Omwihwa wa Pawulo Akooleka Obumanzi

Ka tusome hali omusigazi omu ayajunire nyinarumi kufa. Nyinarumi musigazi onu akaba nuwe omukwenda Pawulo. Ibara ry’omusigazi onu titulimanyire baitu tumanyire ngu akakora ekintu eky’obumanzi. Nogonza kumanya ekiyakozere?—

Pawulo akaba asibirwe omu nkomo omu Yerusalemu. Bakamusiba habw’okutebeza hali Yesu. Haroho abasaija abatagonzaga Pawulo, abaali nibagonza kumwita. Banu bakakora pulaani. Bakagamba: ‘Tusabe omukuru w’ihe atume abasirikale be baleete Pawulo omu kooti. Twija kubeserekerra ha muhanda, nukwo obu baraaba nibamurabyaho, nitubarumba nitwita Pawulo.’

Ekiro ekyo omwihwa wa Pawulo akabahura nibakora pulaani yaabu. Yakukozere ki? Akagenda omu nkomo nambere Pawulo yali, yamugambira. Pawulo nauwe akamusindika agende agambire omukuru w’ihe ebyakaba ahulire. Noteekereza kikanguhira omwihwa wa Pawulo kugenda kubaza n’omukuru w’ihe?— Nangwa, habwokuba omukuru w’ihe aba muntu mukuru muno. Baitu omwihwa wa Pawulo akakora ekikorwa eky’obumanzi y’agenda y’amugambira.

Omukuru w’ihe akamanya eky’okukora. Akatekaniza ihe ly’abantu 500 basendekereze Pawulo. Akabagamba kutwara Pawulo Kaisaliya ekiro ekyo kyonyini. Bakasobora kumuhikyayo kurungi?— Ego, bakamuhikyayo kurungi, abasaija ababi batamuhikyeho kabi koona.

Oruganikyo runu rukwegesiize ki?— Naiwe osobora kuba n’obumanzi nk’omwihwa wa Pawulo. Nikyetaagisa obumanzi kugambira abantu hali Yahwe. Orayoleka obumanzi n’ogambira abantu hali Yahwe?— Obworakora otyo, osobora kukonyera abantu butahikwaho akabi.