Okubonabona Kwoona Kuli Haihi Kuhwaho!
Mubwomezi bwawe okaba orayekagwizeho ngu ‘Habwaki haroho okubonabona kwingi?’ Okumara ebyasa by’emyaka bingi, orulyo rw’abantu rubaire nirubonabona habw’obulemu, amaseege, obutabanguko, obucwi bw’ebiragiro, obutali bwinganiza, oburwaire hamu n’okufa. Mu myaka kikumi enyakuhingwireho abantu baboineboine muno kukira enyumaho. Binu byoona birihwaho?
Ekyokugarukamu ekirukugarramu amaani kiri nti ego, kandi mubusumi obutali bwahara! Ekigambo kya Ruhanga, Baibuli, nikigamba: “Omubi alihera . . . Baitu abaculezi baligwetwa ensi; balikyanganuka obwobusinge obwingi.” Kumara mwanya ki? “Abahikirire baligwetwa ensi, baragiikaramuga ebiro nebiro.”—Zabuli 37:10, 11, 29.
Hanyuma ya Ruhanga okumaraho ababi n’okubonabona ensi nijja kuhindurwa orugonjo rwe. Hanyuma abantu balisobora kwomera ebiro byoona mubwomezi oburungi hamu n’okusemererwa. Ekigambo kya Ruhanga nikiraganiza: “[Ruhanga] alisusura amaizi gona ha maiso gabu; kandi tihakiroho okufa; nobukwakuba okutera empamo, nobukwakuba oku’ra, n’obukwakuba okusasa tibikiroho.”—Okusuku’rwa 21:4.
Munsi empyaka egyo, n’abaffu baligarurwa kuba bomezi nukwo basemererwe mumigisa eno: “Halibaho okuhumbuka okwabahikirire nabatahikirire.” (Engeso 24:15) Habw’ensonga enu nikyo Yesu Kristo yagambire omu h’abasisi ayamwikiririzemu ngu: “Oliba nanyowe mu Rugonjo rwa Ruhanga.”—Luka 23:43, New World Translation.
Habwaki Okubonabona Kukatandika?
Ruhanga obwaraba yagondeze abantu okuba n’obwomezi oburungi buti, habwaki yaikirize okubonabona okutandika? Habwaki akwikirize okumara omwanya muraingwa guti?
Ruhanga obu yahangire Adamu na Hawa, bakaba bahikirire mu mubiri hamu n’omubitekerezo. Akabata mu rugonjo kandi akabaha n’emirimo emirungi ey’okukora. Baibuli n’egamba eti: “Ruhanga yarora byona ebiyakozire, kandi dora bisemire muno.” (Okubanza 1:31) Kakuba bahuliire Ruhanga, bakuzaire abaana abahikirire n’ensi yoona yakufookere orugonjo, nambere bakwomiire ebiro byoona mubusinge n’okusemererwa.
Ruhanga akata mu Adamu na Hawa ekisembo ekirungi muno eky’okwesarramu wenka. Baali batali nk’ebyoma ebitaine magezi. Baitu okugumaho mumasemererwa gabu kyali nikisigikirra hankozesa enungi y’ekisembo ekyokwecweramu nukwo okworobera ebiragiro bya Ruhanga. Nkoku Ruhanga agamba: “Ninyowe Mukama Ruhanga wawe, arukukwegesa okugasa, arukukuterekereza mu muhanda ogwoliba nogendamu.” (Isaya 48:17) Enkozesa embi y’ekisembo kyokwecweramu n’erugwamu emihito, habwokuba abantu batahangwe okwerema boonka. Baibuli egamba: “Omuhanda ogwomuntu tiguli omuluwe wenka: tikiri omu muntu arukugenda okuterekereza ebigere bye.”—Yeremiya 10:23.
Ekyennaku kiri nti abazaire baitu ab’okubanza bakahurra ngu baali nibasobora kweremera Ruhanga kandi bakeyongera kuba kurungi muno. Baitu obu bayesazireho obulemi bwa Ruhanga, nawe ateyongere kubasagika mubuhikirire. Hanyuma bakatandika kuhwererra n’okuhikya bakaikwire baffa. Nkoku tuli baana babu, tukagwetwa obutahikirire hamu n’okuffa.—Abarumi 5:12.
Ensonga Enkuru eri Nooha Asemerire Kulema?
Habwaki Ruhanga atarahwerekerize Adamu na Hawa kandi akatandika buhyaka n’abantu abandi? Habwokuba obulemi bwa Ruhanga nubwo bwahakanizibwe. Ekikaguzo kiri nti, Nooha eine obusobozi bw’okulema kandi bulemi bwoha obuhikirire? Abantu bakubaire kurungi batarukulemwa Ruhanga? Habwokubahayo obwire oburukumara okulengesa obugabe bwabo, Ruhanga akaba naija kukyoleka omurundi gumu gwonka ngu abantu babaire kurungi hansi y’obulemi bwabo rundi obwe. Obwire obwahairwe bwali bwine kuba oburukumara kurungi nukwo abantu kutegekeramu obulemi obwa buli mulingo ogw’ebyobulemi, ebyenyikara, ebyentahya n’ebyedini ebitali hansi yentekaniza ya Ruhanga.
Biki ebirugiremu? Emyaka nyingi y’ebyafayo by’omuntu n’etwoleka ngu habaireho okubonabona kwingi. Mukyasa ekyakahwa omuntu aboineboine muno kukira nkoku kitakabahoga. Obukaikuru bw’abantu bakaitwa mukwitwa okwekikungo okwabaireho mu Bulemu obw’Akabiri obw’Ensi Yoona. Abantu abarukukira ha bukaikuru 100 baisirwe mu bulemu. Obucwi bw’ebiragiro hamu n’obusasamaro byeyongire buli hantu. Enkozesa y’emibazi erukutamiza eyeyongirire kimu. Oburwaire oburukuruga omu busihani nabwo bweyongire. Obukaikuru n’obukaikuru bw’abantu baitwa enjara n’endwaire buli mwaka. Obwomezi bw’amaka hamu n’engeso enungi bigarukirire muno. Busaho bulemi bw’abantu obusobora okujangurra emihito enu yoona. Busaho bulemi bwoona obusobora kumaraho kukaikura, kurwara hamu n’okufa.
Entekaniza y’obwomezi bw’omuntu eri nkoku Baibuli yagiragwireho habw’ebiro byaitu. Ekigambo kya Ruhanga nikyoleka ngu obusinge bwaitu ‘bw’ebiro bya hanyuma’ eby’entekaniza ey’ebintu, ‘ey’akabi kaingi.’ Nkoku Baibuli egamba ‘abantu ababi nabetuliki’ra bahinguraine omu bubi.’—2 Timoseo 3:1-5, 13.
Okubonabona Kuli Haihi Kuhwaho
Obujulizi bwoona nibwoleka ngu tusemberire empero y’obulemi obw’okweremera Ruhanga. Nkoku kyolekerwe kurungi hataroho kugurukyagurukya ngu, obulemi bw’omuntu hatali Ruhanga tiburukusobora kugumaho. Obulemi bwa Ruhanga bwonka nibwo busobora kuleeta obusinge, okusemererwa, obwomezi oburungi hamu n’obwomezi obutahwaho. Nahabwekyo obwire Yahwe obu yalekereho obubi n’okubonabona okugumaho buli haihi kuhwaho. Mubwangu Ruhanga naija kutaha munsonga z’abantu nahwerekereza entekaniza yoona enu embi ey’ebintu.
Obunabbi bwa Baibuli nibugamba: “Omu biro ebyabakama abo [obulemi bw’abantu oburoho] Ruhanga owomu iguru aliimukya obukama [omu iguru], obutalihwerekerezebwa ebiro byona. . . . Bulicwacwana nubumaraho obukama obu bwona [obulemi oburoho], kandi buligumaho ebiro nebiro.” (Danieri 2:44) Okuhaisaniza kw’obulemi bwa Yahwe n’obusobozi bwe wenka okulema kuraba mu Bukama bwe obw’omu iguru niyo nyegesa enkuru muno ey’omu Baibuli. Naragura ha kimu ekiri omu kamanyiso ‘ak’ebiro bya hanyuma,’ Yesu akagamba ngu: “Enjiri enu eyobukama eritebezebwa omu nsi zona okuba kaiso hali amahanga gona; nubwo empero erihika.”—Matayo 24:14.
Empero obwerijja, nibaha abalikira? Baibuli negarukamu eti: “Baitu abamazima balitaha ensi, nabahikirire baliikara omu. Baitu ababi balimarwa omu nsi.” (Enfumo 2:21, 22) Abamazima nibo abo abarukwega hali ebyo Yahwe arukugonza kandi bakabikora. Yesu Kristo akagamba: “Buno nubwo bwomezi obutahwaho, okumanya iwe Ruhanga omu owamananu, nogu ouwatumire, Yesu Kristo.” (Yohana 17:3) Ego, “ensi ehwaho . . . , baitu anyakukora Ruhanga ebyagonza aikara ebiro nebiro.”—1 Yohana 2:17.
Kwihaho kyolekerwe kundi, Ebyahandiikirwe ebirukujulizibwa bihirwe omu Baibuli y’Orutoro eya 1965.