Kwadru Ga Ziwutiso

◼ Xana za fanela lezaku a vaingiseli vaba mandla anzhako ka xipanze xinwe ni xinwani xa Xikola xa Wutireli ga Nungungulu ni ka Mutlhangano wa Ntiro?

A xikhati lexi a Muvangi, Jehova, a nga wumba misava, ‘a tinyeleti ta mixo ti lo yimbelela khatiginwe, ni vontlhe vana va Nungungulu va lo kanyuluka hi kutsaka.’ (Joba 38:7) A vana lavo va moya va Nungungulu va lo tsakela ku dumisa Jehova hi kota ya zilo zo hlamalisa lezi a zi vangileko, lezi zi nga hi xikombiso xiswa xa wutlhari, wunene, ni ntamu wakwe.

Zi nene ka hina a ku kombisa kubonga ku humako mbilwini hi kota ya mizamo ya vamakabye va hina hi timhaka leti va kanelako. Hi xikombiso, hi tolovela kuba mandla anzhako ka tikanelo kutani mikombiso yi mahiwako lomu ka mitlhangano yo hlawuleka, yo kota mitlhangano ya hombe ni migotsovanyano. A tikanelo leti ti vekiwako leyo ti lavile xikhati ni mizamo yo engeteleka lezaku ti longiselwa. A xikhati lexi hi bako mandla, a hi bongi ntsena a mizamo ya hombe leyi yi mahilweko hi mukaneli, kanilezi hi bonga kambe a gonziselelo leyi Jehova a hi nyikako hi ku tirisa a Mhaka yakwe ni hlengeletano yakwe. — Isa. 48:17; Mat. 24:45-47.

Ahati a kuba mandla ka tikanelo ta Xikola xa Wutireli ga Nungungulu ni Mutlhangano wa Ntiro? A ku na nayo wu beletelako kuba mandla loku ku hi lezaku hi lava ku bonga a xigonzani xi mahileko a xiavelo xa xona xo sangula ka xikola. Hambulezo, za olova ku a kuba mandla kuva xihena ku tlhela ku lahlekelwa hi tlhamuselo wa kona. Hi kota ya lezo, a hi toloveli kuba mandla anzhako ka kanelo wunwe ni wunwani.

Hambu lezi hi kalako hi ngabi mandla ka tikanelo to tala ta Xikola xa Wutireli ga Nungungulu ni Mutlhangano wa Ntiro, ku na ni tindlela to tala leti hina hontlhe hi nga kombisako kubonga ha tona a gonziselelo leyi hi yi kumako ni ka mizamo ya lava va vekako tikanelo. Hi nga maha lezo hi ku nga tsiki a maalakanyo ya hina ma enza ni ku tshama hi ingisela khwatsi a vakaneli. Niku anzhako ka mutlhangano, zikhati zinyingi za koteka ku tshinelela a makabye loyi a vekileko kanelo, hi mu bonga hi kota ya kutikarata kakwe. — Efe. 1:15, 16.