Wok Yet Long Strongim Pasin Pren Bilong Yu Wantaim Poroman Marit Bilong Yu

1. Wai na ol gutpela pren ol i presen i kam long Jehova?

OL GUTPELA pren em ol i presen i kam long Jehova. (Jems 1:17) Ol i laikim God, na ol i laikim yumi tu. Ol i save amamas taim yumi amamas, mekim isi bel bilong yumi taim yumi bel hevi, na ol i save givim yumi ol onest edvais taim yumi nidim helpim. Ol i save stap gut long yumi, na yumi ken trastim ol. Ol kain gutpela pren olsem i save “mekim bel i amamas.”—Prov. 27:9.

2. Wai na em i bikpela samting olsem ol marit i mas wok yet long strongim pasin pren namel long ol? (Matyu 19:6)

² Em i bikpela samting long man na meri marit i stap olsem tupela bes pren. Ol i mas mekim ol samting bilong wok yet long strongim pasin pren namel long ol. Sapos ol i no mekim olsem, ol inap kirap long pilim wanpis, bel hevi, na tu, belhat. Tasol taim ol i wok yet long strongim pasin pren namel long ol, ol inap stap amamas na stap olsem tupela gutpela pren i pas gut wantaim. (Ritim Matyu 19:6.) Long dispela atikol, yumi bai stori long hau ol marit i ken wok yet long strongim pasin pren namel long ol. Tasol pastaim, yumi ken stori long hau ol singel Kristen i ken makim gutpela poroman husat inap stap olsem bes pren bilong ol long laip olgeta bilong ol.

HAU LONG MAKIM WANPELA PREN BILONG OLTAIM

3-4. Wanem samting bai helpim wanpela long painim gutpela poroman bilong maritim? (Provep 18:22)

³ Paslain long yumi mekim ol bikpela disisen, yumi mas tingim gut wanem ol gutpela samting na ol samting nogut inap kamap sapos yumi mekim dispela disisen. Ol bikpela disisen inap mekim sampela samting long laip olgeta bilong yumi, so em i bikpela samting long skelim gut paslain long yumi mekim ol dispela disisen.

⁴ Taim yumi laik makim wanpela pren bilong oltaim—poroman marit—em wanpela bilong ol bikpela disisen tru yumi laik mekim. Jehova em i As bilong marit, olsem na i stret long yumi lukluk i go long em bilong stiaim yumi long husat yumi ken makim bilong maritim. Em i laik bai man i painim gutpela meri bilong maritim, na Em i laik bai meri i painim gutpela man bilong maritim. Oltaim Jehova i save long wanem gutpela rot bilong helpim yumi. (Ritim Provep 18:22; Ais. 48:​17, 18) Ol stiatok i stap long Tok Bilong God inap helpim wanpela Kristen long painim gutpela poroman bilong maritim.

5. Wai na em i bikpela samting long makim wanpela baptais brata o sista bilong maritim?

⁵ Taim yumi kisim baptais, yumi kamap ol pren bilong God. (Sng. 25:14) Sapos yu laik marit, orait i gutpela yu makim wanpela poroman marit namel long ol pren bilong Jehova. (1 Kor. 7:39) Taim yu mekim olsem, yu soim olsem yu amamas long bihainim ol lo bilong Jehova, na dispela bai helpim yu long tingim poroman marit bilong yu olsem blesing i kam long Jehova. (Prov. 19:14) Na yu bai abrusim tu ol hevi i save kamap long pasin bilong “pas wantaim” ol man na meri em ol i no wanbilip. (2 Kor. 6:14) I no stret long prenim wanpela i no lotuim Jehova na holim tingting kranki olsem i no gat wanpela Kristen yu laikim namel long lain bilong Jehova. Na tu, no ken kisim tingting olsem yu ken prenim wanpela i no wanbilip na bihain em bai kisim save long tok i tru.

6-7. Yu ken givim wanem ol askim long yu yet taim yu prenim wanpela?

⁶ Em tru olsem i no olgeta baptais Kristen ol i stap olsem gutpela poroman bilong maritim. Sapos yu laik prenim wanpela, orait i gutpela yu skelim gut. Askim yu yet olsem: ‘Em i save mekim wanem pasin long famili bilong em? Em i save tingim ol narapela na rispektim ol? Husat ol pren bilong em? Em i save mekim wanem taim ol narapela i no wanbel long tingting bilong em? Em i save strong long ol i bihainim tingting bilong em, o em i save redi long bihainim tingting bilong ol taim dispela i no pait wantaim stiatok bilong Baibel? Em i gat wanem tingting long mani?’

⁷ Yu ken givim sampela moa askim long yu yet olsem: ‘Dispela man o meri em mi tingting long prenim, em i laikim tru Jehova? Em i wok long kisim “nupela pasin”? Em bai helpim mi long wok yet long givim bel olgeta long lotuim Jehova? Mitupela i putim ol wankain mak bilong bilip? Mi tingim em olsem wanpela pren em mi inap pas gut wantaim em na mitupela inap stap olsem tupela bes pren?’ (Kol. 3:​9, 10) Sapos yu wanpela sista, dispela brata yu wok long prenim, em inap stap olsem gutpela pren na gutpela het bilong famili? (1 Kor. 11:3) Sapos yu wanpela brata, dispela sista yu wok long prenim, em inap redi long daun long wok bilong yu olsem het bilong famili maski yu mekim ol popaia? Yu mas lusim sampela haptaim bilong bekim kain ol askim olsem. Olsem na i gutpela long yu yusim dispela haptaim yu wok long prenim wanpela long save gut long dispela man o meri em yu tingting long maritim.

8-9. Wanem samting inap helpim wanpela husat i wok long prenim narapela long mekim gutpela disisen? (Lukim tu piksa.)

⁸ Taim yu wok long prenim wanpela, yu bai mekim gutpela disisen sapos yu traim long luksave long em i wanem kain man o meri tru. Painimaut long tingting ol narapela i gat long pren bilong yu. Yu ken askim ol long wanem kain ol pasin em i gat na askim long tingting bilong ol narapela long kongrigesen. Olsem, em i gat pasin daun, em i gat gutpela pasin, na em i save holim stretpela tingting? Sarah, em wanpela sista long Frens Giana, em i maritim wanpela brata nem bilong em Daniel, em i tok: “Mi kisim sampela save moa long Daniel taim mi toktok wantaim brata em i serim haus wantaim em na em i painia poroman bilong em, na tu, long wanpela elda long kongrigesen bilong Daniel, ol pren bilong mitupela, na ol sista long kongrigesen bilong em.” Long gutpela pasin, yu ken askim man o meri em yu prenim sapos i gat sampela samting long laip bilong em long bipo o long nau em yu mas save long en bikos sampela bilong ol dispela samting inap kamapim hevi insait long marit bilong yutupela long bihain.

⁹ Sapos yu gat tupela tingting long pren bilong yu o ol narapela i tokim yu long sampela samting long em we ol i luksave long en, orait i gutpela long tingim gut ol dispela samting na no ken sakim. Taim yu mekim olsem, dispela bai helpim yu long wokim disisen olsem em i savetingting long wok yet long prenim em, o nogat.a Orait nau, kirap long hia na i go long dispela atikol, yumi bai stori long man na meri em ol i marit pinis.

LUSIM TAIM WANTAIM BILONG STRONGIM PASIN PREN

10. Wai na i gutpela long maritman na maritmeri i lusim haptaim wantaim na pilim tingting bilong narapela narapela?

¹⁰ Maritman na maritmeri i ken strongim pasin pren namel long ol taim ol i lusim haptaim long stap wantaim maski ol i bisi tru. Dispela i opim rot long ol i ken toktok gut wantaim long ol samting i kamap long wan wan de, stori gut wantaim long tingting bilong ol, mekim ol samting bilong soim olsem ol i laikim narapela narapela, na amamas wantaim.

11. Wanem samting inap bagarapim pasin pren namel long man na meri marit?

¹¹ Man na meri marit em ol i stap gutpela pren, oltaim ol i laik stap klostu long narapela narapela na ol i no laik stap longwe. Em tru olsem, sampela taim ol i mas stap longwe long narapela narapela inap sotpela haptaim. Tasol pasin bilong stap longwe long narapela narapela inap longpela haptaim inap kamapim bikpela hevi. Olsem, sampela i kisim wok mani long narapela kantri, dispela i mekim na ol i stap longwe long famili bilong ol inap longpela haptaim. Ating dispela i opim rot long ol inap i gat mani na gutpela sindaun, tasol taim ol i stap longwe inap longpela haptaim, dispela inap kamapim bikpela hevi long marit bilong ol.

12-13. (a) Sampela marit Kristen i mekim wanem bilong lusim haptaim wantaim poroman marit bilong ol? (Lukim tu piksa.) (b) Poroman marit bilong yu i bikpela samting olsem wanem long yu? (Lukim blok “Poroman Bilong Yu i Bikpela Samting Long Laip Bilong Yu.”)

¹² Tingim samting em sampela marit i mekim na bai ol i gat haptaim bilong stap na mekim ol samting wantaim. Leah, em i bilong Guam, em i tok: “Mi na man bilong mi i save amamas long mekim planti samting wantaim. Mipela i save mekim olgeta samting wantaim na go long ol bung wantaim.” Roxanne, em i bilong Amerika, em i tok: “Mipela i gat planti samting long mekim na mipela i save bisi tru, olsem na mipela i luksave olsem mipela i mas makim haptaim long mekim ol samting wantaim, wankain olsem mipela i save makim taim long mekim ol bikpela samting.” (Skelim Amos 3:3.) Damien, em i bilong Frans, em i tok: “Mipela i luksave olsem em i bikpela samting long lain long laikim samting em poroman i save amamas long mekim.” (Mat. 7:12) Na Katie, em tu i stap long Amerika, em i tok: “Sampela taim mipela i save lusim fon so dispela i no pulim nabaut tingting bilong mipela.”

¹³ Bikpela samting moa, lusim haptaim wantaim long mekim ol wok lotu. Myriam, em i bilong Frans, em i tok: “Long kirap bilong de, mipela i save ritim Baibel wantaim na stori long ol tok mipela i laikim na hau mipela i ken bihainim ol dispela tok long laip bilong mipela. Mi save amamas tru long ol dispela haptaim. Na tu, mi save laikim taim mitupela i beten wantaim na mi harim man bilong mi i kamapim bilip bilong em we i soim olsem em i laikim tru Jehova.” Katie, em yumi stori pinis long em, em i tok: “Mitupela i save amamas tru long autim tok wantaim. Mitupela i save kisim nupela strong taim mipela i harim narapela narapela i kamapim bilip bilong em, na mipela i wok yet long lainim ol nupela samting long narapela narapela.”—Prov. 27:17.

PAS GUT WANTAIM LONG TAIM I GAT OL HATWOK

14-15. Wai na tupela marit i mas wok strong long winim ol hatwok i kamap insait long marit bilong ol? Stori long tok piksa.

¹⁴ Yumi ol man i no gutpela olgeta, olsem na ol marit bai bungim ol hatwok long marit bilong ol. Baibel i tokaut stret olsem ol marit “bai karim pen na hevi long bodi bilong ol.” (1 Kor. 7:28) Wanpela stadi nout i stori long dispela ves olsem “dispela i makim ol hevi na ol traim i save painim ol man na meri marit.” Taim ol hevi olsem i kamap, wai na ol marit i mas wok strong tru long pas gut wantaim na winim ol dispela hevi?

¹⁵ Tingim wanpela tok piksa. Sapos wanpela naispela bilding i gat bagarap long en, papa bilong dispela bilding bai wok strong long stretim gen. Em inap lusim bikpela mani tru na ol narapela samting bilong stretim gen dispela bilding, na planti yia inap lus long pinisim dispela wok. Bilong wanem em i mekim olsem? Bikos dispela bilding i dia tumas long em. Wankain olsem, olgeta marit i dia tumas. Na tupela marit em ol i save pas gut wantaim, ol tu inap bungim ol hatwok. Tasol wankain olsem wanpela bilding i bagarap na ol i stretim gen, tupela marit i gat hevi insait long marit bilong ol, ol i ken strongim gen marit bilong ol. Bikpela haptaim na strong inap lus long tupela i mekim ol samting bilong strongim gen marit bilong ol, tasol Jehova i amamas taim tupela i wok strong tru long strongim marit bilong ol na ol i stap yet wantaim. (Mal. 2:16) Taim ol i mekim olsem, ol i soim olsem ol i laikim na rispektim narapela narapela, na tu, ol i laikim Jehova na rispektim em olsem As bilong marit.

16. Olsem 1 Korin 13:​4-8a i kamapim, wanem samting inap helpim tupela marit em ol i bungim bikpela hatwok insait long marit bilong ol? (Lukim tu piksa na blok “Strongim Pasin Pren Bilong Yutupela.”)

¹⁶ Sapos i gat ol hatwok i kamap insait long marit bilong yu, no ken hariap long seperet. (1 Kor. 7:​10, 11) Yu ken askim yu yet olsem, ‘I gat sampela samting moa mi ken mekim bilong strongim pasin pren bilong mitupela?’ Skelim gen ol tok Baibel i mekim long pasin laikim, na tingim hau yu ken soim moa yet pasin laikim long ol dispela rot olsem i stap long 1 Korin 13:​4-8a. (Ritim.) Na no ken traim long painim eskius long lusim poroman marit bilong yu, nogat, painim rot bilong stap yet insait long lewa bilong em. Putim tingting long ol samting yu ken mekim bilong strongim gen pasin pren bilong yutupela. Beten askim Jehova long stiaim yu. Kisim helpim long ol pablikesen na ol vidio bilong yumi, na tu, long ol elda na ol Kristen i strong long bilip. Taim yu trastim Jehova, em namba 3 strongpela rop insait long “3-pela rop em ol i tanim wantaim,” marit bilong yu “i no inap bruk hariap long tupela hap.”—Ekl. 4:12.

17. Olsem wanem ol lain i tingting long marit na ol lain i marit pinis i ken stap amamas?

¹⁷ Jehova i laik bai olgeta wokman bilong em i stap amamas, dispela i makim tu ol lain i tingting long marit na ol lain i marit pinis. So sapos yu singel na yu laik marit, orait makim gut dispela poroman em yu laik spendim laip olgeta bilong yu wantaim em. Na sapos yu marit pinis, orait wok yet long strongim pasin pren namel long yu na poroman marit bilong yu. Wok gut wantaim bilong winim ol hevi i kamap insait long marit bilong yutupela long rot bilong kisim helpim i kam long Jehova. Taim yu mekim olsem, yu bai stap “amamas” wantaim poroman marit bilong yu em yu laikim em tru!—Ekl. 9:9.