Yu Ting Ol Man Inap i Stap Laip Bihain Long Taim Ol i Dai?
INAP planti tausen yia pinis ol man i bin tingting planti long tupela askim: Bilong wanem yumi go lapun na bihain yumi dai? Bihain long yumi dai, yumi inap tingting na mekim sampela samting?
Planti man i bin tingting planti long namba wan askim, long wanem, maski ol saveman bilong nau i painim pinis planti marasin samting bilong helpim man, ol dispela saveman i no bin kisim save long bekim tru bilong dispela askim.
Namba 2 askim i bin kamapim planti kain kain bekim. Tasol planti bekim bilong dispela askim olsem yumi inap stap laip bihain long taim yumi dai o nogat, ol i bilong tupela kain lain tasol. Namba wan lain i bilip olsem yumi inap stap laip bihain long taim yumi dai, na namba tu lain i bilip olsem, taim yumi dai, tingting bilong yumi i pinis na yumi no inap mekim wanpela samting moa. Planti bilong namba tu lain ol i tok yumi bilong i stap liklik taim tasol na bai yumi dai na em tasol; ol i no gat tupela tingting long dispela samting. Na taim man i laik kamapim narapela tingting, planti ol i save tok: “Tasol i no gat wanpela man i bin kam bek bilong toksave long yumi, a?”
Tasol planti man i holim yet tupela tingting, na ol i tok, oltaim ol i redi long kisim wanem wanem tingting ol man i kamapim sapos ol inap bilip tru long en. Tasol sampela narapela i save tok, olsem tok pilai, “Yumi mas wet pastaim inap long taim yumi dai, na em nau, bai yumi save!”
Wanpela Askim Bilong Bipo Yet
Inap 3,500 yia i go pinis, Jop i kamapim wanpela askim olsem man inap i stap laip bihain long taim em i dai o nogat. Planti man i save long stori bilong dispela man Jop, em i bin karim bikpela pen na hevi. Askim bilong Jop i olsem: “Taim mipela i dai, mipela i save pinis olgeta, na ol arapela i no lukim mipela moa. Sampela taim ol raunwara na ol bikpela wara i save drai olgeta. Olsem tasol ol manmeri i save dai na i no save kirap bek. . . . [“Ol manmeri i dai pinis, ol inap stap laip gen?,” Baibel New International Version].”—Jop 14:10-14.
Tasol i no Jop wanpela tasol i laik save long laip bihain long taim man i dai, nogat. Buk Encyclopædia of Religion and Ethics, aninit long het-tok “Man i Dai Pinis i Stap Olsem Wanem,” i tok: “Ol man i laik save, taim ol i dai ol i stap olsem wanem, na dispela i winim planti narapela samting bilong laip bilong ol em ol i laik save long en. Ol asples long olgeta hap bilong graun ol i tok ol i save gut long ples bilong ol spirit—em i wanem kain ples na i luk olsem wanem, na ol daiman long en i stap olsem wanem—na dispela i kamapim klia olsem ol i wok long tingim tingim dispela samting. Ol man long olgeta hap bilong graun ol i pret tru long ol daiman, na dispela i makim olsem ol i holim wanpela tingting i bin kamap long bipo yet, olsem ol man i dai pinis, laip bilong ol i no pinis. Tru ol i save, dai i pinisim strong bilong man i dai pinis, tasol i gat sampela narapela strong i wok i stap, na ol dispela strong inap kamap ples klia long ol rot i narapela kain tru. Maski yumi no save ol man bilong pastaim i bilip olsem yumi gat wanpela spirit o tewel em inap lusim skin o nogat, i gat planti as na yumi ken save ol i bilip olsem, man i dai pinis em i stap laip yet.”
Ating yu bihainim wanpela bilong ol dispela tripela tingting yumi stori pinis long en: yu no save tru long wanem samting i painim man bihain long taim em i dai; o yu bilip olsem man i dai pinis em i stap laip yet; o yu bilip olsem yumi bilong i stap nau tasol na bai yumi dai na em tasol. Maski yu gat wanem kain tingting, mipela i laik bai yu tingim gut stori i kamap bihain long dispela. Taim yu kaunim, wok long painim ol tok bilong Baibel i kamapim as tru na yumi ken bilip olsem, bihain long taim man i dai, em inap i stap laip na i stap amamas tru, na dispela inap kamap olsem wanem, na long wanem hap, na long wanem taim.