6-12 KA ABRIL WA 2026
LISIMU 82 “Woningelani!”
Hi nga ma vhunisa kuyini a maxaka ya hina ma nga kholwiko?
“Hi nga tsiki a ku maha zvazvinene”. — GAL. 6:9.
LEZVI HI TO GONDZA
Hi ta wona lezvi hi nga mahako kasi hi simama kuva ni kuzwanana kunene ni maxaka ya hina ma nga kholwiko ni lezvi hi nga ma vhunisako zvona hi tlhelo ga moya loku zvi koteka.
1-2. Zvini kuzvilava zvi nga khumba a kuzwanana ka wena ni maxaka ya wena laha u nga sangula ku gondza lisine?
JESU i no byela a wanuna a nga lava kuva mulandzeli wakwe, aku: “Famba kaya ka maxaka ya wena u ya ma hlawutela zvontlhe lezvi Jehovha a nga ku mahela”. (Mar. 5:19) Jesu i wulile lezvo hi ku tiva lezvaku a vanhu vo tala va zvi lava ku bhulela maxaka yabye a mahungu ya manene.
2 Wa ha zvi alakanya lezvi u nga ti zwisa zvona a cikhati leci u nga sangula ku gondza Bhibhiliya? Kuzvilava a wu zvi kotangi ku miyela ni lezvi u nga kari u gondza! Kanilezvi zvi nga maha a maxaka ya wena ma nga zvi tsakelangi lezvi u nga kari u gondza. Kutani a ndlela leyi u nga ma chumayela hi yona yi vhuxile mazunga cikari ka n’wina. Loku zvi hi lezvo, zvini u nga mahako kasi ku vhuxa kuzwanana ni maxaka ya wena na u nga hambunyeti a matshinya ya milayo ya wuKristu?
3. Zvini hi to bhula hi zvona ka ndzima leyi?
3 Ka ndzima leyi hi ta bhula hi mune wa zvilo. Co sangula: Lezvi a zwela wusiwana wu nga hi vhunisako zvona a ku kombisa kukhatala hi maxaka ya hina ma nga kholwiko,a hambu loku ma nga zvi lavi a ku gondza hi Jehovha. Ca wumbiri: Lezvi hi nga mahako loku a maxaka ya hina ma wula kutani ku maha zvilo zvi hi pandzako mbilu. Ca wunharu: Lezvi a lihlazva-mbilu la hina ni kutsumba zvi nga vhunisako zvona maxaka ya hina a ku pola ku leli hi lona lisine. Ni ca wumune: Lezvi hi nga kombisako zvona ku ha ma randza maxaka ya hina.
KOMBISA ZWELA WUSIWANA
4. Jesu i wa va khomisa kuyini lava va nga kala va nga tsakeli mahungu yakwe?
4 Jesu a nga hatliselangi ku tsukula lava va nga kala va nga tsakeli a mahungu yakwe. I ti fananisile ni mutiri wa lomu civhineni loyi a nga tirisa tindlela to hambanahambana kasi ku maha ku a vhina lowu wu nga kala wu nga pswali, wu pswala. (Luka 13:6-9) A cikhati leci Jesu a nga maha mufananiso lowo, i wa sina a zama ku vhuna vaJudha hi malembe manharu ni kuhundza lezvaku vava ni kukholwa. Hikuyini a nga simama ku zama ku va vhuna? Jesu i wa va zwela wusiwana vanhu niku lezvo zvi mu vhunile ku a va kombisa lihlazva-mbilu.
5. Cini ci nga kuca Jesu a ku a va zwela wusiwana a vaJudha-kuloni?
5 Jesu i va zwele wusiwana a vaJudha-kuloni, hakuva a varangeli va wukhongeli va wa nga va vhuni a ku tiva lisine xungetano hi Jehovha. Jesu i wonile lezvaku a vanhu lavo va wa fana ni “tiyivhu to kala murisi”. (Mar. 6:34) Na ku kiyela kutsongwani kasi a dawa, Jesu i no rilela Jerusalema hakuva i wa zvi tiva lezvaku a kutala ka lava va nga hanya lomo va wa tafa hi kota ya ku kiyelelwa hi kukholwa. (Luka 19:41-44) A ku fana na Jesu, loku hi ehleketa hi ku hikuyini a maxaka ya hina ma faneleko ku gondza lisine hi ta kuceka ku ma vhuna.
6. Hikuyini hi faneleko ku ma kombisa lihlazva-mbilu a maxaka ya hina ma nga kholwiko? (Va Le Galatiya 6:9)
6 Lera Va Le Galatiya 6:9. Hambu loku ku hi ku zvezvi a maxaka ya hina a ma zvi tsakeli lezvi hi zvi kholwako, hi fanele ku ma kombisa lihlazva-mbilu hi tlhela hi nga tsiki “ku maha zvazvinene”. Ha zvi tiva ku zvi teka cikhati kasi ku a munhu a tsika tigondzo ti zimileko mitsu ni ku kombisa kukholwa ka Jehovha. Kuzvilava a kale ka kona wenawu u wa fana ni lava va nga hi hava “kutsumba [va tlhela va] nga hi na Nungungulu tikweni”. (Efe. 2:12) Kanilezvi a wokari i kombisile lihlazva-mbilu hi wena, a ku vhuna ku cica ni ku gondza hi Jehovha. A ku wenawu a wu kuceki ku vhuna maxaka ya wena a ku gondza hi Jehovha loku zvi koteka?
U NGA VEKI KUPIMA KA LEZVI VA WULAKO NI LEZVI VA MAHAKO
7. Zvini lezvi kuzvilava zvi nga vhalela vamakabye va Jesu a ku va kholwa kakwe?
7 Kuzvilava a vamakabye va Jesu va zwile lungu ya zvihlamaliso lezvi a nga maha le Galileya. (Luka 4:14, 22-24) Hambulezvo, a va tekelangi ku kholwa kakwe. (Joh. 7:5) Hikuyini? A Bhibhiliya a gi hi byeli. Kanilezvi gi bhoxa zvilo zvimbiri hi wutsongwani ga kona zvi nga kari zvi vhalela vaJudha vo kari a ku vava vapizani va Jesu. A vokari va wa chava ku minyiwa lomu mugangeni. (Joh. 9:18-22) A van’wani va wa tiva Jesu kusukela wun’wananeni gakwe, hikwalaho va wa nga alakanyeli ku a ngava muyimeli wa Nungungulu. (Mar. 6:1-4) Kuzvilava a vamakabye va Jesu vonawu va khumbilwe hi mawonela lawo. A ku a zvilo zvo kota lezvo hi zvona zvi mahako maxaka ya wena ma nga zvi lavi kuzwa lisine?
8. Zvini zvi nga mahako a maxaka ya hina ma nga kholwiko ma wula kutani ku maha zvilo hi ndlela ya hava?
8 Zama ku pola ku hikuyini va mahako ni ku wula zvilo zvo kari. Kuzvilava a vamakabye va Jesu van’we va lava ka khati go kari va nga wula ku “wa hlanya”. (Mar. 3:21) Zvini lezvi kuzvilava zvi mahileko ku a vamakabye va Jesu va wula lezvo? A mongo wa matimu lawo wu komba ku Jesu i wa khomekile nguvhu hi ku chumayela ni ku hanyisa vanhu laha ka kuza a vhumala ni cikhati coga zvakuga. (Mar. 3:20) A ku a maxaka yakwe ma alakanyile ku Jesu i wo hundzeleta? Kuzvilava! A maxaka ya hinawu ma nga alakanya ku a wukhongeli ga hina ga hi gela nguvhu cikhati. Loku ma ti zwisa lezvo, hi nga komba hi magezu ni mitiro lezvaku hi vanhu vo ringanisela.
9. Zvini zvi nga vhunako maxaka ya hina a ku cica mawonela yabye hi hina? (1 Pedro 3:1, 2) (Wona ni mifota.)
9 Tsika mahanyela ya wena ma wulawula. A magezu ni zvimaho zva hina zva zvinene zvi nga kuca maxaka ya hina a ku cica mawonela yabye hi hina. (Lera 1 Pedro 3:1, 2.) Zvi nga olova ku a nuna a nga khozeliko Jehovha a alakanya ku a sati wakwe a nga ha mu randzi kutani ku zangara a cikhati leci a yako mitlhanganweni ya bandla kutani kuchumayeleni. Hi kota ya lezvi a kalako a nga lavi ku a nuna wakwe a ti zwisa lezvo, kuzvilava a sati a nga cica programa yakwe ya moya kasi a mbheta cikhati co tala naye. Hi cikombiso, kuzvilava a nga boha kuya kuchumayeleni loku a nuna wakwe a khomekile kutani a nga hi laha kaya. Hi kuva munhu wo olova ni wo ringanisela, kuzvilava a sati a nga muKristu a nga vhuna nuna wakwe lezvaku a cica mawonela yakwe hi Vakustumunyu va Jehovha.
A magezu ni zvimaho zva hina zva zvinene zvi nga maha a nuna kutani sati a nga khozeliko Jehovha a cica mawonela yakwe hi Vakustumunyu va Jehovha (Wona paragrafo 9)g
10. Hi nga mu pimanyisisa kuyini Jesu loku va wulawula zvahava hi hina?
10 U nga tizwi na u kurumeteka ku hlamula ni cihi va wulako. A cikhati leci Jesu a nga lumbetiwa ku i khobomu ni cidhakwa, a nga ti yimelelangi. Wutshan’wini ga lezvo, i wa lava ku a vanhu va zvi wona ha voce a ku lezvi va nga kari va wula zvi wa hi lisine kutani ahihi. (Mat. 11:19) I tlhelile a zvi kombisa hi mahanyela yakwe a ku i wa hi ni mawonela yo ringanisela hi wutomi. (Fananisa na Johani 2:2, 6-10.) Hi kufanana, u nga zami ku ti yimelela khati ni khati u lumbetiwako. Wutshan’wini ga lezvo, komba maxaka ya wena hi mitiro lezvaku u munhu wo ringanisela ni wo tsaka, u gumesa u va tsika va chikelela magumo ha voce. Loku a maxaka ya wena ma wona lezvo, kuzvilava ma nga pola ku lezvi ma zvi zwileko hi hina mawunwa.
SIMAMA KUVA NI LIHLAZVA-MBILU NI KUTSUMBA
11. Jesu i wa va khomisa kuyini a vamakabye vakwe vangakholwiko?
11 A matimu ya tiIvhangeli ma komba ku Jesu i simamile kuva ni lihlazva-mbilu hi vamakabye vakwe. Hi cikombiso, zvi wonekisa ku khwatsi vonawu va wa hi kona le Kana a cikhati leci Jesu a nga maha cihlamaliso cakwe co sangula. (Joh. 2:11, 12) Kota lezvi zvi kumbukilweko, a vamakabye va Jesu va wa nga kholwi kakwe. Hambulezvo, Jesu a nga tsemangi wuxaka navo. A Bhibhiliya gi wula lezvaku kwalomu ka malembe manharu andzhako ka loku a mahile cihlamaliso cakwe co sangula le Kana, Jesu i wulawulile hi ndlela ya yinene ni vamakabye vakwe. — Joh. 7:5-8.
12. Cini ci to hi vhuna ku simama hi tsumba lezvaku a maxaka yo kari ma ta cica?
12 A ku gi zwisisa khwatsi a wuxinji ga Jehovha zvi nga hi vhuna a ku simama hiva ni kutsumba. A cikhati leci a wukhongeli ga mawunwa gi to lovisiwa, kuzvilava a maxaka ya hina ma ta zvi alakanya ku hi wa ma byelile a ku lezvo zvi ta maheka.b (Kuv. 17:16) Kuzvilava ma ta tlhela ma ti patsa na hina ka wukhozeli go basa, andzhako ka kusangula ka kuxaniseka ka hombe. Hambulezvo, na ci nga se chikela a cikhati leco, loku a maxaka ya hina ma kumana ni zvikarato hi ta maha zvontlhe hi zvi kotako kasi ku ma vhuna. Zvi nga maha ma vhumela ku amukela lisine loku ma wona ku ha ma randza hi mbilu yontlhe niku ha ma kombisa wunene.
MA KOMBE KU WA MA RANDZA
13. Hambu lezvi hi khomekileko ntirweni wa Jehovha, zvini hi faneleko ku ti wonela ka zvona?
13 Hambu lezvi hi khomekileko ntirweni wa Jehovha, a hi lavi ku a maxaka ya hina ma alakanya ku a hi na cikhati ca ku tshama nawo niku a ha ha ma randzi. (Mat. 7:12) Hi nga zvi kombisa kuyini ku ha khatala hi wona? A hi woneni tindlela to kari.
14-15. Hi yihi yin’we ya tindlela hi nga kombako hi yona a ku ha ma randza maxaka ya hina ma nga kholwiko? Nyika cikombiso.
14 Simama ku bhula nawo ni ku ma kombisa lirandzo. Hi komba ku ha ma randza maxaka ya hina hi ku bhula nawo hi kukhandzakanya. Hi cikombiso, hi nga ma rumelela mesaji, mifota yo kari hi nga susa na hi hi ka maferiya, kuendzeni kutani na hi hi ni vanghana va hina. A ku ma rumelela cinyikiwana co kari kutani ku ma tsalela cipapilwana zvi nga maha ku hiva ni kuzwanana kunene. Loku hi ranga hi hina hi maha lezvo, ma ta zvi wona ku ha va randza.
15 Wona cikombiso ca Ana, a makabye wa cisati, wa le Arménia. A ngango wakwe wu mbheta cikhati co tala na wu hi zvin’we, nguvhunguvhu loku a wokari a tlhanganisa malembe kutani hi khisimuso. A cikhati leci Ana a nga gondza lisine, a maxaka yakwe ma no sangula ku karateka hi lezvi a kukholwa kakwe ka kuswa ku nga wa ta khumbisa zvona a kuzwanana kabye kota ngango. Ma wa karateka kambe hi lezvi a ciboho cakwe ca kuva Kustumunyu wa Jehovha ci nga wa ta gi khumbisa zvona wutomi gakwe cikhatini ci tako. Zvini lezvi Ana a nga maha kasi ku bohlisa a kukarateka kabye? Ana i wula lezvi: “A cikhati leci ndzi vhuxelako maxaka ya mina, ndzi ma hlawutela lezvi ndzi hanyisako zvona ni lezvi zvi ndzi mahako ndzi khomeka. Ndza ma ramba kambe lezvaku mata kaya ka mina ni ku ma komba vanghana va mina. Hi kota ya lezvo, a kutala ka maxaka ya mina ma tivana ni vanghana va mina niku ma tizwa khwatsi loku ma hi navo.” I engeta aku: “A kutala ka maxaka ya mina ma wulawula hi lezvi ndzi tsakisileko zvona niku a ma ha karateki hi nchumu hi mina.”
16. Jesu i zvi kombisile kuyini ku i wa khatala hi makabye wakwe Jakobe? (Wona ni tlhamuselo wa lahasi.)
16 Kombisa kukhatala hi wona. Andzhako ka loku Jesu a vhuxilwe, i no kombisa ku i wa khatala hi makabye wakwe Jakobe hi ku woneka kakwe wutsumbu. (1 Kor. 15:7) Hi nga alakanyela lezvi Jakobe a nga ti zwisa zvona, hi ku wona ku Jesu i wa nga mu tsukulangi. Kuzvilava a kuva va wonene zvi kholwisile Jakobe ku Jesu i wa hi Mesiya. Andzhako ka loku va wonene, kuzvilava Jakobe i yile a ya vhuna zviro lezvi zvin’wani zva ngango wakwe a ku zwisisa ku hakunene Jesu i wa hi yena Mesiya.c — Miti. 1:14.
17. Hi nga gi tirisisa kuyini a wusungukati gi nga ka Va Le Roma 12:15? (Wona ni mufota.)
17 Lera Va Le Roma 12:15. Loku hi kombisa kukhatala hi maxaka ya hina a cikhati leci zvi lavekako nguvhu ka wona — ku ngava ka zvikhati zva zvinene kutani zvo nonoha — hi nga ma vhuna ku cica lezvi ma hi wonisako zvona.d Hi cikombiso, hi nga tsaka nawo a cikhati leci a wokari a pswalako n’wana ni ku ma nyika zvinyikiwo kasi ku komba lezvaku ha tsaka nawo. Loku ma felwa hi munhu ma mu randzako, hi nga ma chavelela, hi ma vhuna hi zvilo zvo woneka kutani ku ma rumelela cipapilwana ci nga ni magezu yo tiyisa. Hi fanele ku ma vhuxela hi kukhandzakanya, kanilezvi hi fanele ku zvi maha nguvhunguvhu ka zvikhati lezvi ma kumanako ni zvikarato.
Loku u kombisa kukhatala hi maxaka ya wena a cikhati leci zvi lavekako nguvhu ka wona, ma nga cica lezvi ma ku wonisako zvona wena ni lezvi u zvi kholwako (Wona paragrafo 17)h
18. Hi nga mu pimanyisisa kuyini mupizani Andrewu?
18 Ma tivekise ka maKristu-kulori. A cikhati leci mupizani Andrewu a nga tiva ku Jesu hi yena Mesiya, i no tekela kuya ka makabye wakwe Pedro a ya mu byela lezvaku ata a ta mu wona. (Joh. 1:40-42) A ku hinawu hi nga maha zvo fana? Hi cikombiso, ka zvikhati zvo kari hi nga ramba xaka ga hina hi famba nago mutlhanganweni kutani ku gi ramba lezvaku hi taga nago ni vanghana va hina. Laha hi gi tivekisako ka vamakabye, gi ta wona lezvaku a Vakustumunyu va Jehovha vanhu vo toloveleka ni va vanene.
19. Hambu loku a maxaka ya hina ma nga kholwiko ma nga ti zwisisi khwatsi a tigondzo to kari hi ti kholwako, hi fanele ku ma khomisa kuyini? (1 Pedro 3:15)
19 Lera 1 Pedro 3:15. A maxaka ya hina ma nga tshuka ma nga zvi zwisisi hi kumbhelela a ku hikuyini hi kalako hi nga mahi zvilo zvo kari, kanilezvi contlhe cikhati ma ta alakanya a wunene ni cichavo ca hina. Hambu loku hi nga hlengeli nawo ka mibuzo ya tiferiyadho kutani ka mikhuwo yo kari, ma nga tsaka loku hi ti nyika cikhati ca kuva zvin’we nawo hi cikhati cin’wani. Hi cikombiso, hi nga ma vhuxela, higa zvin’we zvakuga niku ka zvikhati zvin’wani hi nga ma nyika zvinyikiwo.
U NGA TSHUKI U TSUKULA MAXAKA YA WENA
20. Hikuyini a cikombiso ca Jakobe ci hi tiyisako?
20 Jakobe i luzile thomo ga ku fambafamba zvin’we na Jesu ntirweni wakwe, kanilezvi hi kugumesa i nova mupizani wakwe. (Gal. 1:18, 19; 2:9) Hambu lezvi Jakobe a nga kala ku tekela kuva mupizani wa Jesu, zvi wonekisa ku khwatsi i hlayisile tigondzo ta Jesu mbilwini yakwe. Hi cikombiso, i no ma tsalela papilo a maKristu a kumbuka zvigondzo zvo fana ni lezvi Jesu a gondzisileko ka Kanelo ya le Citsungeni.e
21. Hikuyini hi nga faneliko ku tsukula maxaka ya hina ma nga kholwiko?
21 Hambu loku ho ti karatisa kuyini kasi ku kombisa wunene ka maxaka ya hina hi tlhela hi kombisa ku khatala hi wona, ma nga tshuka ma simama ku nga hi khomi khwatsi kutani ma nga lavi ku gondza hi Jehovha. Kanilezvi a hi faneli ku ma tsukula, hakuva khati ni khati hi ma kombisako wunene a maxaka ya hina ho pimanyisa Jehovha, a Nungungulu wa hina wa wuxinji, ni N’wana wakwe Jesu. (Luka 6:33, 36) Loku hi simama ku ma randza, hi kufamba ka cikhati, ma nga cica lezvi ma hi wonisako zvona niku kuzvilava ma nga alakanya a tigondzo leti hi bhulileko hi tona nawo. Loku hi nga ma tsukuli, hi ngava ni litsako la ku wona maxaka yo kari na ma maha ciboho ca ku khozela Jehovha zvin’we na hina!
LISIMU 60 Va gondzise va fela ku pona
a MAGEZU MA TLHAMUSELWEKO: Lomu ka Bhibhiliya, a gezu “a nga kholwiko” a hi contlhe cikhati gi tiriselwako ku wula munhu a nga lumbiko wukhongeli go kari kutani wo kala a nga kholwi ka Nungungulu. (1 Kor. 7:12; wona nota ya cigondzo laha ka gezu “esposa descrente”.) Ka ndzima leyi, a gezu legi gi wula a munhu wo kala a nga khozeli Jehovha Nungungulu a ku khwatsi hi lezvi a Vakustumunyu va Jehovha va mahako.
b Wona ndzima yi nge: “Zvini hi zvi tivako xungetano hi kulamula ka Jehovha loku ku tako?” yi nga ka Murindzeli wa Maio wa 2024, paj. 11, par. 11-13.
c A vamakabye vambiri va Jesu hi wutsongwani ga kona, ku nga Jakobe na Judha, va no amukela lisine andzhako ka loku Jesu a delwe a tlhela a vhuxiwa.
d Wona kwadru gi nge: “U taya muchadhweni kutani marilweni ya xaka go kala gi nga hi Kustumunyu wa Jehovha?”
e Fananisa Jakobe 1:2 na Matewu 5:11, 12; Jakobe 1:19 na Matewu 5:22; Jakobe 1:22; 2:24 na Matewu 7:21; Jakobe 2:13 na Matewu 5:7; 6:14, 15.
f Kasi ku kuma mahungu man’wani hi lezvi u nga mahako ka zviyimo lezvi, wona a “Zviwutiso zva vagondzi” ka A Sentinela ga 15 ka Maio wa 2002, ni ga 15 ka Novembro wa 2007.
g TLHAMUSELO WA MUFOTA: Makabye a mu longiselelako zvakuga a nuna wakwe na a nga seya kuchumayeleni.
h TLHAMUSELO WA MUFOTA: A makabye yaloyi wa mun’we i ti nyika cikhati ca ku a ya vhuxela a n’wingi wakwe a nga hiko Kustumunyu wa Jehovha.