaani.—2 Kol. 10:​3-5; Bef. 6:12. w25.03 8-9 ¶1-3

Kiki eki osemeriire kumanya ha muntu obu murukuba mujumbiirengana? Otakatungire enyehurra ez’amaani ha muntu ogu, musemeriire kubanza kubazaaho ebintu ebikuru, nk’ebigendererwa ebi aine. Noosobora ota kumanya omuntu ogu eki ali omu mutima? Gumu ha miringo musobora kukikoramu nukwo kubalizangana mutarukuserekangana, kukaguzangana ebikaguzo n’okuhulirizangana kurungi. (Yak. 1:19) Obundi nimusobora kukora hamu ebintu ebirabaleetera kubaza hamu, nk’okuliira hamu, kurubata hamu, n’okukora hamu omu buheereza. Ekindi, nimusobora kweyongera kumanyangana kuraba omu kumara hamu obwire n’abanywani hamu n’abanyabuzaale. Ekindi, mukole enteekaniza eziraabakoonyera kumanya omulingo buli omu hali inywe arukwetwaza omu nyikara ezirukwahukana noobu arukuba ali n’abantu abarukwahukana. w24.05 27-28 ¶6-7

Omu biro eby’omumaiso, nitwija kuhikwaho ebirengo ebiraatwetaagisa kwesiga Yahwe kukira na kara. Ebyokurorraho by’abaheereza ba Yahwe aba kara n’ab’omu kasumi kanu nibiija kutukoonyera kumanya omulingo Yahwe ayolekere emiringo ye ey’erukusisana n’omwandara kusobora kusagika abaheereza be. Weecumiitirizeeho muno ebyokurorraho ebi. Obu oraakora eki, nikiija kukukoonyera kufoora Yahwe Omwandara gwawe. Ekindi, noija kusobora kugumya ab’oruganda na banyaanya itwe omu kitebe. Ekyokurorraho, Yesu akaha Simooni ibara Keefa (kihindurwa nka “Petero”), ekimanyisa “Omwandara.” (Yoh. 1:42) Yesu akaba naamanyisa ngu Petero yaakuhuumwize abandi omu kitebe, kandi agumye okwikiriza kwabo. Abagurusi b’ekitebe babazibwaho “nkekiituru ekiibale erikoto.” Kinu nikyoleka omulingo balinda ab’omu kitebe. (Is. 32:2) Baitu, ekitebe kigasirwa ab’oruganda na banyaanya itwe bona obu beegera ha miringo ya Yahwe ey’erukusisana nk’omwandara. w24.06 28 ¶10-11

Abakama ba Isaleeri Yahwe abayarozere nk’abarungi baamuramyaga omu mulingo oguhikire. Baingi h’abakama Yahwe yarozere nk’abatali beesigwa bakaleka kuhondera Ebiragiro bye kandi baagonza okuramya okw’ebisuba. (1 Bakam. 21:​25, 26; 2 Byom. 12:1) Habwaki ensonga y’okuramya ekaba eri nkuru muno hali Yahwe? Emu ha nsonga niyo ngu, omukama akaba aine obujunaanizibwa obw’okukoonyera abantu kuramya Yahwe omu mulingo oguhikire. Ekindi, abantu obu baramya baruhanga ab’ebisuba, kibaleetera kukora ebibi ebindi n’okutwaza abantu abandi omu mulingo ogutali gw’obwinganiza. (Hos. 4:​1, 2) Kwongerraho, abakama ba Isaleeri hamu n’abantu abakaba bali hansi yabo, bakaba beehaireyo hali Yahwe. Egi niyo ensonga habwaki, Baibuli erengesaniza okwejumbira kwabo omu kuramya kw’ebisuba n’obusiihani. (Yer. 3:​8, 9) Omuntu obu asiihana, aba agobiize omuntu ou ali na uwe omu buswere kandi amuleetera obusaasi obw’amaani muno. Omu mulingo nugwo gumu, omuheereza wa Yahwe ow’ayehaireyo hali uwe, obu ayejumbira omu kuramya okw’ebisuba, amusaaliza muno.—Bir. 4:​23, 24. w24.07 22-23 ¶12-15