KUFOORA ABANTU ABEGESWA
ISOMO 11
Yegesa omu Mulingo Ogwanguhire
Omusingi: “[Kozesa] ebigambo ebyanguhire kwetegerezebwa.”—1 Kol. 14:9, NWT.
Omulingo Yesu Yakikozeremu
1. Rora VIDIYO, rundi soma Matayo 6:25-27. Hanyuma ogarukemu ebikaguzo binu:
Byokurorraho ki Yesu ebiyakozeseze kwoleka ngu Yahwe natufaaho?
N’obukiraaba ngu Yesu akaba amanyire bingi ebirukukwata ha binyonyi, kintu ki ekiyataireho omutima? Habwaki omulingo yayegesezeemu gwali murungi?
Kiki Ekiturukwegera Hali Yesu?
2. Obutwegesa omu mulingo ogwanguhire, abantu nibaija kwijuka ebitubegeseze kandi nitwija kubahika ha mutima.
Yegera Hali Yesu
3. Otabaza muno. Omu kiikaro ky’okubaza byona eby’omanyire ha isomo, teeka omutima ha biri omu kitabu ekimurukukozesa kwega. Hanyuma y’okukaguza ekikaguzo, linda omwegi waawe akugarukemu. Kakuba aba atamanyire eky’okugarukamu rundi akabaza ekintu ekitahikire, kozesa ebikaguzo ebindi kumukonyera kwetegereza. Hanyuma y’omwegi kwetegereza ensonga enkuru, mugende ha nsonga endi.
4. Konyera omwegi kurora akakwate akali hagati y’ebintu ebihyaka ebyayegere n’eby’abaire amanyire. Ekyokurorraho, mutakatandikire kwega isomo erirukubazaaho okuhumbuuka, n’osobora kubanza kumukaguza ebyamanyire ha nyikara y’abafu.
5. Komamu ebyokurorraho nobwegendereza. Otakakozeseze ekyokurorraho, wekaguze:
Ekyokurorraho kinu kyanguhire?’
‘Kirayanguhira omwegi kukyetegereza?’
‘Kiramukonyera kwijuka ensonga enkuru hatali ekyokurorraho?’