Wakugondeze Okumanya Amananu?

AMANANU agarukukwata haki? Agarukukwata ha bikaguzo ebikuru abantu ebi bekaguza. Naiwe nosobora kuba orayekagwizeho habikaguzo nka binu:

• Mananu Ruhanga atufaaho?

• Obulemu n’okubonabona birihwaho?

• Kiki ekitubaho obutufa?

• Haroho okunihira kwona okw’abafu?

• Nsobora nta kusaba nkahulirwa Ruhanga?

• Nsobora nta kutunga okusemererwa omubwomezi?

Nosobora kwiha nkaha ebyokugarukwamu okw’ebikaguzo binu? Kakuba ogenda mbere batundira ebitabu naha babisomera, nosobora kusangayo ebitabu bingi ebirukwegamba okuha Engarukamu. Obundi osanga ekitabu kimu nikihakaniza ekindi. Ebimu amagezi ebi gaha tigagumaho, obundi gahindurwa rundi bataho agandi, hampero gahwaho.

Baitu, haroho ekitabu kimu ekiha engarukamu erukwesigwa. Kitabu ky’amananu. Yesu Kristo omukusaba kwe hali Ruhanga akagamba: “Ekigambo kyawe nigo mananu.” (Yohana 17:17) Ebiro binu nitumanya ekigambo ekyo nka Baibuli Erukwera. Mumpapura ezirakurataho noija kwerorra wenka Engarukamu eya Baibuli erukwetegerezebwa kurungi kandi y’amananu hali ebikaguzo ebya haruguru.

Mananu Ruhanga Atufaaho?

HABWAKI EKIKAGUZO KINU KIKAGUZIBWA: Twikara munsi ijwiremu emihito hamu n’obutali bwinganiza. Amadiini amaingi nigegesa ngu okubonabona okuturabamu kuba kusiima kwa Ruhanga.

EKYO BAIBULI KYEYEGESA: Ruhanga taleeta bubi. “Kimuli hara Ruhanga okukora kubi kandi owobusobozi bwona okukora obutahikirra!” nukwo Yobu 34:10 rugamba. Ruhanga aine ekigendererwa kirungi h’abw’abantu. Enu niyo nsonga yesu yatwegeseze okusaba: “Isitwe ali omu iguru. Obukama bwawe . . . buije. Ebyogonza bikorwe hansi nkoku babikora omu iguru.” (Matayo 6:9, 10) Ruhanga natufaaho muno, eno niyo nsonga habwaki yakozere ekirikusoboka okugumya ngu nahikiriza ekigendererwa kye.—Yohana 3:16.

Yongera osome Okubanza 1:26-28; Yakobo 1:13; na 1 Petero 5:6, 7.

Obulemu n’Okubonabona Birihwaho?

HABWAKI EKIKAGUZO KINU KIKAGUZIBWA: Abantu baingi beyongiire kufeera Omubulemu. Itwena tukwasirweho okubonabona.

EKYO BAIBULI KYEYEGESA: Ruhanga nanihiza ngu obwire nibwija obu araleeta obusinge omunsi yoona. Hansi y’Obukama bwe, nubwo obulemi obwomu iguru, abantu “tibalyega kurwana obundi.” Baitu “balihesa busitama zabu enfuka.” (Isaya 2:4) Ruhanga alimarraho kimu obutali bwinganiza hamu n’okubonabona. Baibuli neraganiza: “[Ruhanga] alisusura amaizi goona hamaiso gaabo kandi tihakiroho okufa n’obukwakuba okutera empamo n’obukwakuba oku’ra n’obukwakuba okusasa tibikiroho. Eby’okubanza [okutwarramu obutali bwinganiza hamu n’okubonabona ebiroho] bihoireho.”—Okusuku’rwa 21:3, 4, New World Translation.

Yongera osome Zabuli 37:10, 11; 46:9; na Mika 4:1-4.

Kiki Ekitubaho Obu Tufa?

HABWAKI EKIKAGUZO KINU KIKAGUZIBWA: Ediini ezirukukira obwingi omunsi zegesa ngu haroho ekintu ekiri omu muntu ekyeyongera okwomera ­hanyuma y’omuntu okufa. Abamu nibatekereza ngu abafiire nibasobora kurumya abomezi ngu na Ruhanga afubira ababi n’abata omu murro ogutarara babonebone ebiro n’ebiro.

EKYO BAIBULI KYEYEGESA: Ha kufa, abantu tibeyongera kuba bomezi. “Abafiire . . . tibamanyire kigambo na kimu,” nukwo Omugambizi 9:5, rugamba. Abafu obubaraaba batarukumanya ekintu kyona, kuhu’ra rundi kwetegereza ekintu kyona nahabwekyo tibarukusobora kurumya rundi kukonyera abomezi.—Zabuli 146:3, 4.

Yongera osome Okubanza 3:19 n’Omugambizi 9:6, 10.

Haroho Okunihira Kwona Okwa Bafu?

HABWAKI EKIKAGUZO KINU KIKAGUZIBWA: Tugonza kuba bomezi, kandi tugonza kusemerererwa obwomezi hamu n’abagonzebwa baitu. Kyomu buhangwa okwesunga okugaruka okurora abagonzebwa baitu abafiire obundi.

EKYO BAIBULI KYEYEGESA: Abantu abarukukira obwingi abafiire nibaija kuhumburwa. Yesu akanihiza ati “bona abali omubituro . . . balirugamu.” (Yohana 5:28, 29) Okusigikirra ha kigendererwa kya Ruhanga eky’okuba­nza abantu abalihumburwa baliba n’omugisa kwikara omurugonjo rwa Ruhanga omunsi. (Luka 23:43) Omurago gunu nigutwarramu obwomezi omutali kurwara n’obwomezi obutalihwaho hali abantu abahulizi. Baibuli negamba eti: “Abahikirire baligwetwa ensi, baragikaramuga ebiro byona.”—Zabuli 37:29.

Yongera osome Yobu 14:14, 15; Luka 7:11-17; n’Engeso 24:15.

Nsobora Nta Kusaba Nkahulirwa Ruhanga?

HABWAKI EKIKAGUZO KINU KIKAGUZIBWA: Abantu omumadiini goona basaba. Baitu baingi bahu’ra ngu esara zabu tizigarukwamu.

EKYO BAIBULI KYEYEGESA: Yesu akatwegesa obutagarukamu esara ezitegekerwe. “Obwosaba,” akagamba, “otalisaba endanda.” (Matayo 6:7) Kakuba nitugonza Ruhanga ahulirize okusaba kwaitu, twine kusaba omu mulingo ogu arukusiima. Okukora kinu twine okumanya ebyo Ruhanga ebyagonza nukwo tusobole kusaba kurungi. 1 Yohana 5:14 nirukisoborraho ruti: “Obutusaba ekintu kyoona [Ruhanga] nk’okwagonza atuhu’ra.”

Yongera osome Zabuli 65:2; Yohana 14:6, 14; na 1 Yohana 3:22.

Nsobora Nta Kutunga Okusemererwa Mubwomezi?

HABWAKI EKIKAGUZO KINU KIKAGUZIBWA: Abantu abarukukira obwingi nibaikiriza ngu sente, okuranganwa rundi oburungi nibisobora kubaletera okusemererwa. Nahabwekyo binu nibyo ebintu bakolerra—hamperu besanga tibatungiremu okusemererwa.

EKYO BAIBULI KYEYEGESA: Yesu akoleka ekyo ekisobora kuleta okusemererwa obu yagambire: “Banyine omugisa abafayo haby’etago byabu eby’eby’omwoyo.” (Matayo 5:3, NW) Okusemererwa okwamananu nitusobora kukutunga kakuba tulengaho kwigusa okwetaga kwaitu okukirayo obukuru—enjara ey’eby’omwoyo erukukwata hamananu aga Ruhanga n’ebigendererwa bye. Amananu ganu nigasangibwa omu Baibuli. Okumanya amananu ganu nigasobora kutuyamba okumanyira kimu bintu ki ebyomugaso n’ebitali. Kakuba tuleka amananu ga Baibuli okutwebembera mwebyo ebitucwamu n’omubikorwa byaitu nitwija kutunga obwomezi obwine ekigendererwa.—Luka 11:28.

Yongera osome n’Enfumo 3:​5, 6, 13-​18 na 1 Timoseo 6:​9, 10.

Egi ebaire nsoborraho enke eya Baibuli habikaguzo mukaga. Wakugondeze okumanya ebikukiraho? Obworaba oli omu hali abo abaine “obwetago bwabo obwebyomwoyo” nkoku oli. Nosobora kwekaguza ebikaguzo ebindi nka: ‘Ruhanga obu araba natufaaho, habwaki alekereho obubi bwingi buti obubaireho mu byafayo? Nsobora nta kuba n’obwomezi obw’amaka oburungi?’ Baibuli eha ebyokugarukamu ebirungi ebirukuhwitura hali ebikaguzo binu hanu n’ebindi bingi.

Baitu, abantu baingi bagurukyagarukya omu kusoma Baibuli. Bakirora nk’ekitabu ekikoto kandi obundi ekigumire okwetegereza. Wakugondeze obukonyezi okutunga ebyokugarukwamu okuruga omu Baibuli? Abakaiso ba Yahwe bagaba ebintu bibiri ebirukusobora kukuyamba.

Eky’okubanza, nikyo akatabu Baibuli Etwegesa Ki? kakategekebwa okuyamba abantu abataine obwire okuzoora nkoku Baibuli egarukamu ebikaguzo byabu ebikuru. Ekyakabiri niyo entegeka eyabusa ey’okwegamu Baibuli omumaka. Hataroho kusasura kwona, Omu h’Abakaiso ba Yahwe arukwikara haihi naiwe, kandi namanya kwegesa kurungi Baibuli, nasobora kwija omuka yawe rundi omukikaro kyoona okumara akanya kake buli wiiki akakwegesa Baibuli. Obukaikuru bw’abantu omunsi yoona batungiremu omugaso muntegeka enu. Baingi bahikire naha kugamba bati: “Nzoire amananu!”

Busaho kintu ky’omugaso kyoona ekyorukusobora kuzoora, nk’amananu aga Baibuli. Gatusumu’ra kuruga omu kutiina kurogebwa, okubuzabuzibwa, n’okutiina ebitaroho. Nigatuha okunihira, ekigendererwa n’okusemererwa. Yesu akagamba ati: “Mulimanya amananu kandi n’amananu galibafora b’obugabe.”—Yohana 8:32.