‘Akasumi K’okusara Omusango’ Kairire Haihi

EKITABU ekya hamperu ekya Baibuli eky’Okusuku’rwa nikitumanyisa ngu maraika nahurruka ha’iguru omu mwanya hagati “ayina enjiri y’ebiro n’ebiro.” Nagambira haiguru niraka lihango: “Mutine Ruhanga mumuhe ekitinisa, baitu akasumi ke ak’okucweramu omusango kahikire.” (Okusuku’rwa 14:​6, 7) ‘Akasumi ak’okucweramu omusango’ nikatwarramu okurangirra n’okuta munkora ensara y’omusango ya Ruhanga. ‘Akasumi’ kaba kaanya kake. Nikaija kwija ha kumalirrayo ‘kw’ebiro bya ha mperu.’ Tuli mu busumi obu hati.​​—⁠2 Timoseo 3:⁠1.

Okuhikirra kwa ‘kasumi k’okusara omusango’ makuru marungi hali abo abagonza okuhikirra. Obu nubwo obwire Ruhanga alireeta okuhumuzibwa hali abahereza be ababonabonisibwe entekaniza enu ey’obusasamaro, kandi n’obutagonzangana.

Hati, ‘akasumi k’okusarramu’ omusango katakafundikirwe n’okuhwerekerezebwa kw’entekaniza ey’ebintu enu embi katakabaireho nitugambirwa tuti: “Tina Ruhanga mumuhe ekitinisa.” Kinu n’okikora? Kinu nikitwarramu bingi kukira hakumara gagamba ngu, “ninyikiriza mu Ruhanga.” (Matayo 7:​21-​23; Yakobo 2:​19, 20) Okutiina Ruhanga okw’amazima nikumanyisa okumuha ekitinisa ekimusemerire. Kwakutuyambire kwetantara emihanda emibi. (Enfumo 8:​13) Kyakutuyambire kugonza ebirungi tukanoba ebibi. (Amosi 5:​14, 15) Kakuba tutamu Ruhanga ekitinisa twakumuhulirize n’obwegendereza. Titwakubaire nitutalibaana muno n’ebintu bingi tukaburwa obwire kusoma Ekigambo kye obutayosa. Twine kumwesiga mu bwire bwoona n’omutima gwaitu gwoona. (Zabuli 62:⁠8; Enfumo 3:​5, 6) Abo abamutamu ekitinisa bakimanya ngu nuwe Muhangi w’iguru n’ensi, kandi Mulemi Wabyo Byoona nahabwekyo behayo n’obwomezi bwabo bwona haliwe nk’omulemi wabo. Obu turakimanya ngu twine kwecumitirizaho ebintu binu tubikorreho mubwangu.

Akasumi k’okusarramu omusango maraika akayagambire nikamanywa mumakuru agandi ‘nk’ekiro kya Yahwe.’ ‘Ekiro’ nk’ekyo kikaizira Yerusalemi ey’aira omu mwaka 607 B.C.E. habwokuba abali bakirimu batahulirize okuhabura kwa Yahwe kuraba mu banabbi be. Obutakitaho mutima kikata obwomezi bwabu omu kabi. Yahwe akaba abahabwire: “Kiri haihi, nikyanguha muno.” (Zefaniya 1:​14) “Ekiro kya Mukama” ekindi kikaizira Baburoni ekyaira omu 539 B.C.E. (Isaya 13:​1, 6) Okwesiga okubali baine mu bisiika ebyali byetoroire orubuga hamu n’abaruhanga babu kikaletera Abababuroni obutafayo ha kuraburwa kwa banabbi ba Yahwe. Baitu mu kiro kimu kyonka, Baburoni ekyali kyamahano kikahambwa Abamedi na Baperusi.

Itwe kiki ekirukutukwataho hati? Haliyo ‘ekiro kya Yahwe’ ekindi ekikuraho. (2 Petero 3:​11-​14) Omusango gwa Ruhanga gumazire kucwerwa ‘Baburoni Orukuru.’ Omu okusuku’rwa 14:​8, maraika nagamba: ‘Rugwire! Baburoni Orukuru.’ Kinu kimazire kubaho. Baburoni takyalemesa abahereza ba Yahwe. Obuli bwenguzi bwe, kwetahya mu by’obulemu nibimanywa boona. Baitu okuhwerekereza Baburoni Orukuru okwakamalirizo kuli haihi. Omukunihira ekyo Baibuli egambira abantu boona: “Mumuturukemu [Baburoni Orukuru] . . . muleke kuterana n’ebibi bye, muleke kuhabwa ha mihito ye. Baitu ebibi bye bihikire omu iguru, kandi Ruhanga aijukire eby’okusisa bye.”​​—⁠Okusuku’rwa 18:​4, 5.

Baburoni Orukuru nikyo kiki? Enu niyo entekaniza ey’ediini ey’ensi yoona enyakwina obwokurorraho nkobu obwali mu Baburoni eyaira. (Okusuku’rwa, esuura 17, 18) Rora obwokurorraho oburukusisana:

• Abanyakatagara aba Baburoni ey’aira bali betahiize kimu omu by’obulemi eby’ensi yabu. Kinu ky’amazima naha diini ez’ebiro binu.

• Banyakatagara ba Baburoni baali nibasagika obulemu bw’ensi yabu. Ediini z’ebiro binu zibaire z’okubanza mukuha emigisa abasirikale abarukugya mu kurwana mu bulemu.

• Enyegesa n’emikorre eya Baburoni ekyaira ekaletera ihanga lyoona kugwa mungeso z’obusihani. Abakuru ba madiini obu bata ha rubaju amateeka ga Baibuli ag’okuterana hamu kw’omusaija n’omukazi, kireterize obusihani obwa buli kika kukanya mu bahule hamu n’omubakurasi babu. Ne kikuru ekirukumanywa kurungi ngu Baburoni Orukuru nirusihana n’ensi hamu n’entekaniza yayo ey’ebyobulemi, nikyo eki ekitabu eky’Okusuku’rwa kirwoleka nk’omukazi omusihani.

• Baibuli egaruka egamba ngu Baburoni Orukuru nirwikara omu bwomezi ‘bwokwecuma wenka.’ Mu Baburoni ekyaira, ekitebe kya yekaru kyali kine amataka maingi, kandi n’abanyakatagara bali basubuzi bamaani. Nahati, kwihaho kuba n’amaramizo, Baburoni Orukuru rwine ebyobusubuzi bingi. Enyegesa zakyo hamu n’ebiro byabu ebikuru bibagaigahaize hamu nabo abali mu nsi ey’ebyobusubuzi.

• Enkozesa z’ebisisani, amasano n’obusezi byaali bintu by’abuli muntu omu Baburoni ekyaira, nkoku kiri mubikaro bingi. Okuffa kwali nikurorwa nk’omuhanda ogurukutwara omubwomezi obundi. Baburoni ekaba ijwiremu amaramizo amakooto n’amake agali nigata ekitinisa mu baruhanga babo, baitu abantu omu Baburoni baali nibahakaniza abarukuramya Yahwe. Enyikiriza n’emigenzo nkenu niyo erukwoleka Baburoni Orukuru.

Mu biro ebyaira Ruhanga akakozesa abalemi abaamaani okufubira abo abali batakumutamu ekitinisa nabatarukufayo haby’arukugonza. Samalia ekahwerekerezebwa Abasura omu mwaka gwa 740 B.C.E. Yerusalemi ekahwerekerezebwa aba Baburoni omu mwaka 607 B.C.E., n’Abarumi omumwaka 70 C.E. Baburoni nayo ekahambwa Abamede n’Abaperusi omu 539 B.C.E. Omu biro byaitu, Baibuli n’eragura ngu obulemi oburukusisanizibwa nk’ekisoro ky’omu kisaka ngu kirihindukira “omusihani” n’okumujura nokumwoleka mubwijwire nkoku ali, kandi bulimuhwerekerereza kimu.​​—⁠Okusuku’rwa 17:⁠16.

Abalemi b’ensi mali balikora ekintu kinu? Baibuli n’egamba ngu “Ruhanga akakita omu mitima yabu.” (Okusuku’rwa 17:17) Kinu nikija kuba mu bwangu, mukuhuniriza mukutinisa, batakukinihira, kandi muntegeka erukukuratana.

Kiki ekyoina kukora? Wekaguze: ‘Nyowe nkyagugubire ha kitebe kye diini ekinyakurumu enyegesa ne migenzo eya Baburoni Orukuru?’ N’obworaba otali munyadiini nosobora kucumitirizaho ha kikaguzo kinu: ‘Nyowe ndekere omwoyo gwa Baburoni Orukuru okuntwaliriza?’ Mwoyo ki gunu? Omwoyo gunu nigwo okwikiriza engeso zoona ez’obusihani, okugonza ebintu hamu n’okugonza kwesemeza kukira Ruhanga, rundi obutatamu Ekigambo kya Yahwe ekitinisa (obundi n’omubintu ebitwara okuba ebitali by’amaani). Tekerezaho kiki ekyoragarukamu.

Itwe okutunga okusimibwa kwa Yahwe, kikuru nti mubikorwa byaitu hamu n’ebigendererwa byaitu eby’omutima, twine kwoleka ngu tituli kicweka kya Baburoni Orukuru. Busaho kaire k’okusisa. Baibuli netuhabura ngu emperu nija mubwangu, egamba eti: “Nukwo n’okugwa kwingi Baburoni orubuga orukuru rulinagwa hansi kandi rutalizooka obundi.”​​—⁠Okusuku’rwa 18:⁠21.

Haliyo bingi ebirukwija. Mumulingo ogundi ‘ogw’okusarramu omusango,’ Ruhanga alisarra entegeka ez’oby’obulemi ez’ensi, n’abalemi, hamu naabo abatarukufayo ha bulemi bwe obw’omu iguru obwateire mu mikono gya Yesu Kristo. (Okusuku’rwa 13:​1, 2; 19:​19-​21) Okwolekebwa kw’obunabbi obwahandikirwe obwa Danyeri 2:​20-​45 bukoleka entegeka ey’oby’obulemi kurugirra kimu ha Baburoni ekyaira kuhikya hati nk’ekisisani ekikoto ekyakozirwe mu zabu, feza, miringa, kyoma hamu n’ibumba. Habikwatiraine n’ebiro byaitu, obunabbi bukagamba: “Ruhanga owomu iguru alimukya obukama obutalihwerekerezebwa.” Ebikwatiraine n’ebyo obukama ebi bulikora mu ‘kasumi k’okucwa omusango,’ Baibuli n’egamba: “Baitu bulicwacwana, nubumaraho obukama obu bwona kandi buligumaho ebiro n’ebiro.”​​—⁠Danieri 2:​44.

Baibuli n’erabura abaramya abamananu obutagonza ‘ebintu ebiri munsi’ nukwo kugamba obwomezi obw’ensi egonza tube nabwo ebweyahukanize n’emitwalize ya Ruhanga ow’amazima. (1 Yohana 2:​15-​17) Ebyosaramu n’ebikorwa byawe nibyoleka ngu oli musagiki atarukugarukirra w’Obukama bwa Ruhanga? Mananu obuta mukikaro ky’okubanza mubwomezi bwawe?​​—⁠Matayo 6:​33; Yohana 17:​16, 17.

[Akasanduuko akali ha rupapura 14]

Emperu Erija Ddi?

“Omu kasumi akamutatekerezaho, Omwana w’omuntu aliiziramu.” ​—⁠Matayo 24:⁠44.

“Murole, . . . timurukumanya kiro n’obwakuba kasumi.”​​—⁠Matayo 25:⁠13.

“Mazima tikuliikaraho.” ​—⁠Habakuki 2:⁠3.

[Akasanduuko akali ha rupapura 14]

Kyakulesereho Embaganiza Kakuba Wakukimanyire?

Kakuba wakubaire n’okimanyira kimu ngu Ruhanga okusara kwe kw’omusango kwongizibweyo emyaka mike omu maiso, kinu kyakuhindwireho omulingo ogu orukukozesa obwomezi bwawe? Kakuba emperu y’entekaniza enu embi ey’ebintu ekererirwe okwija nkoku okaba nonihira, kyakukuletiire kugarukirra omu buhereza bwawe hali Yahwe?​​—⁠Abaheburaniya 10:​36-​38.

Obutamanya kasumi konyini, kituha omugisa okuhereza Ruhanga n’omutima ogutaina bugobya. Abarukumanya Yahwe nibakimanya ngu okwoleka obwekambi hali Ruhanga obw’esaaha erukusembayo, emperu etakahikire tibusobora kusemeza Ruhanga, anyakurora omutima nkoku guli.​​—⁠Yeremiya 17:10; Abaheburaniya 4:​13.

Abagondeza kimu Yahwe bamuta mu kikaro kyo kubanza. Nkokusisana abantu abandi Abakristayo bakora emirimu eya buli kiro. Baitu ekigendererwa kyabu tikiri kutunga itungo, kwihaho kuba neby’okukozesa mubwomezi n’ebindi ebike kugabira abandi. (Abefeso 4:​28; 1 Timoseo 6:​7-​12) Nabo basemererwa hamu kandi n’okuhingisaho obwomezi, baitu ekigendererwa kiri kugarukwamu amaani, kitali kukopa abandi ekibarukukora. (Marako 6:​31; Abarumi 12:⁠2) Nk’okusisana Yesu Kristo, basemere’rwa okukora Ruhanga ekyagonza.​​—⁠Zabuli 37:4; 40:⁠8.

Abakristayo abamazima bagonza kwomera n’okuhereza Yahwe ebiro byoona. Okunihizibwa kunu tikwine kutwarwa nk’okutaine muhendo habwokuba baine kulindirraho emigisa ye mukanya akairireyo kukira abandi nkoku baali nibanihira.

[Akasanduuko/Eisisani ekiri ha rupapura 15]

Ensonga Enkuru ey’Obulemi Oburukukirayo

Okwetegereza habwaki Ruhanga alekereho okubonabona kwingi omunsi twine kwetegereza ensonga ekwatereine ha bulemi bwa Ruhanga.

Habwokuba Yahwe nuwe Muhangi, aine obusobozi bwoona kulema ensi nabo abagikaramu. Baibuli nesoborra ngu mubyafaayo by’omuntu ebyabandize, obulemi bwa Yahwe bukahakanizibwa. Sitani omuhangirizi akagamba ngu Ruhanga akaba natanga muno, kandi akabihabiha abazaire baitu ab’okubanza hali ekyo ekyakubabaireho, kakuba bajemire Ruhanga, bakakora ebyabu nkoku bagondeze, ngu bakubaire kurungi muno obubakubaire niberema bonka hatali Ruhanga.​​—⁠Okubanza, esura 2, 3.

Kakuba Ruhanga yahwerekerize abajemu bano bwangu, kinu kyakwolekere amani ge, baitu kinu tikyakujangurwire ensonga ezaleserweho. Mukikaro ky’okuhwerekerezaho abajemu banu, Yahwe ahaire omugisa ebihangirwe bye eby’amagezi okwetegereza ebirugire omubujemu. Nobu kiraba kiresereho kubonabona, baitu kituhaire omugisa gw’okuzarwa.

N’obukyakubaire kya muhendo gw’amani muno hali we, Yahwe mukugonza kwe akozereho entegeka ye ey’okucungura abo boona abamuhurra n’okwikiririza mu kicunguro ky’Omwana we okusumururwa kuruga mu kibi nebi ebikirugamu n’okwomera omu rugonjo. Obu kiraba nikyetagisa, kinu nikisoboka nokuraba mukuhumbuka mu bafu.

Okulekaho obwire bwingi okurabaho, nukwo ajangurre ensonga enkuru kihaire abahereza ba Yahwe omugisa okwoleka ngu nibamugonza kandi nibasobora n’okumugumiraho ebiro byoona. Okumara ensonga enkuru ey’obulemi bwa Ruhanga, hamu ney’obwesigwa bw’omuntu, kyali nikyetagisibwa ngu amateka g’obuhangwa kutebwamu ekitinisa. Hatali eki, obusinge obw’amazima bwakubaire tibukusoboka.a

[Obugambo obuli wansi]

[Ekisisani ekiri ha rupapura 15]

Entekaniza yoona ey’obulemi ey’ensi erimalibwaho