Nupela Taim−Paradais i Kamap Bek!

MAN TUPELA MERI i nupela marit na tupela i gat gutpela ples bilong i stap long en−tupela i stap long bikpela hap graun i gat ol plaua, na diwai, na pisin, na animal i pulap long en. Tupela i stap long gutpela ples Paradais. Gutpela Papa bilong tupela i givim dispela ples long tupela! Olsem wanem? Tupela i stap amamas oltaim? Nogat. Bihain ol i raus long dispela gutpela ples ol i stap long en. Bilong wanem ol i raus long en?

Long wanem tupela i no pilim gutpela pasin Papa bilong ol i bin mekim long ol. Tupela i no tenkyu long Em. Na tupela i mekim pasin i moa nogut, winim dispela−tupela i sakim tok bilong Papa. Papa i bin tokim tupela ol i ken kaikai pikinini bilong olgeta diwai long dispela gaden na i gat wanpela diwai tasol ol i no ken kaikai pikinini bilong en. Papa i laik save, tupela bai i stap gut long lo bilong em o nogat. Tasol tupela i mekim pasin bikhet na tupela i kaikai pikinini bilong dispela diwai.−Jenesis 2:​15-17; 3:​6, 7.

Tupela i kisim bikpela strafe tru, tasol ating tupela i mekim liklik rong tasol? Nogat. Tingim dispela tok piksa: Papa bilong wanpela stua i putim wanpela man i stap bos bilong stua. Dispela man i gat ol pas i tok, em i gutpela man na em i no save stil samting, tasol papa bilong stua i laik save, tru em i gutpela man olsem o nogat. Olsem na papa bilong stua i givim ol ki long em, tasol em i tokim em, em i no ken mekim wok long ki bilong wanpela bokis insait long tebol. Em i tambuim em long opim dispela wanpela samting. Em i tok, sapos man hia i opim dispela bokis bai em i rausim em long wok. Papa bilong stua i go pinis na bihain dispela man i laik save, wanem samting i stap insait long dispela bokis. Olsem na em i holim ki na em i opim, tasol papa bilong stua i kam bek na lukim em i mekim olsem na em i rausim em long wok.

Paradais i Lus

Olsem wanem dispela tok piksa i makim dispela tupela nupela marit? Long wanem tupela i mekim samting Papa i tambuim tupela long mekim. Tupela i kaikai pikinini bilong dispela diwai na Papa bilong ol i rausim ol long dispela gutpela ples tupela i stap long en. Tupela hia, em Adam tupela Iv, tupela i lusim gutpela ples Paradais long Iden na tupela i stap ausait. Tupela i stap long ples bilong ol diwai i gat nil, na i gat ol gras nogut long en. Pastaim tupela i gutpela olgeta, tasol nau tupela i gat sin. Na tupela i no inap i stap oltaim; skin bilong ol i wok long i go lapun na bihain tupela i dai. Ol pikinini bilong tupela i kisim sin na i dai long rot bilong tupela.−Rom 5:⁠12.

Bihain bihain “Yawe i lukim pasin bilong ol man long olgeta hap i nogut tru.” Olsem na long taim bilong Noa, God i kamapim bikpela Tait Wara na em i pinisim olgeta samting nogut i stap long graun. Olsem wanem? I gat sampela man ol i abrusim bagarap? Etpela tasol i abrusim bagarap, em Noa wantaim tripela pikinini man bilong em na meri bilong fopela. Bilong redi long nupela taim i laik kamap, ol i bihainim tok bilong God na wokim draipela sip em inap long ol yet, na planti kain kain animal, na ol kaikai tu. (Jenesis 6:​5-7, 13-22) Dispela Tait Wara i pinisim gutpela ples Adam tupela Iv i stap long en long pastaim. Long dispela rot Paradais i lus−tasol i no lus inap oltaim!

Paradais i Kamap Bek

Planti handet yia bihain God i salim Pikinini bilong em i kam long graun bilong baim bek ol man long sin na i dai. Long dispela rot ol man i bilip long Krais Jisas ol inap kisim laip i stap oltaim. (Jon 3:16) Na Jisas i tok tu, bai ol inap kisim laip long Paradais. Taim ol i nilim Jisas long pos pen na em i laik i dai, em i tokim wanpela man nogut ol i bin nilim em long pos klostu, olsem: ‘Bai yu stap wantaim mi long Paradais.’−Luk 23:⁠43.

Pasin bilong dispela graun i mas pinis pastaim na bihain bai Paradais i kamap bek long graun. Jisas i tok profet long dispela samting taim ol disaipel i tokim em: “Wanem mak bai i kamap pastaim, na mipela i ken save, yu kam i stap na pasin bilong dispela graun i laik pinis?” Jisas i bekim tok long ol na em i tok, bai i gat ol bikpela pait, na bikpela hangre, na guria, na sik, na pasin bilong sakim lo bai i go bikpela, na bai i gat bikpela wok bilong autim tok bilong Kingdom long olgeta hap bilong graun. Ol dispela samting Jisas i kolim na ol narapela samting i olsem hap bilong dispela mak, ol i wok long kamap long yia 1914 na bihain long dispela taim. (Matyu 24:​3-14, NW ) Ol dispela samting i makim olsem pasin bilong dispela graun i laik pinis, na bai Paradais i kamap bek long graun.

Taim Jisas i mekim dispela tok profet, em i tok tu: “Yupela i ken kisim save long diwai fik. Taim han bilong en i gat nupela lip i kamap, yupela i save, taim bilong gutpela san i laik kamap nau. Olsem tasol, bihain yupela i lukim dispela olgeta samting i kamap, orait yupela i ken save, em i kam klostu pinis, na i stap long dua. Mi tok tru long yupela: Ol manmeri bilong dispela taim ol i no i dai pinis yet, na bai dispela olgeta samting i kamap.” (Matyu 24:​32-35) Sampela narapela tok profet bilong Baibel tu i makim olsem i no longtaim na bai Paradais i kamap bek long graun. Nupela taim i klostu pinis. Wanem kain pasin bai stap long dispela nupela taim bihain?

Nupela Taim−Narapela Kain Tru!

Kingdom bilong God bai senisim olgeta gavman nau ol i stap. (Danyel 2:44) Long Nupela Taim bai Krais Jisas i bosim Kingdom na mekim stretpela pasin long olgeta man, na bai ol i stap bel isi oltaim. Krais Jisas em i “King Bilong Gutaim.” (Aisaia 9:​6, 7, NW ) Bai em i pinisim olgeta man i mekim pasin nogut na ol man i sakim lo na nau ol i save bosim ol narapela man, na bai ol “gutpela stretpela man” tasol i stap long graun, em ol i laikim tumas pasin bilong i stap wanbel wantaim. (Provep 2:​21, 22; Revelesen 19:​11-21; 16:​14-16) Tru tumas ol man i abrusim bagarap em ol man i gat pasin daun na ol i laikim tumas pasin bilong i stap wanbel wantaim. Gutpela taim tru bai kamap!

Long nupela taim bai ol man i no ken tingting nogut long man bilong narapela skin samting. Long nau bikpela lain manmeri i bung pinis, em ol i lusim pinis ol kain pasin birua olsem. Dispela lain ol i husat? Em ol Witnes Bilong Jehova. Olsem wanem na ol i narapela kain? Long wanem ol i save lainim gut ol tok bilong Baibel, na ol i save bihainim ol dispela tok, na narapela i laikim tru narapela. (Jon 13:​34, 35; Aposel 10:​34, 35) Nau lain Witnes i go bikpela na i gat sampela milion ol i stap long olgeta hap bilong graun, tasol Baibel i tok, bihain bai i gat “planti tumas manmeri ol i bung i stap,” olsem lain bilong Jehova long graun, “na i no inap man i kaunim namba bilong ol. Dispela ol manmeri ol i bilong olgeta lain man, na bilong olgeta graun, na bilong olgeta kain skin, na bilong olgeta tok ples.”−Revelesen 7:⁠9.

Bai pait i no bagarapim moa ol man. Bai ol man i no tromoi bikpela bikpela mani moa long baim ol bom nogut bilong nuklia, na ol narapela samting bilong pait, na long ami. Bai ol man i no kirapim pait moa bilong daunim olpela gavman na kamapim nupela gavman; na bai ol man bilong wanpela skin o tok ples ol i no ken pait wantaim ol man bilong narapela skin o tok ples; olgeta narapela pasin tu bilong pait na bagarapim man bai pinis. (Aisaia 2:⁠4) Ol i no ken lainim ol man moa long mekim pait na putim ol long ami. Long wanem bai i no gat wok moa long ol ami. Taim God i mekim i dai pait long olgeta hap bilong graun, bai gutpela taim tru i kamap!−Sam 46:​8, 9.

Gutaim tru bai kamap. Man bilong raitim sam i tok: “I no longtaim na bai ol man nogut i lus olgeta. . . . Tasol ol manmeri i daunim nem bilong ol yet bai ol i stap gut long graun. Bai ol i sindaun gutpela tumas na amamas i stap.”−Sam 37:​10, 11.

Bai i no gat hangre moa; bai i gat planti kaikai. Long planti hap bilong graun ol man i stap rabis ol i hatwok long wokim gaden, long wanem i gat ol kain gras nogut i save kamap, na graun i no gat gris bilong en, na ol ples wesan nating i wok long i go bikpela bikpela, na i gat bikpela san tasol i kukim graun na i no gat ren, na ol bikpela lain grasop i pinisim ol kaikai long ol gaden. Tasol long nupela taim bihain, olgeta dispela hevi bai pinis. (Aisaia 35:​1, 6, 7) Na wanem samting bai kamap? Bai planti kaikai i kamap long ol gaden! (Sam 72:16) Jehova bai stretim ol samting na bai kaikai na wara bilong dring i no sot moa; bai Jehova i wokim “bikpela kaikai bilong olgeta man.”−Aisaia 25:​6, NW.

Bai olgeta man i lukim gutpela samting i kamap long wok bilong ol. Bai ol i amamas long wokim ol haus, na planim ol diwai i karim kaikai, na lukautim ol gaden! Na bai yu inap sindaun long ples kol aninit long diwai fik bilong yu yet na kaikai pikinini bilong en i swit moa! Em gutpela tru, a?−Maika 4:⁠4.

Bai olgeta man i gat gutpela haus. Long nau planti milion man i stap long ol haus nogut long ol setelmen samting. Ol i no gat gutpela sindaun! Long Afrika planti milion blakskin i lusim ol liklik ples long bus na ol i go sindaun long ol biktaun, tasol ol i no gat gutpela haus. Ol i stap long ol liklik haus ol man i wokim long graun malumalum na i gat rup kapa, na i no gat wara o toilet samting, na ol man i pas pas insait long ol dispela haus. Tasol long nupela taim bihain bai ol man i wokim ol gutpela haus na bai ol i sindaun long ol dispela haus.−Aisaia 65:​21, 22.

Bai ol man i no gat sik moa; olgeta kain sik na ol sik i save kilim i dai ol man, olsem sik AIDS, bai pinis. Spirit holi i kirapim profet long tok olsem: “Bai i no gat wanpela man i tok; ‘Mi gat sik.’ ” Na long dispela nupela taim i laik kamap nau, “bai ai bilong ol aipas i op, na bai yau bilong ol yaupas i op. Long dispela taim bai ol lek nogut i wokabaut i go antap olsem dia i save mekim, na maus bilong ol mauspas bai singaut na amamas.”−Aisaia 33:​24, NW; 35:​5, 6, NW.

I dai na krai na pasin bilong planim man bai pinis. (Revelesen 21:⁠4) Tasol olsem wanem long ol planti milion milion manmeri ol i dai pinis? Taim Jisas i stap long graun, em i kirapim bek sampela man i dai pinis. Wanpela taim em i go long taun Nen na em i bungim sampela man ol i go bilong planim wanpela yangpela man i dai pinis. Jisas i mekim sampela tok bilong mekim isi bel bilong mama bilong dispela yangpela man, em man bilong em tu i dai pinis, na bihain Jisas i tok: “Yangpela man, mi tokim yu, yu kirap.” Na yangpela man i kirap bek! (Luk 7:​11-17) Na narapela taim Jisas i mekim tok promis, olsem: “Taim i laik kamap na olgeta man i stap long matmat bai ol i . . . lusim matmat na i kam ausait.” (Jon 5:​28, 29) God i bin wokim ol planti milion milion sta na ol narapela samting i stap long antap na em i save “kolim nem bilong olgeta.” Olsem na i no hatwok long em i tingim ol planti milion milion manmeri i dai pinis na kirapim bek ol.−Aisaia 40:​26, NW.

Bai Yu Stap long Dispela Gutpela Taim?

Laik bilong God Jehova long pastaim em i laik bai ol man i no ken i dai, tasol ol i ken amamas oltaim long ol gutpela gutpela samting em i bin wokim na givim long ol. Olsem na long nupela taim bai i gat planti gutpela samting, olsem blesing. Bai ol famili i pas gut wantaim na i stap amamas! Na bai ol pikinini inap pilai wantaim ol animal nau ol i save birua long man, na bai ol pikinini i no bagarap. (Aisaia 11:​6-9) Bai olgeta man i stap bel isi, na bai ol i gat gutpela haus, na gutpela wok, na planti kaikai. Bai ol inap i stap oltaim long gutpela ples paradais long graun. Yu tingim ol dispela gutpela samting bai kamap?

Olsem wanem? Bai yu stap long dispela gutpela taim? Sapos nau yu wok long kisim stretpela save long ol tok bilong God long Baibel na yu bihainim ol dispela tok, bai yu inap i stap long dispela gutpela taim bihain. Ol Witnes Bilong Jehova i redi i stap bilong helpim yu bambai yu ken bilip tru long ol samting God i laik mekim, em ol dispela samting i no inap lus nating. Yu ken bilip tru olsem klostu nau bai Paradais i kamap bek long graun. Tru tumas, nupela taim i klostu pinis!