Obusaasi Obuleetwa Okufeerwa

“Nyowe na mukazi wange Sophiaa tukaba tumazire omu buswere emyaka erukuhingura 39, hanyuma akarwara kumara akasumi kandi yafa. Banywani bange bakansagika muno, kandi nkaikara nyine bingi eby’okukora. Baitu nkamara omwaka gwona nimpurra obusaasi bw’amaani. Nabaga ninyehurra kurungi baitu hanyuma y’obwire buke nintandika kwehurra kubi. Hati hahoireho emyaka nk’esatu kuruga afa, baitu nabwo haroho obumpurra nakwatwa enaku ey’amaani.”​—Kostas.

Oferiirwe omuntu oworukugonza? Obukiraaba nukwo kiri, n’osobora kuba n’oyehurra nka Kostas. Bintu bike ebisobora kuleeta obusaasi n’okwetuntura, nk’okufeerwa ow’oli nauwe omu buswere, omunyabuzaale, rundi omunywani oworukugonza muno. Kandi abakugu abaseruliiriza ha busaasi obuleetwa okuganya nibaikiranganiza nakyo. Ekicweka ekyaturukiire omu kitabu ekirukwetwa The American Journal of Psychiatry nikigamba ngu “baingi obubafeerwa behurra ngu tibalyongera kurora omuntu wabo kandi bahurra obusaasi bw’amaani.” Habw’obusaasi bwingi obuleetwa okufeerwa, anyakuferiirwe n’asobora kwekaguza ati: ‘Ndayehurra nti kuhikya di? Ndyongera nsemererwe? Ninsobora nta kutunga okuhuumura?’

Ebikaguzo binu nibiija kugarukwamu omu katabu kanu aka Awake! Ekicweka ekirukuhonderaho nikiija kubazaaho eky’osemeriire kunihira hanyuma y’okufeerwa omuntu waawe. Kandi ebicweka ebindi nibiija kubazaaho bimu ha bintu ebisobora kukukonyera kukehya ha busaasi bwawe.

Nitunihira ngu ebirabazibwaho nibiija kukuhuumuza kandi bikonyere omuntu weena ow’aferiirwe.