Wanem Samting Bai Painim Lotu?—Baibel i Tok Wanem

Yu bel hevi o i no laikim tru lotu? Maski lotu i mekim sampela gutpela samting long sampela komiuniti na long olgeta wan wan man, em i kamapim tu planti hevi. Buk Encyclopedia of Religion and War i tok: “Sampela bikpela woa i bin kamap long bipo em bikos long bilip bilong ol lotu.” Planti taim ol hetman bilong lotu i yusim lotu, i no bilong mekim lotu, tasol long strongim sampela tingting bilong wok politik. Na tu, ol narapela hetman bilong lotu i haitim ol pasin olsem seksual abius o pasin bilong stilim mani.

Sapos yu bel hevi long lotu, ating yu laik save God i pilim olsem wanem long lotu. Baibel i kamapim olsem, God i no orait long planti lotu bikos long ol samting ol i mekim. Baibel i kamapim tu ol tok profet i stori long samting em bai mekim. Long rot bilong tok piksa, Baibel i stori olsem klostu nau God bai mekim wanpela samting long lotu long olgeta hap bilong graun we i no bin kamap bipo.

Baibel i tok wanem samting bai painim lotu long bihain?

Tok Profet: Buk Revelesen long Baibel i stori long wanpela pamukmeri em nem bilong en Bikpela Babilon. Dispela pamukmeri i sindaun antap long wanpela retpela wel animal. Tasol bihain, dispela wel animal i birua long em na kilim em i dai.—Revelesen 17:3, 5, 16.

Mining: Dispela pamukmeri, em Bikpela Babilon, i makim olgeta kain lotu giaman—em lotu God i sakim.a Retpela wel animal i makim Yunaitet Nesen.b Dispela tok piksa long pamukmeri i sindaun antap long retpela wel animal i soim olsem lotu giaman i bin stiaim, na tu kontrolim Yunaitet Nesen. Ol dispela wel animal i kilim i dai pamukmeri na dispela i soim olsem Yunaitet Nesen na ol kantri i sapotim em bai givim baksait na bagarapim olgeta lotu giaman bilong dispela graun. Dispela samting bai kamapim bikpela hevi tru.

Pamukmeri long buk Revelesen, em i sindaun antap long retpela wel animal na ron i go. Hetkota bilong Yunaitet Nesen i stap long left sait bilong wel animal, na ol narapela narapela bilding bilong lotu i stap long rait sait bilong en.

Lotu giaman bai bagarap olsem wanem?

Tok Profet: “Dispela 10-pela kom na dispela wel animal yu bin lukim, ol bai heitim dispela pamukmeri na . . . ol bai kukim em olgeta long paia. Long wanem, God i givim tingting long ol [tingting long ol lida bilong graun] long mekim samting em yet i tingting pinis long en, yes, em long karimaut dispela wanpela tingting ol i gat bilong givim kingdom bilong ol long wel animal . . . Insait long wanpela de tasol ol samting nogut bai kamap long em olsem, dai, krai sori, na bikpela hangre. Na paia bai kukim em olgeta, long wanem, Jehovac God, husat i bin jasim em, em i gat bikpela strong.”—Revelesen 17:16, 17; 18:8.

Mining: God bai kirapim olgeta kantri bilong graun long “mekim samting em yet i tingting pinis long en.” Em bai kirapim ol long givim “kingdom bilong ol,” o wok politik bilong ol i go long Yunaitet Nesen. Long dispela rot, Yunaitet Nesen—nau tasol em i kisim strong long ol kantri—bai bagarapim lotu giaman long olgeta hap bilong graun. Dispela narakain samting bai kamap wantu i olsem em i kamap “insait long wanpela de tasol”—hariap tru na long taim ol man i no ting bai kamap—na ol manmeri bai kirap nogut.—Revelesen 18:21.

Wai na lotu giaman bai bagarap?

Tok Profet: “Ol sin bilong em i hip i go antap olgeta long heven, na God i tingim ol pasin i no stret em i bin mekim.”—Revelesen 18:5.

Mining: Lotu giaman i bin mekim planti pasin nogut inap planti handret yia. Skelim sampela bilong “ol sin” em i mekim na God i kotim em:

Piksa bilong wanpela lida bilong politik na wanpela hetman bilong lotu i sekan.

Insait long wok politik. Jisas Krais i skulim ol disaipel bilong em long no ken insait long ol wok politik, tasol ol i mas putim tingting na bilip long Kingdom Bilong God, em wanpela gavman i stap long heven we bai senisim wok bos bilong ol man.d (Daniel 2:44; Matyu 6:9, 10; Jon 6:15; 18:36) Lotu giaman i no mekim olsem. Em i insait tru long ol wok politik na em i no stap gut long God, olsem na tok profet long Revelesen i stori long Bikpela Babilon olsem em i gat asua long mekim “pasin pamuk” na i stret long kolim em olsem “bikpela pamukmeri.”—Revelesen 17:1, 2; Jems 4:4.

Piksa bilong wanpela hetman bilong lotu i holim kruse na blesim ol ami.

Pait na bagarapim man. Baibel i stori olsem lotu giaman i as bilong dai bilong “olgeta manmeri em ol birua i bin kilim ol i dai long graun.” (Revelesen 18:24) Planti lotu i no skulim ol manmeri bilong ol long kamapim bel isi, tasol ol i kirapim ol long sapotim o kirapim ol woa na pasin teroris.

Piksa bilong wanpela hetman bilong lotu i holim planti mani long han bilong em.

Pasin gridi. Lotu giaman “i no sem long kisim planti samting i dia tumas.” (Revelesen 17:4; 18:7) Planti lotu i bin yusim namba na pasin pren bilong ol long kisim planti mani kago. Dispela kain pasin gridi i mekim na God i no amamas.—Taitus 1:7.

Piksa bilong wanpela hetman bilong lotu i wok long toktok.

Tok giaman. Lotu giaman i skulim ol manmeri na i kirapim ol long mekim ol samting we i no stret wantaim tok i tru bilong Baibel.e Lotu giaman i as bilong planti tok na pasin we i paulim ol manmeri na i no givim ona long God, olsem na tok profet i kolim em olsem “mama bilong . . . olgeta stingpela samting bilong graun.”—Revelesen 17:5; 18:23.

**Yu ting olgeta lotu bai bagarap?**

Nogat. Buk Revelesen i stori long wanpela lain manmeri bilong olgeta kantri bilong graun na i kolim ol olsem “bikpela lain manmeri.” (Revelesen 7:9) Baibel i stori olsem dispela bikpela lain manmeri “i werim ol longpela waitpela klos,” dispela i makim olsem ol i stap gut long God na lotuim em long rot em i orait long en. Ol dispela lain i abrusim “traipela hevi tru,” em Baibel i kolim dispela haptaim we lotu giaman na olgeta birua bilong God bai bagarap. (Revelesen 7:13, 14; 19:11, 19-21) Dispela bikpela lain manmeri i werim ol longpela waitpela klos ol i bilong lotu i tru—em lotu bai stap oltaim.f

Bikpela lain man, meri, na ol pikinini i amamas na wokabaut wantaim. Baksait long ol em ol bilding bilong lotu we i no gat man long en, ol dispela bilding i bagarap. — Bikpela lain manmeri i lotu tru long God bai abrusim bagarap i painim lotu giaman

Lotu giaman bai bagarap na hau dispela i gutpela samting long yu?

Yu ken kisim bel isi long save olsem God i no orait long olgeta samting nogut em lotu i bin mekim. Yu ken bilip na wet olsem gutpela samting bai kamap bihain, olgeta kain lotu we i no save rispektim God na i mekim ol manmeri i karim pen na hevi bai pinis olgeta.

Na tu, yu ken save tru olsem i gat wanpela rot bilong mekim lotu em God i orait long en. Baibel i tok: “Ol man i lotu tru long Papa, ol bai lotuim em long spirit na long pasin i tru. Tru tumas, Papa i painim ol kain man olsem long lotuim em.” (Jon 4:23) Em i tokim ol: “Ol manmeri bilong mi, yupela i mas lusim dispela ples na kam ausait sapos yupela i no laik poroman wantaim em [Bikpela Babilon] long ol sin bilong em, na sapos yupela i no laik kisim hap bilong ol pe nogut bilong em.” (Revelesen 18:4, 5) Yes, God i singautim ol manmeri long lotuim em long pasin i tru. (1 Timoti 2:3, 4) Em i tok promis long ol lain i harim singaut bilong em olsem ol bai stap laip oltaim.—1 Jon 2:17.

a Bilong kisim save long 4-pela samting we bai helpim yu long luksave long Bikpela Babilon, ritim atikol “Bikpela Babilon Em Wanem Samting?”

b Bilong kisim save long 6-pela samting we bai helpim yu long luksave long dispela wel animal, ritim atikol “What Is the Scarlet-Colored Beast of Revelation Chapter 17?”

c Jehova em nem bilong God. (Buk Song 83:18) Lukim atikol “Jehova Em i Husat?”

d Bilong kisim sampela save moa, watsim vidio Kingdom Bilong God Em i Wanem Samting?

e Bilong lukim ol eksampel, lukim blok “Yu Ting Ol Lotu Em Ol i Tok Ol i Kristen i Insait Long Bikpela Babilon?”

f Bilong kisim save long hau Baibel inap helpim yu long luksave long lotu i tru, ritim atikol “How Can I Find the True Religion?”