Kliagut Long Ol Tok Piksa i Stap Long Baibel

Baibel i stori long planti handret tok piksa. Tasol planti man em ol i save ritim Baibel, ol i hatwok long kisim gut mining bilong ol. (Mat. 13:13) Wanem samting i ken helpim yu long kliagut long mining bilong ol tok piksa i stap long Baibel? Traim mekim ol dispela samting:

• Tingim topik na tok piksa. Wanpela tok piksa i save helpim yumi long kisim gut mining bilong wanpela topik. Olsem, Revelesen 3:3 i tok Jisas bai kam (em topik) olsem wanpela stilman (em tok piksa).

• Luksave long olsem wanem topik na tok piksa i wankain. Traim long luksave long ol samting insait long wanpela topik i wankain long wanpela tok piksa.

• Skul yu kisim i mas stret wantaim poin bilong tok piksa. Sampela taim, ol samting i wankain long topik na tok piksa inap mekim na man inap kisim rong aidia. Long eksampel i stap antap, Jisas i no kam bilong stilim wanpela samting. Ol tok i stap long ol ves i stap klostu i soim olsem Jisas bai kam olsem wanpela stilman taim ol man i no ekspektim em long kam o ol i no redi na wet i stap long em i kam.