Printim Ol Pablikesen Long Haptaim We Planti Infomesen i Dijitol

Taim yu laik ritim Baibel o wanpela pablikesen bilong yumi, yu save yusim wanem samting? Planti bilong yumi i no save rit long buk o magasin moa, yumi save rit long smatfon o teblet. Ating yu wok long ritim dispela atikol long wanpela elektronik divais. Yumi tenkyu tru olsem ol pablikesen bilong yumi i stap long JW Library ap na jw.org!

Wai na planti pablikesen bilong yumi i dijitol o stap onlain? Planti Witnes i laik yusim ol dijitol pablikesen bikos em isi long ritim, na tu, i gat additional features long ol dijitol pabliksesen em ol pablikesen yumi prinim i no gat. Em tru olsem yumi wok yet long tilim ol litresa long ol manmeri, tasol nau yumi tingting moa long kirapim toktok wantaim ol manmeri taim yumi autim tok.

Em risen na yumi no moa prinim planti ol pablikesen em yumi bin prinim inap 10-pela yia i go pinis! Long 2015, paslain long planti man tru i stat long yusim JW Library long daunlodim ol pablikesen, planti ol printing pres bilong yumi i mekim wok inap olsem 16 aua long olgeta de, na bikos i gat planti pablikesen tru long prinim, ol i bin plen tu long prinim ol pablikesen inap 24 aua long olgeta de. Long nau, planti ol printing pres bilong yumi i mekim wok inap 8-pela aua tasol long olgeta de.

I no oganaisesen bilong yumi tasol i daunim namba bilong ol pablikesen yumi prinim, planti narapela oganaisesen tu i bin mekim olsem. Sampela wok painimaut i tok insait long ol yia i go pinis, ol bikpela kampani i no prinim moa planti pablikesen olsem ol niuspepa na ol magasin olsem long bipo. Planti man i wok long yusim ol dijitol pablikesen, olsem na yu ting i gat wok long yumi mas prinim yet ol buk na nius? Yes! Yumi ken lukim ol risen na yumi mas wok yet long prinim ol litresa na hau ol donesen bilong yupela i opim rot long oganaisesen inap mekim olsem.

Wai na Yumi Mas Prinim Yet Ol Buk na Nius?

Sampela bratasista bilong yumi i wok yet long yusim ol pablikesen em yumi prinim. Skelim ol dispela eksampel:

“Mi yusim ol pablikesen yumi prinim bikos mi no gat narapela rot. Mi no gat inap mani long baim wanpela elektronik divais, na maski sapos mi mekim olsem, long ples bilong mipela i gat planti blak-aut so mi bai no gat rot long sasim ol divais long pawa. So em i no gutpela tingting long mi yusim ol dijitol pablikesen.”​—Odete, Mosambik.

“Mi no gat inap mani long baim wanpela dijitol divais, na maski sapos mi baim, ol divais em pe bilong ol i daun, ol bai bagarap hariap na planti taim mi mas fiksim ol. Mi bai no gat rot long ritim ol pablikesen taim mi wetim ol man long fiksim ol dispela divais.”​—Linley, Malawi.

“Mipela i no gat planti mani so mi na tupela pikinini meri bilong mi i serim wanpela fon. Long taim bilong miting, mipela i save mekim olsem: Wanpela i yusim fon, na narapela tupela i yusim ol pablikesen yumi prinim.”​—Sinine, Maikronisia.

Ol narapela bratasista i gat rot long yusim ol dijitol pablikesen, tasol ol i laik yusim ol pablikesen yumi prinim. Skelim ol tok ol i mekim:

“Planti taim mi save yusim ol dijitol pablikesen. Tasol taim mi redim ol miting, mi laik yusim ol pablikesen yumi prinim. Mi save enjoi stret long ritim ol tok long pepa na mi inap holim pepa long han bilong mi. Mi save amamas long makim ol bikpela poin wantaim pen na raitim ol tok long spes i stap arere long pes. Mi ken mekim olsem tu long ol dijitol pablikesen, tasol taim mi rait long pepa stret, mi save pilim olsem ol tok mi ritim i go daun tru long bel na tingting bilong mi.”​—Márcia, Brasil.

“Mi save pilim isi moa long ritim ol pablikesen yumi prinim; ol i no mekim ai bilong mi pen olsem taim mi ritim ol dijitol pablikesen. Na tu, mi no hapmeri bilong yusim teknoloji. Mi save hatwok long raitim ol nout, daunlodim ol fail, na painim ol infomesen.”​—Selina, Mosambik.

“Mi save yusim fon na kompiuta bilong mi long de olgeta. Tasol taim mi laik mekim stadi bilong pas gut moa wantaim Jehova, mi no laik yusim ol divais bilong mi, mi laik yusim ol pablikesen yumi prinim. Mi ken stap isi taim mi rit, na ol mesis na notifikesen i no inap pulim nabaut tingting bilong mi.”​—Guillaume, Kanada.

“Long fes taim yu toktok wantaim wanpela long taim yu autim tok, em i no isi long askim em long kontek infomesen na bai yu ken salim dijitol pablikesen long em. Em isi moa long lusim wantaim em kopi bilong wanpela pablikesen yumi prinim. Na tu, mipela i save autim tok long ol ples i no seif, so long ol dispela ples, mipela i no save yusim tumas ol elektronik divais.”​—Wanpela wasman sekit long Saut Amerika.

Yumi mekim wanem bilong helpim ol bratasista bilong yumi em ol i nidim o laikim ol pablikesen em yumi save prinim?

Provaidim Ol Samting Ol Bratasista i Nidim

Long 9-pela printing brens bilong yumi, ol printing pres i wok yet long prinim ol pablikesen. Long 2025 sevis yia, yumi prinim moa long 1.5 bilion litresa, dispela i makim tu winim 3 milion Baibel, moa long 18 milion buk, na winim 941 milion liklik nius na ol invatesen pepa. Yumi tromoi winim 35 milion dolaa long prinim ol dispela pablikesen. Na tu, insait long winim 3-pela yia i go pinis, yumi tromoi inap olsem 10 milion dola long apdetim ol printing na bainderi masin bilong yumi.

Bilong yusim gut ol donesen mipela i kisim, mipela i prinim tasol ol litresa em ol wanbilip bai yusim. Olsem yumi stori pinis, yumi wok yet long tilim ol litresa, tasol yumi tingting moa long kirapim toktok wantaim ol manmeri. So insait long 10-pela yia i go pinis, yumi daunim namba bilong magasin Kirap! em yumi prinim bilong wan wan pablisa long 86 long olgeta yia i go daun long 11-pela tasol long olgeta yia. Na bikos planti Witnes i save yusim ol kontek kat long autim tok, nau yumi wokim planti moa kontek kat olsem 3-pela taim moa winim long paslain long yia 2020.

“Tru Tru God i Save Tingim Tru Olgeta Manmeri”

Ol bratasista bilong yumi i tenkyu tru olsem yumi wok yet long prinim ol pablikesen. Ricardo long Brasil, em i tok: “Mi pilim amamas olsem mi insait long wanpela gutpela oganaisesen em ol i wokim ol buk na nius bilong Baibel em olgeta man i ken kisim, dispela i makim tu ol lain em ol i no inap ritim o daunlodim ol dijitol pablikesen. Dispela i opim rot long ‘man nek bilong em i drai’ na ‘olgeta man i gat laik’ long ol i ken kisim save long tok i tru i givim laip long man.” (Revelesen 22:17) Bernard long Tahiti, em i tok: “Long bel, mi tenkyu tru long ol pablikesen bilong yumi em ol i prinim. Ol i stap olsem evidens i soim pasin laikim, savetingting, na gutpela tingting bilong oganaisesen bilong Jehova, em dispela oganaisesen i givim rot long olgeta man—ol yangpela na lapun, na ol maniman na tarangu man—long ol i ken putim yau long gutnius bilong Kingdom. Em naispela rot we yumi lukim klia olsem wanem God i save tingim tru olgeta wan wan man.”

Andréia em i bilong Brasil, em i amamas olsem ol donesen em i givim i sapotim wok bilong prinim ol pablikesen bilong yumi. Em i tok: “Oganaisesen bilong yumi i save yusim mani, taim, save, na strong long prinim ol pablikesen bilong ol man em ol i no inap yusim ol dijitol pablikesen. Dispela i mekim na mi bilip tru olsem tru tru God i save tingim tru olgeta manmeri. Sapos oganaisesen i yusim ol donesen bilong mi long prinim ol pablikesen tasol, mi bai amamas yet long givim ol donesen.”

Mipela i laik tok tenkyu tumas long ol donesen bilong yupela, na ol donesen yupela i mekim tu long rot bilong donate.jw.org. Ol dispela donesen i givim rot long mipela long wok yet long prinim ol pablikesen bilong ol manmeri i nidim ol na ol lain i laik yusim ol.