Entasi Ikumi na Ibiri

Abaisareri bakaruga ha Rusozi Sinai bagenda Kadesi nibaraba omu irungu lya Parani. Obu bahikireyo, Yahwe akagambira Musa ati: ‘Tuma abasaija 12, buli ruganda ogende noihamu omusaija omu kugenda kutata ensi ya Kanani ei ndaaha Abaisareri.’ Nahabweki, Musa akakoma abasaija 12 kandi yabagambira ati: ‘Mugende omu nsi ya Kanani murole obweraaba eri nungi y’okulimamu. Murole abantu obu baraaba bali baceke rundi bamaani kandi obu baraaba nibaikara omu heema rundi omu bibuga.’ Entasi 12 otwaliremu Yosuha na Kalebu bakagenda Kanani.

Hanyuma y’ebiro 40, abasaija bakagaruka balesere enkomamahanga, amatini, hamu n’omugimba gw’emizabibu. Abakaba bagenzere kutata bakagaruka nibigamba ngu: ‘Ensi nungi, baitu abantu abarukwikaramu b’amaani kandi n’embuga zaabo ziraihire muno.’ Hanyuma Kalebu akagamba ati: ‘Nitusobora kubasingura, katubaramagire ahonaaho!’ Omanyire habwaki Kalebu yabalize ati? Habwokuba uwe na Yosuha baali nibesiga Yahwe. Baitu abandi 10 bakagamba ngu: ‘Nangwa! Abasaija baabo nibatukira amaani, kandi bakooto! Kandi tubaire nitwerora nk’ensenene omu maiso gabo.’

Abaisareri bakahwamu amaani. Bakatandika kutontorroma nibagamba ngu: ‘Leka tukome aratwebembera twegarukire Misiri. Habwaki nitugenda omu nsi nambere baratwitira?’ Baitu Yosuha na Kalebu babagarukamu bati: ‘Mutajemera Yahwe, kandi mutatiina. Yahwe naija kutulinda.’ Baitu Abaisareri batahulirize. Bakagonza kwita Yosuha na Kalebu!

Yahwe akakora ki? Akagambira Musa ngu: ‘Hanyuma y’okukorra Abaisareri ebintu bingi, bangire kunyorobera. Nahabweki nibaija kwikara omu irungu emyaka 40 kandi nuho balifeera. Oihireho Yosuha na Kalebu hamu n’abaana Babaisareri nubo baliikara omu nsi ei nabaraganiize kubaha.’