Kisim Skul Long “God Bilong Mekim Isi Bel Bilong Ol Man Long Olgeta Kain Taim”

1. Wai na yumi mas mekim isi bel bilong ol narapela?

SAMPELA taim yumi laik bai ol narapela i mekim isi bel bilong yumi na strongim yumi bikos yumi olgeta i save bungim “kain kain hevi i save mekim [yumi] bel hevi.” (1 Pita 1:6) Yumi save amamas taim ol narapela i mekim isi bel bilong yumi, olsem na yumi mas mekim isi bel bilong ol taim ol i karim hevi. (Mat. 7:12) Jehova em “God bilong mekim isi bel bilong ol man long olgeta kain taim,” em i soim yumi long hau yumi ken “mekim isi bel bilong ol arapela man em ol i gat kain kain hevi.” Yumi ken bihainim eksampel bilong em long rot bilong “mekim isi bel bilong narapela narapela.” (2 Kor. 1:​3, 4; 1 Tes. 4:18) Yumi mekim olsem bikos yumi laikim ol bratasista bilong yumi, na yumi no mekim olsem bikos em wanpela wok yumi mas mekim, nogat. Long dispela atikol, yumi bai stori long (1) mining bilong dispela tok mekim isi bel olsem Baibel i kamapim, (2) hau yumi ken mekim isi bel bilong ol narapela, na (3) samting yumi ken mekim taim yumi nidim ol narapela long mekim isi bel bilong yumi.

MEKIM ISI BEL OLSEM BAIBEL I KAMAPIM

2. Long Baibel, dispela tok “mekim isi bel” inap makim wanem ol samting?

² Long Baibel, dispela tok Grik em ol i tanim olsem “mekim isi bel,” em inap kamapim narapela narapela mining taim yumi skelim ol tok i stap paslain na bihain long en. Em inap makim “strongim,” o “kirapim wanpela” long mekim samting. (Rom 12:8) Mining tru bilong en i makim olsem “wanpela i singautim narapela i kam sanap long sait bilong em bilong helpim em.” So yumi ken piksaim long tingting wanpela pren i hariap i go bilong givim helpim long pren bilong em husat i karim pen na hevi, na em i givim helpim na sapot em i nidim. Maski wanem helpim em i givim long pren bilong em, em i laik bai pren bilong em husat i karim hevi i ken pilim bel isi na kisim bek nupela strong.

3. Olsem wanem Barnabas i stap gutpela eksampel long mekim isi bel bilong ol narapela? (Lukim tu piksa.)

³ Tingim wanpela stori bilong Baibel. Wanpela Kristen nem bilong em Josep, oltaim em i save mekim isi bel bilong ol narapela na strongim ol, olsem na ol aposel i givim nem Barnabas long em, we i makim “Pikinini Bilong Mekim Isi Bel.” (Apo. 4:36) Em i inapim gut mining bilong dispela nem, olsem na Baibel i no kolim gen nem tru bilong em. Planti taim em i save inapim mining bilong nem bilong em long rot bilong helpim ol wanbilip bilong em taim ol i nidim helpim. Olsem, bihain long Sol i kamap wanpela Kristen, em i go long Jerusalem bilong bungim ol disaipel. Tasol ol i pret long em bikos em i gat nem olsem man bilong mekim nogut long ol Kristen. Maski i olsem, Barnabas i trastim Sol na em i bringim em i go bilong bungim ol aposel.—Apo. 9:​26-28.

HAU YUMI KEN MEKIM ISI BEL BILONG OL NARAPELA

4. Wanem wanpela gutpela rot bilong mekim isi bel bilong ol narapela? (Rom 1:​11, 12)

⁴ Visitim ol sapos yu inap mekim olsem. Jehova i save yusim ol wokman bilong em long mekim isi bel bilong ol narapela. Olsem, taim profet Elaija i bel hevi, Jehova i yusim wanpela ensel long strongim em. (1 Kin. 19:​4-7) Aposel Pol tu i laik tru long visitim ol wanbilip Kristen na bai em i ken strongim ol. (Ritim Rom 1:​11, 12.) Taim yu go visitim wanpela bilong mekim isi bel bilong em, lusim sampela haptaim long toktok gut wantaim em. (1 Kor. 16:7) Sapos yu no inap long i go visitim wanpela i nidim helpim, orait yu ken ringim em, salim wanpela pas, wanpela kat, o salim teks mesis long em, dispela tu i gat strong long helpim em. Olsem wanem? Yu bai larim Jehova i yusim yu long mekim isi bel bilong ol narapela?

5. Yumi ken redi long bungim wanem ol hatwok?

⁵ Long dispela haptaim bilong las de ol hevi bai i wok long i go nogut moa, olsem na yumi inap bungim ol hatwok taim yumi laik i go visitim ol bratasista bilong yumi na mekim isi bel bilong ol. Taim Pol i stap kalabus long Rom, Onesiforus, em i bilong Efesus, em i wok long painim Pol maski dispela inap mekim na ol man i kalabusim em o kilim em i dai. (2 Tim. 1:​16-18) Ol Witnes long Rasia tu i bihainim wankain pasin taim ol man i mekim nogut long ol bratasista bilong ol bikos long bilip bilong ol. Taim ol man i sanapim ol Witnes long kot, ol bratasista i save stap insait long haus kot bilong sapotim ol, maski ol man inap arestim ol tu. Yu ken redim yu yet long bihainim eksampel bilong ol taim yu mekim stadi long hau ol wokman bilong God long bipo na long nau i sapotim narapela narapela na ol i amamas long mekim olsem maski ol man i mekim nogut long ol.

6. Olsem wanem yumi ken bihainim pasin bilong Jehova taim yumi mekim isi bel bilong ol narapela? (Lukim tu piksa.)

⁶ Putim gut yau long ol. Taim profet Elaija i pilim olsem klostu nau em bai dai, em i kamapim bel hevi bilong em long Jehova. God i putim gut yau taim Elaija i kamapim bel hevi bilong em, maski Em i save pinis long ol samting i mekim Elaija i wari na tingting planti. Na tu, Jehova i no les kwik na em i putim gut yau taim Elaija i kolim gen ol wankain tok! (1 Kin. 19:​9, 10, 14) Olsem tasol, Jehova i larim profet Habakuk i kamapim ol wari bilong em na ol samting em i tingting planti long en maski i luk olsem em i askim God long risen na Em i larim pasin nogut i stap. (Hab. 1:​2, 3) Long nau, Jehova i save putim gut yau long ol beten bilong yumi maski em i save pinis long wanem ol samting yumi nidim. Yumi ken bihainim pasin bilong Jehova long rot bilong putim gut yau na soim rispek taim ol bratasista i toktok long yumi. Yumi mas “putim yau kwik long harim tok” taim ol i toktok, na abrusim pasin bilong katim tok o kros hariap, maski yumi pilim olsem ol i no tingting gut na toktok o ol i kolim gen ol wankain tok planti taim.—Jems 1:19; Ekl. 7:9.

7. Olsem wanem yumi ken skelim gut wanem helpim man i nidim taim em i karim hevi?

⁷ Skelim gut wanem helpim man i nidim. Yumi no inap lukim bel na tingting bilong ol man olsem Jehova i save mekim, so yumi inap luksave long wanem helpim man i nidim taim yumi putim gut yau long em. No ken ting olsem yu save long wanem helpim man i nidim bikos yu bai nidim dispela kain helpim sapos kain hevi i painim yu. Yumi olgeta i no wankain. So lusim haptaim long skelim gut wanem helpim em i nidim, putim gut yau long em, na givim ol gutpela askim bilong save long ol samting em i pilim long bel.—Prov. 20:5.

8. Olsem wanem Jisas i mekim isi bel bilong Marta na Maria bihain long Lasarus i dai? (Lukim tu ol piksa.)

⁸ Tingim hau Jisas i mekim isi bel bilong Marta na Maria bihain long brata bilong ol Lasarus i dai. Tupela meri wantaim i bel hevi bikos brata bilong ol i dai, tasol Jisas i mekim isi bel bilong ol long narapela narapela rot. Bihain long Marta i toktok wantaim em, Jisas i kamapim ol bikpela tok i tru i stori long kirap bek na em i strongim gen bilip bilong em long dispela presen God i givim. Tasol taim Maria i krai na i kam long em, Jisas i no stori long kirap bek, nogat. Em i krai wantaim Maria na em i askim em long ol i putim bodi bilong Lasarus long wanem hap. (Jon 11:​20-35) Yumi kisim wanem skul long dispela? Taim yumi laik mekim isi bel bilong ol lain i karim pen na hevi, yumi mas skelim gut wanem helpim stret ol i nidim na yumi no laik ting olsem helpim yumi givim long wanpela, dispela bai wok gut long olgeta.

9. Olsem wanem yumi ken yusim Baibel bilong mekim isi bel bilong ol narapela? (Rom 15:​4, 5)

⁹ Yusim gut Baibel. Taim yu “mekim isi bel bilong [wanpela] long rot bilong Rait Holi,” yu helpim em long strongim bilip bilong em long ol samting yumi bilip na wet long en. (Ritim Rom 15:​4, 5.) Na taim em i strongim bilip bilong em long ol samting bai kamap bihain, dispela i mekim isi bel bilong em na strongim em moa yet. (Ais. 40:31) Hau yu ken painim wanpela skripsa long Baibel bilong strongim wanpela? Sampela i gat lista bilong ol skripsa em ol i save skelim gen taim ol i nidim helpim, olsem ol skripsa i stap aninit long het tok “Mekim Gut Bel” long buk Ol Skripsa Bilong Kristen Laip. Askim Jehova long helpim yu long yusim gut Baibel long strongim ol narapela. Holi spirit bilong God i ken helpim yu long tingim gen ol skripsa em yu ken yusim bilong helpim ol.—Jon 14:26.

10. Wai na yumi mas toktok long gutpela pasin taim yumi laik strongim wanpela?

¹⁰ Toktok long gutpela pasin. Dispela tok Grik em ol i tanim olsem “mekim isi bel,” em inap makim tu olsem “kirapim wanpela” long mekim samting. Sampela taim, ating yu mas kirapim wanpela em yu laik mekim isi bel bilong em long stretim tingting bilong em. Sapos i gat wok long yu mekim olsem, orait yu mas tingting gut paslain long yu toktok so ol tok bilong yu i helpim em na i no bagarapim bel bilong em. (Prov. 12:18) Jehova i stap gutpela eksampel long dispela samting taim em i toktok long Elaija. Elaija i kisim tingting kranki olsem wok bilong em i no kamapim gutpela samting na pasin apostet i go bikpela long Israel. Long gutpela pasin, Jehova i helpim Elaija long stretim tingting bilong em na Em i no tokim em stret long ol popaia bilong em. (1 Kin. 19:​15-18) Yu tu i ken bihainim gutpela pasin na skelim gut ol tok yu laik mekim taim yu laik strongim ol narapela. Taim yu laik givim tok o bekim tok long ol miting Kristen, oltaim toktok long gutpela pasin na mekim ol tok i strongim ol bratasista bilong yu.

11. Ol lain i karim hevi i nidim wanem helpim? (1 Jon 3:18)

¹¹ Givim helpim ol i nidim. Yumi ken mekim ol gutpela tok bilong mekim isi bel bilong ol lain em ol i karim hevi, na yumi ken mekim sampela samting moa bilong helpim ol. (Ritim 1 Jon 3:18.) Barnabas i stap gutpela eksampel taim em i salim hap graun bilong em na givim dispela mani bilong helpim ol nupela baptais bratasista em ol i nidim helpim. (Apo. 4:​36, 37) Planti wanbilip Kristen long nau i bihainim gutpela eksampel bilong em long rot bilong helpim ol narapela em ol i nidim helpim. Gabriela, em i bilong Polan, em i bel hevi tru taim tait wara i bagarapim haus bilong em. Em i tok: “Mi pret na wari nogut tru na papamama bilong mi em ol i save stap wantaim mi, ol tu i pilim olsem. Mi tingting planti long hau mi bai karim dispela hevi. Tasol ol bratasista long ol kongrigesen i stap klostu i kam na insait long wanpela de tasol ol i mekim planti wok bilong helpim mipela. Dispela ekspiriens i strongim bilip bilong mi olsem Jehova i save stiaim lain bilong em long mekim isi bel bilong ol lain i karim pen na hevi.”

12. Olsem wanem yu ken helpim ol wanbilip Kristen taim yu sanap strong na karim ol hevi?

¹² Sanap strong na karim ol hevi i painim yu. Pol i tokim ol Kristen long Tesalonaika olsem em i kisim bel isi na nupela strong taim em i harim stori olsem ol i sanap strong long bilip na karim ol hevi. Em i save olsem ol wok em i mekim bilong helpim ol i no lus nating. (1 Tes. 3:​5-8) Pol i save olsem taim em i stap gut yet long Jehova na karim ol hevi i painim em, em inap strongim ol bratasista bilong em long stap gut yet long God, na tu, em inap strongim ol Kristen em i no bin bungim yet. (Kol. 2:​1, 2) Wankain olsem, taim ol wanbilip Kristen i lukim hau Jehova i wok long helpim yumi long sanap strong na karim ol hevi i painim yumi, dispela i save strongim ol tru.

13. Yumi mas wok yet long mekim wanem taim yumi laik mekim isi bel bilong ol narapela?

¹³ No ken les kwik. Ol bratasista em ol i bel hevi na yumi strongim ol na mekim isi bel bilong ol, ating ol i no inap kamap strong hariap. Tasol Baibel i tok yumi mas “wok yet long mekim isi bel bilong narapela narapela.” Dispela tok “wok yet long mekim isi bel” i makim olsem yumi mas wok yet long mekim dispela pasin na yumi no ken stop. (1 Tes. 5:11) No ken les kwik taim yu wok yet long mekim isi bel bilong ol lain em ol i nidim helpim bilong yu. (1 Tes. 5:14) Em tru olsem sampela taim yumi wan wan i nidim ol narapela long mekim isi bel bilong yumi. Long kain taim olsem, yumi ken mekim wanem?

TAIM YU LAIK OL NARAPELA I MEKIM ISI BEL BILONG YU

14-15. Yumi mas mekim wanem taim yumi tingting planti o bel hevi?

¹⁴ Beten long Jehova. Beten askim Jehova long mekim isi bel bilong yu taim yu tingting planti o bel hevi. (Sng. 94:19) Kolim stret ol samting taim yu beten na kamapim bel bilong yu long em. (Sng. 62:8) Em tru olsem Jehova i save pinis long ol samting yu pilim paslain long yu beten long em. Tasol taim yu beten na tokim em long tingting tru i stap long bel bilong yu, yu soim olsem yu bilip long em. Na taim yu bilip na beten long Jehova, em bai bekim beten bilong yu long ol rot em yet i makim. (Mak 11:24) Filipai 4:​6, 7 i tok: “Kamapim ol askim bilong yupela long God, . . . na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela.”

¹⁵ Askim ol narapela long helpim yu. Autim ol wari bilong yu long wanpela pren i strong long bilip, o wanpela elda em yu trastim. Ol bratasista bilong yu inap mekim isi bel bilong yu, tasol ol i no inap save long ol samting yu pilim long bel o wanem helpim stret yu nidim sapos yu no tokim ol. (Prov. 14:10) Yu ken askim ol long putim gut yau na pilim tingting bilong yu o serim wanpela skripsa o wanpela atikol i bin mekim isi bel bilong ol.

16. Wanem samting inap kamap taim ol narapela i laik strongim yu, tasol yu mas tingim wanem samting?

¹⁶ No ken les kwik na fogivim ol narapela. Ol bratasista bilong yu inap mekim ol popaia taim ol i laik strongim yu. Olsem, ol inap mekim wanpela tok o pasin we i mekim na yu pilim nogut moa na yu no amamas. Sapos dispela samting i kamap, no ken les kwik long ol. (1 Kor. 13:​4, 7) Na tingim tok i stap long Jems 3:​2, em i tok: “Sapos man i no popaia long tok em i mekim, orait dispela man i gutpela olgeta.” Tingim risen na ol bratasista bilong yu i laik helpim yu. Na tingim olsem “bel bilong man i redi long mekim olgeta samting, tasol bodi i no gat strong.”—Mat. 26:41.

17. Yumi mas tingting strong long mekim wanem?

¹⁷ Yumi olgeta i nidim ol narapela long mekim isi bel bilong yumi na strongim yumi, na yumi bai nidim dispela helpim moa yet taim ol hevi bilong dispela haptaim bilong las de i go nogut moa na ol birua bilong God i mekim nogut tru long yumi. Yumi mas tingting strong long givim bel olgeta long mekim isi bel bilong narapela narapela.