EKIKAGUZO 4

Nsobora Kukora Ki Kakuba Nsiisa Ekintu ky’Abandi?

HABWAKI KIKURU

Okwikiriza ensobi zaawe nikiija kukufoora omuntu w’obujunanizibwa kandi arukwesigwa.

WAKUKOZERE KI?

Teramu akasisani: Tim abaire n’azaana omupiira n’abanywani be yagusamba gwayata ekirahule ky’eddirisa ly’emotoka y’omutaahi.

Kakuba niiwe Tim, wakukozere ki?

TEKEREZA HALI KINU!

OINE EBINTU BISATU EBY’OSOBORA KUKORA:

Kwiruka.
Kuhangirra omuntu ondi.
Kugambira omutaahi eky’okozere kandi okamuraganiza kusasura ekirahule kye.

Nikisobora kukwanguhira kucwamu kukora ekiri omu A. Baitu buli kiro kirungi kwikiriza esnsobi zaawe, gonze ziri nkooto rundi ntaito.

ENSONGA ISATU EZIRAKUKONYERA KWIKIRIZA ENSOBI ZAAWE

Nikyo ekintu ekihikire eky’okukora.

Baibuli egamba: “Tusemeriire kuba abesigwa omu buli kintu kyona.”—Abaheburaniya 13:18, NW.
Obwire oburukukira obwingi, abantu baganyira abo abaikiriza ensobi zaabo.

Baibuli egamba: “Anyakusereka ebibibye talibona omugisa, Baitu wena abigamba nabireka nuwe alibona okuganyirwa.”—Enfumo 28:13.
Ekirukukirayo obukuru, kisemeza Ruhanga.

Baibuli egamba: “Baitu owobutigi muziro hali Mukama, baitu ensitaze ziri nabamazima.”—Enfumo 3:32.

Karina ow’emyaka 20 akakora omusango gw’okwirukya muno motoka. Aba poliisi obu bamuhaire ekibbaruha, akakisereka nukwo ise atakirora. Karina agamba, “Ise nyowe obuyazoire ekibbaruha kinu kikandugirramu ebizibu.

Akeega isomo ki? Karina agamba: “Obwosereka ensobi zaawe kirugamu ebizibu ebirukukiraho. N’obwozisereka, habaho akaire k’okuzisasurra!”

OKWEGERA HA NSOBI ZAAWE

Baibuli egamba: “Baitu omu bingi tusobya itwena.” (Yakobo 3:2) Nk’oku tumazire kurora, okwikiriza ensobi zaawe omu bwangu kyoleka ngu oli muntu arukwebundaaza kandi ngu okuzire omu biteekerezo.

Ekintu ekindi nukwo kwegera ha nsobi zaawe. Omwisiki arukwetwa Vera akagamba: “Buli nsobi eyi nkora ngitwara nk’isomo erirankonyera kuba muntu w’obujunanizibwa n’okumanya omulingo oguhikire ogw’okugikwatamu omurundi gundi.” Katurole omulingo osobora kukikoramu.

Kakuba oyetiiza egaali ya so hanyuma okagisiisa, orakora ki?

Kuculeera kwonka okateekereza ngu so tarukwija kukyetegereza.
Kumugambira omulingo esisikairemu.
Kumugambira ekibaireho baitu okahangirra omuntu ondi.

Kakuba ogwa ebirengeso habw’okutasoma ebitabu, orakora ki?

Kugamba ngu bikaba bigumire.
Kwikiriza ngu okagwa habw’okutasoma ebitabu.
Kuhangirra omwegesa ngu n’akuharana.

Omwisiki narora omu ndolerwamu erukwoleka eby’enyuma kandi kunu n’avuga emotoka — Kwikara n’oteekerezaaho ensobi eziwakozere nikisisana n’okwerora omu ndolerwamu ey’emotoka erukwoleka ebintu eby’enyuma kandi kunu oli mukuvuga

N’ocumitiza ha byokurorraho ebiturozere, teramu akasisani niiwe ali (1) omuzaire rundi (2) omwegesa. Omuzaire waawe n’omwegesa bakukutwaire bata kakuba oikiriza ensobi zaawe? Kiki ekibasobora kuteekereza kakuba osereka ensobi zaawe?

Hati tekereza ha nsobi eyi wakozere omu mwaka oguhoire hanyuma ogarukemu ebikaguzo binu.

Okakora nsobi ki? Okakora ki hanyuma y’okusobya?

Nkagisereka.
Nkahangirra omuntu ondi.
Nkagiikiriza.

Obworaaba waculeriire ensobi yaawe, okahurra ota hanyuma?

Nkahurra kurungi muno—busaho ayakimanyire!
Nkehurra nyine omusango—nk’eyijukya habwaki ntarabalize amananu.

Kintu ki ekihikire eki wakubaire okozere?

Kiki eki wayegiire ha nsobi yaawe?

WEKAGUZE

Habwaki abantu abamu bataikiriza ensobi zaabu?

Abantu barakutwara bata obworaaba otaikiriza ensobi zaawe, kandi barakutwara bata oikiriize ensobi zaawe?—Luka 16:10.