Kuvuxeta Ka Xikola Xa Wutireli Ga Nungungulu
A ziwutiso lezi zi lanzelako zi ta kambisiswa hi bhulo ga ziwutiso ni mihlamulo ka Xikola Xa Wutireli Ga Nungungulu ka viki gi sangulako hi 30 ka Junho wa 2008. Hi 30 wa timeneti, a muwoneleli wa xikola i ta fambisa a kuvuxeta ku seketelwako ka timhaka ti gonzilweko ka ziavelo za maviki ya 5 ka Maio kala 30 ka Junho wa 2008. [Cuwuka: Laha ku kalako ku nga kombiswangi lomu a timhaka ti susilweko kona anzhako ka xiwutiso, u fanele ku kambisisa ha wece kasi ku kuma a mihlamulo. — Wona Escola do Ministério, pp. 36-7.]
MATSHAMELA YA WUKANELI
1. Hi nga maha yini kasi ku a mifananiso leyi hi yi tirisako yi zwisiseka? [be p. 242 nzi. 3–p. 243 nzi. 1]A kutala ka zikhati zi nene a ku komba lezi a mufananiso wu yelanisako zona ni mhaka leyi ku wulawuliwako hi yona. Hi xikombiso, a xikhati lexi Jesu a nga vitana vapizani vakwe ku “kuwonekela ka tiko,” i tlhelile a komba a wutihlamuleli legi lezo zi kombako ka vona. (Mat. 5:14-16) Anzhako ka mufananiso wakwe wa yivu yi lahlekileko, i lo tlhamusela xungetano hi kutsaka le tilweni hi kota ya muonhi loyi a hunzulukako. (Luka 15:7)
2. Hikuyini a mifananiso yo olova leyi yi seketelwako ka ziyimo zo toloveleka yi humelelako? [be p. 245 tinz. 2-4]A mifananiso yi seketelwako ka ziyimo zo toloveleka ya khumba timbilu ta vaingiseli va hina. A ku fana na Jesu, ha zi kota ku tirisa zilo zitsongwani kasi ku tlhamusela zilo za hombe ni zilo zo olova kasi ku tlhamusela zilo zo karata. Hi ndlela leyi hi ta vuna vanhu lezaku va zwisisa va tlhela va alakanya a zinene za moya lezi hi gonzisako.
3. Xana a ku tirisa zitiro zi wonekako ku na ni lisima la ku chikela kwihi, niku xana Jehova i zi tirisisile kuyini kasi ku gonzisa tigonzo ta lisima? (Gen. 15:5; Jer. 18:6; Jona 4:10, 11) [be p. 247 tinz. 1-2]A xitiro xi wonekako xa zi kota ku koka kupima ka vaingiseli laha ka kuza va alakanya a mhaka leyo hi xikhati xo leha. Khwatsi hi Jehova a tirisileko tinyeleti ta tilo, yindlu ya muwumbi, ni khungu kasi ku gonzisa tigonzo ta lisima, hinawu ha zi kota ku tirisa zitiro zi wonekako kasi ku nyika ntamu ka timhaka ta lisima.
4. Hi nga tirisisa kuyini a zitiro zi wonekako kasi ku chukwatisa a magonzisela ya hina? [be p. 248 tinz. 1-3]A xikhati lexi hi fambisako xigonzo xa Biblia xa laha mutini, ha zi kota ku yisa kupima ka mifananiso ya lomu ka bhuku yi yelanako ni lezi hi gonzako hi tlhela hi kombela xigonzani lezaku xi hi byela lezi xi zi wonako. A xikhati lexi hi wulawulako hi ziprofeto zi fambelanako ni xikhati kutani zimaho zo kongoma matinwini, a kutala ka zikhati za vuna a ku maha tikonta kutani ku komba a xaxamelo wa zimaho za lisima hi kuyelana ni malembe lawa zi mahekileko ha wona. Loku hi tirisa khwatsi a mifananiso ni makwadru ma kumekako lomu ka mabhuku ya hina, ha zi kota ku vuna vanhu lezaku va hatlisa ku zwisisa lezi zi gonziwako.
5. Xana hi nga yi tirisisa kuyini a mimapa hi kuhumelela kota zitiro zi wonekako loku hi gonzisa a zigonzani za Biblia? [be p. 248 nzi. 4]A mimapa ya hi vuna ku “enzela” matshamu lawa hi gonzako ha wona lomu ka Biblia, niku ya hi vuna a ku engetela kuzwisisa ka hina a Mitsalo. Hi xikombiso, a ku kambisisa lienzo la Abrahama la ku suka Ure kala Harani zonake aya Beteli, kutani ndlela leyi a vaIsraeli va nga famba hi yona a xikhati lexi va nga suka hi Gipite vaya Tikweni ga Xitsumbiso za etisa a wutivi ga hina hi matiko ya Biblia zi tlhela zi hi komba a pfhuka wa kusuka ka wutshamu ginwe kala ka ginwani. A ku wona madoropa ni zidoropana lezi Jesu na Paule va xumayeleko ka zona zi nga hi vuna ku wona a mizamo va yi mahileko kasi ku xumayela a mahungu yo saseka.
XIAVELO N.° 1
6. Hi ku vuniwa hi moya wa ku basa wa Nungungulu, xana a ku gonza Biblia zi ta hi vuna ku pola yini? [be p. 32 tinz. 2-3]Hi ku vuniwa hi moya wa Nungungulu, ha zi kota ku zwisisa a kutatiseka ka wuprofeti ga Biblia ni tlhamuselo wa lisine wa lezi zi mahekako misaveni. (Mar. 13:4-29; Kuv. 12:12) Ha zi kota ku tiva a matshamela ya Muvangi hi ka wuako legi gi wonekako. (Rom. 1:20) A ku gonza a Mhaka ya Nungungulu ku nga hi vuna kambe lezaku hi simama ku ti tsongahata, hi ala a “kukhohlisa ka kuonha,” hi famba hi laha ku faneleko Jehova. (Maheb. 3:13; Deut. 17:18-20; Kol. 1:10)
7. Xana hi nga gi tirisisa kuyini a Biblia ha goce kasi ku kambisisa a tlhamuselo wa mutsalo? [be p. 34 nzi. 4–p. 35 nzi. 2]Ha zi kota ku maha lezo hi ku kambisisa a mongo wa mhaka zonake hi ti maha ziwutiso zo fana ni lezi: ‘Xana a mutsalo lowu wu wa kongomiswa ka mani? Xana a mavesi ya laha kusuhani ma komba yini xungetano hi ziyimo lezi zi mahileko kuza ku wuliwa magezu lawo, kutani ku ma komba yini xungetano hi maalakanyo ya vanhu lava va patsekako ka ximaho lexo?’
8. Xana a Ivangeli ya Johani yi wu khanyisisa kuyini a ntiro wa Jesu kota ndlela ya Jehova yo hunzisela a makatekwa ka vanhu? [bsi08-1 p. 13 nzi. 32]A ntiro wa Jesu kota ndlela yinwe ntsena leyi a makatekwa ya Nungungulu ma hunziselwako ka vanhu ha yona wu khanyiswa ka mitsalo yo kota Johani 14:13, 14 ni 16:23. Ku wulawuliwa hi Jesu kota “Yivana ya Nungungulu,” “xibaba xa wutomi,” “kuwonekela ka tiko,” “murisi nene,” “kuvuka ni wutomi,” “ndlela, ni zinene, ni wutomi,” ni “tshinya gi nene ga vina.” (Joh. 1:29; 6:35; 8:12; 10:11; 11:25; 14:6; 15:1)
9. Hi xihi a xiseketelo xa lomu Mitsalweni xa ku kholwa lezaku a bhuku ga Mitiro gi tsalilwe hi dokodela Luka? [bsi08-1 p. 14 nzi. 3; p. 14, 15 tinz. 5-7]A Ivangeli ya Luka ni bhuku ga Mitiro hi wumbiri ga wona ma tsalelwa Teofilu. (Luka 1:3; Miti. 1:1) A vesi go sangula ga Mitiro gi kumbuka a zimaho zo gumesa za bhuku ga Luka. A mitlhamuselo ya Luka xungetano hi xitimela ni pfhumba ga ku suka Kesaria kala Roma yi tsumbekile hambu hi ka zilo za zi tsongwani nguvu. (Miti. 27:40)
10. Xana a munhu a nga longiselisa kuyini a phepha ga kanelo? [be pp. 39-41]A xigava xo sangula ku yisa kupima ka hloko ya mhaka, kutani mhaka-tshinya, leyi u lavako ku wulawula hi yona. Kambisisa a magezu-tshinya ya hloko ya mhaka. Ehleketa hi kungo ga kanelo wa wena. Hi kulanzela, hlawula a timhaka-tshinya leti u lavako ku wulawula ha tona kasi u kota ku anzisa a hloko ya mhaka u tlhela u chikelela a kungo ga wena. Kambisisa u tlhela u hlawula mitsalo ni mitlhamuselo yi yelanako ni timhaka-tshinya ta wena. “Longoloxa” khwatsi a timhaka leti u lavako ku wulawula ha tona. (Luka 1:3)
KUGONZA KA BIBLIA KA VIKI NI VIKI
11. Hi yihi a tempeli leyi yi nga “akiwa hi 46 wa malembe”? (Joh. 2:20) [w08 15/4 “A Palavra de Jeová É Viva — Destaques do livro de João”]A vaJuda va wa wula a tempeli ya Zerubabeli yi aketilweko hi Hosi Herodi wa Judia. Maringano na Josefo, a mutsali wa matimu, a ntiro lowo wu sangulile hi lembe ga wu 18 ga kufuma ka Herodi, kutani hi 18/17 Mahlweni ka Nguva ya Hina. A wutshamu ga kubasa ga tempeli ni zinwani zipanze za lisima zi lo akiwa hi ntlhanu wa malembe ni manharu. Hambulezo, a ntiro wa ku aka zilo zinwani lomu tempeleni wu lo simama kala anzhako ka Pasika ga 30 Nguveni ya Hina a xikhati lexi a vaJuda va nga wula lezaku yi lo akiwa hi 46 wa malembe.
12. Hi vamani va ‘humako kufeni, va enghena wutomini’? (Joh. 5:24, 25) [w08 15/4 “A Palavra de Jeová É Viva — Destaques do livro de João”]Jesu i wulawula hi lava va nga file hi tlhelo ga moya kanilezi anzhako ka kuzwa timhaka takwe va kombisileko kukholwa ka yena zonake va tsika ku famba ndleleni yabye ya wuonhi. Va ‘huma kufeni, va enghena wutomini’ hakuva a kukonelwa kufa ka susiwa kabye, va tlhela va nyikwa a kutsumba ka wutomi ga pinzukelwa hi kota ya kukholwa kabye ka Nungungulu. (1 Ped. 4:3-6)
13. Hikuyini Jesu a nga byela Maria lezaku a tsika ku mu khumba kutani ku mu namarela? (Joh. 20:17) [w08 15/4 “A Palavra de Jeová É Viva — Destaques do livro de João”]Zi woneka ku khwatsi Maria i lo namarela Jesu hakuva i wa alakanya lezaku Jesu i wa hi kusuhani ni ku tlakukela tilweni niku i wa nga ta ha mu wona kambe. Kasi ku mu tiyisa a ku i wa nga fambi ka xikhati lexo, Jesu i lo mu byela lezaku a tsika ku mu namarela, kanilezi ngha a famba a ya byela vapizani vakwe a mahungu ya kuvuxiwa kakwe.
14. Xana zi wula yini a ku Jesu i wuya “kota lezi” a nga tlakukelisa zona tilweni? (Miti. 1:9-11) [rs p. 435 nzi. 3; it-1 p. 243 nzi. 14]Ku fanele ku tiviwa lezaku a tingelosi ti wa wula “lezi” Jesu a nga tlakukelisa zona (hi xiGreki, troʹpos) na ku nga hi matshamela (hi xiGreki, mor·pheʹ) ya miri wakwe a xikhati lexi a nga tlakukela tilweni. A xikhati lexi a refu gi nga mu fihla, a nga ha woniwangi hi vanhu. A tlhatlhambutelo lomu ka Mitiro wu komba lezaku a kutlakukela kakwe a ku vangi ni xikombiso xa wudzunzo ga hombe kutani ku kulungelwa hi vanhu va tiko kanilezi ku lo woniwa ntsena hi valanzeli va tsongwani vo tsumbeka. A tiko laha gi yileko a gi zi wonangi. Ku wa ta maheka zo fana ni lezo kuwuyeni ka Kristu ntanwini wa Mufumo hi 1914.