ISOMO 15
Habwaki Wakugenzire omu Maiso n’Okwega Baibuli?
1. Oragasirwa ota obw’oragenda omu maiso n’okwega Baibuli?
Hataroho kugurukyagurukya, enyegesa za Baibuli zigumize okugonza kwawe hali Yahwe. Twina kutekamu amaani kurora ngu nitulinda okugonza kunu. (1 Petero 2:2) Okunihira kwawe okw’obwomezi obutahwaho nikusigikirra ha kweyongera kwirra haihi na Ruhanga kuraba omu kwega Ekigambo kye Baibuli.—Soma Yohana 17:3; Yuda 21.
Obw’orayeyongera kumanya Ruhanga okwikiriza kwawe nikwija kuguma. Okwikiriza kunu nukwo kurukwija kukukonyera kusemeza Ruhanga. (Abaheburaniya 11:1, 6) Kandi nikwija kukuletera kwegarukamu n’okukora empindahinduka eziragasira obwomezi bwawe.—Soma Engeso 3:19.
2. Eby’oyegere hali ruhanga orabikozesa ota kukonyera abandi?
Kuraba omu kusaba n’osobora kutunga omuganjano ogw’embaganiza na Yahwe
Ky’obuhangwa n’oija kugonza kugambiraho abantu abandi hali eby’oyegere. Obw’orayeyongera kusoma Baibuli noija kwega kugikozesa kusoborra okwikiriza kwawe hamu n’okutebeza amakuru amarungi.—Soma Matayo 24:14; Abarumi 10:13, 14.
Abarukukira obwingi obubaba nibatandiika kutebeza babandiza ha nganjani n’abanyabuzaale baabu. Kinu nikyetaaga kukozesa amagezi. Omu kikaro ky’okubagambira ngu ediini yaabu ehabisibwe, bagambire ha mirago ya Ruhanga. Ijuka abantu basemezebwa engeso zaawe ennungi okukira eby’obaza.—Soma 2 Timoseo 2:24, 25.
3. N’osobora kuba n’enkoragana y’amulingo ki na Ruhanga?
Okusoma Ekigambo kya Ruhanga nikiija kukukonyera kukura omu by’omwoyo. Hanyuma n’oija kutunga enkoragana ennungi na Yahwe. Noija kuba omu hali abaana be.—Soma 2 Abakolinso 6:18.
4. Kiki ekirakukonyera kugenda omu maiso n’okurakurana?
N’oija kukurakurana omu by’omwoyo obw’orayeyongera kusoma Ekigambo kya Ruhanga. (Abaheburaniya 5:13, 14) Saba omu hali Abakaiso ba Yahwe kukukonyera kwega Baibuli nimukozesa akatabu Baibuli Etwegesa Ki? Horagarukira kusoma Ekigambo kya Ruhanga nuho oragarukira kuba n’obusinguzi.—Soma Zabuli 1:1-3; 73:27, 28.
Amakuru amarungi garuga hali Yahwe Ruhanga ow’okusemererwa. Noija kwirra haihi nawe obw’oraganjana n’abantu be. (Abaheburaniya 10:24, 25) Obw’orayeyongera kusemeza Yahwe, noija kutunga obwomezi bwonyini—obwomezi obutahwaho. Kwirra haihi na Ruhanga nikyo kintu ekirukukirayo oburungi eky’orukusobora kukora.—Soma 1 Timoseo 1:11; 6:19.