Xana Hi Fanele Ku Alakanya A Mibuzo Ya Masiku Yo Hlawuleka?

A MIBUZO yo alakanya a masiku yo hlawuleka ya za wukhongeli ni lawa ma nga hiko ya wukhongeli yi alakanyiwako matshanwini yo tala ya tiko inyamutlha a yi seketelwi lomu ka Biblia. Makunu, yi sangulele kwihi a mibuzo leyo? Loku u zi kota ku ya hlola lomu ndlwini ya mabhuku ma gonziwako hi vontlhe, u ta hlamala hi ku wona lezi a mabhuku ya mitlhamuselo ma wulako xungetano hi mibuzo yo alakanya masiku yo hlawuleka leyi yi tolovelekileko lomu u hanyako kona. Wona a zikombiso zitsongwani.

Pasika. The Encyclopædia Britannica gi ngalo: “A ku na xikombiso xa kualakanyiwa ka mubuzo wa Pasika lomu ka Testamenta Ga Giswa.” Xana a Pasika gi sangulisile kuyini? Gona gi sangulele wukhozelini ga wuhedeni. Hambulezi va nge ngalo a mubuzo lowo wu alakanya a kuvuka ka Jesu hi ka vafileko, a mikhuwo yi yelanako ni nguva ya Pasika a hi ya wuKristu. Hi xikombiso, xungetano hi “mugwadja wa Pasika” lowu wu tolovelekileko, The Catholic Encyclopedia gi ngalo: “A mugwadja xikombiso xa wuhedeni niku cima ka kale wu woniwa kota xifungo xa kunona ka misava.”

Mibuzo Ya Lembe Giswa. A siku ni mikhuwo yi yelanako ni mibuzo ya Lembe Giswa ya hambana hi kuya hi tiko ginwe ni ginwani. Xungetano hi kutumbuluka ka mubuzo lowo, The World Book Encyclopedia gi ngalo: “A mufumeli wa muRoma Júlio César i yimisile a 1 wa Janeiro kota Siku ga Lembe Giswa hi 46 Mahlweni ka Kristu. A vaRoma va lo hendleleta a siku lego ka Jano, a nungungulu wa tinyangwa, tivati, ni masangulo. A hweti ya Janeiro yi chulilwe a vito lego hi kota ya Jano, loyi a nga hi ni tinghohe timbiri — a yinwe yi nga cuwukile mahlweni ni yinwani yi nga cuwukile nzhako.” Hikwalaho a mibuzo ya Lembe Giswa yi seketelwa lomu ka mikhuwo ya wuhedeni.

Halloween. The Encyclopedia Americana gi ngalo: “A matshamela ya mikhuwo yi yelanako ni Halloween yi zwananisiwa ni nkhozo ya wuDruida [wupristi ga vaCelta va kale] ya le xikhatini xa mahlweni ka wuKristu. A vaCelta va wa kari va mahela mibuzo a vanungungulu vabye va hombe va vambiri — a nungungulu gambo ni nungungulu wa vafileko . . . , loyi a mubuzo wakwe wu nga mahiwa hi 1 wa Novembro, ku nga hi masangulo ya Lembe Giswa ga vaCelta. A mubuzo wa vafileko wu lo ngheniswa lomu ka mikhuwo ya wuKristu hi kutsongwani-kutsongwani.”

Yinwani Mibuzo Yo Alakanya Masiku Yo Hlawuleka. A zi koteki a ku wulawula hi yontlhe mibuzo yi mahiwako misaveni. Hambulezo, a mibuzo yo alakanya masiku yo hlawuleka leyi yi dzunzako vanhu kutani tihlengeletano ta vanhu a yi vumeleki ka Jehova. (Jeremia 17:5-7; Mitiro 10:25, 26) Kambe, tiva lezaku a matumbulukela ya mibuzo yo alakanya za wukhongeli ma fanele ku komba lezaku yona ya tsakisa Nungungulu kutani ahihi. (Isaya 52:11; Kuvululelwa 18:4) A matshinya ya milayo ya Biblia ma kumbukilweko lomu ka Xipimo 16 xa bhuku legi ma ta ku vuna a ku tiva lezi Nungungulu a wonisako zona a kuhlengela mibuzweni yi nga hiko ya wukhongeli.