Bakahandiika Hali Yesu

N’orora abasaija abali omu kisisani?— Amabara gaabu nigo Matayo, Marako, Luka, Yohaana, Peetero, Yakobo, Yuda, na Pawulo. Banu boona bakabaho omu kasumi nuko kamu na Yesu, kandi bakahandiika ha bintu Yesu ebi yakozere n’ebiyarabiremu. Katusome hali ebibahandiikire.

Basatu hali abo abahandiikire hali Yesu bakaba bakwenda be kandi baatebezaaga nauwe. Abasatu abo obamanyire?— Baali Matayo, Yohaana na Peetero. Matayo na Yohaana baali bamanyire Yesu kurungi, kandi banu bombi bakahandiika hali ebintu Yesu yakozere omu bwomezi bwe. Omukwenda Yohaana nuwe yahandiikire ekitabu ky’Okusukuru’rwa n’ebbaruha isatu ezeetwa Ebbaruha ya Yohaana ey’Okubanza, ey’Akabiri n’Eyakasatu. Omukwenda Peetero nauwe akahandiika ebbaruha ibiri. Nizo Ebbaruha ya Peetero ey’Okubanza n’Eyakabiri. Omu bbaruha ye ey’akabiri, Peetero akahandiika ha kasumi nambere iraka lya Yahwe lyahulirwe kuruga omu iguru nirigamba hali Yesu: ‘Onu nuwe mwana waange ou ngonza muno, kandi ou nsemere’rwa.’

Abasaija abandi abali omu kisisani nabo baina ebi bahandiikire hali Yesu. Omu hali bo akaba Marako. Nikizooka akabaho nibakwata Yesu yarora byoona ebyabaireho. Ondi akaba Luka. Akaba dakitaali baitu nikizooka akafooka Mukristaayo hanyuma ya Yesu kufa.

Abahandiiki ba Baibuli abandi ab’orukurora omu kisisani bakaba bagenzi ba Yesu abato. Amabara gaabu ogamanyire?— Nigo Yakobo na Yuda. Mukubanza banu bakaba batarukwikiririza omu Yesu. Haroho n’obubateekerezaga ngu agwire iraru. Baitu akasumi obu karabireho, bakatandiika kumwikiririzamu, kandi bafooka Bakristaayo.

Omuhandiiki ou turukugenda kumalira nauwe nuwe Pawulo. Obwakaba atakafookere Mukristaayo bamwetaga Sawulo. Tiyagonzaga Abakristaayo nakake. Yabatwaazaga kubi kandi yabatuntuzaaga. Omanyire ekyaletiire Pawulo kufooka Mukristaayo?— Kiro kimu obwakaba ali ha rugendo, akahu’ra iraka nirimweta kuruga omu iguru. Likaba iraka lya Yesu! Akakaguza Pawulo: ‘Habwaki n’otuntuza abaheereza bange?’ Kuruga kiro ekyo, Pawulo akahinduka yafooka Mukristaayo. Pawulo akahandiika ebitabu 14 ebya Baibuli, kuruga ha kya Abarumi kuhika ha kya Abaheburaniya.

Tusoma Baibuli buli kiro, tinukwo kiri?— Obutusoma Baibuli, twega ebintu biingi hali Yesu. Naiwe wakugondeze kwega ebirukukiraho hali Yesu?—