Wanpela Niusman i Amamas Long Kirap!

Tok i kamap daunbilo em i bin kamap long nius High Country News bilong Oktoba 13, 1997, em ol i wokim long Paonia, Kolorado, Yunaitet Stets.

“Lain Greenpeace [wanpela lain bilong lukautim graun samting] i no save go moa long ol haus na toktok wantaim ol man, tasol i gat narapela lain i wok yet long toktok wantaim ol man na planti taim ol i stori long graun na ol samting i stap long en. Dispela lain i save tilim planti milion nius (19 milion bilong wan wan nius) long samting olsem 60 tok ples [em 81 tok ples] na tok Pisin, tok Hiligeynon na tok Sulu, em sampela bilong ol dispela tok ples. Nius bilong Julai 8 [1997] (tok Inglis) i gat askim long karamap olsem: ‘Who Will Save Our Animals?’ Wanpela stori i toktok long planti animal samting i wok long pinis (3-pela long olgeta wanpela wanpela aua), na ol binatang samting bilong helpim graun i wok long bagarap, na ol man i wok long bagarapim ol samting bilong graun . . . Nius bilong Ogas 22, 1997, (tok Inglis) i stori long ‘The Water Crisis: A Global Problem,’ na ol hevi i kamap, long wanem, planti man tumas i wok long kamap long graun, na win na wara na graun i bagarap, planti kantri i laik bosim ol wara na tok kros i kamap long dispela . . . Tru, tingting bilong saiens i as bilong ol dispela stori, tasol long pinis bilong planti stori ol i no tok long pasin bilong mekim sampela samting bilong lukautim win na wara na graun. Ol i tok, sapos yu laik insait long wok bilong stretim bek graun, ‘Orait, yu mas stadi long Baibel na lain long ol samting God i laik yu mas mekim.’

“Dispela lain em Ol Witnes Bilong Jehova, na dispela nius em Kirap! Sapos ol i no kam long haus bilong yu, yu ken raitim pas long Watchtower Bible and Tract Society of New York Inc., 25 Columbia Heights, Brooklyn, NY 11201-​2483.”

Tok bilong dispela niusman i stret tru, mipela i laik skruim wanpela tok tasol long en, em “o salim pas long atres klostu long hap bilong yu i stap long pes 5 bilong Kirap!”