Xilalelo Xa Hosi — A Xialakanyiso Xi Dzunzako Nungungulu

A MAKRISTU ma rumiwa ku alakanya a Xialakanyiso xa kufa ka Kristu. A xialakanyiso lexo xi vitanwa a ku “xilalelo xa Hosi.” (1 Va Le Korinte 11:20) Xana lisima muni xi nga nalo? Hi rini hi faneleko ku xi alakanya niku xana hi fanele ku xi alakanyisa kuyini?

Jesu Kristu i yimisile a xialakanyiso lexi wusikwini ga Pasika ga xiJuda hi 33 Nguveni ya Hina. A Pasika gi wa hi xialakanyiso xi nga mahiwa khati ginwe ntsena hi lembe hi siku ga wu 14 ga hweti ya xiJuda ya Nisani. Kasi ku tiva siku lego, ko khwatsi a vaJuda va wa rinzela wuxika, ka siku legi gi nga ni xipimo xa 12 wa tihora ta kuwonekela ni 12 wa tihora ta munyama. A kuwoneka ko sangula ka hweti yiswa ku nga kusuhani ni siku lego ga wuxika ku wa gema a masangulo ya Nisani. A Pasika gi wa mahiwa a 14 wa masiku anzhako ka lezo, loku gambo gi pelile.

Jesu i loga Pasika ni vapostoli vakwe, a tlhela a tsika Judasi Iskarioti a huma, zonake a yimisa a Xilalelo xa Hosi. A xilalelo lexo xi lo valeta a Pasika ga xiJuda niku hikwalaho xi fanele ku alakanyiwa kanwe ntsena hi lembe.

A Ivangeli ya Mateu ya bika: “Jesu i lo teka xibaba, a khesa, a xi khema; i lo nyika vapizani aku: Tekani, muga; lexi hi miri wa mina. I lo teka a gombe, a bonga, a gi nyika kabye, aku: Nwanani nwentlhe ha gona; hakuva lexi hi nkhata wa mina wa xivumelwano xiswa, lowu wu halatelwako a vanyingi a kutsetselelweni ka zionho.” — Mateu 26:26-28.

Vo kari va kholwa lezaku Jesu i lo hunzula a xibaba a xi maha miri wakwe wa nyama niku a vinya i lo gi maha nkhata wakwe. Kanilezi, a xikhati lexi yena a nga nyikela a xibaba a miri wakwe wu wa ha hi wona wontlhe. Xana a vapostoli va Jesu va wa kari vaga a miri wakwe wa nyama ni kunwa a nkhata wakwe futsi? Ahihi, hakuva lezo zi wa tava kuga a nyama ya munhu ni ku tshova a nayo wa Nungungulu. (Genesisi 9:3, 4; Levi 17:10) Maringano ni bhuku ga Luka 22:20, Jesu i te ngalo: “Legi i gombe ni xivumelwano xiswa nkhateni wa mina, lowu wu halatelwako nwina.” Xana a gombe lego gi lo hunzuka gi maha a “xivumelwano xiswa”? Lezo zi wa nga ta koteka hakuva a xivumelwano i zwanano, a hi nchumu wu zi kotako ku khumbiwa.

Hikwalaho, hi wumbiri ga zona a xibaba ni vinya zo fananisa ntsena. A xibaba xi yimela a miri wa Kristu wo mbhelela. Jesu i tirisile a xibaba lexi xi nga sele Pasikeni. A xibaba lexo xi wa mahilwe na xi nga hi na comelo. (Eksodusi 12:8) A Biblia gi tirisa a comelo kasi ku fananisa xionho kutani kubiha. Hikwalaho a xibaba xi yimela a miri wo mbhelela lowu Jesu a wu nyikeleko. Wona wu wa nga hi na xionho. — Mateu 16:11, 12; 1 Va Le Korinte 5:6, 7; 1 Pedro 2:22; 1 Johani 2:1, 2.

A vinya go pswhuka gi yimela a nkhata wa Jesu. A nkhata lowo wu tiyisa a xivumelwano xiswa. Jesu i te ngalo a nkhata wakwe wu halatelwe ‘kutsetselelwa ka zionho.’ Hizalezo a vanhu va zi kota kuva lava va basileko mahlweni ka Nungungulu niku va zi kotawo ku nghena ka xivumelwano xiswa na Jehova. (Maheberu 9:14; 10:16, 17) A xivumelwano lexi xi maha lezaku zi koteka a ku a 144.000 wa maKristu yo tsumbeka maya tilweni. Kwaseyo ma ta ya tira kota tihosi ni vapristi kasi ku katekisa vanhu vontlhe. — Genesisi 22:18; Jeremia 31:31-33; 1 Pedro 2:9; Kuvululelwa 5:9, 10; 14:1-3.

Hi vamani va faneleko kuga zikombiso lezo za Xialakanyiso? Zi te dlunya lezaku ntsena lava va nga ka xivumelwano xiswa — ku nga lava va nga ni kutsumba ka kuya tilweni — ​hi vona va faneleko kuga xibaba ni kunwa vinya. A moya wa ku basa wa Nungungulu wa va tiyisa lezaku va hlawulilwe a kuva tihosi ta le tilweni. (Va Le Roma 8:16) Vona kambe va le ka xivumelwano xa Mufumo na Jesu. — Luka 22:29.

Ku nga wuliwa yini hi lava va rinzelako ku hanya kala kupinzuka lomu Paradiseni misaveni? Vona va lanzela a xileletelo xa Jesu va tlhela va kumeka Xilalelweni xa Hosi, kanilezi vata kota vacuwukiseli va kombisako xichawo, a vagi a xilalelo. A Timboni ta Jehova ti alakanya a Xilalelo xa Hosi a kanwe hi lembe, hi 14 wa Nisani anzhako ka kupela ka gambo. Hambulezi a misaveni yontlhe ku nga ni makume ya mazana ma tsongwani ntsena ya lava va ti wulako lezaku va rinzela kuya tilweni, a xialakanyiso lexi xa lisima ka maKristu wontlhe. Lexo xikhati xa ku a maKristu wontlhe ma zi kota ku alakanyela a liranzo la hombe nguvu la Jehova Nungungulu na Jesu Kristu. — Johani 3:16.