Bataikirize Kwinamira Ekisisani

Hanyuma yakasumi amazire kuroota ekisisani ekikooto, Omukama Nebukadeneza akakora ekisisani kikooto eky’ezaabu. Akakita omu kicweka ekirukwetwa Dura hanyuma yaraaliza abantu ab’ebitiinisa otwaliiremu Saduraki, Mesaki, hamu na Abedenego kwesoroleza haihi nakyo. Hanyuma, Nebukadeneza akabaragira ati: ‘Obu murakahurra iraka ly’ikondere, enyamulere, hamu n’enanga, inywena mwinamire ekisisani kinu! Ogu wena araaba atakiinamiire naija kunagwa omu murro.’ Aboojo banu Abaheburaniya bakwinamiire ekisisani kinu, rundi bakusigaire bali besigwa hali Yahwe?

Omukama akaragira ngu bateho amaraka. Hanyuma buli omu wena akainamira ekisisani oihireho Saduraki, Mesaki hamu na Abedenego. Abamu ha basaija bakabarora kandi babanyegerra hali Omukama Nebukadeneza nibagamba ngu: ‘Aboojo Abaheburaniya bangire kuramya ekisisani.’ Nebukadeneza akaragira babaleete hanyuma yabagambira ati: ‘Ningenda kubaha omugisa ogundi gumu nukwo muramye ekisisani. Obumuraaba mutakiramize hati, nimbanaga omu murro. Kandi busaho ruhanga wena asobora kubajuna akabaiha omu mikono yange.’ Bakamugarukamu bati: ‘Titurukwetaaga omugisa gundi gwona habwokuba Ruhanga waitu n’asobora kutujuna. Baitu n’obwaraaba atatujunire, titurukwija kuramya ekisisani kyawe.’

Omukama Nebukadeneza akabiihirwa muno kandi yaragira abaisaja be ati: ‘Omurro mugwongeze emirundi musanju kukiraho ogwa buli kiro!’ Hanyuma akaragira abaserikale be ati: ‘Musibe abasaija abo kandi mubanage omu murro!’ Omurro gukaba nigwokya muno habwokuba ekibabu kyagwo kikaita abaserikale abanagire Abaheburaniya basatu omu murro. Baitu Omukama Nebukadeneza obuyarozere omu murro, akarora harumu abasaija bbana nibarubatira omu murro omu kiikaro ky’abasaija basatu. Omukama Nebukadeneza akatiina muno kandi yakaguza abaheereza be ati: ‘Titunagirege abasaija basatu omu murro? Baitu hati, nindoramu abasaija bbana kandi ondi nasisana maraika!’

Kandi Omukama Nebukadeneza akairra haihi n’omurro yabeeta nagamba ati: ‘Murugeyo, inywe abaheereza ba Ruhanga Arukukirayo!’ Buli muntu akahunirra obuyaboine Saduraki, Mesaki, hamu na Abedenego nibaruga omu murro batahiire nakake. Emibiri yabo, isoke hamu n’engoye zaabo bitahye kandi bakaba batarukununka omwika gwona.

Omukama Nebukadeneza akagamba ati: ‘Ruhanga wa Saduraki, Mesaki hamu na Abedenego w’amaani muno. Atumire maraika we yabajuna kandi busaho ruhanga ondi arukukira owabu.’

Naiwe oyehaireyo kusigara oli mwesigwa hali Yahwe nk’Abaheburaniya banu omu nyikara yoona?