Aboojo Bbana Omu Baburoni

OMUKAMA Nebukadeneza atwara Abaisareri boona abakaba begesiibwe kurungi omu Baburoni. Hanyuma, omukama akakomamu abakaba nibazooka kurungi kandi abakaba bakyali bato. Abamu halibo nibo banu aborukurora hanu. Omu nuwe Danieri kandi abandi abasatu abomu Baburoni bakabeta Saduraka, Mesaki ne Abedenego.

Nebukadeneza ategeka kutendeka abasigazi banu nukwo basobole kumuhereza kurungi omukikaali kye. Hanyuma y’emyaka esatu y’okutendekebwa, akaba nagenda kukomamu abo ab’amagezi okumukonyera okujangurra emitalibaine egimu. Omukama akagonza abasigazi banu kuba n’amaani hamu n’obwomezi oburungi. Nikyo yaragiire abahereza be kubaha ebyokulya ebyaali by’ebisajwa hamu n’amaarwa nkebyo uwe n’amaka ge ebi balyaaga.

Dora musigazi Danieri. Nomanya ekyakaba nagambira omuhereza wa Nebukadeneza omukuru Asipenazi? Danieri akaba namugambira ngu akaba atarukugonza kulya habyokulya eby’ebisajwa ebyahameza y’omukama. Baitu Asipenazi akatuntura muno. Akagamba ati: ‘Omukama nuwe yaragiire kiki ekimwine okulya n’okunywa kandi obu mutazooke kurungi nk’abandi nasobora n’okunyita.’

Nikyo Danieri yagendiire ow’omulinzi Asipenazi ou akaba ataireho kurolerra Danieri hamu n’abagenzi be abasatu. Akamugambira ati: ‘Bambi nitukusaba otulengese kumara ebiro 10. Otuhe ebihimba byokulya hamu n’amaizi g’okunywa. Hanyuma olitulengesaniza n’abo abasigazi abarukulya ha byokulya by’omukama, hanyuma orole nibaha abarukuzooka kurungi.’

Omulinzi aikiriza kukora kinu. Kandi ebiro 10 obu byarabireho, Danieri n’abagenzi be basatu bakaba nibazooka kurungi n’okukira abasigazi abandi. Nahabwekyo, omulinzi akabaleka kugumizamu nibalya ebihimba n’okunywa amaizi mukiikaro ky’okulya ebi omukama akaba abaragiire.

Hampero y’emyaka esatu, abasigazi boona bakaleetwa omu maiso ga Nebukadeneza. Hanyuma y’okubaza nabo boona, omukama akasanga Danieri n’abagenzi be abasatu okuba n’amagezi maingi. Nukwo kubaleeta omu kikaali kye okumukonyera. Ebikaguzo byona ebi omukama yakaguzaga Danieri, Saduraki, Mesaki na Abedenego, rundi ekigumu eki yabaleterega okujangurra, bakaba nibabimanyira kimu emirundi 10 okukira abanyakatagara be n’abasaija be abagezigezi.