Insait Bilong Ol Tok i Kam long Olgeta Hap
Bai Jisas Inap Luksave Long En?
Edita bilong hap bilong lotu long wanpela nius bilong Kanada (Toronto Star), nem bilong em Tom Harpur, em i tok: “Mi bilip tru olsem: Lotu Kristen i mas ‘kamap nupela gen’ bambai em i no ken bagarap long bihain.” Bipo dispela man em i wanpela pris long Misin Katolik na em i tok moa olsem: “Inap planti handet yia ol i bin skruim planti samting long lotu Kristen na ol i mas senisim tru ol dispela samting o rausim olgeta.”
Em i askim olsem: ‘Dispela lotu bilong nau i tok em i lotu bilong Krais, yu ting bai Krais inap luksave long en?’ Na em i tok: ‘Yu ting Jisas i wanbel wantaim ol hetman bilong lotu long nau, em ol i save pasim ol narapela kain klos bilong lotu na mekim ol bilaspasin bilong lotu? Yu ting em i wanbel wantaim ol evanselis yumi save lukim long televisen, em ol i man bilong tok gris? Sapos em i go long wanpela haus lotu bilong Anglikan long nau o long wanpela haus lotu Katolik o long narapela haus lotu bilong ol man, yu ting bai em i amamas long ol samting ol i mekim bilong lotu?’
Sapos ol dispela lotu i bin bihainim tok bilong Baibel i tok, “yupela i mas skelim olgeta samting na holimpas gutpela samting,” bai i no gat askim olsem.—1 Tesalonaika 5:21.
Maski i Tambu, Ol i Wok Yet
Long sampela hap bilong Afrika ol i tambuim ol “dokta bilong ples long mekim wok. Tasol planti planti man, taim ol i gat sik, ol i no i go lukim dokta long haus sik, ol i go lukim wanpela “dokta bilong ples.” Long wanpela hap bilong Afrika ol i tambuim ol “dokta bilong ples,” ol dispela kain “dokta” i mekim bikpela wok tru. Sampela man i tok, ol man bilong pilai soka, ol i save singautim dispela kain man, olsem man bilong papait na posin, na em i mas kolim ol samting nogut bilong bagarapim tim ol i laik pilai soka wantaim ol. Em i mas mekim dispela samting pastaim na bai ol i pilai. Sapos em i no mekim, ol i no ken pilai. Tupela dokta long Jemani i go long dispela hap na ol i lukim wanpela “dokta bilong ples i katim wanpela manki bilong stretim sik i kamap insait long het bilong em. Dispela “dokta bilong ples” i no givim sampela marasin long manki bilong mekim em i slip. Nogat.
Dispela manki i pilim bikpela pen long het, long wanem wanpela man i bin paitim het bilong em. Faipela man i holimpas em na dispela “dokta bilong ples” i holim samting i sap na inap 5-pela aua em i wokim wokim hul i go insait long het bilong dispela manki. Bihain em i kapsaitim wel long dispela hul em i wokim long het bilong manki na pasim banis. Manki i kirap na wokabaut i go long haus. Dispela tupela dokta bilong Jemani i kirap nogut tru.
Tasol wanem as bilong strong bilong ol dispela “dokta bilong ples” na ol wailis bilong ol spirit? Baibel i tok klia, ol spirit nogut i as bilong strong bilong ol. Olsem na Baibel i tok yumi no ken “singautim” ol dispela kain man o meri bilong helpim yumi. God i “nolaik tru” long ol manmeri i mekim ol kain pasin olsem.—Diuteronomi 18:9-12, NW.
Em i No Kilim i Dai Man?
Nius (New York Post) i tok: “Man i sutim meri long naip, em dispela meri i gat 29 krismas na em i gat bel, na dispela man i kilim i dai pikinini i stap long bel bilong dispela meri, taim polis i holim em bai em i no gat kot long kilim man i dai.” Bilong wanem? Long wanem lo bilong dispela hap i tok, sapos pikinini i no winim yet 6-pela mun long bel bilong mama, maski han lek samting bilong pikinini i kamap pinis, tasol man i bagarapim dispela pikinini em i no gat rong long kilim man i dai. Olsem na dispela man bai kot tasol long bagarapim meri na sutim em long naip.
Ol lo bilong man i no wankain liklik long lo bilong God! Baibel i tok, man i paitim meri i gat bel na pikinini i stap long bel em i “bagarap,” orait ol i mas kilim i dai dispela man. ‘Laip i bekim bilong laip.’ Liklik taim na bai i gat stretpela kot, taim ol man i bihainim laik bilong God long graun, na bai ol man i tingim gut laip bilong olgeta man.—Eksodas 21:22, 23; Matyu 6:10.