Yerusalemu Ruhwerekerezebwa

HATI hahingwireho emyaka 10 kuruga obu omukama Nebukadeneza atwara Abaisareri abakaba begesiibwe kurungi omu Baburoni. Hati dora ekiroho! Yerusalemu nirwokebwa. Abaisareri abakizireho nibatwarwa omu Baburoni nk’abanyankomo.

Ijuka, kinu nikyo abarangi ba Yahwe bakaba bagambiire abantu ngu kiribaho obu bakwangire kuhingisaho ha ngeso zabu. Baitu Abaisareri batahurre abarangi eki bakaba nibabagambira. Bakeyongera kuramya baruhanga babu ab’ebisuba mukiikaro ky’okuramya Yahwe. Abantu banu bakaba basemeriire kufubirwa. Nitumanya kinu habwokuba omurangi wa Ruhanga Ezekyeri natugambira ebibi Abaisareri ebi bakoraga.

Nomanya Ezekyeri nuwe araha? Akaba ali omu h’abasigazi Nebukadeneza aba yatwaire omu Baburoni emyaka 10 ey’enyuma okuhwerekereza Yerusalemu obu kukaba kutakabaireho. Danieri n’abanywani be Saduraki, Mesaki, n’Abedenego bakaba bali banyagwa omu bwire nibwo bumu.

Ezekyeri obwakaba akyali omu Baburoni, Yahwe akamwoleka ebibi ebikaba nibikorwa mu yekaru omu Yerusalemu. Kinu Yahwe akakikora nk’ekyamahano. Ezekyeri akaba naikara omu Baburoni, baitu Yahwe akamwoleka buli kimu ekikaba nikikorwa omu yekaru. Ezekyeri ebi yaboine bikamutiinisa muno!

Yahwe agambira Ezekyeri ati: ‘Dora ebinugwa abantu ebi barukukorra hanu omu yekaru. Dora ebisiika byona ebiswekerweho ebisisani by’enjoka n’ebisoro ebindi. Kandi dora Abaisareri abarukubiramya!’ Ezekyeri akasobora kurora byona n’okuhandika ebikaba nibikorwa.

‘Norora abakuru b’Abaisareri ebi barukukora omunsita?’ Yahwe akaguza Ezekyeri. Ego na kinu akirora. Haroho Abasaija 70, kandi boona nibaramya baruhanga ab’ebisuba. Nibagamba bati: ‘Yahwe tasobora kuturora. Ensi enu akagifuruka.’

Hanyuma Yahwe ayoleka Ezekyeri abakazi abamu abakaba bali ha mulyango gw’omumatemba ga yekaru. Bakaba baikaliire nibaramya ruhanga ow’ebisuba arukwetwa Tamuzi. Kandi rora abasaija abo ha mulyango gwa yekaru ya Yahwe! Bakaba bali 25, Ezekyeri nabarora. Bakaba batiize amaju buruga izooba kandi bakaba nibaramya izooba!

Yahwe agamba ati: ‘Abantu banu tibankyantamu kitinisa nakamu. Tibarukukora ebinugwa byonka baitu nibaija n’omu yekaru kubikorramu!’ Yahwe anihiza ati: ‘Balimanya amaani n’ekiniga kyange. Kandi tindihurra kusaasa kwoona obu balihwerekerezebwa.’

Hakaba harabireho nk’emyaka esatu kuruga Yahwe ayoleka Ezekyeri ebintu binu obu Abaisareri bajemera omukama Nebukadeneza. Nahabwekyo akaija kubarwanisa. Hanyuma y’omwaka gumu n’ekicweka Abababuroni bakasenya ebisiika bya Yerusalemu kandi barwokeza kimu. Abantu abarukukira obwingi baitwa, kandi abandi batwarwa nk’abanyankomo omu Baburoni.

Habwaki Yahwe yaikirize ekintu nka kinu ekibi okuhika ha Baisareri? Ego, nahabwokuba bakanga kuhurra Yahwe n’ebiragiro bye. Kinu nikyoleka obukuru bw’okuhurra n’okukora ebi Ruhanga agamba.

Omukubanza, abantu bake baikirizibwa okusigara omu nsi ya Isareri. Omukama Nebukadeneza akoma Omuyudaya Gedaliya okulema abantu. Baitu Abaisareri bamwita. Hanyuma abantu batiina muno ngu Abababuroni nibasobora kugaruka kubahwerekereza habw’ekintu kinu eki bakozire. Bahambiriza Yeremiya hamu nabo boona okwirukira omu Misiri.

Kinu kileka ensi y’Abaisareri etarumu muntu weena. Okumara emyaka 70, busaho muntu ayaikaramuga. Ensi esigara matongo. Baitu Yahwe araganiza ngu akaba naija kugarra abantu be omu nsi egi hanyuma y’emyaka 70. Baitu mukasumi kanu, abantu ba Ruhanga bali bata omu Baburoni nambere baali batwairwe? Katurole.