EKIKAGUZO 5

Nsobora Kukora Ki Kakuba Abaana ha Isomero Banyendereza?

HABWAKI KIKURU

Eky’orakora kisobora kumaraho ekizibu ekyo—rundi kukyongerereza.

WAKUKOZERE KI?

Teramu akasisani: Thomas tarukugonza kugaruka ha isomero. Acweriiremu kimu ngu talyongera kugarukayo. Ekizibu kikatandika ameezi asatu agahingwire abeegi bagenzi be obu bamubalizeeho ebigambo ebitahikire n’okumuruka ebirukirro. Obwire obumu, omu h’abeegi asobora kwija n’amuhumira, ebitabu bye nibigwa hansi hanyuma ayefoora ngu takigenderiire. Obundi, omuntu amusindika kuruga enyuma. Thomas obw’ahinduka kurora amusindikire, buli muntu ayefoora nk’atamanyire akikozere. Ijo, bamusindikiirege obutumwa ha simu ye oburukumutiinisiriza . . .

Kakuba niiwe Thomas, wakukozere ki?

TEKEREZA HALI KINU!

Otateekereza ngu toine eky’osobora okukora! N’osobora kurwanisa abarukukwendereza otabatiire. Omu mulingo ki?

OTABAGARUKAMU. Baibuli n’egamba ngu: “Omudomadoma ayatura ekinigakye kyona, baitu omuntu owamagezi akiigaliriza nakiculeza.” (Enfumo 29:11) Kakuba otabooleka ngu obiihirwe—n’abarukukwendereza nibaija kubirugaho.
OTARWANA. Baibuli n’egamba ngu: “Mutagaru’ra omuntu obubi obwobubi.” (Abarumi 12:17) Okuhoora enzigu nikiija kwongera kurugirramu ebizibu bindi.
OTENAGA EBIZIBU. Baibuli egamba ngu: “Omuntu omwekengi arora akabi ayesereka.” (Enfumo 22:3) Lengaho nk’oku orukusobora obutagenda nambere abaana abo bali, kandi otakora ebintu ebisobora kubaletera kukwendereza.
KORA EKI BATARUKUNIHIRA. Baibuli egamba ngu: “Okugarukamu ebirukworoba kuhindura ekiniga.” (Enfumo 15:1) Osobora n’okulengaho kubaza ekintu ekirukusekesa. Ekyokurorraho, kakuba arukukwendereza akugamba ngu oli mukooto muno, osobora kumugarukamu ngu, “ago mananu, nyine kukehyaho omunyeto gunu!”
RUGAHO OGENDE. Nora ow’emyaka 19 agamba “Okuculeera nikyoleka ngu okuzire omu biteekerezo kandi ngu oli w’amaani kukira n’arukukwendereza. Kandi nikyoleka ngu oli muntu arukwetanga—eky’ogu arukukwendereza atarukusobora kukora.”—2 Timoseo 2:24.
WEYONGERE KUBA MUNTU ARUKWEIKIRIRIZAAMU. Abarukwendereza banguha kumanya omuntu arukutiina rundi atarukusobora kwerwanaho. Baitu obu barora ngu torukubaikiriza kukuzaniraho, baleka kukutalibaniza.
NYEGERRA. Omwegesa ayahumwire agamba ati: “Nimpeereza abeegi boona amagezi butatiina kunyegerra abarukubendereza habwokuba nikyo ekintu ekihikire eki baine kukora. Okunyegerra kutangira abandi okwenderezebwa.”

Omwojo asingura arukumwendereza habwokuba nayeikiririzaamu — Okweikiririzaamu nikwija kukufoora w’amaani kukira arukukwendereza

OBAIRE OKIMANYIRE?

Oihireho okuteera abaana bagenzi baabu, okwenderezebwa kutwarramu:

Okubajuma. “Tindyebwa amabara goona agabandukire n’ebigambo ebibi byoona ebi bambalizeho. Kinu kikandetera kwehurra nk’omuntu ataine omugaso, atasemeriire kuba omu bantu bandi. Tikyankundabize kubi muno hakire kakuba baali bantiiremu ekikoonde.”—Celine, 20.
Okubasoroora. “Abeegi bagenzi bange bakatandika kunyecwaho. N’obwire bw’ekyamusana, tibagonzaga nyikarre n’abo. Omwaka gwona n’aikaraga ndi omu kurra kandi nalyaga nyenka.”—Haley, 18.
Okubasindikira obutumwa nibakozesaa intaneeti. “Tikitwara obwire kusiisa ibara ly’omuntu rundi kumusiisira obwomeezi bwe bwona n’okozesa kompyuta. Abamu basobora kuteekereza ngu ninyongeramu ekisura baitu nikisobokera kimu!”—Danieri, 14.

**WAKUGARUKIREMU OTA?**
KIHIKIRE RUNDI KIGWIRE	EBY’OKUGARUKAMU
1 Okwendereza kwikaireho kumara enkumi n’enkumi z’emyaka.	1 Kihikire. Ekyokurorraho, Baibuli ebazaaho abasaija abanefirimu—bayetwaga bati habw’okutwaza kubi abantu.—Okubanza 6:4.
2 Okwendereza tikwine kabi koona.	2 Kigwire. Okwenderezebwa kurugirramu ensingato ezimu okweita.
3 Omulingo gwoka ogw’okwerwanaho nukwo kuteera abarukukwendereza.	3 Kigwire. Abantu abendereza abandi emirundi ekira obwingi baba b’amaani. Nahabwekyo, kulengaho kubarwanisa kisobora kutakukonyera.
4 Kakuba orora omuntu n’ayenderezebwa, tikiri kirungi kubyetahyamu.	4 Kigwire. Obw’orora abantu nibendereza omuntu ondi okaculeera buculeezi, naiwe oba n’osagika engeso ezo embi.
5 Oihireho kwehaisabwehaisa, abantu ababendereza abandi baba batiini.	5 Kihikire. N’obukiraaba ngu abenderezi baba n’emyehembo, abarukukira obwingi batiina kandi bendereza kwoleka ngu b’amaani.
6 Basobora kuhinduka bakaleka engeso egyo.	6 Kihikire. Abarukwendereza kakuba bakonyerwa nibasobora kuleka ebikorwa n’entekereza enu etahikire.