4 Kuganyira

NIKIMANYISA KI?

Kuganyira nikitwarramu kuleka kutekerezaaho ekintu kyona ekikubihiize n’okuleka kwahura enzigu. Kuganyira tikirukumanyisa ngu ekintu ekibakukozere tikibaire ky’amaani rundi kwefoora ngu busaho ekibaireho.

OMUSINGI GWA BAIBULI: “Nimuculerangana kandi nimuganyirangana inywenka, rundi haroho wena anyina ekigambo hali mutahiwe.”—Abakolosai 3:13.

“Obwogonza omuntu, toteeka omutima ha butahikirra bwe, baitu oguteeka ha kiki omuntu ogu ekyarukulengaho kufooka.”—Aaron.

HABWAKI KIKURU?

Kakuba oyahura enzigu, n’osobora kwehikyaho akabi omu mubiri n’omunyehurra—n’osobora n’okuleetera obuswere bwawe kutabamu okusemererwa.

“Kiro kimu iba nyowe akansaba ekiganyiro habw’ekintu eky’akaba ankozere kandi kyambiihiza muno. Kikangumira muno kumuganyira. Ha kumalirra nkamuganyira, baitu ninyeijukya ngu kakuba nakikozere kara. Kikasiisa enkoragana yaitu.”—Julia.

EKY’OSOBORA KUKORA

WERENGESE

Omurundi ogundi ow’li nauwe omu buswere obwarakubaliza rundi akakukora ekintu ekirukusaaliza, wekaguze:

• ‘Ninteeka muno omutima ha buli kintu kyona ekyabaza rundi akora?’

• ‘Ekintu ekyankozere ky’amaani muno kuhika ha rulengo ngu asemeriire kunsaba ekiganyiro, rundi ninsobora kukyeganyira?’

MUBAZEEHO HAMU ENSONGA

• Kitutwarra kasumi kuganyirangana?

• Kiki ekitusobora kukora kurora ngu twaganyirangana omu bwangu?

AMAGEZI AGASOBORA KUKONYERA

• Kakuba ow’oli nauwe omu buswere akubiihiza, otatekereza ngu akikozere akigenderiire.

• Ganyira ow’oli nauwe omu buswere habw’omulingo ayetwaizeemu, n’oijuka ngu “omu bingi tusobya itwena.”—Yakobo 3:2.

“Kyanguhire kuganyira itwena obutuba tuli omu nsobi, baitu kigumire muno kuganyira omu haliitwe obw’arukuba omu nsobi. Kuganyira omuntu obwatusaba kumuganyira n’okuganyira omuntu obw’atusobeza, kyetaagisa obwebundaazi obw’amaani.”—Kimberly.

OMUSINGI GWA BAIBULI: “Terana bwango nogu anyakukutonganiza.”—Matayo 5:25.