Ol Umben Bilong Kisim Pis Long Taim Bilong Baibel

Ol man i ritim Baibel i save olsem sampela disaipel bilong Jisas em ol man bilong kisim pis. (Mak 1:​16-20) Ol i yusim ol umben long kisim pis long Raunwara Galili.

Bilong wokim ol umben, ol man i wokim ol rop o tret long bun bilong fleks em ol i pasim o taitim wantaim. Bilong kisim ol liklik pis, ol i save wokim umben i gat ol liklik hul long en, na bilong kisim ol bikpela pis, ol i save wokim umben i gat ol bikpela hul long en. Ol liklik umben i gat led o ston long en we i hevi tru na i save sinkim umben i go daun insait long solwara bilong trapim ol pis. Na ol bikpela umben i gat ol led o ston long as bilong en na i gat ol flota long antap, na ol man i save pulim dispela umben long wara bilong trapim ol pis.

Ol umben bilong kisim pis i gat bikpela pe bilong en. Ol bikpela ston long as bilong solwara inap brukim ol umben, na tu, sapos ol man i kisim planti pis tru insait long umben, orait umben inap bruk. (Luk 5:6) Baibel i stori long Jems na Jon i “stretim umben bilong ol,” ating ol i yusim nidol na linen tret long mekim olsem. (Mat. 4:21) Ating ol man bilong kisim pis i save stretim ol umben bihain long ol i kisim pis. Luk i stori tu olsem ol man bilong kisim pis i “wasim ol umben bilong ol” bilong rausim ol pipia o graun malumalum long ol. (Luk 5:2) Na bihain, ol i save hangamapim ol umben bilong draim, long dispela rot umben i no ken sting na bagarap.—Ese. 47:10.

Jisas i singautim ol man em ol i save yusim ol umben long kamap “ol man bilong kisim ol manmeri.”