ISOMO 6
Orugonjo Rwa Ruhanga Ruli Haihi!
Ebintu ebibi ebiri kubaho mu nsi nibyoleka Orugonjo rwa Ruhanga ruli haihi. Baibuli ekagamba ngu Orugonjo rwa Ruhanga rutakabaireho halibaho obusumi bw’omuhito mwingi. Tuli mu busumi obu hati! Hati binu nibyo ebimu Baibuli yagambire ebyakubaireho:
Obulemu obw’amani. “Ihanga liriramagira ihanga n’obukama buliramagira obukama.” (Matayo 24:7, NW) Obunabbi bunu buhikirizibwe. Kuruga omu mwaka 1914 habaireho obulemu bw’ensi yoona bubiri kandi n’obulemu obutaito taito bwingi. Obukaikuru bw’abantu baingi baferiremu.
Okujanjara kwendwaire. Halibaho ‘orufu ahandi na handi.’ (Luka 21:11) Kinu kihikirizibwe? Mazima. Ekokoro, endwaire y’omutima, akakonko, omuswija, AIDS, n’endwaire ezindi ziisire obukaikuru bwa bantu.
Ibura lye by’okulya. Okwetorora ensi yoona halimu abantu abataine ebyokulya ebirukumara. Obukaikuru bw’abantu baffa enjara buli mwaka. Nakanu kokurorraho ngu Orugonjo ruli haihi muno. Baibuli egamba ngu: “Halibaho [“enjara,” NW].”—Marako 13:8.
Emisisa. “Halibaho emisisa handi na handi.” (Matayo 24:7) Nakinu kihikirizibwe mu kasumi kaitu. Abantu kukira ha kakaikuru baferire mu misisa kuruga 1914.
Abantu ababi. Abantu baliba ‘abarukugonza sente’ kandi ‘abegonza bonka.’ Abaliba “bagonza okwesemeza bonka kukira okusemeza Ruhanga.” Abaana ‘abatahurra ab’abazaire.’ (2 Timoseo 3:1-5) Torukwikiriza ngu hati abantu baingi nibasisana bati? Tibarukutamu Ruhanga ekitinisa, kandi bahiganiza abarukwenda kwega hali Ruhanga.
Obucwi bw’ebiragiro. Halibaho okweyongera “kwo bwemi.” (Matayo 24:12) N’osobora kukikiriza ngu okucwa ebiragiro kweyongire muno okukira nkoku kyali emyaka yenyuma. Buli hantu abantu nibatina kwibwa, kuseerwa rundi kukorwa kubi.
Ebintu binu byoona nibyoleka ngu Obukama bwa Ruhanga buli haihi. Baibuli egamba: “Nainywe, obumulikarora ebi nibihiki’ra mulimanya ngu Obukama bwa Ruhanga buli haihi.” (Luka 21:31) Obukama bwa Ruhanga nikyo kiki? Nubwo bulemi obwa Ruhanga obw’omu iguru oburaleeta Orugonjo ha nsi. Obukama bwa Ruhanga nibwija kwihaho endema yoona ey’abantu.—Danieri 2:44.