Abakaiso ba Yahwe Bakonyera Abahikirweho Ebigwererezi?

Ego, Abakaiso ba Yahwe bakira kukonyera abandi abahikirweho ebigwererezi. Tukonyera Abakaiso ba Yahwe n’abatali Bakaiso ba Yahwe. Eki tukikora nituhondera obuhabuzi bwa Baibuli oburukusangwa omu Abagaratiya 6:10: “Tukolege kurungi abantu bona, kandi nokukira, abo abomunju yokuikiriza.” Ekindi, tulengaho kuhuumuza abahikirweho ebigwererezi n’okubakonyera omu by’omwoyo.—2 Abakolinso 1:3, 4.

Omulingo tukikoramu

Hanyuma y’ekigwererezi kubaho, abagurusi b’ebitebe ab’omu kiikaro nambere habaire ekigwererezi, balengaho kuhikirra boona abali omu bitebe ebi kumanya obubaraaba bali kurungi, n’okumanya omulingo barabakonyera. Hanyuma, ahonaaho abagurusi bamanyisa itaagi obwetaago oburoho n’ebibasoboire kukoraho.

Kakuba obwetaago buba bw’amaani kandi ebitebe ebiri haihi tibisobora kukonyera abo abahikirweho ekigwererezi, Akatebe Akalemi ak’Abakaiso ba Yahwe nikasobora kukora entekaniza z’okusindika ebirukwetaagwa. Kandi entekaniza enu n’esisanaho n’omulingo Abakristaayo abaakara baakonyiire ab’oruganda abandi enjara obuyagwire. (1 Abakolinso 16:1-4) Ofiisi y’itaagi ey’omu kiikaro eki ekoma Obutebe bw’Okukonyera Abahikirweho Ebigwererezi nukwo busobole kutekaniza omulimo gw’okukonyera bahikirweho ebigwererezi n’okubahikyaho obukonyezi. Abakaiso ba Yahwe kuruga omu biikaro ebindi bahayo ebintu kandi nabo beehayo kukonyera.—Enfumo 17:17.

Sente ziruga nkaha

Gumu ha miringo nugwo ngu sente sente ezihairweyo zisindikwa ha ofiisi z’amataagi nukwo zikozesebwe omu kukonyera abahikirweho ebigwererezi. (Engeso Ezabakwenda 11:27-30; 2 Abakolinso 8:13-15) Habwokuba emirimo ekorwa abantu abehaireyo kukonyera batarukusasurwa, sente zoona zikozesebwa kukonyera abakwasirweho hatali kusasura abakozi. Tukozesa kurungi sente eziba zihairweho.—2 Abakolinso 8:20.