Obukama Obuliikaraho Ebiro n’Ebiro

Kiro kimu, Omukama Nebukadeneza, akaroota ekirooto ekirukuhuniriza muno. Ekirooto kinu kikamweraliikiriza muno akaba atarukusobora n’okugwijagira. Akeeta abafumu be yabagamba ati: ‘Munsoborre amakuru g’ekirooto kinu.’ Bamukaguza: ‘Mukama waitu, tugambire eky’orosere.’ Baitu Omukama Nebukadeneza akabagarukamu ati: ‘Nangwa! Mungambire eki ndosere kitali eki nimbaita.’ Bakongera bamwesengereza bati: ‘Tugambire eky’orosere nukwo tukusoborre.’ Akabagarukamu ati: ‘Inywena nimulengaho kumbiihabiiha. Mungambire ekindosere!’ Bagambira omukama ngu: ‘Busaho muntu n’omu arukusobora kukora eky’ongambire. Eky’otugambire kukora tikirukusoboka.’

Omukama Nebukadeneza akabiirwa muno yaragira ngu abasaija abamagezi boona ab’omu Baburoni baitwe. Eki nikimanyisa ngu Danieri, Saduraki, Mesaki, hamu na Abedenego nabo bakaba nibagenda kwitwa. Danieri akesengereza omukama kumuha obwire. Nukwo Danieri n’abanywani be basatu basaba Yahwe nibamwesengereza kubakonyera. Yahwe akakora ki?

Yahwe akoleka Danieri ekirooto Omukama Nebukadeneza eky’akaba arosere kandi y’amusoborra n’amakuru gakyo. Ekiro ekyayongireho, Danieri akagenda hali omuhereza w’omukama y’amugambira ati: ‘Otaita abasaija ab’amagezi. Nyowe nigenda kusoborra omukama eky’arosere.’ Omuhereza akatwara Danieri hali Omukama Nebukadeneza. Danieri akagambira omukama ati: ‘Ruhanga akwolekere ekirabaho omu busumi bw’omu maiso. Kinu nikyo orosere: Okarora ekisisani kikooto ekiine omutwe ogw’ezabu, ekifuba eky’efeza, enda hamu n’ebibero eby’omulinga, amaguru g’ekyoma, kandi ebigere by’ekyoma kitabwirwemu ibumba. Nukwo ibale likasarwa kuruga ha rusozi, kandi lyatera ekisisani ha bigere. Ekisisani kyona ky’asasangurwa kyafoka nsaano kandi yatwarwa omuyaga. Ibale eryakitiire likafoka orusozi orukoto orwaijwire ensi yoona.’

Hanyuma Danieri akamugambira ati: ‘Ganu nugo makuru g’ekirooto kyawe: Obukama bwawe nugwo omutwe gw’ezabu. Efeza n’emanyisa obukama oburalema hanyuma y’obwawe. Hanyuma yabwo halibaho obundi obuli k’omulinga, obulirema ensi yoona. Obukama obulyongeraho buliguma nk’ekyoma. Ha kumalirra, halibaho obukama obwecwiremu, ebicweka byabwo ebimu biriguma nk’ekyoma kandi ebindi biriba biceke nk’ibumba. Ibale ery’afokere orusozi orukoto nirimanyisa Obukama bwa Ruhanga. Obukama bunu nibwija kuhwerekereza obukama obundi bwona kandi bwo buliikaraho ebiro n’ebiro.’

Omukama Nebukadeneza akajumara hansi omu maiso ga Danieri. Kandi yagambira Danieri ati: ‘Ruhanga wawe nuwe akwolekere amakuru g’ekirooto kinu kandi busaho Ruhanga ondi arukumwingana.’ Omu kiikaro ky’okwita Danieri, Omukama Nebukadeneza akamufoora mukuru w’abasaija boona abamagezi kandi yamufoora mulemi omu Baburoni. Orozere omulingo Yahwe yagarukiremu okusaba kwa Danieri?