Baibel i Tok Wanem Long Pasin Bilong Stap Fri Long Makim Ol Samting Yu Laik Mekim? Yu Ting God i Kontrolim Ol Samting i Kamap Long Laip Bilong Yu?
Bekim Bilong Baibel
God i larim yumi yet i makim ol samting yumi laik mekim, na em i no kontrolim ol samting i kamap long laip bilong yumi na em i no makim pinis ol samting bai painim yumi long bihain. Skelim tok Baibel i mekim long dispela.
God i wokim ol man i kamap olsem em yet. (Stat 1:26) Yumi ol man i no olsem ol animal em ol i save bihainim ol lo i stap pinis long skin bilong ol. Yumi olsem Krieta bilong yumi, olsem na yumi inap kamapim ol pasin olsem pasin laikim na stretpela pasin. Na olsem Krieta bilong yumi, yumi stap fri long makim ol samting yumi laik mekim.
Yumi yet inap makim wanem ol samting bai painim yumi long bihain. Baibel i kirapim yumi long “makim rot bilong laip . . . na harim tok bilong [God],”dispela i makim olsem yumi yet i mas mekim ol disisen long bihainim tok bilong em. (Lo 30:19, 20) Dispela tok bai i no gat as bilong en na God i mekim hatpela pasin sapos yumi no gat presen long makim wanem samting yumi laik mekim. God i no subim yumi long mekim ol samting em i tokim yumi long en, long gutpela pasin em i tok olsem: “Sapos yupela i putim gut yau long ol lo bilong mi, orait bel isi bilong yupela bai kamap olsem wara i save ron.”—Aisaia 48:18.
Ol gutpela samting o ol hevi i kamap long laip bilong yumi i no makim olsem God i makim pinis wanem samting bai painim yumi. Sapos yumi laik bai ol wok bilong yumi i kamap gut, orait yumi mas wok strong. Baibel i tok: “Wanem wanem samting em han bilong yu inap mekim, mekim wantaim olgeta strong bilong yu.”(Eklisiastis 9:10) Na em i tok tu olsem: “Ol plen bilong man i save wok strong bai kamapim gutpela samting.”—Provep 21:5.
Pasin bilong i stap fri em naispela presen i kam long God, dispela i opim rot long yumi inap laikim em wantaim “bel olgeta” bilong yumi bikos yumi laik mekim olsem.—Matyu 22:37.
Yu ting God i kontrolim olgeta samting?
Baibel i skulim yumi olsem God i Gat Olgeta Strong, strong bilong em i no gat mak bilong en na i no gat man inap daunim na pinisim strong bilong em. (Jop 37:23; Aisaia 40:26) Maski i olsem, em i no yusim strong bilong em long kontrolim olgeta samting. Olsem, Baibel i tok God i “bosim [em] yet” na em i no pait long Babilon bilong bipo, em birua bilong ol manmeri bilong em. (Aisaia 42:14) Wankain long nau, em i makim olsem em bai larim ol man husat i no yusim gut pasin bilong i stap fri long mekim nogut long ol narapela. Tasol God i makim pinis taim bilong pinisim ol kain man olsem.—Buk Song 37:10, 11.