ASKIM BILONG OL RIDA

Aposel Pol i stori long wanem tupela kontrak long Galesia 4:24?

Bihain long aposel Pol i stori long Abraham, Sara, na Hagar, em i tok: “Dispela stori i tok piksa long wanpela samting. Tupela meri i makim tupela kontrak.” (Gal. 4:​22-24) Bipo yumi bin tok olsem dispela tupela kontrak i makim kontrak bilong Lo na nupela kontrak. Tasol bihain long mipela i skelim gen, mipela i bilip olsem i mas i gat senis long dispela save yumi holim pinis. I luk olsem Pol i no tok long nupela kontrak, nogat, em i tok long kontrak bilong Abraham. Skelim sampela risen na yumi tok olsem.a

Pol i tok dispela wokmeri Hagar i olsem piksa bilong Maunten Sainai. (Gal. 4:25) Hagar i makim kontrak bilong Lo em Jehova i givim long lain Israel long Maunten Sainai long 1513 B.C.E. (Kis. 19:​5, 6) I no gat wanpela man inap bihainim stret tru dispela Lo, so em i kirapim ol Juda long tingim olsem ol i wokboi bilong sin. Dispela kontrak bai helpim lain Israel long luksave long Mesaia, em dispela wanpela man tasol husat inap bihainim stret tru dispela Lo. Taim Mesaia i givim laip bilong em i gutpela olgeta olsem sakrifais, em i opim rot long ol man i no gutpela olgeta long kamap fri long sin na dai. (Gal. 3:​19, 24, 25) Taim Jisas i inapim samting God i tingting pinis long mekim, bai i no gat wok moa long Lo.—Rom 10:4.

Pol i tok Sara i no olsem Hagar; Sara em i “frimeri” na em i kamapim pikinini “long rot bilong wanpela promis.” (Gal. 4:23) Dispela promis em dispela kontrak bilong Abraham. (Gal. 3:29; 4:​28, 30) Long Stat 22:​18, Jehova i tok long dispela kontrak olsem: “Long rot bilong pikinini bilong yu [Abraham] olgeta lain bilong graun bai kisim blesing, long wanem, yu bin bihainim tok bilong mi.”

Dispela kontrak Jehova i mekim wantaim Abraham i givim sampela save moa long yumi long promis Em i bin mekim long gaden Iden. (Stt. 3:15) Em i kamapim klia olsem dispela “lain pikinini” em God i tok profet long en bai wanpela tumbuna pikinini bilong Abraham. Pol i tok dispela “pikinini” i makim Jisas Krais. Tasol lain “i bilong Krais” em lain 144,000 em ol bai mekim wok king wantaim Jisas long Kingdom, ol tu i insait long dispela lain pikinini. (Gal. 3:​16, 29; Rev. 14:​1-3) Taim God i truim tok promis em i mekim long Abraham, dispela bai bringim planti blesing long olgeta manmeri bilong graun em ol i bilip na bihainim tok bilong Jisas.

Wai na Pol i mekim “tok piksa” long dispela samting? Em i laik kamapim klia olsem sapos ol Juda long taim bilong em i strong yet long bihainim Lo, orait ol i stap kalabus yet long sin olsem Hagar. Tasol sapos ol i bilip long dispela namba wan “pikinini” bilong Abraham, em Jisas Krais, ol bai stap fri olsem Sara. Ol bai kamap fri tru long sin na dai. (Jon 8:​32-34) Sapos ol i no bilip long Jisas, ol i no inap kisim helpim long nambawan wok bilong kontrak bilong Lo, em long bringim ol i go long Krais.

Planti Kristen long Galesia em Pol i bin raitim pas i go long ol, ol i no bilong lain Juda na ol i no bin stap aninit long Lo. Sampela man em ol i strong long bihainim lotu Juda, ol i strong olsem ol Kristen em ol i bilong ol arapela lain, ol i mas bihainim Lo na dispela i makim tu lo bilong katim skin. Pol i laik helpim ol long kliagut olsem em i longlong pasin long holimpas yet Lo na “kamap wokboi” bilong en bikos ol i “stap fri” pinis long rot bilong bilip long Krais.—Gal. 5:​1, 10-14.