Tukonyera Tuta Bagenzi Baitu Abali omu Buzibu?

Obu hagwaho obuzibu, Abakaiso ba Yahwe batandikiraho kukora kyoona ekirukusoboka kuhikya obukonyezi hali bagenzi baabu abagwerirwe obuzibu. Ekyo kyoleka okugonza kwonyini okubainire bagenzi baabu. (Yohana 13:34, 35; 1 Yohana 3:17, 18) Tukonyera omu miringo ki?

Tuhayo sente. Abakristaayo ab’omu Antyokiya bakatwekera ab’oruganda abaali omu Buyudaya sente zibakonyere, obu bahulire ngu haali hagwireyo ekiihe eky’amaani. (Engeso 11:27-30) Omu mulingo nugwo gumu, obutuhu’ra ngu ab’oruganda omu kicweka ekimu batungire ekizibu eky’amaani, kuraba omu bitebe byaitu tutwekayo obukonyezi.​—2 Abakolinso 8:13-15.

Tugenda nitukonyera nambere obuzibu bugwire. Abagurusi abali omu kicweka nambere obuzibu bugwire, bafaayo kumanya ab’oruganda boona obu baraaba bali kurungi. Akatebe katekwaho kusobora kuhikya h’ab’oruganda ebyokulya, amaizi g’okunywa, eby’okujwara, ah’okurara, n’emibazi. Abakaiso ba Yahwe baingi bakozesa sente zaabu kugenda kukonyera ab’oruganda, n’okugarraho amaju n’Ebyombeko by’Obukama ebiba bisiisirwe. Habwokuba buli kasumi tukorra hamu nk’ekitebe, tikigumire kutunga ebintu ebirukwetaagisibwa n’ab’oruganda abarukugonza kukonyera. Gonze tukira kukonyera abaikiriza bagenzi baitu, n’abantu ab’enyikiriza eziindi tubakonyera obukiba kisobokere.​—Abagaratiya 6:10.

Tubahumuza n’Ebyahandiikirwe. Abantu abagwerirwe obuzibu obw’amaani betaaga kuhumuzibwa. Omu busumi nk’obu amaani tugaiha hali Yahwe, “Ruhanga owokuhumuza kwona.” (2 Abakolinso 1:3, 4) Tugumya boona abarukuganya nitubooleka emirago ya Ruhanga kuruga omu Byahandiikirwe, erukutugumiza ngu omu kasumi akatali kahara, Obukama bwe nibwiija kwihaho ebintu byoona ebirukutuletera obusaasi n’okubonabona.​—Okusuku’rwa 21:4.

• Kiki ekisobozesa Abakaiso ba Yahwe kwanguhirwa kukonyera bagenzi baabu abagwerirwe obuzibu?

• Abantu abatungire obuzibu tubahikyaho kuhumuzibwa ki okurugire omu Byahandiikirwe?