Mekim Printing Wok i Kamap Simpol Bilong Helpim “Olgeta Kain Man”

God Jehova i laik bai “olgeta kain man . . . i kisim stretpela save long tok i tru.” (1 Timoti 2:3, 4) Tasol ol bratasista bilong yumi na ol manmeri yumi autim tok long ol, ol i mekim planti tokples. Long olgeta yia, yumi save prinim klostu 2 bilion litresa long ol dispela tokples. Yumi bin mekim wanem bilong wokim ol buk na nius bilong Baibel long planti tokples na long wankain taim yusim gut ol donesen yumi kisim?

Daunim Namba Bilong Ol Printing Ples, Ol Masin i Gutpela Moa

Inap olsem 40 yia i go pinis, yumi prinim ol magasin long winim 40 kantri. Stat long dispela taim na i kam, isi isi yumi senisim wok bilong printing na nau yumi mekim printing long 9-pela kantri tasol. Tasol insait long dispela haptaim, namba bilong ol tokples em yumi prinim ol buk na nius long en i go antap olsem 6-pela taim moa! Hau yumi inap wokim printing long planti tokples moa, maski yumi no gat planti ples bilong printing olsem long bipo? Wanpela risen em bikos yumi gat ol masin i gutpela moa.

Ol nupela printing masin i mekim na yumi inap prinim planti moa litresa insait long liklik haptaim. Long ol olpela printing masin, yumi mas lusim bikpela haptaim long senisim ol samting bilong redim masin long prinim neks pablikesen. Tasol nau nupela masin i gutpela moa na liklik haptaim i lus long mekim senis long en bilong redim em long nupela printing. Yumi ken pinisim printing hariap, olsem prinim ol buk na nius em i no planti tumas long ol tokples em sampela manmeri tasol i save mekim. Tru, bilong mekim printing bilong wanpela buk o nius, i mas i gat printing plet bilong em yet. Wanpela taim, insait long 12-pela mun yumi tromoi klostu 2 milion dola long baim ol printing plet.a So bilong mekim ol liklik printing, yumi yusim ol dijitol printing masin we i no gat printing plet long en. Ol dijitol printing masin na ol printing masin i yusim leisa teknoloji inap mekim ol liklik printing we yumi seivim mani na yumi no yusim planti risos.

Insait long 3-pela yia i go pinis, yumi spendim moa long 10 milion dola long apdetim ol printing na bainding masin yumi yusim long olgeta hap bilong graun. Skelim olsem wanem yumi yusim sampela ol dispela masin long wokim ol Baibel. Long bipo, ol brata i mas mekim 40 samting bilong wokim wanpela Baibel bihain long ol i prinim—ol i mas samapim, katim, trimim, polisim, na gildim. Na tu, planti taim yumi mas muvim na bungim ol Baibel na bai ol i stap antap long narapela narapela. Long nau, ol brata i mekim 10-pela samting tasol bikos planti samting ol i mekim bipo, nau masin i mekim ol dispela samting. Na tu, ol konveya masin i muvim ol Baibel taim ol i pinis long wanpela proses i go long neks proses. So nau yumi no mekim bikpela wok tumas olsem bipo long wokim ol Baibel. Long Japan brens, bainderi dipatment i save wokim 2,000 Baibel insait long olgeta 8-pela aua. Nau, ol i wokim olsem 35 tausen Baibel insait long olgeta 8-pela aua!

Mekim Ol Samting Bilong Seivim Man

Ol samting em yumi stori pinis long en i helpim mipela long seivim gut ol donesen mipela i kisim. Eksampel, nau mipela i mekim ol liklik printing na mipela inap senisim hariap ol printing plet, olsem na namba bilong ol litresa long printeri i no planti tumas olsem long bipo. Gary i wok long brens long Amerika, em i tok: “Pastaim i hatwok long tingim olsem gutpela samting inap kamap taim mipela i mekim ol liklik printing. I luk olsem em gutpela moa long mekim ol bikpela printing wan wan taim. Long fes yia bihain long mipela i stat long mekim ol liklik printing, mipela i spendim 60,000 dola moa long baim ol printing plet na pepa. Tasol mipela i seivim moa long 1.5 milion dola long dispela yia, em mani mipela i bin yusim bilong painim spes long putim ol pepa na ol buk mipela i prinim!” Nau mipela inap yusim mani long ol narapela bikpela samting, olsem konstraksen bilong ol Haus Kingdom na disasta rilif wok.

I no gat wok moa long painim spes long putim ol pepa na buk so i gat planti moa spes long sampela brens ofis bilong yumi. Ol dispela brens i ken yusim ol dispela spes long mekim ol narapela wok long Betel. Na tu, mipela i mekim printing long sampela brens tasol, so i no gat wok long sanapim ol bikpela brens long taim mipela i mekim ol konstraksen projek. Wanpela eksampel, printing wok long Briten brens nau i kamap long Sentral Yurop brens na ol narapela printing lokesen long 2018. Em as na oganaisesen i seivim planti milion dola long wok konstraksen bilong nupela brens long Chelmsford, Inglan.

“Yu Tingim Mi!”

Bikpela samting moa, yumi mekim printing wok i kamap simpol na dispela i helpim planti manmeri moa long pas gut wantaim Jehova. Nau yumi inap prinim ol litresa long planti tokples moa, maski yumi mas prinim sampela handret kopi tasol bilong wanpela pablikesen. Olsem, i gat inap 35,000 manmeri long Nu Kaledonia na Wallis and Futuna em ol i mekim tok Wallis. Tasol long Ogas 2024, mipela i rilisim Baibel Nupela Taim Trenslesen Bilong Ol Skripsa Holi long tokples Wallis. Wanpela pablisa husat i mekim tokples Wallis em nem bilong em Selafina, em i tok: “Bipo mi save ritim ol tok long Frens Baibel em mi no klia long em. So taim mi kisim Baibel long tokples Wallis, aiwara i kam daun long ai bilong mi. Mi beten olsem, ‘O Jehova, yu tingim mi! Yu God i save laikim olgeta kain man.’”

Long Demokratik Ripablik Bilong Kongo, ol manmeri em namba bilong ol i no winim 500,000 i mekim tokples Sanga. Maski i olsem, ol i wokim buk Stap Amamas Oltaim! long dispela tokples. Josué i save go long kongrigesen i mekim tokples Sanga, em i tok: “Bipo mipela i mas taitim bun long eksplenim o trensletim sampela wed o ol tok long ol Baibel sumatin. Na maski mipela i mekim olsem, sampela taim ol sumatin bilong mi i no klia long buk i tok wanem. Mi amamas tru long kisim dispela buk long tokples Sanga! Nau ol sumatin bilong mi i klia long ol tok ol i lainim long Baibel, na mi no nid long mekim ol longpela stori bilong helpim ol long kliagut.”

Yumi wokim na tilim ol buk na nius bilong Baibel long planti manmeri moa na long planti moa tokples winim long bipo. Ol donesen em yu mekim long donate.jw.org, i helpim mipela long mekim olsem. Tenkyu long gutpela pasin bilong yu.