Эритреядә Файза Саид 2009 елның июненнән төрмәдә утыра

Үз иманнары өчен төрмәдә. Төрле илләрдәге Йәһвә Шаһитләре

2026 елның мартында бөтен дөнья буйлап ким дигәндә 275 Йәһвә Шаһите үз иманнары өчен төрмәдә утыра.

Граждан хокукларын һәм сәяси хокукларны яклау буенча халыкара килешүнең 18 нче мәхкәмәсендә һәрбер кешенең үз фикергә ия булу, дин тоту һәм вөҗдан кушуы буенча эш итү иреге бар дип әйтелә. Шулай да кайбер җирләрдә Йәһвә Шаһитләре бу хокукларыннан мәхрүм ителә. Үз динен тотулары һәм армиядә хезмәт итүдән баш тартулары аркасында, аларны төрмәгә утырталар һәм начар мөнәсәбәт күрсәтәләр.

Кырым

2017 елның апрель аенда Россиядә Йәһвә Шаһитләренең оешмасы рәсми рәвештә тыелды. Хөкүмәт тынычлык яратучы бу кешеләрнең Аллаһыга гыйбадәт кылуларын туктатырга тырыша. Бу хәл Кырымга да кагылды. Бу ярымутрауда кардәшләребезне кулга алалар һәм йортларында тентүләр үткәрәләр. Бүгенге көнгә Кырымда 14 Йәһвә Шаһите төрмәдә утыра. Барысы да экстремистик эшчәнлекне алып баруда гаепләнә.

Кырымда иманнары өчен төрмәдә утыручы Йәһвә Шаһитләренең исемлеген күрер өчен, астагы сылтамага басыгыз.

Эритрея

1994 елда Эритреянең президенты Исайяс Афеворки Эритреядәге Йәһвә Шаһитләрен гражданлыктан мәхрүм иткән. Сәбәп нәрсәдә? Йәһвә Шаһитләренең 1993 елда бу илдә үткән бәйсезлеккә кагылышлы референдумда катнашмаулары һәм үз ышанулары аркасында армия сафларына барудан баш тартулары. Ул вакыттан алып хөкүмәт кардәшләребезне, шул исәптән апа-кардәшләрне, олы яшьтәгеләрне һәм хәтта балигъ булмаганнарны, суд үткәрмичә, төрмәгә ташлый, җәзалый һәм аларга авырлыклар тудыра. Бүгенге көнгә Эритреядә 64 кардәшебез төрмәдә утыра. Берсе дә рәсми рәвештә гаепләнмәгән, һәм берсенә дә хөкем карары чыгарылмаган.

Эритреядә иманнары өчен төрмәдә утыручы Йәһвә Шаһитләренең исемлеген күрер өчен, астагы сылтамага басыгыз.

Россия

2017 елның апрель аенда Россиянең Югары суды Йәһвә Шаһитләренең эшчәнлеген һәм бар юридик затларын тыйды. Аларны экстремистик эш алып баруда гаепләделәр. Россия хакимияте Йәһвә Шаһитләренең мал-мөлкәтен тартып алды, аларның гыйбадәт кылу урыннарын япты, ә әдәбиятын «экстремистик» дип таныды. Ләкин Россия хөкүмәте моның белән генә чикләнмәде һәм аерым Йәһвә Шаһитләрен, тыелган оешма белән бәйләнеш тотуда гаепләп, эзәрлекли башлады. Полиция хезмәткәрләре кардәшләребезнең йортларына бәреп керә, аларны кыйный һәм, сорау алганда, үзләрен тупас тота. Бүгенге көнгә Россиядә ким дигәндә 171 Йәһвә Шаһите СИЗОда утыра, мәҗбүри эш үти я төрмәдә утыра.

Россиядә иманнары өчен төрмәдә утыручы Йәһвә Шаһитләренең исемлеген күрер өчен, астагы сылтамага басыгыз.

Сингапур

Сингапур хөкүмәте хәрби хезмәтне мәҗбүри дип саный һәм кешеләрнең үз иманнары нигезендә бу хезмәттән баш тартырга хаклары юк дип әйтә. Армиягә барудан баш тарткан кешегә 30 айлык төрмә срогы яный. БМО Сингапур хөкүмәтеннән үз карашын үзгәртергә таләп итсә дә, Сингапур хөкүмәте, беренче урында кешенең хокуклары түгел, ә хөкүмәтнең милли оборонасы торырга тиеш, дип саный. Бүгенге көнгә 10 яшь кардәшебез, армиягә барудан баш тартканга, төрмәдә утыра. Аларның дүртесе үзенең карашлары аркасында инде икенче тапкыр төрмәгә утыртылган.

Сингапурда иманнары өчен төрмәдә утыручы Йәһвә Шаһитләренең исемлеген күрер өчен, астагы сылтамага басыгыз.

Көньяк Корея

2020 елның 26 октябрендә Көньяк Корея хөкүмәте үз тарихында беренче тапкыр альтернатив граждан хезмәтен гамәлгә кертте. Ләкин кеше хокукларын яклый торган оешмалар шуңа игътибар иткән: Корея хөкүмәте гамәлгә керткән шул хезмәт күбрәк җәза итеп кулланыла. Мәсәлән, аны үткәндә, кеше, армия сафларында хезмәт итүгә караганда, ике тапкыр озынрак вакыт — өч ел хезмәт итә һәм күпкә кырысрак шартларда яши. Бу сорау Кореяның конституцион судына барып җитте, ләкин, кызганычка каршы, 2024 елда бу суд хөкүмәт ягына басты. Альтернатив хезмәт кырыс шартларда үтсә дә, күпчелек Йәһвә Шаһите аны үтәргә ризалаша. Шулай да 15 кардәш баш тарта. Аларның берсе хәзер төрмәдә утыра, һәм кайберләренең эше судта карала. Аларга да төрмә яный.

Көньяк Кореяда иманнары өчен төрмәдә утыручы Йәһвә Шаһитләренең исемлеген күрер өчен, астагы сылтамага басыгыз.

Украина

Якынча 30 ел Украинада яшәүче Йәһвә Шаһитләре, армиягә бармыйча, альтернатив хезмәт үтә алды. Ләкин 2022 елның 24 февраль аенда Украинада сугыш башланды. Шунда шунысы ачыкланды: законда мобилизация барган вакытта альтернатив хезмәт үтү турында бернәрсә дә әйтелми. Нәтиҗәдә, дини карашлары аркасында армиягә барырга теләмәгән күп кенә кешене эзәрлекли башладылар. Бүгенге көнгә сигез Йәһвә Шаһите — төрмәдә, ә җидесе СИЗОда утыра. БМОның өч махсус вәкиле, альтернатив хезмәткә кагылышлы законнар булмаганга, үз борчылуларын белдерткән.

Украинада иманнары өчен төрмәдә утыручы Йәһвә Шаһитләренең исемлеген күрер өчен, астагы сылтамага басыгыз.

«Төрмәдә утыручыларны, үзегез дә алар белән бергә тоткынлыкта булгандай, исегездә тотыгыз» (Еврейләргә 13:3).