Trastim Jehova Em i Bikpela King Bilong Heven na Graun

1. Jop i bungim wanem ol hevi?

JOP em wanpela bilipman long bipo, em i bin lusim olgeta samting em i gat, olsem ol pikinini bilong em, gutpela helt bilong em, na mani kago bilong em. Na tu, gutnem bilong em i bin bagarap. Ol pren giaman bilong em i mekim ol tok we i bagarapim tru bel bilong em. Na gutpela meri bilong em i bel hevi tru na i tokim em olsem: “Mobeta yu tok nogut long God na yu dai.” (Jop 2:9; 15:​4, 5; 19:​1-3) Olgeta dispela hevi i bin painim Jop inap mekim na em i lusim pasin bilong em long trastim God tru, na em inap i gat tupela tingting long Jehova olsem em i no inap lukautim ol manmeri i laikim em na i mekim wok bilong Em.

2-3. (a) Yumi inap tingting planti long wanem samting? (b) Yumi bai kisim wanem skul long stori i stap long Buk Jop?

² Sampela taim, yumi tu inap bungim ol hevi na dispela inap traim tru pasin bilong yumi long trastim Jehova. Yumi stap long “taim nogut. . . . na dispela bai givim hatwok long ol man.” (2 Tim. 3:1) So taim yumi bungim planti hevi, yumi inap pilim olsem dispela i daunim yumi tru na i hatwok long yumi sanap strong na karim ol dispela hevi. Kain samting olsem i bin mekim na sampela gutpela wokman bilong Jehova i bin tingting planti olsem tru tru Jehova i tingim ol, o nogat.

³ Sapos yu yet i bin gat kain tingting olsem, orait no ken bel hevi. Jop i bin lain olsem Jehova i save kisim bek ol man i stap gut long Em. So yumi tu i ken gat dispela pasin bilong trastim tru Papa bilong yumi long heven. Bilong helpim yumi long trastim tru Jehova, yumi ken skelim stori i stap long Buk Jop na lukim wanem tupela lesen yumi inap lainim long stori bilong dispela buk: Namba 1, Jehova wanpela tasol em i Bikpela King bilong heven na graun. Na namba 2, God bilong yumi em God i Gat Olgeta Strong na em i ken kontrolim ol samting i kamap long graun na bai laik bilong em i ken kamap, na bai em i ken lukautim gut lain bilong em na bagarap i no ken painim ol na ol i ken pas gut yet wantaim em.

SATAN I KAM BUNG WANTAIM OL

4. Husat i kam long dispela bung long heven em Buk Jop i stori long en?

⁴ Wanpela taim “ol pikinini bilong God tru” i kam bung long ai bilong Jehova long heven. Baibel i tok: “Satan tu i kam bung wantaim ol.” (Jop 1:6) Dispela em i fes taim Baibel i kolim taitol bilong dispela nambawan birua bilong Jehova, em “Satan,” o “Birua.” Long dispela taim, Satan i no stap moa olsem wanpela gutpela pikinini bilong God. Em i kamap birua bilong Jehova na em i birua tu long famili bilong Jehova i stap long heven na long graun. Jehova i kamapim klia olsem Satan em i no hap moa bilong famili bilong em long heven taim Em i kolim dispela tok i stap long Stat 3:15. So Satan i no insait long lain bilong “meri,” em famili bilong Jehova em ol gutpela ensel long heven husat bai kamapim dispela “pikinini.”

5. Yumi kisim wanem skul taim yumi skelim tok i bin kamap long dispela bung long heven?

⁵ Jehova i laik yumi save long ol tok i kamap long dispela bung long heven, olsem na em i kirapim ol wokman bilong em long raitim dispela stori long Baibel. Ol tok Satan i mekim i kamapim klia olsem em i wanpela man nogut tru bilong bagarapim gutnem bilong ol narapela. (Jop 1:9; skelim Revelesen 12:10.) Jehova i larim dispela stori i stap long Baibel na dispela i ken mekim gut bel bilong yumi olsem Jehova em God i Gat Olgeta Strong na oltaim em i save mekim stretpela pasin. Na dispela stori i helpim yumi tu long save olsem God i Gat Olgeta Strong i ken makim wanem tok o pasin man i ken mekim o i no ken mekim.

JEHOVA I PUTIM MAK PINIS

6. Hau Jehova i soim olsem em i bosim olgeta samting i kamap long miting long heven? (Jop 1:​7, 8)

⁶ Ritim Jop 1:​7, 8. Jehova i bosim olgeta samting i kamap long dispela miting. Em i askim Satan olsem: “Yu lukim tu wokman bilong mi Jop o nogat?” Yes, Jehova i save olsem Satan i laik bagarapim o mekim nogut long Jop. Nau yumi ken skelim olsem wanem Jehova i yusim bikpela strong bilong em long helpim Jop.

7. Olsem Jop 1:​10, 11 i kamapim, Satan i tok wanem long ol man i mekim wok bilong Jehova?

⁷ Ritim Jop 1:​10, 11. Jehova em i Bikpela King bilong heven na graun na God i Gat Olgeta Strong, na em i save yusim namba na strong bilong em long ol rot we em i ting i stret long mekim olsem. (Jer. 32:17; Dan. 4:35) Maski i olsem, Satan i sutim tok olsem Jehova i yusim bikpela strong bilong em long pasin i no stret. I olsem Satan i tok God i save braibim ol manmeri, kain olsem Jop, long mekim wok bilong Em. Na tu, i olsem Satan i tok ol manmeri i mekim wok bilong Jehova bikos long ol samting ol i kisim long Em. Jehova i mekim wanem bilong bekim dispela tok?

8-9. Jehova i putim wanem ol mak i stret long Satan, na bilong wanem? (Jop 1:12) (Lukim tu piksa.)

⁸ Ritim Jop 1:12. Jehova i larim Satan i traim Jop olsem em i bin tok, tasol em i putim mak na Satan i no ken abrusim dispela mak. God i tok olsem: “Yu no ken mekim nogut long dispela man [Jop].” Long ai bilong olgeta lain i bung i stap, Jehova i putim mak long samting nogut em Satan i laik mekim long Jop. Satan i no gat strong long mekim nogut long Jop i go abrusim dispela mak, so ol samting em i mekim long Jop i stap insait long dispela mak. Na em wankain tu long nau. Jehova i yusim namba na strong bilong em long lukautim Jop, na tu, long lukautim gutnem bilong Em yet.

⁹ Ol traim Satan i kamapim long fes taim i no kamapim samting em i laikim. Jop i stap gut yet long Papa bilong em long heven. (Jop 1:22) Tasol dispela Birua i no pinisim yet wok bilong em long traim Jop.

10. Wai na Jehova i larim Satan i kamapim narapela traim gen long Jop? (Jop 2:​2-6)

¹⁰ Ritim Jop 2:​2-6. Satan i kamapim narapela traim bilong mekim nogut moa yet long Jop. Satan i tok olsem Jop bai tok nogut long God bilong em i ken lukautim laip bilong em yet. Bilong lukim sapos dispela samting bai kamap o nogat, Jehova i larim Satan long mekim nogut long dispela gutpela man. Tasol wanpela taim gen, Jehova i putim mak, na em i tok: “Yu no ken kilim em i dai!” Satan i no gat strong long kilim Jop i dai, so em i bihainim dispela mak em Jehova i putim. Long dispela traim Satan i putim long Jop, yumi ken lukim olsem God Antap Tru i kontrolim ol hevi i painim Jop bikos Em i save olsem Satan bai no inap abrusim mak Em i putim pinis.

JEHOVA I PINISIM OL HEVI BILONG JOP

11. Taim Jehova i pinisim ol hevi bilong Jop, Em i givim wanem gutpela pe long Jop? (Jop 42:​10-13)

¹¹ Ritim Jop 42:​10-13. I klia tru olsem Jop i no pundaun na lusim bilip, olsem na Jehova i stopim Satan long mekim nogut long em. Jehova i mekim samting bilong pasim Satan long mekim nogut moa yet long dispela gutpela wokman bilong em. Long dispela taim gen, Satan i no gat strong long pasim ol disisen bilong Jehova. Jehova i no larim Satan i mekim nogut moa long dispela gutpela wokman bilong em Jop.

12. Stori long wanpela eksampel long pasin bilong trastim strong bilong Jehova long kisim bek yumi.

¹² Long taim bilong las de, planti wokman bilong Jehova i lukim strong bilong Jehova long kisim bek ol. Olsem, long 1945 i gat 230 Witnes Bilong Jehova i bin stap long kalabus nogut bilong Jemani em ol i insait long Natsi mats bilong dai, tasol i no gat wanpela bilong ol i lusim laip. Na ol i bin raitim dispela wanpela tok long samting nogut i bin painim ol olsem: “Inap longpela taim tru ol traim i painim mipela na nau ol dispela traim i pinis, na mipela em dispela lain i abrusim bagarap, i olsem God i kisim mipela long paia, na i no gat smel bilong paia i stap long mipela. Nogat tru. . . . Jehova i givim bikpela strong long mipela.” Ol i tok moa olsem: “Mipela i gat laik long wanpela samting tasol . . . [bihain long] mipela i kam ausait long hul bilong laion, mipela i laik bai Jehova i larim mipela i mekim laik bilong em . . . inap oltaim oltaim. Dispela em gutpela pe tru Jehova inap givim long mipela.”—Skelim Daniel 3:27; 6:22.

13. Yu ken bilip tru long wanem samting taim ol hevi i painim yu? (Lukim tu ol piksa.)

¹³ Sampela taim yumi inap bungim ol hevi we inap mekim yumi pilim olsem ol i tromoi yumi i go insait long hul bilong laion. (1 Pita 5:​8-10) Sampela taim, yumi inap pilim olsem strong bilong yumi i pinis olgeta na yumi inap tingting planti olsem ol hevi bilong yumi bai pinis o nogat. Long kain taim olsem, yumi ken tingim ekspiriens bilong Jop na dispela i ken helpim yumi. Yumi ken bilip tru olsem Jehova i gat strong long pinisim ol pen na hevi yumi karim, maski em i mekim olsem long nau o long nupela taim em bai kamapim bihain. Em i no inap larim dispela haptaim nogut bilong nau i stap yet i go na abrusim taim em i makim bilong pinisim, nogat!

JEHOVA I LAIKIM TRU OL GUTPELA WOKMAN BILONG EM

14-15. Jehova i pilim olsem wanem long pasin bilong givim gutpela pe long ol wokman bilong em i stap gut long em? (Jop 14:15) (Lukim tu piksa.)

¹⁴ Ritim Jop 14:15. Papa bilong yumi long heven i save pas gut wantaim ol manmeri i save stap gut long em. Em i laikim ol tru na sapos ol i dai, em bai kirapim bek ol na givim laip long ol. Em bai pinisim pen em dai i save kamapim.—Ais. 65:17.

¹⁵ Maski Jop i bin stap yet long graun em Satan i bosim, long rot bilong Baibel yumi kisim save olsem Jehova i givim bek gutpela helt bilong Jop na givim em planti blesing moa winim ol samting em i gat paslain long Satan i bin traim em. Ol dispela blesing Jop i kisim i olsem piksa tasol na i makim planti blesing Jehova bai givim em long bihain. Jehova i soim olsem em i laik bai ol gutpela wokman bilong em i stap amamas tru na enjoim laip. Jehova bai givim rot long olgeta wokman bilong em husat i stap gut long em long kisim laip i gutpela olgeta long Paradais long graun. (Rev. 21:​3, 4) Em i King bilong heven na graun, na em i gat laik long mekim olsem. Tru tumas, dispela tingting i ken mekim gut bel bilong yumi taim yumi sanap strong na karim ol hevi!

16. I gat wanem narapela risen na yumi ken trastim Jehova olsem Bikpela King bilong heven na graun?

¹⁶ Jehova i bin surikim sampela yia moa long laip bilong Jop na em i stap laip longpela taim, tasol bihain em i dai. Maski i olsem, Jehova em Bikpela King bilong heven na graun na em God i Gat Olgeta Strong na em i gat strong long pinisim dai. (Lo 32:39) So i no gat wanpela man inap stopim em long kirapim bek ol manmeri em i laikim tru. Na em bai mekim olsem long taim em yet i makim.—Rom 8:​38, 39.

TRASTIM TRU JEHOVA

17. Wanem samting i soim olsem Satan i no gat strong long pinisim lain bilong Jehova?

¹⁷ Stori bilong Jop long Baibel i kamapim klia planti risen na yumi ken trastim tru Jehova. Yumi amamas long save olsem maski Satan i bin wok strong tru long pinisim lain bilong Jehova, ol hatwok bilong em i lus nating! Long nau, i gat winim 9 milion gutpela wokman bilong Jehova, na dispela i kamapim klia olsem Jehova em i Bikpela King bilong heven na graun na em i gat bikpela strong. Planti taim yumi bin lukim ol man i birua long lain bilong Jehova na wok strong long daunim ol, tasol ol hatwok bilong ol i lus nating. (Ais. 54:17) Ol kantri i gat bikpela strong na ol lain lotu i bin wok strong tru long daunim lain bilong Jehova—long ai bilong ol i olsem yumi no gat man bilong helpim yumi. Tasol i no gat wanpela samting inap pasim yumi long autim tok i tru bilong Jehova na kamapim klia olsem Satan em i man bilong giaman na em i wanpela kilman. Dai tu i no gat strong bilong pasim yumi, long wanem, Jehova bai kirapim bek na givim bek laip long ol gutpela wokman bilong em husat i dai pinis.—Hos. 13:14.

18. Wai na yumi no ken pret long ol samting bai painim yumi long bihain?

¹⁸ Taim yumi tingim tingim long bel ol samting tru tru i bin painim Jop, dispela bai strongim bilip bilong yumi na yumi no inap pret long ol samting bai painim yumi long bihain. Long taim bilong traipela hevi tru, bai i luk olsem lain bilong God i no gat strong na bai i luk olsem Satan na lain bilong em i gat bikpela strong tru. Tasol wankain olsem long taim bilong Jop, Jehova bai kontrolim olgeta samting na em i no inap larim Satan i bagarapim na pinisim tru lain bilong God. Klostu nau Jehova bai pinisim olgeta pen na hevi em Satan i kamapim long yumi ol manmeri long graun. Satan na ol dimon bilong em bai kalabus inap 1,000 yia. (Luk 8:31; Rev. 20:​1-3) Bihain Satan na olgeta lain i stap long sait bilong em bai bagarap na pinis olgeta. (Rev. 20:10) Olsem Jehova i tokaut pinis, Pikinini na lain bilong em bai krungutim het bilong Satan. Na ol bai pinisim em olgeta na em bai i no inap stap moa.—Stt. 3:15; Rom 16:20.

19. Wanem gutpela samting bai painim ol manmeri em ol i trastim tru Jehova? (Lukim tu piksa.)

¹⁹ Ol manmeri em ol i lotu tru long Jehova long nau, ol bai kamap gutpela olgeta na ol bai stap amamas tru long nupela taim God bai kamapim hia long graun. Laip bai gutpela tru winim samting yumi ken piksaim long tingting. Jehova i tok promis olsem: “Harim! Mi mekim olgeta samting i kamap nupela.” (Rev. 21:5) Wanem samting i insait long dispela tok promis bilong Jehova? Em fes taim insait long planti tausen yia we ol manmeri bai stap fri long pasin korapsen, pasin bilong heitim narapela, na ol pasin nogut em Satan na ol spirit nogut bilong em i save kirapim ol man long mekim. Olgeta manmeri bai stap bel isi na amamas tru! Ol bai i no inap pilim bel hevi moa em yumi save pilim long nau na dispela i save mekim na i hatwok long slip gut long nait. Ol manmeri em ol i abrusim bagarap long Armagedon, ol bai lukim planti mirakel Jehova i wokim bilong oraitim sik bilong olgeta manmeri. Na tu, Jehova bai stat long kirapim bek ol famili na ol pren bilong yumi em ol i dai pinis. Long dispela taim, laip bai gutpela tru wankain olsem Papa bilong yumi long heven i bin i gat laik long en long pastaim tru!

20. Yu mas tingting strong long mekim wanem?

²⁰ Taim yumi sanap strong na karim ol hevi long dispela taim bilong las de, yumi mas tingting strong long trastim Jehova na sapotim wok bos bilong em. Yumi ken soim olsem yumi laikim tru Papa bilong yumi long heven na pruvim olsem ol tok Satan i mekim em ol tok giaman. Yes, yumi ken bilip tru na wetim gutpela samting bai kamap bihain aninit long wok bos bilong Jehova, em Bikpela King bilong heven na graun husat i gat laik tru long givim gutpela pe long ol wokman bilong em i stap gut long em!